Apocalipsis
17 Canchis tazoncunata charicuj canchis angelcunamanta shuj ángel shamushpami ñucataca cashna nirca: “Shamui, achca yacucuna jahuapi tiyacuj, achca poderta charij huainayaj huarmi llaquichishca canatami ricuchisha. 2 Paihuanmi allpa pachapi mandajcunaca huainayarcacuna.* Shinallataj allpa pachapi causajcunaca paipaj vinohuanmi macharcacuna. Chai vinoca pai yallitaj huainayashcatami* ricuchin” nircami.
3 Chai angelca Diospaj espirituhuanmi ñucataca chaquishca pambaman pusharca. Chaipica pucanicuj manchanai millai animalpaj jahuapi shuj huarmi tiyacujtami ricurcani. Chai animalca canchis umacunayuj, chunga gachucunayuj, Diosta cꞌamij shuticunahuanpish jundami carca. 4 Chai huarmica morado, pucanicuj churanata churarishcami carca. Shinallataj orohuan rurashca adornocunahuan, sumaj rumicunahuan, perlacunahuan allichirishcami carca. Paipaj maquipica oro copatami millai ruraicunahuan, pai huainayashca* mapa ruraicunahuan jundata charicurca. 5 Paipaj frentepica mana yachaipaj shuj shutitami quillcashca carca. Chai shutica: “Babilonia Jatun llajta, huainayaj huarmicunapaj, allpa pachapi tiyaj millai ruraicunapaj mamami” ninmi. 6 Chai huarmitaca jucha illajcunapaj, Jesuspaj testigocunapaj yahuarhuan machashca cashcatami ricurcani.
Chaita ricushpami achcata mancharircani. 7 Chaimi angelca ñucataca cashna nirca: “¿Imamantataj mancharingui? Ñucami chai huarmimantapish, pai tiyacushca canchis umacunayuj, chunga gachucunayuj manchanai millai animalmantapish mana yachashcataca huillasha. 8 Can ricushca manchanai millai animalca callaripica tiyarcami. Qꞌuipaca chingarircami. Shinapish ñallami jatun jutcumanta llujshinga. Paica tucuchishcami canga. Allpapi causaj gentecunaca callaripi tiyaj, qꞌuipaman chingarij, cutinllataj ricurij manchanai millai animalta ricushpami mancharingacuna. Paicunapaj shuticunaca cai pacha tiyai callarishcamantami causaita chasquinapaj rollopica mana quillcashca cashca.
9 Caita intindingapajca alli yuyaiyuj canami minishtirin.* Canchis umacunaca canchis urcucunatami ricuchin. Chai urcucuna jahuapimi chai huarmica tiyarin. 10 Cutin chai urcucunaca canchis mandajcunatami ricuchin: pichca mandajcunaca ñami urmashca. Shuj mandajca cunanmi mandacun. Caishuj mandajca manaraj shamushcachu. Shinapish pai shamushpaca asha tiempollatami mandanga. 11 Callaripi tiyaj, qꞌuipaman chingarij manchanai millai animalpish pusaj mandajmi. Paica canchis mandajcunamantami llujshin. Paipish tucuchishcami canga.
12 Can ricushca chunga gachucunaca chunga mandajcunatami ricuchin. Paicunaca manaraj mandancunachu. Shinapish manchanai millai animalhuan tandalla shuj horata mandangapajmi autoridadta chasquingacuna. 13 Paicunaca shuj yuyaillatami charincuna. Chaimantami paicunapaj podertapish, autoridadtapish manchanai millai animalman entregancuna. 14 Paicunaca Malta Ovejahuanmi macanacungacuna. Shinapish Malta Ovejaca amocunapaj Amo, mandajcunapaj Jatun Mandaj cashcamantami paicunataca mishanga. Malta Ovejahuan cajcunapishmi mishanga. Chaicunaca Dios cayashcacuna, Dios agllashcacuna, Diosta tucui shunguhuan sirvijcunami” nircami.
15 Paica cashnami nirca: “Huainayaj huarmi tiyacuj can ricushca yacucunaca pueblocunata, achca gentecunata, llajtacunata, rimaicunatami ricuchin. 16 Can ricushca chunga gachucunapish, manchanai millai animalpish huainayaj huarmita pꞌiñashpami pai tucui imalla charishcacunata quichungacuna. Shinallataj lluchullatami saquingacuna. Paipaj aichataca micungacunami, paitapish ninapimi tucui rupachingacuna. 17 Diosca paipaj munaita rurachunmi paicunapaj shungupica shuj yuyaita churashca. Tucuicunami shuj yuyaillata charincuna. Paicunaca Dios huillashca shimicuna pajtaringacamami manchanai millai animal mandachun paicunapaj autoridadta paiman entregancuna. 18 Cutin can ricushca huarmica allpa pachapi mandajcunata mandaj jatun llajtatami ricuchin” nircami.