2 Tesalonicenses
3 Shinaca huauquicuna, Jehová* Diospaj shimita tucui ladopi utca huillashpa catingapaj, cancuna alli chasquishca shinallataj shujtajcunapish alli chasquichun ñucanchijmanta Diosta mañashpa catipaichij. 2 Yallitaj millai gentecunamantapish ñucanchijta cuidachun Diosta mañaichij. Mana tucui gentecunachu feta charincuna. 3 Amitoca pajtachijmi can. Paimi cancunataca sinchiyachinga, Diablomantapish* cuidanga. 4 Shinallataj Amitota sirvijcuna cashcamantami cancunapi confianchij. Ñucanchij mandashcata cancuna cazucujta, cazushpa catinatapishmi yachanchij. 5 Diosta cꞌuyangapaj, Cristomanta ahuantangapajpish ñucanchij Amito cancunata ayudachun.
6 Cunanca huauquicuna mana cazuj huauquicunamanta, cancunaman ñucanchij imata nishcata* mana catij huauquicunamanta caruyachunmi Amito Jesucristopaj shutipi mandanchij. 7 Cancunaca ñucanchijta ima shina catinatami yachanguichij. Ñucanchijca cancunahuan cashpaca mana paicuna shinachu carcanchij. Ashtahuanpish tucuipi cazujmi carcanchij. 8 Micunatapish ni maijanpajta mana gratis micurcanchijchu. Ashtahuancarin tutapish, punllapish mana samarishpami sinchita trabajarcanchij. Chaimi ñucanchijta ayudangapaj cancunamanta maijanpish imata mana pagana carcanguichij. 9 Cancuna ñucanchijta ayudachunmi derechota charinchij. Shinapish ñucanchijta catichunmi ejemplota cushun nircanchij. 10 Cancunahuan cashpaca: “Maijanpish mana trabajasha nijca ama micuchun” nishpami mandaj carcanchij. 11 Cancunamanta maijancunaca mana cazushpami puricun nijtami uyashcanchij. Paicunaca mana trabajashpami shujtajcunapaj causaipi satirishpa* purincuna. 12 Chai gentecunataca tranquilo trabajachun, paicuna ganashcahuan micuchun nishpami Amito Jesucristopaj shutipi rogarishpa mandanchij.
13 Shinapish huauquicuna, allita ruranataca ama saquichijchu. 14 Maijanpish cai cartapi ñucanchij ima nishcata mana cazujpica paitaca señalanami canguichij. Paihuan apanacunatapish saquinami canguichij. Chashnami paica pingai tucunga. 15 Shinapish paitaca shuj enemigota shinaca ama ricuichijchu. Ashtahuanpish shuj huauquita shina aconsejashpa catichij.
16 Sumaj causaita cuj Amito Jesús cancunamanca punllanta tucuipi sumaj causaita cuchun. Amito Jesús tucui cancunahuan cachun.
17 Ñucaca Pablomi cani. Cai saludotaca cancunapajmi ñuca propio maquihuan quillcani. Ñuca quillcashca cashcata yachachunmi ñuca cartacunapica siempre chashna quillcani.
18 Amito Jesucristoca yallitaj llaquij cashcata tucui cancunaman ricuchichun.