Lucas

23 Chai qꞌuipami tucui gentecuna jatarishpaca Pilatopajman Jesustaca pusharcacuna. 2 Chaipimi paicunaca cashna nishpa juchachircacuna: “Cai runataca ñucanchij llajta gentecunata jatarichishpa bullata rurachishpa, Cesarmanpish impuestota mana paganachu canguichij nishpa, mandaj Cristomi cani nishpa puricujtami japircanchij” nircacunami. 3 Chaimi Pilatoca: “¿Canchu judiocunata jatun mandaj cangui?” nishpa Jesusta tapurca. Shina tapujpimi paica: “Ari, canllatajmari chaita nicungui” nirca. 4 Chai qꞌuipami Pilatoca sacerdotecunata mandajcunatapish, chaipi caj gentecunatapish: “Cai runapica ima mana allita rurashcataca mana japinichu” nirca. 5 Chashna nijpipish paicunaca ashtahuanmi: “Cai runaca tucui Judeapi, Galileamanta callarishpa caicamami, gentecunata jatarichishpa bullata rurachicun” nircacuna. 6 Chaita uyashpami Pilatoca: “¿Cai runaca Galileamantachu?” nishpa tapurca. 7 Herodes* mandacushca ladomanta Jesús cashcatami Pilatoca yachaj chayarca. Chai qꞌuipami Jesustaca Herodespajman cacharca. Chai punllacunapica Herodespishmi Jerusalenpi carca.

8 Herodesca Jesusta ricushpaca achcatami cushicurca. Jesusmanta parlashcata uyashpami achca tiempo huashamanta Jesusta ricunata munacurca. Shinallataj paipaj ñaupajpi shuj milagrota rurachunmi shuyacurca. 9 Chaimi Jesustaca achca tapuicunata rurai callarirca. Shina tapujpipish paica imata mana cutichircachu. 10 Shinapish sacerdotecunata mandajcunapish, mandashcacunata quillcajcunapish shayarishpami yallitaj pꞌiñarishpa Jesustaca juchachircacuna. 11 Chai qꞌuipami Herodesca paipaj soldadocunandij tucushpa Jesustaca mana ricunayachishpa maipishcachun tratarcacuna. Shinallataj sumaj churanata churachishpami paimantaca burlarirca. Chashna rurashca huashaca Jesustaca Pilatopajmanmi tigrachishpa cacharca. 12 Chai punllami Herodespish, Pilatopish amigocuna tucurca. Ñaupamanca mana apanacujcunachu carca.

13 Chai qꞌuipami Pilatoca sacerdotecunata mandajcunatapish, autoridadcunatapish, tucui gentecunatapish tandachishpaca 14 cashna nirca: “Cai runataca gentecunata jatarichishpa bullata rurachicun nishpami ñucapajman pushamurcanguichij. Cancunapaj ñaupajllapitajmi tapushcani. Shinapish cai runapica cancuna juchachishca shinaca ima mana allitaca mana japinichu. 15 Herodespish ima mana allitaca paipica mana japircachu. Chaimantami paitaca ñucanchijman tigrachishpa cacharca. Ricuichij, paita huañuchingapajca ima mana allitaca mana rurashcachu. 16 Chaimantami paitaca azotichishpa cacharigrini” nircami. 17 *—— 18 Shinapish tucui chaipi cajcunaca: “¡Cai runataca huañuchi,* Barrabastaca cachari!” nishpami caparircacuna. 19 (Barrabasca gobiernopaj contra gentecunata jatarichishcamanta, huañuchishcamantapishmi carcelpi carca). 20 Pilatoca Jesusta cacharichisha nishpami paicunata cutinllataj cayarca. 21 Chaipicarin paicunaca: “¡Paitaca huañuchi! ¡Paitaca huañuchi!”* nishpami caparircacuna. 22 Caihuanca quimsa cutinmi Pilatoca: “¿Imamantataj huañuchichun ninguichijyari? ¿Cai runaca ima mana allitataj rurashcari? Cai runata huañuchingapajca ima mana allitaca mana japishcanichu. Chaimantami azotichishca qꞌuipaca cacharigrini” nirca. 23 Chashna nijpimi paicunaca caspipi clavashpa huañuchichun cutin cutin caparishpa mañarcacuna. Paicuna chashna yallitaj caparijpimi 24 Pilatoca paicuna mañashcata rurashpa, 25 Barrabás runata cacharichirca. Chai runaca gobiernopaj contra jatarishcamanta, huañuchishcamantapishmi carcelpi carca. Cutin Jesustaca paicuna munashcata rurachunmi paicunaman entregarca.

26 Soldadocuna Jesusta pushacushpaca Cirene llajtamanta Simón shuti runatami japircacuna. Paica campomantami shamucurca. Chaipimi paitaca llaquichina caspita* apachishpa Jesusta catishpa richun mandarcacuna. 27 Achca gentecunami Jesusta catishpa ricurcacuna. Paicunapurapica achca huarmicunapishmi carca. Chai huarmicunaca yallitaj llaquirishpami pechopi huajtarishpa paimanta huacacurcacuna. 28 Jesusca chai huarmicunata ricushpaca cashnami nirca: “Jerusalenpi causaj huarmicunalla, ñucamantaca ama huacaichijchu. Ashtahuanpish cancunallamantataj, cancunapaj huahuacunamantapish huacaichij. 29 Ricuichij: ‘¡Huahuata mana chari tucuj huarmicunapish, mana huachaj huarmicunapish, huahuata mana chuchuchij huarmicunapish cushicuichij!’ nina punllacunaca chayamucunmi. 30 Chaipimi gentecunaca urcucunataca, ‘¡Ñucanchij jahuapi urmaichij!’ lomacunatapish, ‘¡Ñucanchijta tapaichij!’ ningacuna. 31 Yura verdijlla cajpiraj chashna rurajpica, ¿yura chaquirijpicarin imashi tucunga?” nircami.

32 Shinallataj ishqui shuhuacunatapishmi Jesushuan igual huañuchingapaj pushacurcacuna. 33 Uma Tullu nishcaman chayashpaca Jesustaca caspipimi clavarcacuna. Paipaj ladopica chai ishqui shuhuacunatapishmi shujtaca alli ladoman, caishujtaca lluqui ladoman churarcacuna. 34 Shinapish Jesusca: “Yayitu, paicunataca perdonahuailla. Paicunaca imata ruracushcataca mana yachancunachu” nishpa mañarca. Ashtahuanpish soldadocunaca Jesuspaj churanata japingapajmi sortearcacuna.* 35 Gentecunaca chaita ricushpami shayacurcacuna. Shinapish autoridadcunaca Jesusmanta burlarishpami: “Paica shujtajcunataca quishpichircamari. Dios agllashca Cristo cashpaca paillataj quishpirichunyari” nircacuna. 36 Soldadocunapishmi Jesusmanta burlarishpa jayaj vinota cungapaj cꞌuchuyarcacuna. 37 Chashna rurashpaca: “Judiocunata jatun mandaj cashpaca canllataj quishpiriyari” nircacunami. 38 Ashtahuanpish Jesuspaj uma jahuapica, shuj letreropi quillcashpami: “Caica judiocunata jatun mandajmi” nishpa churarcacuna.

39 Chaipi huarcushca shuhuacunamanta shujca mana allita nishpami Jesusta rimai callarishpaca: “¡Cristomi cani nircanguica, shinashpaca canllataj quishpiriyari. Ñucanchijtapish quishpichiyari!” nirca. 40 Chaita uyashpami caishuj shuhuaca cashna nishpa sinchita rimarca: “Cai runa shinallataj llaquita apacushpapish, ¿manachu ashallatapish Diostaca manchangui? 41 Ñucanchijca mana allita rurashcamantami cai llaquitaca apacunchij. Shinapish cai runaca ima mana allitaca mana rurashcachu” nirca. 42 Chashna nishca qꞌuipaca: “Jesús, can ña mandaj cashpaca* ñucata yuyaripangui” nircami. 43 Chashna nijpimi Jesusca: “Cunanmi canmanca cashna nini: ñucahuanmi Paraisopi* cangui” nirca.

44 Casi chaupi punlla cajpipish tucui chai llajtami* amsayarca. Casi las tres de la tardecamami chashna amsayarca. 45 Inti ña mana achijyachishcamantami chashna tucurca. Diospaj huasi ucupi tiyaj cortinapish* ishquipimi lliquirirca. 46 Shinallataj Jesusca sinchita caparishpami: “Yayitu, ñuca causaitaca* cambaj maquipimi mingani” nirca. Chashna nishca huashaca huañurcallami. 47 Chaita ricushpami 100 soldadocunata mandajca: “Cai runaca cashcata rurajmi cashca” nishpa Diosta jatunyachirca. 48 Achca gentecunami imalla tucujta ricungapaj tandanacushcacuna carca. Chaita ricushpaca yallitaj llaquirishpami pechopi huajtarishpa huasiman tigrarcacuna. 49 Shinallataj Jesusta tucui rijsijcunapish, Galileamanta catishpa shamuj huarmicunapishmi chaipi imalla tucucushcataca carullamanta ricushpa shayacurcacuna.

50 Chaipica mandaj juezcunapuramanta* José shuti runami tiyarca. Paica alli runa, cashcata rurajmi carca. 51 (Cai runaca Jesusta huañuchingapaj caishujcuna yuyarinacucujpica mana de acuerdochu carca). Joseca Judeapi saquirij Arimatea llajtamantami carca. Paipish Diospaj Gobiernotami shuyacurca. 52 Joseca Pilatopajman rishpami Jesuspaj cuerpota mañarca. 53 Paica Jesuspaj cuerpota uriyachishpaca linohuan rurashca alli telahuanmi pilluchirca. Chashna pilluchishpaca rumi quinripi rurashca pambana jutcupimi Jesustaca churarca. Chai jutcupica ni pita manaraj churashcachu carca. 54 Chai punllaca sábado punllapaj allichirina punllami* carca. Sábado punllaca ñallami callarigrirca. 55 Galileamanta Jesusta catishpa shamuj huarmicunapishmi chaimanca rircacuna. Ña chayashpaca pambana jutcupi Jesuspaj cuerpota ima shina churashcatami ricurcacuna. 56 Chai qꞌuipaca mishquijllata ashnacuj qꞌuihuacunata, mishquijllata ashnacuj aceitecunatami allichinaman tigrarcacuna. Shinapish mandashcapi nishca shinami sábado punllaca samarircacuna.