1 Timoteo
6 Sirvij runacunaca paicunapaj amocunataca tucui shunguhuan respetachun. Chashnami pipish Diospaj shutimanta, paipaj yachachishcacunamantapish mana allitaca mana nunca rimangacuna. 2 Jesusta catij amocunata sirvijcunaca huauquicunallami nishpa ama cꞌariyachun. Chaipaj randica paicunata alli sirvichun. Paicunaca Jesusta catij cꞌuyashca huauquicunapaj allipajmi sirvicuncuna.
Canca caicunamanta yachachishpa, aconsejashpa cati. 3 Maijan runapish ñucanchij Amito Jesucristopaj alli yachachishcacunahuan mana de acuerdo cashpa, paipaj yachachishcahuan Diosta tucui shunguhuan adoranata mana animashpa, ashtahuanpish panda yachachishcacunata yachachishpaca 4 jatun tucushca, imatapish mana intindij runami. Cai runaca rimashca shimicunallamantami pꞌiñanacuna, rimanacuna yuyailla huañurishpa purin. Caicunamantami gentecunaca envidianacuncuna, macanacuncuna, cꞌaminacuncuna, shujtajcuna mana alli cashcata yuyancuna. 5 Shinallataj millai yuyaita charij mana llullata ña mana intindij runacunaca mana tanto valij yuyaicunallamantami pꞌiñanacushpa catincuna. Paicunaca imata japinaraicullami Diostaca tucui shunguhuan adorasha nincuna. 6 Ciertomi, maijanpish Diosta tucui shunguhuan adorashpa, ima charishcallahuan cushilla cashpaca achca bendicioncunatami japinga. 7 Cai pachamanca imata mana apamurcanchijchu. Shinallataj imata mana apashunchu. 8 Chaimanta micunata, churanata charishpaca chaicunallahuan cushilla cashunchij.
9 Shinapish charijyasha nijcunaca tentacioncunapi, trampacunapi, achca yanga mana alli munaicunapimi urmancuna. Chaicunami paicunataca llaquiman, huañuiman apan. 10 Cullquita yallitaj munanaca tucui laya mana alli ruraicunatami callarichin. Chaimantami maijancunaca cullquita munashcamanta feta charinata saquishpa, achca llaquicunata charishcacuna.
11 Shinapish Diosta sirvij runa, canca caicunamanta caruyai. Chaipaj randica cashcata ruranata, Diosta tucui shunguhuan adoranata, feta charinata, cꞌuyanata, ahuantanata, manso shungu canata mashcai. 12 Dios yachachishcacunata difindingapajca alli macanacuipi macanacushpa catirai. Huiñai causaita japina yuyailla catirai. Chaita chasquichunmi Diosca canta agllarca. Cai huiñai causaimantami achca gentecunapaj ñaupajpi alli huillarcangui.
13 Tucuicunaman causaita cuj Diospaj ñaupajpi, Poncio Pilatoman alli huillaj Cristo Jesuspaj ñaupajpimi cantaca mandani. 14 Ñucanchij Amito Jesucristo paipaj poderta ricuchingacama cai mandashcacunata cazuchun, shinallataj pi mana juchachipaj tucuipi chuya cachunmi mandani. 15 Agllashca punllacunapimi pailla Mandaj, cushilla caj Amitoca paipaj poderta ricuchinga. Paica mandajcunapaj Jatun Mandajmi, amocunapaj Amomi. 16 Paillami mana huañui tucun. Pai causanapish yallitaj achijnicujmi. Chaimanca pi mana cꞌuchuyai tucunchu. Paitaca pi mana ricushcachu, ni pi mana ricui tucunchu. Pailla jatunyachishca cachun, paipaj poderpish huiñaipaj cachun. Chashna cachun.*
17 Cai pachapi* achcata charijcunataca ama jatun tucuchun, chingarijlla charinacunapi paicunapaj shunguta ama churachun, ashtahuanpish cushilla cangapaj tucuita cuj Diospi shunguta churachun mandai. 18 Shinallataj paicunataca allita rurachun, alli ruraicunahuan charijcuna cachun, cushicushpa cujcuna cachun, shungumanta shujtajcunaman convidanata yachachun mandai. 19 Chashna rurashpami Diosmanta shamuj charinacunata* japingacuna. Chai charinacunaca shamuj punllacunapaj alli cimientocuna shinami can. Chashnami alli causaita japina yuyailla catirangacuna.
20 Timoteo, canman mingashcataca alli cuidangui. Diospaj contra yanga rimashcacunata, yanga yachaicunamanta panda yuyaicunatapish ama uyangui. 21 Chai yachaicunamanta jatun tucushpami maijancunaca feta charinata saquishcacuna.
Diosca yallitaj llaquij cashcata cancunaman ricuchichun.