Romanos
7 Huauquicuna, cancunaca Leytaca rijsinguichijmi. Chaimantami cancunaman quillcacuni. Shuj runataca huañungacamallami Leyca shuj amo shina mandan, ¿chaitaca manachu yachanguichij? 2 Cazarashca huarmica leypi nishca shinami paipaj cusa causashcacamalla paihuan cazarashca can. Shinapish cusa huañujpica cusapaj leymantami cacharichishca saquirin. 3 Ashtahuanpish cusa causacujpiraj shujtaj cꞌarihuan cazarashpaca paica huainayanmi. Shinapish paipaj cusa huañujpica ña mana cusapaj leypi huatashcachu. Chaimantami shujtaj cꞌarihuan cazarashpaca mana huainayan.
4 Ñuca huauquicuna, cancunapish chashnallatajmi Moisesman cushca leyhuanca cazarashca shina carcanguichij. Shinapish Cristo huañushpami* paipajlla cachun cancunataca chai Leymanta cacharichirca. Huañushcacunapaj chaupimanta Cristo causarishcamantami ñucanchijca Diosta sirvi tucunchij. 5 Juchayuj cajpimi Leyca aichapaj* mana alli munaicuna ñucanchijta juchapi urmachij cashcata ricuchirca. Chai juchami ñucanchijtaca huañuiman apan. 6 Shinapish ñucanchijta Ley ña mana mandacushcamantami leymanta cacharichishca canchij. Cunanca mana Ley mandashcallamantachu Diostaca sirvicunchij. Ashtahuanpish espíritu santo yuyachijpimi Diosta sirvicunchij.
7 Shinaca ¿imatataj nishunyari? ¿Leyca juchachu can? ¡Mana chashnachu! Ley mana tiyashca cajpica jucha ima cashcataca mana yachaimanchu carcani. “Shujtajcunapajta ama munangui” nishpa Leypi mana mandashca cajpica, shujtajcunapajta munana ima cashcataca mana yachaimanchu carcani. 8 Chashna cajpipish juchaca mandashcahuan tucushpami shujtajcunapajta munana tucui laya yuyaicunata ñucapi rijchachirca. Ley mana tiyajpica juchaca huañushca shinami carca. 9 Leyta manaraj cazushpapish ñucaca causacurcanimi. Shinapish chai mandashca chayamujpimi juchaca causarirca, chaimi ñucaca huañurcani. 10 Chai mandashca causaiman apana cashpapish huañuiman ñucata apacushcatami yachaj chayarcani. 11 Juchaca chai mandashca tiyashcamantami ñucataca inquitashpa huañuiman aparca. 12 Shina cashpapish Leyca jucha illajmi. Mandashcapish jucha illajmi, cashcata rurajmi, allimi.
13 Shinaca ¿chai alli cashcachu ñucataca huañuchirca? ¡Mana chashnachu! Juchami ñucataca huañuchirca. Diospaj leyca allimi. Shinapish chai leymi jucha ñucata huañuchishcata intindichirca. Chashnami mandashcaca jucha mana alli cashcataca ricuchirca. 14 Diosmanta Ley shamushcataca yachanchijmi. Shinapish ñucaca aichallami cani, juchaman cꞌatushca shinapishmi cani. 15 Ñuca imamanta chashna rurashcataca mana intindinichu. Ñuca munashcataca mana ruranichu. Ashtahuanpish ñuca pꞌiñashcatami rurani. 16 Ley alli cashcataca ñucaca yachanimi. Chashna yachashpapish mana rurasha nishcacunatami rurani. 17 Shinaca mana ñucachu cai mana alli ruraicunataca rurani. Ashtahuanpish ñucapi caj juchami chai mana allicunata ruran. 18 Shuj runalla cashcataca yachanimi. Ima allipish ñucapica* mana tiyanchu. Ñucaca allita ruranata munashpapish chaitaca mana rurai tucunichu. 19 Allita ruranata munashcataca mana ruranichu. Ashtahuanpish mana munashca mana allicunatami rurani. 20 Shinaca mana munashcata rurashpaca mana ñucachu rurani. Ashtahuanpish ñucapi caj juchami chaicunataca ruran.
21 Chashna cajpimi chai ley ñucata mandacushcata cuentata cuni: allita ruranata munajpipish, mana allicunarajmi ñucapica tiyan. 22 Ñuca shungu ucupica Diospaj leytami cꞌuyani. 23 Shinapish ñuca aichapica* shujtaj ley tiyashcatami cuentata cuni. Chai leymi ñuca yuyaita mandaj leyhuan macanacucun. Chai leyca ñuca aichapi* caj juchami, chaimi ñucataca mandacun. 24 ¡Aij ñucalla, imachari tucusha! ¿Huañuiman apacuj cai cuerpomantaca pitaj quishpichingari? 25 ¡Ñucanchij Amito Jesucristomanta quishpichishcamantami Diosta pagui nini! Ñuca yuyaipica Diospaj leyta sirvijmi cani. Ashtahuanpish ñuca aichapica juchapaj leyta rurajmi cani.