Juan

6 Chai qꞌuipaca Jesusca Galilea mama cucha caishuj ladomanmi rirca. Chai mama cuchaca Tiberíades nishcapishmi can. 2 Milagrocunata ruracushpa ungushcacunata Jesús alliyachicujta ricushpami achca gentecunaca paita catishpa rircacuna. 3 Chaipimi Jesusca shuj urcu jahuaman huichiyashpa paita catijcunandij chaipi tiyarirca. 4 Judiocunapaj Pascua fiestami ña chayamucurca. 5 Jesusca huichilla ricushpaca achca gentecuna paipajman shamucujtami ricurca. Chaita ricushpami Felipetaca: “¿Cai gentecuna micuchunca maipitaj tandataca randishunyari?” nirca. 6 Chaitaca Felipe ima yuyashcata yachangapajllami chashna nirca. Jesusca paillataj imata rurana cashcataca ñami yacharca. 7 Felipeca: “200 denario* cullquihuan tandata randishpa, cada unoman asha asha cujpipish mana pajtangachu” nishpami cutichirca. 8 Chaimi Jesusta catijcunapuramanta Simón Pedropaj huauqui Andresca cashna nirca: 9 “Caipimi shuj huambraca pichca cebada tandata, ishqui uchilla pescadocunatapish charicun. ¿Chaillaca cai tucui gentecunapajca imataj pajtangari?” nircami.

10 Shina nijpimi Jesusca: “Gentecuna tiyarichun mandaichij” nirca. Chaipica achca qꞌuihuami tiyarca. Chai jahuapimi casi 5.000 cꞌaricuna tiyarirca. 11 Jesusca tandata japishpami Diosta pagui nirca. Chai qꞌuipami chaipi tiyacujcunaman curca. Uchilla pescadocunahuanpish chashnallatajmi rurarca. Chaipimi paicunaca huijsa pajtata micurcacuna. 12 Ña huijsa pajtata paicuna micushca qꞌuipami Jesusca paita catijcunataca: “Ama desperdiciarichun sobrashcacunata tandaichij” nirca. 13 Chashna nijpimi paicunaca chai pichca cebada tandamanta micujcuna sobrachishcataca, 12 canasta jundata tandarcacuna.

14 Gentecunaca Jesús chai milagrota rurajta ricushpami: “Paica cai pachaman shamuna cashca Profetamari” nircacuna. 15 Ashtahuanpish jatun mandajta rurangapaj paita japinaman shamucujta yachashpami Jesusca cutinllataj pailla urcuman rirca.

16 Ña tutayamucujpimi Jesusta catijcunaca mama cuchaman uriyarcacuna. 17 Chaimantaca shuj barcoman huichiyashpami Capernaúm llajtaman mama cuchata chꞌimbai callarircacuna. Ña tucui amsayajpipish Jesusca paicunapajmanca manaraj chayashcachu carca. 18 Sinchi huaira pꞌucujpimi mama cucha yacupish caiman chaiman cuyuri callarirca. 19 Ashtahuanpish paicunaca ñami casi pichca o sujta kilometrocunata* rishcacuna carca. Chaipimi mama cucha yacu jahuata purishpa Jesús barcoman cꞌuchuyacujta ricushpa mancharircacuna. 20 Ashtahuanpish Jesusca paicunataca: “Ñucami cani. Ama manchaichijchu” nircami. 21 Chashna nijpimi paicunaca cushicushpa Jesustaca barcoman huichiyachircacuna. Chaimantaca paicuna maiman ricushcamanmi rato chayarcacuna.

22 Cayandij punllaca mama cucha caishuj ladopi saquirijcunaca shuj barcollapish mana chaipi cashcatami ricurcacuna. Ñaupamanca shuj uchilla barcomi chaipi carca. Pero Jesusca paita catijcunahuanca chai barcomanca mana huichiyashcachu carca. Ashtahuanpish paicunallami chai barcopi rishcacuna carca. 23 Chai qꞌuipaca Jesús* maipimi Diosta pagui nishpa tandata gentecunaman carashca carca, chai cꞌuchullamanmi Tiberíades llajtamanta barcocuna chayarca. 24 Chaimi chai gentecunaca Jesustapish, paita catijcunatapish mana chaipi cajta ricushpa barcocunaman huichiyashpa Jesusta mashcanaman Capernaumman rircacuna.

25 Mama cucha caishuj ladopi Jesushuan tupashpaca: “Yachachij,* ¿caimanca ima horataj chayamurcanguiyari?” nircacunami. 26 Chashna nijpimi Jesusca: “Cancunamanca manataj llullanichu. Cancunaca milagrocunata ñuca rurajta ricushcamantaca mana mashcacunguichijchu. Ashtahuanpish tandata huijsa pajtata micushcallamantami ñucataca mashcacunguichij. 27 Chingarijlla micunamantaca ama trabajaichijchu. Ashtahuanpish huiñai causaiman apaj mana tucurij micunamanta trabajaichij. Chai micunataca Runapaj Churimi cancunamanca cunga. Jahua pacha Yaya Diosllatajmi chaita rurachunca paita agllashca”* nirca.

28 Chaimi paicunaca Jesustaca: “¿Dios rurai nishcata rurangapajca imatataj rurana canchij?” nishpa tapurcacuna. 29 Shina tapujpimi Jesusca: “Diosmi ñucataca cacharca. Chaimantami ñucapi crishcata ricuchichun munan. Chaitami Diosca rurachun nin” nishpa cutichirca. 30 Chaipimi paicunaca: “¿Ima milagrotataj ruragringuiyari chaita ricushpa canpi cringapajca? ¿Imatataj ruragringui? 31 Ñucanchij ñaupa yayacunaca chaquishca pambapimi Dios cushca maná* shuti tandata micurcacuna. Quillcachishcapica: ‘Paica jahua pachamanta tandatami cararca’ ninmi” nircacuna. 32 Chashna nijpimi Jesusca: “Cancunamanca manataj llullanichu. Jahua pachamanta tandataca Moisesca mana curcachu. Ashtahuanpish cunanmi ñuca Yayaca jahua pachamantataj caj tandataca cancunaman cun. 33 Dios cushca tandaca jahua pachamantami shamun. Cai tandami gentecunaman* causaita cun” nirca. 34 Chashna nijpimi paicunaca: “Amito, shinashpaca punllanta chai tandata ñucanchijman cuhuai” nircacuna.

35 Shina nijpimi Jesusca cashna nirca: “Causaita cuj tandaca ñucami cani. Ñucapajman shamujca mana ashtahuan yaricachingachu, ñucapi feta charishcata ricuchijpish mana ashtahuan yacunachingachu. 36 Shinapish ima shinami nircani, cancunaca ñucata ricushpapish mana cringuichijchu. 37 Yaya ñucaman tucui cushcacunaca ñucapajmanmi shamungacuna. Maijanpish ñucapajman shamujtaca manataj caruyachishachu. 38 Jahua pachamantaca mana ñuca munaita rurangapajchu shamurcani. Ashtahuanpish ñucata cachaj Yayapaj munaita rurangapajmi shamurcani. 39 Ñucata cachajca ñucaman cushcacunata shujllatapish ama chingachichun, ashtahuanpish tucuri punllapi tucuicunata causachichunmi munan. 40 Ñuca Yayapaj munaica caimi: maijanpish Churita chasquishpa, paipi feta charijca* huiñai causaita charichunmi munan. Ñucami tucuri punllapi paitaca causachisha” nircami.

41 Jesusca “Ñucaca jahua pachamanta shamushca tandami cani” nishcami carca. Chaimantami judiocunaca Jesusmanta huashalla rimai callarircacuna. 42 Chashna rimai callarishpami paicunaca: “¿Manachu paica Josepaj churi Jesús? ¿Manachu paipaj yayatapish mamatapish rijsinchij? ¿Ima nishpataj cunanca ‘Ñucaca jahua pachamantami shamurcani ninyari’?” nircacuna. 43 Chaita ricushpami Jesusca cashna nirca: “Cancunapura huashalla rimanata saquichij. 44 Ñucata cachaj Yaya mana pushamujpica ñucapajmanca ni pi mana shamui tucunchu. Paitaca ñucami tucuri punllapi causachisha. 45 Profetacuna quillcashcapica: ‘Tucui paicunatami Jehová* Diosca yachachinga’ ninmi. Maijanpish Yayata uyashpa, paimanta yachashpaca ñucapajmanmi shamun. 46 Yayataca ni pi mana ricushcachu. Ñucallami Yayataca ricushcani, ñucami paimanta* shamurcani. 47 Cancunamanca manataj llullanichu. Ñucapi crijca huiñai causaitami charinga.

48 Causaita cuj tandaca ñucami cani. 49 Cancunapaj ñaupa yayacunaca chaquishca pambapimi maná shuti tandata micurcacuna. Chaita micushpapish paicunaca huañurcacunami. 50 Cutin cai tandaca jahua pachamanta shamushcami. Maijanpish chai tandata micujca mana huañungachu. 51 Jahua pachamanta shamushca causaita cuj tandaca ñucami cani. Maijanpish cai tandamanta micushpaca huiñaitami causanga. Ñuca cugrishca tandaca ñuca aichami. Gentecuna* causachunmi ñuca aichataca cusha” nircami.

52 Chashna nijpimi judiocunaca: “¿Ima shinataj cai runaca paipaj aichata micuchun ñucanchijmanca cungari?” nishpa paicunapura rimanacucurcacuna. 53 Chaimi Jesusca: “Cancunamanca manataj llullanichu. Runapaj Churipaj aichata mana micushpa, paipaj yahuarta mana ubyashpaca causaitaca* mana charinguichijchu. 54 Ñuca aichamanta micujca, ñuca yahuarmanta ubyajca huiñai causaitami charinga. Paitami tucuri punllapica causachisha. 55 Ñuca aichaca shujtaj micunacunamanta ashtahuan alli micunami, ñuca yahuarpish shujtaj ubyanacunamanta ashtahuan alli ubyanami. 56 Ñuca aichata micujca, ñuca yahuarta ubyajca ñucahuan shuj shinallami. Ñucapish paihuanca shuj shinallami cani. 57 Causaj Yayamantami ñucaca causani. Paimi ñucataca cacharca. Chashnallatajmi ñuca aichamanta micujpish ñucamanta causanga. 58 Cai tandaca jahua pachamantami shamurca. Cancunapaj ñaupa yayacuna micushca tanda shinaca mana canchu. Paicunaca chai tandata micushpapish huañurcacunami. Ashtahuanpish cai tandamanta micujca huiñaitami causanga” nirca. 59 Capernaúm llajta sinagogapi* yachachicushpami Jesusca caicunataca nirca.

60 Chaita uyashpami Jesusta catijcunamanta achcacunaca: “¡Imatataj paica nicunchu, imamí! ¿Pai nishcataca pitaj uyasha ningari?” nircacuna. 61 Shinapish Jesusca paita catijcuna huashalla rimacushcata yachashpami cashna nirca: “¿Chashna nishcamantachu cancunaca mancharinguichij? 62 Runapaj Churi pai ñaupa maipi cashcaman cutin huichiyajta ricushpacarin, ¿imashi tucunguichijman? 63 Espiritumi causaita cun, aichaca imapajpish mana valinchu. Ñuca parlashca shimicunaca espíritu santomantami shamun. Chai parlashca shimicunami causaita cun. 64 Shinapish cancunapuramanta maijancunaca mana cringuichijchu” nircami. Jesusca callarimantami picunalla mana crishcata, contracunapaj maquipi paita pi entregana cashcatapish yacharca. 65 Jesusca caitapishmi nirca: “Chaimantami cancunamanca, Yaya mana pushamujpica ñucapajmanca pi mana shamui tucunchu nircani” nirca.

66 Chashna nishcamantami Jesusta catijcunamanta achcacunaca paita catinata saquishpa, paicunapaj ñaupa ruraicunaman tigrarcacuna. 67 Chaimi Jesusca 12 apostolcunataca: “¿Cancunapishchu ñucata saquishpa risha ninguichij?” nishpa tapurca. 68 Shina tapujpimi Simón Pedroca cashna nishpa cutichirca: “Amito, ¿ñucanchijca maimantaj rishunyari? Canmari huiñai causaita cuj shimicunataca yachachingui. 69 Ñucanchijca canca Dios cachashca jucha illaj cashcatamari yachanchij. Chaitami ñucanchijca crinchij” nirca. 70 Shina nijpimi Jesusca: “Ñucami cancunataca chunga ishquita agllarcani ¿nachu? Ashtahuanpish cancunamanta shujca diablo* shinamari” nirca. 71 Jesusca Simón Iscariotepaj churi Judasmantami parlacurca. Judasca 12 apostolcunamanta cashpapish contracunapaj maquipimi Jesusta entregagrirca.