Josué
1 Moisesca Jehová Diosta sirvijmi carca. Josueca* Moisesta ayudajmi carca. Moisés huañushca qꞌuipami Nunpaj churi Josuemanca Jehová Diosca cashna nirca: 2 “Ñucata sirvij Moisesca huañushcami. Cunanca canpish, tucui israelitacunapish Jordán jatun yacuta pasangapaj allichirichij. Israelitacunaman ñuca cugrishca allpaman yaicuichij. 3 Moisesman cusha nishca shinallatajmi cancunapaj chaqui maillapi sarushca lugartaca cancunaman cusha. 4 Cancunapaj allpacunataca chaquishca pambamantaca Líbano urcucunacamami mirachisha. Shinallataj cancunapaj allpaca Éufrates jatun yacucama,* inti huashicun ladoman caj Jatun mama cuchacamami* canga. (Hititacuna causan tucui allpacunami cancunapaj canga). 5 Canhuan macanacunaman shamujcunapish cantaca mana mishai tucungachu. Moiseshuan cashca shinallatajmi ñucaca canhuan casha. Cantaca manataj saquishachu, manataj shitashachu. 6 Chaimanta sinchi cai, ama manchaichu. Israelitacuna cai allpata japichunca canmi ayudangui. Cai allpacunataca ñucami paicunapaj ñaupa yayacunaman cusha nishpa jurarcani.
7 Tucuimanta yallica sinchi sinchi cai, ama manchaichu. Ñucata sirvij Moisés cushca Leytapish tucuita alli cazungui. Leymantaca alli ladomanpish, lluqui ladomanpish amataj anchuringui. Chashnami maiman rishpapish alli yuyashpa imatapish rurangui. 8 Cai Leyta quillcashca librotaca cambaj shimimantaca amataj anchuchingui. Cai librotaca tutapish, punllapish liyingui, liyishcapipish cutin cutin yuyangui.* Chashnami cai libropi tucui quillcashcacunataca alli cazungui. Cambaj causaipipish tucuimi alli llujshinga. Shinallataj imatapish tucuitami alli yuyarishpa rurangui. 9 ¿Manachu ñucallataj cantaca sinchi cai, ama manchaichu nishpa mandashcani? Shinaca ama manchaichu, ama chujchuichu. Ñucami cambaj Jehová Dios cani. Can maita rijpipish ñucaca canhuanmi casha” nircami.
10 Chaimi Josueca pueblopi pushajcunata cashna nishpa mandarca: 11 “Carpa huasicunaman rishpa gentecunataca: ‘Micunacunata allichichij, quimsa punllacunapimi Jordán jatun yacuta pasanguichij. Chashnami ñucanchij Jehová Dios cusha nishca allpaman yaicushpa chai allpata japinguichij’ nishpa mandagrichij” nircami.
12 Shinallataj rubenitacunamanpish, gaditacunamanpish, Manasespaj chaupi familiamanpish Josueca cashnami nirca: 13 “Jehová Diosta sirvij Moisés mandashcata yuyarichij. Ñucanchij Jehová Diosca cancuna sumajta causachunmi* cai allpata cushca. 14 Cancunapaj huarmicunapish, churicunapish, cancunapaj huagracunapish, ovejacunapish Jordán jatun yacu inti llujshin ladopimi Moisés cancunaman cushca allpapi causashpa saquiringacuna. Pero tucui cancunami cancunapaj huauquicunapaj ñaupajta rishpa macanacungapaj allichirishpa pasana canguichij. Cancunaca sinchi macanacujcunami canguichij. Cancunami paicunataca ayudana canguichij. 15 Jehová Dios sumaj causaita cancunaman cushca shinallataj cancunapaj huauquicunamanpish cungacamami chashna ayudana canguichij. Ñucanchij Jehová Dios paicunaman allpata japichun saquingacamami chashna ayudana canguichij. Chashna rurashpallami cancunaman cushca allpaman tigrashpa chaipi causanguichij. Chai allpataca Jehová Diosta sirvij Moisesmi Jordán jatun yacu inti llujshin ladopi cushca carca” nircami.
16 Chashna nijpimi paicunaca Josuemanca cashna nishpa cutichircacuna: “Tucui cai mandashcataca pajtachishunmi. Can maiman richun mandajpipish rishunllami. 17 Ñucanchijca Moisés tucui nishcacunatami uyarcanchij. Chashnallatajmi cantapish uyashun. Tucuimanta yallica ñucanchij Jehová Dios Moiseshuan cashca shinallataj canhuanpish cachun. 18 Maijan runapish cambaj mandashcacunata, cambaj nishcacunata mana cazushpa, mana uyashpaca huañunatajmi can. Chaimanta tucuimanta yallica sinchi cai, ama manchaichu” nircacunami.