Apocalipsis

19 Chai qꞌuipaca jahua pachamanta achcacuna sinchita rimacuj shinatami uyarcani. Paicunaca cashnami nicurcacuna: “¡Jah-⁠ta alabaichij!* Quishpichinapish, jatunyachishca canapish, poderyuj canapish ñucanchij Diospajmi. 2 Paica cashcata rurashpa allimi juzgan. Achca poderta charij huainayaj huarmitami llaquichishca. Chai huarmica huainayashpami* allpapi causaj gentecunataca pandachirca. Diosca paita sirvijcunapaj yahuarta chai huarmi paipaj maquihuan jichashcamantami paitapish tigra llaquichishca” nicurcacunami. 3 Chai ratomi cutinllataj paicunaca: “¡Jah-⁠ta alabaichij!* Babilonia llajtata rupachishca cushnica huiñai huiñaita llujshicungallami” nircacuna.

4 Chuscu querubincunapish, 24 ancianocunapish cungurishpami jatun tiyarinapi tiyacuj Diosta adorarcacuna. Paicunaca: “¡Chashna cachun!* ¡Jah-ta alabaichij!”* nircacunami.

5 Shinallataj jatun tiyarinamanta shuj rimashca uyarishpami: “Paita sirvijcunapish, paita manchajcunapish, uchillacunapish, jatuncunapish tucui cancuna ñucanchij Diosta alabaichij” nirca.

6 Shinallataj achca gentecuna rimacuj shinata, achca yacucuna huajiacuj shinata, achca cꞌulun nishcacuna uyarij shinatami uyarcani. Paicunaca cashnami nicurcacuna: “¡Jah-ta alabaichij!* ¡Tucui poderta charij ñucanchij Jehová* Diosca ñami mandai callarishca! 7 Jatunta cushicushunchij, paita jatunyachishunchij. Malta Ovejapaj bodaca ñami chayamushca, paipaj huarmipish ñami allichirishca. 8 Malta Ovejapaj huarmimanca achijnicuj, chuya, alli lino churanata churarichunmi cushca carca. Alli linoca jucha illajcunapaj alli ruraicunatami ricuchin” nicurcacunami.

9 Shinallataj angelca: “Caita quillcai: ‘Malta Ovejapaj jatun micui bodaman invitashcacunaca cushicuncunami’” nircami. Shinallataj paica: “Cai shimicunaca Diospaj mana llulla shimicunami” nircami. 10 Chashna nijpimi paita adorangapaj paipaj ñaupajpi cungurircani. Shinapish paica: “¿Imata ruracungui? ¡Ama chaita ruraichu! Ñucapish can shinallataj, Jesusmanta huillaj cambaj huauquicuna shinallataj shuj sirvijllami cani. ¡Diosllata adorai! Profeciacunaca Jesusmanta mana llullata huillangapajmi can” nircami.

11 Jahua pacha pascashcatami ricurcani. Chaipica shuj yuraj caballomi ricurirca. Chai caballopi tiyacujca Alli Pajtachij, Mana Llulla shutiyujmi. Paica cashcata rurashpami juzgan. Cashcata rurashpami macanacun. 12 Paipaj ñahuicunaca nina lunyacuj shinami can. Paipaj umapipish achca coronacunata* churarishcami can. Paipica shuj shutimi quillcashca can. Chai shutitaca pi mana yachanchu, paillami yachan. 13 Paica yahuaryashca* jahua churanata churarishcami. Paipaj shutica: Diospaj Shimi nishcami can. 14 Shinallataj jahua pachamanta soldadocunapish yuraj caballocunapimi caticurcacuna. Paicunaca yurajlla, chuya, alli linohuan churarishcacunami carcacuna. 15 Paipaj shimimantaca llajtacunata llaquichingapajmi suni filoyuj espada llujshin. Paica fierro varahuanmi gentecunataca michinga. Shinallataj jatun jutcupimi uvacunataca sarun. Chai jatun jutcuca Tucui poderta charij Dios yallitaj pꞌiñarishcatami ricuchin. 16 Paipaj jahua churana changa uripica mandajcunata Jatun Mandaj, amocunapaj Amo nishca shutita quillcashcami carca.

17 Shinallataj shuj ángel intipi shayacujtami ricurcani. Paica sinchita caparishpami jahuajta volaj tucui animalcunata cashna nirca: “¡Caiman shamuichij! Diospaj jatun micuiman tandanacuichij. 18 Mandajcunapaj, 1.000 soldadocunata mandajcunapaj, fuerzasapa runacunapaj, caballocunapaj, caballocunapi tiyarijcunapaj, cacharichishca runacunapaj, sirvij runacunapaj, uchillacunapaj, jatuncunapaj, tucuicunapaj aichata micuichij” nircami.

19 Manchanai millai animalpish, allpa pachapi mandajcunapish, paicunapaj soldadocunapish yuraj caballopi tiyacujhuan, paipaj soldadocunahuanpish macanacungapaj tandanacujtami ricurcani. 20 Caballopi tiyacujmi manchanai millai animaltapish, llulla profetatapish japirca. Chai llulla profetami manchanai millai animalpaj ñaupajpi milagrocunata rurashpa manchanai millai animalpaj señalta chasquijcunata, chai animalman rijchajta rurashca animalta adorajcunata pandachirca. Caballopi tiyacujca manchanai millai animaltapish, llulla profetatapish paicuna causacujpiraj japishpami azufrehuan rupacuj nina cuchapi shitarca. 21 Shinapish caishujcunataca caballopi tiyacujca paipaj shimimanta llujshij suni espadahuanmi huañuchirca. Chaimi jahuata volaj tucui animalcunaca paicunapaj aichata sajsajta micurcacuna.