1 Reyes
12 Rehoboamca Siquem llajtamanmi rirca. Tucui israelitacunami paitaca reyta rurangapaj Siquem llajtaman shamushcacuna carca. 2 Nebatpaj churi Jeroboanca chaitami yachaj chayarca (Jeroboanca Egipto llajtapirajmi causacurca. Paica rey Salomonmanta miticushpami Egipto llajtaman rishca carca). 3 Chaimi Jeroboanta mashcanaman cacharcacuna. Chai qꞌuipaca Jeroboanpish, tucui tandanacushca israelitacunapishmi Rehoboamta ricunaman rircacuna. Paicunaca: 4 “Cambaj yayaca ñucanchijmanca llashaj yugotami churarca. Pero can ñucanchijta mana yallitaj trabajachijpi, cambaj yaya churashca llashaj yugomanta ashallatapish aliviajpica ñucanchijca cantami sirvishun” nircacunami.
5 Chaimi Rehoboamca: “Richij, quimsa punllapi ñucata ricunaman tigramunguichij” nirca. Chashna nijpimi gentecunaca chaimanta rircacuna. 6 Rey Rehoboamca paipaj yaya Salomón causacujpiraj paipaj yayata sirvij israelitacunata pushajcunataca:* “¿Cai gentecunamanca imata cutichichuntaj aconsejanguichij?” nishpami tapurca. 7 Paicunaca: “Cunan cai gentecunata can sirvijpi, paicunata cazujpi, paicuna mañashcata alli cutichijpica paicunaca siempremi canta sirvijcuna canga” nircacunami.
8 Ashtahuanpish paica israelitacunata pushajcuna cushca consejota mana cazushpami paihuan huiñashca jovencunata tapurca. Chai jovencunaca cunanca paita ayudajcunami carca. 9 Paicunataca: “¿Imatataj aconsejanguichij? Cai gentecunaca: ‘Cambaj yaya churashca llashaj yugomanta ashallatapish aliviahuai’ nircacunami. ¿Paicunamanca imatataj cutichisha?” nishpami tapurca. 10 Paihuan huiñashca jovencunaca Rehoboamtaca cashnami nircacuna: “‘Cambaj yayaca ñucanchijmanca llashaj yugotami churarca. Cambaj yaya churashca llashaj yugomanta ashallatapish aliviahuai’ nij gentecunataca cashnami nina cangui: ‘Ñuca huahua dedoca ñuca yayapaj huasha caderatapish yalli racumi canga. 11 Ñuca yayaca llashaj yugotami cancunapica churarca. Ñucacarin ashtahuan llashaj yugotami churasha. Ñuca yayaca angucunahuanmi cancunataca castigarca. Ñucacarin puntasapa angucunahuanmi castigasha’ ninami cangui” nircacunami.
12 Jeroboanpish, paihuan caj tucui gentecunapish Rehoboamtaca ña quimsa punlla tucujpimi ricunaman rircacuna. Reyca paicunataca: “Quimsa punllapi ñucata ricunaman tigramunguichij” nishcami carca. 13 Pero reyca israelitacunata pushajcuna cushca consejota mana cazushpami gentecunataca sinchi shimicunahuan cutichirca. 14 Jovencuna cushca consejota catishpami paica: “Ñuca yayaca llashaj yugotami cancunapica churarca. Ñucacarin ashtahuan llashaj yugotami churasha. Ñuca yayaca angucunahuanmi cancunataca castigarca. Ñucacarin puntasapa angucunahuanmi castigasha” nirca. 15 Chashnami reyca gentecuna mañashcataca mana uyarca. Nebatpaj churi Jeroboanman Jehová Dios nishca shimicuna pajtarichunmi Jehová Diosca chashna tucuchun saquirca. Chaitaca Siló llajtamanta Ahíya runamanmi huillachishca carca.
16 Tucui israelitacunami rey paicunata mana uyasha nishcata cuentata curcacuna. Chaimantami tucuicuna reytaca: “Davidhuanca imata ricunata mana charinchijchu. Jesepaj churihuanca ima herenciata mana charinchijchu. Israelitacunalla, cancunapaj dioscunata adoranaman tigraichijlla. ¡Davidpaj huahua huahuacuna, cunanca cancunallataj cuidarichijlla!” nircacuna. Chashna nishca qꞌuipaca israelitacunaca paicunapaj huasiman tigrarcacunallami. 17 Pero Rehoboamca Judá llajtapi tiyaj llajtacunapi causaj israelitacunatami mandashpa catirca.
18 Chai qꞌuipaca rey Rehoboamca Adoram runatami paicunapajman cacharca. Adoramca sinchi trabajocunata rurachun tandachishca runacunata mandajmi carca. Pero paitaca tucui israelitacunami rumicunahuan huañuchirca. Rehoboamca Jerusalenman miticushpa ringapajmi paipaj carretaman huichiyarca. 19 Israelitacunaca Davidpaj huahua huahuacunataca cunan punllacunacamami mana cazushpa catincuna.
20 Jeroboán tigramushcata uyashpami tucui israelitacunaca tandanacuiman cayarcacuna. Chashna tandanacushpami Jeroboantaca tucui israelitacunata mandachun reyta rurarcacuna. Davidpaj huahua huahuacunataca shujllapish mana catircachu. Judapaj familiallami catirca.
21 Rehoboam Jerusalenman chayamushpaca chai ratomi Judapaj tucui familiamantapish, Benjaminpaj familiamantapish macanacunata alli yachaj 180.000 soldadocunata tandachirca. Paicunataca israelitacunahuan macanacushpa Salomonpaj churi Rehoboamman gobiernota tigrachingapajmi tandachirca. 22 Chai qꞌuipami profeta* Semayamanca Diosca cashna nirca: 23 “Judá llajtata mandaj Salomonpaj churi rey Rehoboamtapish, Judapaj familiamanta caj tucui gentecunatapish, Benjaminpaj familiatapish, caishuj gentecunatapish cashna ni: 24 ‘Jehová Diosca cancunataca: “Cancunapaj huauqui israelitacunahuan macanacungapajca ama huichiyaichijchu. Ñucami chashna tucuchunca saquircani. Chaimanta cada uno cancunapaj huasiman tigraichij” ninmi’ ningui” nircami. Chaimi paicunaca Jehová Dios ima nishcata cazushpa Jehová Dios nishca shinallataj paicunapaj huasiman tigrarcacuna.
25 Chaimantaca Jeroboanca Efraín urcucunapi saquirij Siquem llajtata cutin shayachishpami chaipi causai callarirca. Chai qꞌuipaca chaimanta llujshishpami Penuel llajtata cutin shayachirca. 26 Jeroboanca paipaj shungupica cashnami yuyarca: “Cunanca Davidpaj huahua huahuacunami tucui Israelta cutinllataj mandanga. 27 Jehová Diospaj huasipi sacrificiocunata rurangapaj gentecuna Jerusalenman huichiyashpa catijpica, cai gentecunapaj shunguca paicunapaj amo Judá llajtata mandaj rey Rehoboampajmanmi tigraringa. Judá llajtata mandaj rey Rehoboampajman cutin tigrarishpami ñucataca seguro huañuchingacuna” nircami. 28 Reyca consejota mañashca qꞌuipami ishqui oro bizicunata rurarca. Chashna rurashpami gentecunataca: “Cancunapajca Jerusalenman huichiyanaca mana jahuallachu can. Israelitacunalla, Egipto llajtamanta cancunata llujshichij cancunapaj Diosca caipimi” nirca. 29 Chai qꞌuipami bizicunataca shujtaca Betelpi, caishujtaca Danpi churarca. 30 Chashna rurashpami paicunataca juchapi urmachirca. Gentecunaca Dan llajtacamami chaipi caj bizita adorangapaj rijcuna carca.
31 Shinallataj adorana lugarcunapimi* templocunata rurarca. Chaipimi levitacunapuramanta mana caj runacunata sacerdotecuna cachun churarca. 32 Jeroboanca octavo quillapaj 15 punllapimi Judá llajtapi shinallataj shuj fiestata callarichirca. Betelpi rurashca altarpica pai rurashca bizicunamanmi sacrificiocunata curca. Shinallataj Betelpica pai rurashca adorana lugarcunapi sirvichunmi sacerdotecunata nombrarca. 33 Octavo quillapaj 15 punllapimi Betelpi rurashca altarpi sacrificiocunata rurai callarirca. Chai quillataca paipaj munaimantami agllashca carca. Israelitacunapajca shuj fiestatami callarichirca. Shinallataj ofrendacunata cungapaj, sacrificiocunata rupachishpa cushnichingapajmi altarman huichiyarca.