3 Juan
1 Ñucaca ancianomi* cani. Cꞌuyashca huauqui Gayomanmi quillcani. Cantaca tucui shunguhuanmi cꞌuyani.
2 Ñuca cꞌuyashca huauqui, caicama ima shinami causacushcangui chashnallataj alli causashpa catichun, alli saludtapish charichunmi Diosta mañani. 3 Huauquicuna shamushpaca can mana llullapi tucui shunguhuan caticujta, chai mana llullapi puricujtami parlarcacuna. Chashna parlajpica achcatami cushicurcani. 4 Ñuca huahuacuna mana llullapi puricujta uyashpaca yallitajmi cushicuni.
5 Cꞌuyashca huauqui, canca huauquicunata mana rijsishpapish paicunamanta imallatapish rurashpami Diosta tucui shunguhuan sirvicushcata ricuchicungui. 6 Paicunaca can cꞌuyaita ricuchishcatami congregacionpica parlarcacuna. Viajepaj imalla minishtishcata cushpa paicunataca ayudahuai. Chaitaca Dios munashca shina rurapai. 7 Paicunaca shujtaj llajta gentecunamanta imata mana chasquishpami Diospaj shutimanta huillanaman rircacuna. 8 Ñucanchijca paicunahuan tandalla mana llullata huillangapajmi chashna laya huauquicunataca cꞌuyaihuan chasquina canchij.
9 Congregacionmanca shuj cartatami quillcarcani. Shinapish cancunapurapi puntapi canata munaj Diotrefesca ñucanchij ima nishcataca mana chasquinchu, mana respetanchu. 10 Chaimantami cancunapajman rishpaca pai mana allita ruracushcata ricuchisha. Paica ñucanchijmantami mana allicunata nishpa parlashpa purin.* Mana chaillahuanchu cushicun. Ashtahuanpish huauquicunataca mana respetohuan chasquisha ninchu. Chasquisha nijcunatapishmi jarcasha nin. Paicunataca congregacionmantapishmi llujshichishpa cachasha nin.
11 Cꞌuyashca huauqui, mana allita rurajcunataca ama catichu. Allita rurajcunata cati. Allita rurajca Diosmantami shamun. Mana allita rurajca Diostaca mana ricushcachu. 12 Tucui paicunaca Demetriomantaca allitami parlashcacuna. Mana llullapishmi chaitaca ricuchishca. Ñucanchijpishmi paimantaca huillanchij. Ñucanchij nishca shimicuna mana llulla cashcataca canca yachanguimi.
13 Canman achcata quillcana cashpapish plumahuan, tintahuanca mana quillcashpa catisha ninichu. 14 Ashtahuanpish canta ricungapaj, canhuan ñahui ñahui parlanacungapajmi utca risha nicuni.
Sumaj causaita charingui.
Amigocunami canmanca saludocunata cachan. Ñuca partemantapish amigocunataca shuj shuj saludapangui.