2 Tesalonicenses
1 Ñucaca Pablomi cani. Silvanopish,* Timoteopish caipimi ñucahuan can. Cai cartataca Tesalónica llajtapi caj congregacionmanmi cachanchij. Cancunaca ñucanchij Yaya Dioshuanpish, Amito Jesucristohuanpishmi shuj shinalla canguichij:
2 Yaya Diospish, Amito Jesucristopish yallitaj llaquij cashcata ricuchichun, sumaj causaitapish cancunaman cuchun.
3 Huauquicuna, cancunamanta Diosta pagui ningapajmi siempre obligado sintirinchij. Cancunapaj fe ashtahuan sinchiyacushcamanta, tucuicunallataj caishuj chaishuj cꞌuyaita ashtahuan ricuchinacucushcamantami chashna pagui ninaca alli can. 4 Cancunata catirashpa llaquichijpipish, llaquicunata charishpapish ahuantashpa, Diospi confiashpami caticunguichij. Chaimantami Diospaj congregacioncunamanca cushicushpa cancunamanta parlanchij. 5 Caica Dios cashcata rurashpa juzgaj cashcatami ricuchin. Shinallataj Diospaj Gobiernopi yaicuchunmi Diosca cancunata alli nishca. Chaimantami llaquicunata apacunguichij.
6 Diosca cashcata ruraj cashcamantami cancunata llaquichijcunataca castiganga. 7 Shinapish cancunaca llaquicunata apacushpapish ñucanchij Amito Jesús, poderta charij paipaj angelcunandij jahua pachamanta ricurijpica, ñucanchijhuan igualmi quishpichishca canguichij. 8 Paica nina chaupipimi ricuringa. Chashnami Diosta mana rijsijcunata, Amito Jesusmanta alli huillaicunata mana cazujcunatapish llaquichinaman shamunga. 9 Ñucanchij Amito Jesusmi paicunata juzgashpa huiñaipaj chingachinga. Chashnami paicunataca ña mana ricunga, paipaj jatun poderhuanpish mana ayudanga. 10 Ñucanchij Amito Jesús paipaj jucha illaj huauquicunandij jatunyachishca cangapaj shamujpica tucui paipi feta charishcata ricuchijcunami alli ningacuna. Cancunapish ñucanchij nishcata crishcamantami paicunapurapi canguichij.
11 Cancunata cayashca ama yangalla cashcata Dios ricuchun, paipaj poderhuan cancunapaj tucui allicunata rurasha nishcata pajtachichun, feta charishcamanta cancunapaj ruraicunapish alli llujshichunmi cancunamanta Diosta siempre mañanchij. 12 Chashnami ñucanchij Amito Jesuspaj shutica cancunamanta jatunyachishca canga. Cancunapish paihuan shuj shinalla cashcamantami jatunyachishca canguichij. Ñucanchij Dios yallitaj llaquij cashcamanta, Amito Jesucristopish yallitaj llaquij cashcamantami chashna tucunga.