2 Crónicas
36 Jerusalenpi causaj gentecunaca Josiaspaj churi Jehoacaztami paipaj yayapaj randi catij rey cachun agllarcacuna. 2 Jehoacazca 23 huatacunata charishpami rey tucurca. Paica Jerusalenpica quimsa quillacunatami mandarca. 3 Shinapish Egiptomanta reymi Jehoacaztaca Jerusalenpi mandanata quichurca. Chai llajtapi causaj gentecunatapish 100 talento* cullquita, shuj talento orota cuchunmi obligarca. 4 Shinallataj Egiptomanta rey Nekoca Jehoacazpaj huauqui Eliaquimtami Judapi, Jerusalenpi mandachun churarca. Eliaquimtaca Jehoiaquim shutimanmi cambiarca. Pero Nekó shuti reymi Jehoacaztaca Egiptoman pusharca.
5 Jehoiaquimca 25 huatacunata charishpami rey tucurca. Paica 11 huatacunatami Jerusalenpica mandarca. Shinallataj paipaj Jehová Diospaj ñaupajpica mana allicunatami ruraj carca. 6 Babilonia llajtamanta rey Nabucodonosorca Jehoiaquimpaj contra llujshishpami, paitaca cobremanta rurashca ishqui cadenacunahuan huatashpa Babiloniaman aparca. 7 Shinallataj Nabucodonosorca huaquin cosascunatami Jehová Diospaj huasimanta aparca. Chai cosascunataca Babilonia llajtapi paipaj palaciopimi churarca. 8 Jehoiaquimpaj causaimantapish, paipaj tucui millanana ruraicunamantapish, paipaj contra tucui nishcacunapish Judá llajtamanta, Israel llajtamanta Reycunapaj Libropimi quillcashca tiyacun. Qꞌuipaca paipaj churi Joaquinmi catij rey tucurca.
9 Joaquinca 18 huatacunata charishpami rey tucurca. Paica quimsa quillacunata, chunga punllatami Jerusalenpi mandarca. Shinallataj paica Jehová Diospaj ñaupajpica mana allicunatami ruraj carca. 10 Huata callaripica rey Nabucodonosorca Joaquintapish, Jehová Diospaj huasipi tiyaj cosascunatapish Babiloniaman apamuchunmi paita sirvijcunata cacharca. Ashtahuanpish Judapi, Jerusalenpi mandachunca Joaquinpaj tío Sedequiastami churarca.
11 Sedequiasca 21 huatacunata charishpami rey tucurca. Paica 11 huatacunatami Jerusalenpi mandarca. 12 Paipaj Jehová Diospaj ñaupajpipish mana allicunatami ruraj carca. Profeta Jeremías Jehová Diosmanta advertenciata cujpipish mana humillarircachu. 13 Shinallataj rey Nabucodonosortapish mana cazushpami paipaj contra jatarirca. Rey Nabucodonosorca paita tucuipi cazuchunmi Sedequiastaca Diospaj ñaupajpi jurachishca carca. Paica rumi shungu tucushpami israelitacunapaj Jehová Diospajmanpish mana tigrarca. 14 Sacerdotecunata tucui pushajcunapish, gentecunapish Diosmantami caruyarcacuna. Paicunaca shujtaj llajtamanta gentecuna shinami millanana ruraicunata rurashpa Jehová Diospaj huasitapish mapayachircacuna. Diosca Jerusalenpica paipaj huasitaca paipajllami chꞌicanyachishca carca.
15 Paicunapaj ñaupa yayacunapaj Jehová Diosca paipaj huillajcunata cachashpami advirtishpa catirca. Paipaj pueblota cꞌuyashcamanta, paipaj huasipish ama tucuchishca cachun munashcamantami cutin cutin advirtirca. 16 Pero paicunaca Diospaj huillajcunamantami burlarishpa catircacuna. Diospaj shimitapish mana uyashpami paipaj profetacunamantapish burlarircacuna. Chaimantami Jehová Diosca paicunahuanca yallitaj pꞌiñarirca. Paicunaca Diospaj ayudatapish ña mana charircacunachu.
17 Diosca caldeocunapaj reytami paicunapaj contra cacharca. Reyca jovencunatami Diospaj huasipi espadahuan huañuchirca. Jovencunata, cꞌarihuan manaraj chayarishca solteracunata, yuyajcunata, ungushcacunatapish mana llaquircachu. Diosca caldeocunapaj reypaj maquipimi tucuita curca. 18 Diospaj huasipi tiyaj tucui cosascunatami uchilla cajpipish, jatun cajpipish tucuita Babiloniaman aparca. Jehová Diospaj huasimantapish achca valij cosascunata, reypaj achca valij cosascunata, paipaj pushajcunapaj achca valij cosascunatami tucuita Babiloniaman aparca. 19 Paica Diospaj huasitapishmi rupachirca. Shinallataj Jerusalenpi tiyaj pircacunatami urmachirca. Sinchi torrecunatapishmi rupachirca, valishca tucui cosascunatapishmi tucuchirca. 20 Espadamanta quishpirijcunataca Babiloniamanmi prezu shina aparca. Chashnami paicunaca Persia llajtata mandaj tucui allpata mandangacama Babiloniata mandajtapish, paipaj churicunatapish sirvircacuna. 21 Profeta Jeremiasman Jehová Dios huillachishcacuna pajtarichunmi chashna tucurca. Allpaca tucui sabadocuna mana samarishcamanta samaringacamami shitashca saquirirca. Chashnami allpaca 70 huatacuna pajtaringacama samarirca.
22 Persiamanta rey Ciro punta huatapi mandacujpimi Jehová Diosca Persiamanta rey Cirotaca tucui paipaj llajtapi shuj mandashcata huillachun yuyaita curca. Jehová Diosca Jeremiasman huillashca shimicuna pajtarichunmi chashna rurarca. Chai mandashcata quillcachishpaca cashnami churashca carca: 23 “Persiamanta rey Ciroca: ‘Jahua pacha Jehová Diosmi tucui cai allpapi mandanacunata ñucaman cushca. Shinallataj Judapi saquirij Jerusalén llajtapimi paipaj huasita rurachun ñucaman mingashca. ¿Cancunapuramantaca maijantaj paipaj pueblomanta canguichij? Cancunapaj Jehová Diosca cancunahuan cachun. Judapi saquirij Jerusalenman huichiyaichij’ ninmi” nircami.