Gálatas
1 Ñucaca apóstol Pablomi cani. Apóstol cachunca ni maijan runa ñucataca mana agllarcachu. Ashtahuanpish Jesucristomi ñucanchij Yaya Dioshuan tucushpa apóstol cachun agllarca. Diosmi Jesucristotaca huañushcacunapaj chaupimanta causachirca. 2 Ñucahuan caj tucui huauquicunandijmi Galacia llajtapi saquirij congregacioncunaman quillcani:
3 Ñucanchij Yaya Diospish, Amito Jesucristopish yallitaj llaquij cashcata ricuchichun, sumaj causaitapish cancunaman cuchun. 4 Jesucristoca ñucanchij Yaya Diospaj munaita rurashpami, ñucanchij juchacunamanta paipaj causaita curca. Paica cai millai pachamanta* ñucanchijta quishpichingapajmi chaita rurarca. 5 Yaya Diosca huiñai huiñaita jatunyachishca cachun. Chashna cachun.*
6 Alli huillaicunata shina shujtaj huillaicunata chasquishpa Diosmanta utca caruyacujta ricushpami mancharini. Diosmi cancunataca Cristo yallitaj llaquishcamanta cayarca. 7 Ima shujtaj alli huillaicunaca mana tiyanchu. Ashtahuanpish maijancunaca Cristomanta alli huillaicunata cambiashpami cancunataca pandachinata munancuna. 8 Maijanpish ñucanchij huillashca alli huillaicunata cambiashpa huillajca llaquichishca cachun. Ñucanchijpuramanta cashpapish, jahua pachamanta shuj ángel cashpapish llaquichishca cachun. 9 Ñaupaman nishca shinallatajmi cutinllataj caita nisha nini: maijanpish cancuna chasquishca alli huillaicunata cambiashpa huillajca llaquichishca cachun.
10 ¿Ñucaca runacunapaj ñaupajpi alli ricurinatachu mashcacuni? ¿Mana cashpaca Diospaj ñaupajpi alli ricurinatachu mashcacuni? Runacunapaj ñaupajpi alli ricurinata mashcacushpaca Cristota sirvijca mana caimanchu. 11 Huauquicuna, caita yachachunmi munani. Ñuca huillashca alli huillaicunaca mana runacunamantachu shamun. 12 Alli huillaicunataca ni maijan runamanta mana chasquircanichu. Shinallataj ni maijan runa mana yachachircachu. Ashtahuanpish muscuipi shinami Jesucristomanta chasquircani.
13 Judiocuna yachachishcata catishpa ñuca ima shina causashcataca uyashcanguichijmi. Diospaj congregacionta chingachinata munashpa, catirashpa yallitaj llaquichishcatapish uyashcanguichijmi. 14 Ñuca yaya mamapaj costumbrecunatami tucui shunguhuan catircani. Chaimantami judiocuna yachachishcataca ñuca edadta charij caishuj judiocunatapish yalli alli caticurcani. 15 Shinapish Diosmi ñuca huacharichun saquirca. Shinallataj paica yallitaj llaquij cashcamantami ñucata cayarca. Diosca cushicushpami 16 paipaj Churita shujtaj llajta gentecuna rijsichun alli huillaicunata huillachun ñucataca agllarca. Chaita rurachun agllajpica ni maijan runapaj consejota mana mashcarcanichu. 17 Ñucapaj ñaupa apostolcunata tapunamanpish Jerusalenmanca mana huichiyarcanichu. Chaipaj randica Arabia llajtamanmi rircani. Qꞌuipaca Damasco llajtamanmi tigrarcani.
18 Quimsa huatacuna qꞌuipaca Cefasta* visitangapajmi Jerusalenman huichiyarcani. Chaipimi 15 punllacunata paihuan saquirircani. 19 Shinapish caishuj apostolcunataca ni maijanta mana ricurcanichu. Amito Jesuspaj huauqui Santiagollatami chaipica ricurcani. 20 Diospish ricucunmi ñucaca caicunataca mana llullashpami cancunaman quillcani.
21 Chai qꞌuipaca Siria, Cilicia llajtacunamanmi rircani. 22 Shinapish Judea llajta congregacioncunapi Cristota catijcunaca ñucataca ñahui ñahuica mana rijsircacunachu. 23 Paicunaca: “Cai runaca ñucanchijtami ñaupaca catirashpa llaquichirca. Ñucanchij crishcatapishmi chingachisha nirca. Shinapish cunanca chai alli huillaicunallatatajmi huillacun” nijllatami uyajcuna carca. 24 Chaimi paicunaca ñucamanta Diosta jatunyachi callarircacuna.