Hechos

7 Shinapish sacerdotecunata jatun mandajca: “¿Chai nishcacunaca chashnatajchu can?” nishpami tapurca. 2 Chashna tapujpimi Estebanca cashna nishpa cutichirca: “Huauquicuna, yayacuna caita uyaichij. Jatun Diosca ñucanchij ñaupa yaya Abrahanmanmi pai manaraj Harán llajtapi causai callarijpi, Mesopotamia llajtapi ricurirca. 3 Chashna ricurishpami Abrahantaca: ‘Cambaj llajtamanta llujshishpa, cambaj familiatapish saquishpa ri. Ñucami can maiman rina llajtataca ricuchisha’ nirca. 4 Chashna nijpimi Abrahanca caldeocunapaj* llajtamanta llujshishpa Harán llajtapi causai callarirca. Paipaj yaya huañushca qꞌuipaca cunan cancuna causacushca llajtapi causachunmi Diosca mandarca. 5 Shinapish cai llajtapica chaqui saruna vali allpallatapish herenciata shina paimanca mana curcachu. Chashnapish Abrahán huahuata manaraj charijpimi Diosca cai allpata paimanpish, paipaj huahua huahuacunamanpish cusha nirca. 6 Shinallataj Diosca Abrahanpaj huahua huahuacuna paicunapaj llajtata saquishpa shujtaj llajtapi causana cashcatami huillarca. Chai llajtapi causaj gentecunaca paicunata macashpa, sirvichishpami 400 huatacunata charinga nircami. 7 Ashtahuanpish Diosca: ‘Paicunata sirvichishpa charicuj llajtataca ñucami juzgasha. Chai qꞌuipami paicunaca chai llajtamanta llujshimushpa, ñucata cai llajtapi adorangacuna’ nircami.

8 Shinallataj Diosca Abrahanhuanmi circuncisionta* rurachun ari ninacurca. Chaimantami Abrahanca paipaj churi Isaac huacharijpica pusaj punllacuna qꞌuipa circuncisionta rurachirca. Isaacmi Jacobpaj yaya carca. Cutin Jacobca ñucanchij ñaupa 12 yayacunapaj yayami carca. 9 Chai ñaupa yayacunami Josetaca envidiamanta, Egipto llajta runacunaman cꞌatushpa cacharcacuna. Ashtahuanpish Diosca Josetami ayudarca. 10 Chashna ayudashpami Diosca tucui llaquicunamanta Josetaca quishpichirca. Shinallataj Egipto llajtata mandaj faraonpaj* ñaupajpi alli ricurichunmi alli yachaitapish curca. Chaimantami faraonca Egipto llajtatapish, paipaj huasitapish mandachun churarca. 11 Chai punllacunapica tucui Egipto llajtapipish, Canaán llajtapipish jatun yaricai jatarishpami jatunta llaquichirca. Ñucanchij ñaupa yayacunapish micungapajca imata mana charircacunachu. 12 Shinapish Jacobca Egipto llajtapi micuna* tiyashcatami uyarca. Chaimantami paica ñucanchij ñaupa yayacunata chaiman cacharca. 13 Paipaj huauquicuna cutin rijpimi Joseca pai pi cashcata paicunaman huillarca. Chaimi faraonpish Josepaj familiamanta yachaj chayarca. 14 Chai qꞌuipami Joseca paipaj yaya Jacobtapish, paipaj tucui familiacunatapish pushanaman cacharca. Egipto llajtaman shamujcunaca 75 runacunami* carca. 15 Chashna pushamujpimi Jacobca Egipto llajtaman uriyarca. Chai llajtapimi Jacobpish, ñucanchij ñaupa yayacunapish huañurcacuna. 16 Paicunapaj tullucunataca Siquem llajtamanmi aparcacuna. Chaiman apashpami Hamorpaj huahuacunaman Abrahán randishca pambana jutcupi churarcacuna.

17 Abrahanman Dios cusha nishca punllacuna ña pajtamugrijpimi israelitacunaca Egipto llajtapica mirarishpa achca tucurcacuna. 18 Chai qꞌuipaca Joseta mana rijsij shujtaj reymi Egipto llajtata mandai callarirca. 19 Chai reyca ñucanchij ñaupa yayacunata ima shina llaquichinatami yuyarirca. Chaimi paica llullu huahuacuna huañuchun nishpa ñucanchij ñaupa yayacunataca huahuacunata shitachun obligarca. 20 Chai punllacunallapitajmi Moisespish huacharirca. Chai huahuaca yallitaj sumajmi carca.* Quimsa quillacunatami paipaj yaya mamaca huasipi paitaca huiñachirca.* 21 Shinapish paipaj yaya mama huasipi ña mana chari tucushpa shitajpimi, faraonpaj ushushi japishpa paipaj churita shina huiñachirca. 22 Chashna cashpami Moisesca Egipto llajtapi imalla yachachishcacunata alli yachashpa huiñarca. Chaimantami paica alli parlaj, imatapish alli ruraj carca.

23 Moisesca 40 huatacunata charishpami paipaj huauqui israelitacuna ima shina cajta ricunaman rinata yuyarirca. 24 Pai rishpaca shuj egipcio runa shuj israelita runata macacujtami ricurca. Chaita ricushpami israelita runata ayudasha nishpa egipcio runataca huañuchirca. 25 Moisesca: “Ñuca huauquicunaca, ñucanchijta quishpichingapajca Diosca paitami agllashca nishpa yuyangapishchari” nishpami chashna rurarca. Ashtahuanpish israelitacunaca mana chashna yuyarcacunachu. 26 Cutin cayandij punlla rishpaca ishqui israelitacuna macanacucujtami ricurca. Chaimi paicunapura alli tucuchun nishpa: ‘Cancunaca huauquindijcunami canguichij, ¿imamantataj macanacucunguichij?’ nirca. 27 Shinapish paipaj huauquita macacuj runaca Moisesta tꞌangashpaca cashnami nirca: ‘¿Pitaj cantaca ñucanchijta mandachun, ñucanchij juez cachunpish churashcari? 28 ¿Egipcio runata caina huañuchishca shinallatajchu ñucatapish huañuchisha ningui?’ nirca. 29 Chaita uyashpami Moisesca Egipto llajtamanta miticushpa rirca. Chaimantaca Madián llajtapimi causagrirca. Chaipi cazarashpami paica ishqui churicunata charirca.

30 Moisesca 40 huatacuna qꞌuipami Sinaí chaquishca urcu cꞌuchupi, shuj zarza yura* rupacuj chaupipi shuj angelta ricurca. 31 Chaipimi Moisesca achcata mancharishpa alli ricungapaj cꞌuchuyagrishpaca Jehová* Dios rimashcata uyarca. Diosca: 32 ‘Ñucami cambaj ñaupa yayacunapaj Dios, Abrahanpaj, Isaacpaj, Jacobpaj Dios cani’ nircami. Shina nishcata uyashpami Moisesca chujchushpa mana ashtahuan ricui tucurca. 33 Shinallataj Jehová* Diosca cashnami nirca: ‘Canca jucha illaj pambapimi shayacungui, chaimanta cambaj chaquicunamanta sandaliacunata llujshichi. 34 Ñuca agllashca llajtata Egiptopi llaquichicujtami ricushcani. Paicuna llaquirishpa huacacujtapishmi uyashcani. Chaimi paicunata quishpichingapaj uriyamushcani. Cunanca shamui, cantami Egipto llajtaman cachagrini’ nirca. 35 Cai Moisestami: ‘¿Pitaj cantaca ñucanchijta mandachun, ñucanchij juez cachunpish churashcari?’ nishpa mana chasquishun nircacuna. Shinapish Diosca Moisesllatatajmi paicunata mandachun, llujshichichunpish cacharca. Chaitaca zarza yurapi ricurij shuj angelta cachashpami huillachirca. 36 Moisesmi ñucanchij ñaupa yayacunataca Egiptomanta llujshichirca. Paica chai llajtapipish, Puca mama cucha jatun yacupipish mancharina ruraicunata, milagrocunatami rurarca. Chaquishca pambapipish 40 huatacunatami chashnallataj rurarca.

37 Chai Moisesllatajmi israelitacunamanca: ‘Diosca cancunapaj huauquicunamantami ñuca shina shuj profetata agllashpa cancunapajman cachanga’ nirca. 38 Chai runami chaquishca pambapi israelitacunahuan* carca. Paihuanmi Sinaí urcupica shuj ángel parlarca. Chai runami ñucanchij ñaupa yayacunahuanca parlarca. Paillatajmi causaj shimicunata ñucanchijman cungapaj Diosmanta chasquirca. 39 Ashtahuanpish ñucanchij ñaupa yayacunaca paitaca mana cazurcacunachu. Shinallataj paita mana uyashun nishpami paicunapaj shungupica Egipto llajtaman tigranata yuyarcacuna. 40 Chaimantami paicunaca Aarontaca: ‘Ñucanchijta ñaupashpa richun dioscunata rurai. Ñucanchijta Egiptomanta llujshichimuj Moiseshuan ima tucushcataca mana yachanchijchu’ nircacuna. 41 Chai punllacunapica biziman rijchaj diosta rurashpami chai ñaupajpi sacrificiota rurarcacuna. Chashna rurashpami cushicushpa shuj jatun fiestata rurai callarircacuna. 42 Chaimantami Diosca paicunamanta caruyashpa Profetacuna quillcashca libropi nishca shinaca intita, lunata, jahua pacha estrellacunatapish adorachun saquirca. Profetacunaca: ‘Israel llajta runacunalla, 40 huatacunata chaquishca pambapi cashpaca ofrendacunata, sacrificiocunatapish mana ñucamanchu curcanguichij. 43 Ashtahuanpish cancunaca Moloc diospaj carpa huasitapish, estrella shina rurashca Refán diostapishmi caiman chaiman aparcanguichij. Chaicunata adorangapajmi chai santocunata rurarcanguichij. Chaimantami cancunataca Babilonia llajtamanta ashtahuan caruta cachasha’ nishpami quillcarcacuna.

44 Ñucanchij ñaupa yayacunaca chaquishca pambapi cashpaca Dios paicunahuan cashcata ricuchij carpa huasitami charircacuna. Chai carpa huasitaca Moisesman Dios ricuchishpa mandashca shinallatajmi rurashcacuna carca. 45 Ñucanchij ñaupa yayacunapaj huahuacunami paicunata shujtaj llajtacunaman Josué pushajpica chai carpa huasita apashpa rircacuna. Diosca ñucanchij ñaupa yayacunata ñaupashpami chai llajtacunapi causaj gentecunataca llujshichishpa cacharca. Chai carpa huasica Davidpaj punllacamami chaipi saquirirca. 46 Davidca Diospaj ñaupajpimi alli ricurirca. Chaimantami Jacobpaj Dios causana huasita rurasha nirca. 47 Ashtahuanpish chai huasitaca Salomonmi shayachirca. 48 Shinapish Jatun Diosca runacuna rurashca huasicunapica mana causanchu. Shuj profeta nishca shinaca: 49 ‘Jehová* Diosca cashnami nin, jahua pachaca ñuca jatun tiyarinami. Cai pachaca ñuca chaqui sarunami. ¿Ima shina huasitataj ñucapajca ruragringuichijyari? ¿Ñuca samarinapish maipitaj canyari? 50 ¿Manachu ñuca maquillahuantaj tucui caicunataca rurashcani?’ nircami.

51 Mana cazuj runacuna, cancunaca uyanataca mana munanguichijchu, rumi shungumi canguichij.* Cancunapaj ñaupa yayacuna shinallatajmi espíritu santotaca manataj cazusha ninguichij. 52 ¿Cancunapaj ñaupa yayacunaca maijan profetatataj mana catirashpa llaquichircacunari? Paicunami cashcata ruraj shamunata huillajcunataca huañuchircacuna. Cancunapish cunanca paitaca contracunapaj maquipi churashpami huañuchishcanguichij. 53 Cancunaca Moisesman cushca leytaca angelcuna huillashca shinallatajmi chasquircanguichij. Shinapish chaitaca mana cazushcanguichijchu” nircami.

54 Chashna nijta uyashpami paicunaca Estebanta ricushpaca, quirucunapish canirishpa shungupica yallitaj pꞌiñarircacuna. 55 Shinapish Estebanca espíritu santohuan junda cashpami jahua pachata huichilla ricushpaca Diospaj sumaj achijnicujtapish, Jesuspish Diospaj alli ladopi shayacujta ricurca. 56 Chashna ricushpami Estebanca: “¡Ricuichij! Jahua pacha pascashcatapish, Runapaj Churipish Diospaj alli ladopi shayacujtami ricuni” nirca. 57 Chaimi paicunaca sinchita caparishpa, maquicunahuan rinrincunata taparishpa Estebantaca huaicashpa japircacuna. 58 Chai llajtamanta canllaman llujshichishpaca rumicunahuanmi shitai callarircacuna. Llullashpa huillajcunapish Saulo shuti jovenpaj ñaupajpimi jahua churanacunataca churarcacuna. 59 Paicuna rumicunahuan shitacujpimi Estebanca: “Amito Jesús, ñuca causaitaca* cambaj maquipimi mingani” nishpa rogarirca. 60 Chai qꞌuipaca cungurishpami sinchita caparishpaca: “Jehová* Dioslla paicunataca cai juchamantaca ama llaquichichu” nirca. Shina nishca qꞌuipaca huañurcallami.*