1 Corintios
8 Cunanca rurashcalla dioscunaman cushca micunamantami quillcani. Caimantaca tucuicunami yachanchij. Shinapish yachaica jatunyachinmi. Cutin cꞌuyaica sinchiyachinmi. 2 Maijanpish imata yachanimi yuyajca, chaimantaca manaraj tucuita yachanchu. 3 Ashtahuanpish Diosta cꞌuyajtaca Diospish rijsinmi.
4 Cunanca rurashcalla dioscunaman cushca micuita micunamanta parlashun. Rurashcalla diosca cai pachapica ima mana canchu. Shujlla Diosmi tiyan. Chaitaca ñucanchijca yachanchijmi. 5 Gentecunaca jahua pachapipish, cai pachapipish tucui laya dioscunami tiyan nincunami. Shinaca gentecunapajca achca “dioscuna”, achca “amocunami” tiyan. 6 Ñucanchijpajca shujlla Diosmi tiyan. Paica ñucanchij Yayami can. Paimi tucuita rurarca, ñucanchijtapish paipajmi rurarca. Shinallataj shujlla Amitomi tiyan. Paica Jesucristomi. Diosca paihuanmi tucui imatapish rurarca. Paimantami ñucanchijpish tiyanchij.
7 Caimantaca mana tucuicuna yachancunachu. Shinapish maijancunaca rurashcalla dioscunata adorajcunami carca. Chaimantami rurashcalla dioscunaman cushca micunacunata micushpaca rurashcalla diosta adoracushcata yuyashpa concienciapi débil cajcunaca mana alli sintirincuna. 8 Micunaca Diospajman mana ashtahuan cꞌuchuyachinchu. Mana micushpapish ima illajllaca mana saquirinchijchu. Micushpapish imata mana japinchijchu. 9 Imata agllai tucushpapish concienciapi débil cajcunata ama pandachingapaj cuidarichij. 10 Can alli yachaj cashcamanta rurashcalla dioscunapaj huasipi micucujta pi ricushpaca, ¿manachu concienciapi débil cajcunapish rurashcalla dioscunaman cushca micunata paicunapish micusha ningacuna? 11 Can yachashcamanta chashna rurashpaca concienciapi débil caj huauquitami llaquichingui. Cristoca cambaj huauquimantapishmi huañurca. 12 Cancuna chashna rurashpaca concienciapi débil caj huauquicunatami llaquichishpa, paicunapaj contra juchata ruranguichij. Chashna rurashpaca Cristopaj contrami juchata ruranguichij. 13 Chaimanta ñuca huauquita ama pandachingapajmi, chai micuna paita pandachina cajpica aichataca manataj cutinca micusha.