1 Reyes
2 Davidca ñalla huañugrishpami paipaj churi Salomontaca cashna mandarca: 2 “Ñucaca ñallami huañugrini. Chaimantami canca sinchi, mana manchaj cana cangui. 3 Ñucanchij Jehová Diosta tucuipi cazushpa paipaj ñancunapi puringui. Moisesman cushca leypi quillcachishca shina paipaj leycunata, paipaj mandamientocunata, pai imallata rurachun nishcacunata, pai cushca advertenciacunata cazungui. Chashnami can imalla rurashcapish, can maiman rijpipish tucui alli llujshinga. 4 Jehová Diospish ñucaman cusha nishcatami pajtachinga. Paica: ‘Cambaj huahuacuna ñucata uyashpa, ñuca ñancunapi tucui shunguhuan, tucui almahuan* alli catijpica cambaj huahua huahuacunamanta shujmi* Israel llajtata mandangapaj tiyarinapica siempre tiyaringa’ nircami.
5 Zeruyapaj churi Joab ñucata imata rurashcatapish allimi yachangui. Nerpaj churi Abnerta, Jeterpaj churi Amasata imata rurashcatapish allimi yachangui. Chai ishqui runacunaca Israel llajtamanta soldadocunata mandajcunami carca. Joabca paicunata huañuchishpami mana macanacuna tiempo cajpipish yahuarta jicharca. Chashnami paipaj cinturapi churarishca cinturontapish, paipaj chaquicunapi churarishca sandaliacunatapish yahuarhuan mapayachirca. 6 Cunanca canca alli yachaj cashcatami ricuchina cangui. Chai runa yuyajyashpa tranquilo huañuchunca mana saquinachu cangui.*
7 Pero Galaadmanta Barzilaipaj churicunamanca cꞌuyaita* ricuchingui. Paicunaca cambaj huauqui Absalonmanta ñuca miticushpa ricujpica ñuca ladopimi carcacuna. Chaimantami paicunataca canhuan micujcunapurapi cachun saquina cangui.
8 Shinallataj Bahurimpi causaj Benjaminpaj familiamanta caj Guerá runapaj churi Simeipish cambaj cꞌuchullapimi causan. Mahanaimman ricui punllaca paimi ñucataca jatun llaqui japishca canman nishpa maldicirca. Pero Jordanman ñucata tupanaman uriyajpica Jehová Diospaj shutipimi: ‘Cantaca espadahuanca mana huañuchishachu’ nishpa jurarcani. 9 Canca alli yachaj runami cangui, imata ruranatapish yachanguimi. Paitaca castiganatajmi cangui. Chai runataca yuyajyashpa tranquilo huañuchunca ama saquinguichu”* nircami.
10 Chai qꞌuipami Davidca huañurca.* Paitaca Davidpaj Llajtapimi pambarcacuna. 11 Davidca Israel llajtataca 40 huatacunatami mandarca. Hebrón llajtapica canchis* huatacunatami mandarca. Cutin Jerusalén llajtapica 33 huatacunatami mandarca.
12 Salomonca paipaj yaya Davidpaj jatun tiyarinapimi tiyarirca. Tiempohuanca paipaj gobiernoca ashtahuan sinchimi tucurca.
13 Asha tiempo qꞌuipaca Haguitpaj churi Adoniasca Salomonpaj mama Bat-Sebata ricunamanmi shamurca. Chaimi paica: “¿Caimanca alli munaihuanchu shamungui?”* nishpa tapurca. Shina tapujpimi Adoniasca: “Ari, alli munaihuanmi shamuni” nishpa cutichirca. 14 Shinallataj paica: “Caillatami nisha nini” nircami. Chaimi Bat-Sebaca: “Nipailla” nirca. 15 Chaimi Adoniasca: “Ñucami rey tucuna carcani, chaitaca canca allimi yachangui. Israelitacunaca tucuicunami ñucataca rey cachun shuyacurcacuna.* Pero mana rey tucurcanichu. Ashtahuanpish Jehová Dios munashcamantami ñuca huauquiraj rey tucurca. 16 Cunanca caillatami mañasha nini. Ama negapaichu” nircami. Bat-Sebaca: “Nipailla” nircami. 17 Chaimi Adoniasca: “Rey Salomontaca Sunemmanta Abisag huarmita ñuca huarmi cachun mañashpa cuhuai. Can mañajpica paica mana negangachu”* nirca. 18 Chashna nijpimi Bat-Sebaca: “Shinashpaca ñami canmanta reyhuan parlagrini” nirca.
19 Bat-Sebaca Adonías imata nishcata parlangapajmi rey Salomonpaj ñaupajman yaicurca. Reyca chai ratomi paipaj mamata tupanaman ringapaj jatarirca. Chashna tupashpami paipaj ñaupajpi cumurirca. Chai qꞌuipaca paipaj jatun tiyarinapimi tiyarirca. Shinallataj paipaj alli ladopi tiyarichunmi paipaj mamapajpish shuj jatun tiyarinata apanaman cacharca. 20 Chaipi cashpami Bat-Sebaca: “Shuj uchilla favortami mañasha nini. Ama negapaichu” nirca. Chaimi reyca: “Mamita, mañailla. Mana negashachu” nirca. 21 Shina nijpimi Bat-Sebaca: “Sunem llajtamanta Abisagtaca cambaj huauqui Adoniaspaj huarmi cachun saqui” nirca. 22 Pero rey Salomonca paipaj mamataca: “¿Imamantataj Sunem llajtamanta Abisagtaca Adoniaspaj mañanguiyari? Pai rey cachun mañanallamari illan. Paica ñuca jatun huauquimi, paitaca sacerdote Abiatarpish, Zeruyapaj churi Joabpishmi apoyacuncuna” nircami.
23 Chashna nishpaca rey Salomonca Jehová Diospaj shutipi jurashpami: “Adonías caita mañashcamanta mana huañujpica Dios ñucata sinchita castigachun. 24 Causaj Jehová Diosca rey cachun nombrashpami ñuca yaya Davidpaj jatun tiyarinapi ñucataca tiyachishca. Pai nishca shinami ñuca huahua huahuacunataca reycuna cachun churanga. Paipaj shutipimi cunan punllallataj Adonías huañunataj cashcata jurani” nircami. 25 Chaita nishcahuanmi rey Salomonca Jehoiadapaj churi Benayata cacharca. Paica llujshishcahuan rishpami Adoniastaca huañuchirca.
26 Reyca sacerdote Abiatartaca: “¡Anatotpi saquirij cambaj allpacunaman ri! Canca huañunatajmi cangui. Shinapish ñuca yaya Davidpaj ñaupajpimi canca Tucuita Mandaj Amito Jehová Diospaj Arcata aparcangui. Ñuca yayahuan igualmi tucui llaquicunatapish aparcangui. Chaimi cunanca cantaca mana huañuchisha” nircami. 27 Chaimi Salomonca Jehová Diospaj sacerdote ña ama cachun Abiatartaca llujshichishpa cacharca. Chashnami Silopi Elipaj familiamanta* Jehová Dios nishca shimicunaca pajtarina carca.
28 Joab chaita yachaj chayashpaca Jehová Diospaj carpa huasipimi miticunaman rirca. Chaipimi altar gachucunapi* charirirca (Joabca Absalonta mana apoyashca cashpapish Adoniastami apoyashca carca). 29 Chaimi rey Salomonmanca: “Joabca Jehová Diospaj carpa huasipimi miticunaman rishca, chaipimi altar cꞌuchupi can” nishpa huillarcacuna. Chashna huillajpimi Salomonca Jehoiadapaj churi Benayata cachashpaca: “¡Ri, paita huañuchigri!” nirca. 30 Chaimi Benayaca Jehová Diospaj carpa huasiman rishpa Joabtaca: “Reyca: ‘¡Chaimanta llujshi!’ ninmi” nirca. Pero Joabca: “¡Mana! Ñucaca caipimi huañusha” nishpami cutichirca. Benaya chaimanta tigrashpaca Joab imata nishcatami reyman huillarca. 31 Chashna huillajpimi reyca cashna nirca: “Pai nishcata rurai. Huañuchishpa pambai. Mana culpata charij runacunata huañuchishpa Joab runa yahuarta jichashcataca ñucamantapish, ñuca yayapaj familiamantapish anchuchi. 32 Jehová Diosmi Joabtaca paipaj culpallamantataj huañuchun saquinga.* Paica ñuca yaya David mana yachajpimi ishqui runacunata espadahuan huañuchirca. Chai runacunaca cashcata ruraj, paitapish yalli alli runacunami carca. Nerpaj churi Abnerca Israel llajtamanta soldadocunata mandajmi carca. Cutin Jeterpaj churi Amasaca Judá llajtamanta soldadocunata mandajmi carca. 33 Chai runacuna huañushcamantaca Joabpish, paipaj huahua huahuacunapishmi huiñaipaj culpayuj cangacuna.* Pero Jehová Diosca Davidtapish, paipaj huahua huahuacunatapish, paipaj familiacunatapish huiñaipaj bendiciachun. Paicunami sumaj causai tiyachun mandangacuna” nircami. 34 Shinaca Jehoiadapaj churi Benaya huichiyashpami Joabta huañuchirca. Joabtaca chaquishca pambapi saquirij paipaj huasi cꞌuchullapimi pambarcacuna. 35 Chai qꞌuipami reyca Joabpaj randi soldadocunata mandaj cachunca Jehoiadapaj churi Benayata churarca. Cutin sacerdote Sadoctaca Abiatarpaj puestopi sirvichunmi churarca.
36 Chaimantaca Simeí runata cayanaman cachashpami reyca cashna nirca: “Jerusalenpi shuj huasita rurashpa chaipi causai. Chai llajtamantaca ni maiman ama llujshinguichu. 37 Chaimanta ima punllapish llujshishpa Cedrón pugru pambata pasashpaca huañunguitajmi. Chaica cambaj culpallatajmi canga”* nircami. 38 Shina nijpimi Simeí runaca reytaca: “Canca allitami ningui. Canta sirvijca ñuca amito rey nishcatami ruranga” nirca. Chaimantami Simeica Jerusalenpi achca tiempota saquirirca.
39 Pero quimsa huatacuna qꞌuipaca Simeipaj ishqui esclavocunaca Gat llajtata mandaj rey Akís maipi cashcamanmi miticushpa rircacuna. Akisca Maacapaj churimi carca. Simeí runamanca “¡Ricui! Cambaj esclavocunaca Gat llajtapimi can” nishpami huillarcacuna. Chashna huillajpimi 40 Simeica paipaj burrota parejashcahuan Akista ricungapaj Gat llajtaman rirca. Chaipimi paipaj esclavocunata japigrirca. Simeí runa paipaj esclavocunandij Gatmanta tigramujpimi 41 Salomonmanca: “Simeica Jerusalenmantami llujshishca. Paica Gatman rishpami tigramushca” nishpa huillarcacuna. 42 Chaita uyashpami reyca Simeita cayaj cachashpaca cashna nirca: “¿Manachu Jehová Diospaj shutipi jurachishpa cantaca ‘Caimanta ima punllapish maiman llujshishpaca huañunguitajmi’ nishpa advirtircani? ¿Manachu canca ‘Allitami ningui. Cantaca cazushami’ nishpa cutichircangui? 43 Shinashpaca ¿imamantataj Jehová Diospaj ñaupajpi canllataj jurashcataca mana pajtachircangui, ñuca mandashcatapish mana cazurcangui?” nircami. 44 Chai qꞌuipami reyca Simeí runataca cashna nirca: “Ñuca yaya Davidta tucui laya llaquichishcataca cambaj shunguca yachanmi. Chashna mana allita rurashcamantaca Jehová Diospishmi cantaca llaquichinga. 45 Pero Jehová Diosca rey Salomontaca bendiciangami, Davidpaj gobiernotapish huiñaipajmi churanga” nircami. 46 Shina nishca qꞌuipami reyca Jehoiadapaj churi Benayataca Simeí runata huañuchigrichun mandarca. Chaimi pai rishpaca Simeita huañuchirca.
Chashnami Salomonpaj maquipi cashca gobiernoca ashtahuan sinchi tucurca.