Juan
2 Chaimanta quimsa punllacunapica Galileapi caj Caná pueblopimi shuj cazamiento boda tiyarca. Jesuspaj mamapish chaipimi carca. 2 Chai bodamanca Jesustapish, paita catijcunatapishmi invitashcacuna carca.
3 Vino ñalla tucuricujpimi Jesuspaj mamaca: “Vinotaca ña mana charincunachu” nirca. 4 Chashna nijpimi Jesusca paipaj mamataca: “Huarmi, ¿imatataj ñucanchijca rurashunyari?* Ñuca imata rurana horasca manaraj chayamushcachu” nirca. 5 Chaimi paipaj mamaca vinota sirvicujcunataca: “Pai tucui ima nishcata ruraichijlla” nirca. 6 Chaipica yacuta churanapaj sujta rumi pꞌunducunami tiyarca. Judiocunaca mandashcapi nishca shina maillarishpa chuyayangapajmi chai pꞌunducunapica yacuta churajcuna carca. Cada pꞌundumi* casi 44 o 66 litrocunata apaj carca. 7 Chaimi Jesusca: “Pꞌunducunapi yacuta jundachichij” nirca. Chashna nijpimi paicunaca jundachircacuna. 8 Chai qꞌuipami Jesusca: “Cunanca ashata surcushpa bodata pushajpajman apaichij” nirca. Chashna nijpimi ashata aparcacuna. 9 Shina apajpimi bodata pushajca yacumanta rurashca vinota ashata probarca. Chai vinota maimanta llujshichishcataca paica mana yacharcachu (yacuta surcushpa sirvijcunallami chaitaca yacharca). Chaimantami bodata pushaj runa noviota cayashpaca 10 cashna nirca: “Tucuicunami callaripica alli vinotaraj sirvincuna. Gentecuna ña machashca cajpimi yangalla vinotaca sirvincuna. Ashtahuanpish canca alli vinotamari cai horacama huaquichishpa charicushcangui” nirca. 11 Chaita rurashpami Jesusca Galileapi caj Caná pueblopi paipaj punta milagrota rurarca. Chashnami poderta charishcata ricuchirca. Chaita ricushpami paita catijcunapish paipi crircacuna.
12 Chai qꞌuipaca Jesusca paipaj mamandij, paipaj huauquicunandij, paita catijcunandijmi Capernaúm llajtaman rircacuna. Shinapish chaipica mana achca punllacunatachu saquirircacuna.
13 Judiocunapaj Pascua fiesta ñalla chayamucujpimi Jesusca Jerusalenman huichiyarca. 14 Diospaj huasiman* Jesús yaicushpaca huagracunata, ovejacunata, palomacunatapish cꞌatujcunatami ricurca. Shinallataj cullquita cambiajcunapish paicunapaj tiyarinacunapi tiyacujtami ricurca. 15 Chaimi Jesusca azotina anguta rurashpa Diospaj huasimantaca cꞌatujcunata paicunapaj ovejacunandij, huagracunandij tucuicunata llujshichishpa cacharca. Cullquita cambiajcunapaj mesacunatapish vueltachishpami paicunapaj cullquitapish pambaman tsirapashpa shitarca. 16 Chashna rurashpami palomata cꞌatujcunataca: “¡Caicunata caimanta anchuchichij! ¡Ñuca Yayapaj huasitaca ama mercadota* ruraichijchu!” nirca. 17 Chaita ricushpami Jesusta catijcunaca: “Cambaj huasita achcata cꞌuyashcamantami ñuca shungupica nina rupacuj shina canga” nishpa quillcashcata yuyarircacuna.
18 Chaipicarin judiocunaca: “¿Ima milagrota rurashpataj caicunata rurai tucushcataca ricuchigringuiyari?” nircacunami. 19 Shina nijpimi Jesusca: “Diospaj huasita urmachichij. Ñucaca quimsa punllacunallapimi shayachisha” nishpa cutichirca. 20 Chaimi judiocunaca: “Diospaj huasitaca 46 huatacunapimi shayachircacuna. ¿Canca ima shinataj quimsa punllacunallapica shayachinguiyari?” nircacuna. 21 Shinapish Jesusca Diospaj huasi nishpaca paipaj cuerpomantami parlacurca. 22 Huañushcacunapaj chaupimanta Jesús causarijpimi paita catijcunaca pai ima nij cashcata yuyarircacuna. Chaipimi paicunaca Dios quillcachishcapi ima nishcata, Jesús ima nishcatapish crircacuna.
23 Jerusalén Pascua fiestapi cashpami Jesusca milagrocunata rurarca. Chaita ricushpami achca gentecunaca paipi crircacuna.* 24 Chashnapish Jesusca tucuicuna ima shina cashcata yachashpami paicunapica mana tanto confiarca. 25 Shinapish paica gentecuna ima shina cashcata pi huillachunca mana minishtircachu. Gentecunapaj shungu ima shina cashcataca paica allimi yacharca.