2 Crónicas
32 Ezequías tucui cai allicunata rurashca qꞌuipami Asiriamanta rey Senaqueribca Judá llajtaman a la fuerza yaicungapaj shamurca. Asiriamanta reyca muyundijta pircashca llajtacunaman a la fuerza yaicusha nishpami chai llajtacuna muyundijta shayarirca.
2 Ezequiasca rey Senaquerib Jerusalenpaj contra macanacungapaj shamushcata ricushpami 3 chai llajta canlla ladopi caj pugyu yacucunata tapanata decidirca. Chaimi pai decidishcata paipaj mandajcunahuan, paipaj soldadocunahuan parlanacunaman rirca. Paicunapish chai yuyaitami apoyarcacuna. 4 Achca gentecunata tandachishpami tucui pugyu yacucunata tapai callarircacuna. Shinallataj Jerusalén muyundijta pasaj larca yacutapishmi tapai callarircacuna. Paicunaca: “¿Imamantataj Asiriamanta reycuna cai allpapi achca yacu tiyashcata ricushpa japichunca saquishunyari?” nircacunami.
5 Pero Ezequiasca tucui shunguhuanmi chai llajtapi tꞌuñirishca tucui pircataca cutin shayachirca. Shinallataj pirca jahuapica torrecunatami shayachirca. Chai llajtapaj canlla ladomanpish shujtaj pircatami shayachirca. Davidpaj Llajtapica Miló* nishca lomatapishmi allichirca. Achca lanzacunata, escudocunatapishmi rurarca. 6 Chai qꞌuipaca gentecunata mandachunmi soldadocunata pushajcunata churarca. Paicunataca chai llajtapi tiyaj pungu plazapi tandachishpami cashna nishpa animarca:* 7 “Cancunaca sinchi caichij, ama manchaj caichijchu. Asiriamanta reytapish, paihuan caj gentecunatapish ama manchaichijchu, ama chujchuichijchu. Paicunahuan cajcunaca ashacunallamari, pero ñucanchijhuan cajcunaca achcacunamari. 8 Senaqueribca runacunapaj poderllahuanmari can. Pero ñucanchijta ayudangapajpish, ñucanchij macanacuicunata macanacungapajpish Jehová Diosmari ñucanchijhuan can” nircami. Rey Ezequías chashna nijpimi Judá llajtapi causaj gentecunaca mana manchashpa sinchiyarcacuna.
9 (Rey Senaqueribca Lakís llajtapimi paipaj tucui soldadocunahuan carca). Chai qꞌuipaca Asiriamanta rey Senaqueribca paita sirvijcunatami Jerusalenpi caj Judá llajtata mandaj rey Ezequiasman, Jerusalenpi caj tucui Judá llajtapi causajcunamanpish cashna nichun cacharca:
10 “Asiriamanta rey Senaqueribca caitami nin: ‘¿Jerusalén muyundijta soldadocuna ña shayacujta ricushpapish cancunaca maijanpi confiashpataj mana llujshinguichijyari? 11 Ezequiasca “Ñucanchij Jehová Diosmari Asiria llajtata mandajmantaca quishpichinga” nishpaca cancunataca umacunmari. Ashtahuanpish cancunaca yaricaihuan, yacunaihuanmi huañunguichij. 12 ¿Manachu Ezequiasllataj adorana lugarcunata,* cancunapaj Diospaj altarcunatapish anchuchirca? Qꞌuipamanca Judapi, Jerusalenpi causajcunamanca “Cancunaca shuj altar ñaupajllapimi cumurina canguichij. Chaipimi sacrificiocunata cushnichina canguichij” nircami. 13 ¿Ñuca ñaupa yayacunapish, ñucapish shujtaj allpapi tiyaj tucui pueblocunahuan imata rurashcataca manachu cancunaca yachanguichij? ¿Chai llajtapi causajcunapaj dioscunaca paicunata ñuca maquimanta mana quishpichi tucushcataca manachu ricushcanguichij? 14 Ñuca ñaupa yayacunaca achca llajtacunatami ñaupa tiempopica tucuchirca. Chai llajtacunapaj dioscunaca chai llajtacunapi causajcunataca ñuca maquimanta mana quishpichi tucushcachu. Maitataj cancunapaj Diosca ñuca maquimantaca quishpichi tucungayari. 15 ¡Ezequías cancunata llullashpa umachunca ama saquichijchu! Paipi ama feta churaichijchu. Llajtacunapaj dioscunapish, gobiernocunapaj dioscunapish paicunapaj gentecunataca ñuca ñaupa yayacunapaj maquimanta, ñuca maquimantapish mana quishpichi tucushcachu. Maitataj cancunapaj Dioscarin ñuca maquimantaca quishpichi tucungayari’ ninmi” nircami.
16 Senaqueribta sirvijcunaca Jehová Diospaj contra, paita sirvij Ezequiaspaj contrami achca mana allicunata rimashpa catircacuna. 17 Ashtahuanpish Senaqueribca israelitacunapaj Jehová Diosta cꞌamishpami cartacunata escribirca. Shinallataj paipaj contra rimashpami: “Caishuj llajtacunamanta dioscunaca ñuca maquimantaca paicunapaj pueblocunataca mana quishpichi tucurcachu. Chashnallatajmi Ezequiaspaj Diospish ñuca maquimantaca paipaj pueblotaca mana quishpichi tucunga” nirca. 18 Jerusalén pirca jahuapi caj gentecunata manchachingapaj, chujchuchingapajmi judiocuna rimashca shimipi caparinata mana saquircacuna. Chashnami paicunataca manchachishpa, chujchuchishpa chai llajtata mishashpa japisha nircacuna. 19 Paicunaca ima shinami shujtaj allpapi tiyaj tucui pueblocunapaj dioscunapaj contra parlarcacuna, chashnallatajmi Jerusalenpi tiyaj Diospaj contrapish parlarcacuna. Chai shujtaj allpapi tiyaj dioscunaca runacunapaj maquicunahuan rurashcacunami can. 20 Chashna paicuna rimacujpimi rey Ezequiaspish, Amospaj churi profeta Isaiaspish jahua pachapi caj Diosta caparishpa ayudachun mañarcacuna.
21 Chaimi Jehová Diosca shuj angelta cachashpa Asiria llajtamanta reypaj tucui sinchi macanacuj soldadocunata, pushajcunata, carpa huasicunapi pushajcunatapish huañuchirca. Shinallataj Senaqueribca humillarishpami paipaj llajtaman tigrarca. Qꞌuipamanca Senaquerib paipaj dioscunata adorana huasiman yaicujpimi paipaj huaquin churicuna espadahuan paitaca chaipi huañuchircacuna. 22 Chashnami Jehová Diosca Ezequiastapish, Jerusalenpi causajcunatapish Asiria llajtata mandaj rey Senaqueribpaj maquimanta, paipaj tucui contracunapaj maquicunamantapish quishpichirca. Shinami Diosca tucui ladocunapi sumaj causaita curca. 23 Achca gentecunami Jehová Diospajca regalocunata Jerusalenman apamurcacuna. Judá llajtata mandaj Ezequiaspajpish alli cosascunatami apamurcacuna. Chai qꞌuipaca rey Ezequiasca tucui llajtacunapaj ñaupajpimi respetashca tucurca.
24 Chai punllacunapica Ezequiasca ungushpami ñalla huañugrirca. Chaimi paica Jehová Diosta mañarca. Diosca paipaj mañashcataca cutichircami. Shuj señaltapishmi curca. 25 Pero Ezequiasca chai alli cosascunata Dios paimanta rurashcataca mana valichircachu. Paipaj shungupishmi jatun tucurca. Chaimantami Diosca paihuanpish, Judapi causaj gentecunahuanpish, Jerusalenpi causaj gentecunahuanpish pꞌiñarirca. 26 Pero Ezequiasca humillarishpami jatun tucushca canata saquirca. Jerusalenpi causajcunapish chashnallatajmi rurarcacuna. Chaimantami Ezequiaspaj punllacunapica Jehová Diosca paicunata mana castigarca.
27 Ezequiasca achca cosascunatami charirca, jatunyachishcapishmi carca. Shinallataj cullquipaj, oropaj, sumaj rumicunapaj, aceite balsamicopaj, escudocunapaj, tucui sumaj cosascunapajpish huaquichina cuartocunatami rurarca. 28 Pꞌucushca granocunata, llullu vinota, aceiteta huaquichina cuartocunatapishmi rurarca. Shinallataj tucui laya animalcunata churana corralcunatapish, ovejacunapaj corralcunatapishmi rurarca. 29 Ezequiasca llajtacunatapishmi paipaj shayachirca. Paica achca huagracunata, ovejacunata, chivocunatami charirca. Dios chashna cujpimi paica achca cosascunataca charirca. 30 Ezequiasca Guihon pugyumanta llujshishca larca yacutami taparca. Paica chai yacucunataca urimanmi inti huashicun ladoman caj Davidpaj Llajtaman aparca. Ezequías tucui imalla rurashcacunapish allimi llujshirca. 31 Pero Babilonia llajtata mandajcunaca paicunapaj huillajcunatami chai llajtapi ricurij señalhuan ima tucushcata yachangapaj Ezequiasta tapuchun cacharcacuna. Chashna cachajpimi Diosca Ezequiasllataj imata ruranata decidichun saquirca. Chaimi Diosca paipaj shungupi imata charishcata yachai tucurca.
32 Ezequiaspaj causaimantapish, paipaj mana tucurij cꞌuyaimantapish Amospaj churi profeta Isaías muscuipi shina ricushcacunata quillcashcapimi tiyacun. Chai quillcashcacunaca Judá llajtamanta, Israel llajtamanta Reycunapaj Libropimi quillcashca tiyacun. 33 Qꞌuipamanca Ezequiasca huañurcami.* Shinallataj Davidpaj churicunata pambashca jutcucuman rina huichi ñanpimi pambarcacuna. Pai huañujpica Judá llajtapi tucui causajcuna, Jerusalenpi causajcunapishmi paitaca jatunyachircacuna. Qꞌuipaca paipaj churi Manasesmi catij rey tucurca.