1 Corintios

13 Ñucaca runacunapaj rimaita, angelcunapaj rimaita rimashpapish cꞌuyaita mana charishpaca shuj campana bullata ruraj shina, shuj platillo* chꞌilin nicuj shinallami caiman. 2 Dios ima nishcata huillai tucushpapish, Dios tucui pacalla charicushcacunata intindishpapish, tucuita yachashpapish, urcucunata cuyuchingapaj feta charishpapish cꞌuyaita mana charishpaca mana imapish canichu. 3 Shujtajcunaman carangapaj tucui imalla charishcacunata cushpapish, jatun tucungapaj shujtajcunamanta ñuca causaita cushpapish cꞌuyaita mana charishpaca yangallami chaicunataca ruraiman.

4 Cꞌuyaita charijca pacienciata charijmi,* llaquijmi. Cꞌuyaita charijca mana envidianchu, ñucami ashtahuan alli cani mana ninchu, mana jatun tucunchu, 5 imapish pingai cajtaca mana ruranchu. Mana paillapi yuyanchu, mana jahualla pꞌiñarinchu. Llaquichijpipish mana yuyaipi charicunllachu. 6 Cashcata mana ruranahuanca mana cushicunchu. Ashtahuanpish mana llullahuanmi cushicun. 7 Tucuita apanllami, tucuita crinllami, tucuita shuyanllami, tucuita ahuantanllami.

8 Cꞌuyaica manataj tucuringachu. Shinapish Dios ima nishcata huillana poderpish tucuringami. Chꞌican chꞌican shimicunapi rimana poderpish tucuringami. Yachaita chasquina poderpish tucuringami. 9 Ñucanchijca ashallatami yachanchij. Dios ima nishcatapish ashallatami huillanchij. 10 Shinapish ña tucuita alli yachajpi, Dios ima nishcatapish tucuita huillajpica chai ashalla yachaipish, ashallata huillanapish tucuringami. 11 Ñucaca huahuaraj cashpaca huahua shinami parlaj carcani, huahua shinami yuyaj carcani, huahua shinami intindij carcani. Cunanca ña huiñashpaca huahuacuna rurashcataca mana ruranichu. 12 Cunanca fierro espejopi shinami zuyullata ricunchij. Shinapish qꞌuipataca pitapish ñahui ñahui ricucushca shinami alli ricushun. Cunanca ashallatami yachani. Ashtahuanpish qꞌuipataca Dios ima shinami ñucata rijsin, chashnallatajmi Diosmantapish tucuita yachasha. 13 Shinaca feta charinapish, shuyanapish, cꞌuyaipish mana tucuringachu. Cai quimsamanta ashtahuan yallica cꞌuyaimi.