Nehemías

9 Israelitacunaca séptimo quillapaj 24 punllapimi tandanacurcacuna. Chai punllaca ayunashpa, racu sacota* churarishpami paicunapaj jahuapipish ñutu allpata shitarircacuna. 2 Israelitacunaca shujtaj llajta gentecunamantami chꞌicanyarircacuna. Chai qꞌuipami paicunaca shayarishpa paicunapaj juchacunata, paicunapaj ñaupa yayacunapaj pandarishcacunatapish tucuita huillarcacuna. 3 Paicuna shayacushcapimi ñucanchij Jehová Diospaj Leyta quillcashca librotaca casi quimsa horasta sinchita liyircacuna. Cutin catij quimsa horastaca paicunapaj juchacunatami tucuita huillacurcacuna. Shinallataj ñucanchij Jehová Diospaj ñaupajpimi cunguricurcacuna.

4 Jesúa, Baní, Cadmiel, Sebanías, Buní, Serebías, Baní, Kenaní runacunaca levitacunapaj tarima jahuaman huichiyashpami ñucanchij Jehová Diosta caparishpa mañarcacuna. 5 Jesúa, Cadmiel, Baní, Hasabneya, Serebías, Hodías, Sebanías, Petahías levitacunaca cashnami nircacuna: “Jatarishpa Jehová Diosta huiñai huiñaipaj* alabaichij. Ñucanchij Dioslla, cambaj sumaj shutica alabashca cachun. Cambaj shutica ima bendicionmantapish, ima alabashcamantapish ashtahuan jatunmari.

6 Canllami Jehová Dios cangui. Canmi jahua pachatapish, jahua pachamanta jahuaman caj jahua pachacunatapish, chaicunapi tiyaj tucui soldadocunatapish* rurarcangui. Canmi allpa pachatapish, chaipi tucui imalla tiyajcunatapish, mama cuchacunatapish, chaicunapi tucui imalla tiyajcunatapish rurarcangui. Canmi tucuicunaman causaita cungui. Jahua pacha soldadocunaca cambaj ñaupajpimi cungurincuna. 7 Canmi Jehová Dios cangui, canmi Dios verdadero cangui. Canca Abranta agllashpami caldeocunapaj Ur llajtamanta llujshichircangui. Paitaca Abrahán shutitami shutichircangui. 8 Paipaj shungupi canta cazujta ricushpami paimanpish, paipaj huahua huahuacunamanpish cananeocunapaj, hititacunapaj, amorreocunapaj, perizitacunapaj, jebuseocunapaj, guirgaseocunapaj allpacunata cungapaj paihuan ari ninacurcangui. Canca cashcata ruraj cashcamantami can imalla cusha nishcataca pajtachircangui.

9 Chaimantami Egipto llajtapi ñucanchij ñaupa yayacuna llaquita apacujta ricushpa, Puca mama cucha cꞌuchupi ayudachun tucui shunguhuan paicuna mañashcata uyashpaca 10 faraonta, paita sirvijcunata, paipaj llajtamanta caj tucui gentecunata llaquichingapaj milagrocunata rurarcangui, señalcunatapish ricuchircangui. Paicuna jatun tucushpa cambaj pueblota llaquichishcamantami chashna rurarcangui. Chashnami cambaj shutitaca cunan punllacunacama rijsichishcangui. 11 Canta sirvijcunapaj ñaupajpimi mama cuchata chaupircangui. Chaimi paicunaca chaquishca allpata pasarcacuna. Caiman chaiman cuyuricuj yacupi rumita shitaj shinami paicunata llaquichijcunataca mama cucha yacu ucujman shitarcangui. 12 Punllaca shayacuj jatun pꞌuyuhuan, tutaca jatun lunyacuj ninahuanmi cambaj pueblotaca pusharcangui. Chashnami paicuna maita rina ñanta achijyachircangui. 13 Sinaí urcuman uriyashpami jahua pachamanta paicunahuan parlarcangui. Paicunamanca cashcata rurashpa juzgachunmi leycunata curcangui. Shinallataj mana llulla leycunata, mandashcacunata, alli mandamientocunatapishmi curcangui. 14 Cambajlla chꞌicanyachishca sábado punllatapishmi paicunaman ricuchircangui. Canta sirvij Moiseshuanmi mandamientocunata, mandashcacunata, shuj leytapish paicunaman curcangui. 15 Yaricachijpica jahua pacha micunatami* curcangui. Yacunachijpipish jatun pata rumimantami yacuta surcurcangui. Can cushatajmi nishca allpaman yaicushpa chaipi causachun nircanguimi.

16 Shinapish ñucanchij ñaupa yayacunaca jatun tucushcacuna, rumi shungumi tucurcacuna. Cambaj mandamientocunatapish mana cazurcacunachu. 17 Paicunaca mana cazusha nircacunachu. Paicunapaj ñaupajpi jatun milagrocunata can rurashcatapish mana yuyarircacunachu. Ashtahuanpish rumi shungu tucushpami Egiptoman esclavocuna shina tigrangapaj shuj pushajta agllarcacuna. Pero canca perdonaj, alli shungu, llaquij, pacienciata charij,* achcata cꞌuyajmi* cangui. Chaimantami paicunataca mana shitashpa saquircangui. 18 Paicunaca fierrota yacuyachishpa shuj bizita rurashpaca: ‘Caimi ñucanchij Dios. Paimari Egipto llajtamanta ñucanchijta llujshichirca’ nircacunami. Chashnami canta mana respetashcata ricuchircacuna. 19 Chashna rurajpipish canca yallitaj llaquij cashpami paicunataca chaquishca pambapi mana shitashpa saquircangui. Punllaca shayacuj jatun pꞌuyumi paicuna rina ñanta pushangapajca mana anchurirca. Cutin tutaca jatun lunyacuj ninami paicuna maita rina ñanta siempre achijyachirca. 20 Yachaisapacuna cachunpish cambaj alli espiritutami curcangui. Maná shuti cambaj tandatapish mana mitsarcanguichu. Paicuna yacunachijpipish yacutami curcangui. 21 Chaquishca pambapica 40 huatacunatami paicunaman cararcangui. Paicunapajca ima mana illarcachu. Paicunapaj ropapish mana tucurircachu, paicunapaj chaquicunapish mana pꞌunguircachu.

22 Paicunamanca llajtacunata, chai llajtacunapi causajcunatami curcangui. Allpacunatapish chaupishpami curcangui. Chaimantami paicunaca rey Sehón mandacushca Hesbón allpacunata, rey Og mandacushca Basán allpacunatapish japircacuna. 23 Paicunapaj huahuacunatapish jahua cielopi tiyaj estrellacunata shinami yallitaj achcata mirachircangui. Qꞌuipaca paicunapaj ñaupa yayacunaman cusha nishca allpamanmi pusharcangui. Paicunami chai allpataca japina carcacuna. 24 Chaimantami paipaj huahuacunaca chai allpaman yaicushpa japircacuna. Paicunapaj ñaupajpimi chai allpapi causaj cananeocunataca misharcangui. Chashna mishashpami paicuna munashcata rurachun chai llajtata mandaj reycunata, chaipi causajcunatapish paicunapaj maquipi curcangui. 25 Paicunaca muyundijta pircashca llajtacunata, alli allpacunatami japircacuna. Shinallataj tucui laya alli cosascunahuan junda huasicunata, yacuta tandana allashca jutcucunata, uva chagracunata, olivo chagracunata, frutacunata pꞌucuj achca yuracunatapishmi japircacuna. Chashnami huijsa pajtata micushpa gordoyarcacuna. Paicunaca can jatunta llaquishcamantami cushicurcacuna.

26 Chashnapish paicunaca mana cazushpami cambaj contra jatarircacuna. Cambaj Leytapish mana cazurcacunachu. Ashtahuanpish cambajman tigrarichun nishpa advertenciacunata cuj cambaj profetacunatami huañuchircacuna. Chashnami canta mana respetashcata ricuchircacuna. 27 Chaimantami paicunataca pꞌiñajcunapaj maquipi churarcangui. Paicunami achcata llaquichircacuna. Pero chashna llaquicunapi cashpaca ayudachunmi caparishpa canta mañarcacuna. Chashna mañajpimi canca jahua pachamanta uyarcangui. Canca jatunta llaquijmi cangui. Chaimantami paicunata pꞌiñajcunapaj maquimanta quishpichichun quishpichij runacunata cacharcangui.

28 Shinapish paicunata pꞌiñajcuna ña mana llaquichijpica cutinllatajmi cambaj ñaupajpica mana allita rurarcacuna. Chaimantami paicunata pꞌiñajcunapaj maquipi saquircangui. Paicunami achcata llaquichircacuna. Chashna llaquipi cashpaca cutinllatajmi ayudachun canta rogarcacuna. Chashna rogashcatami jahua pachamanta cutin cutin uyarcangui. Jatunta llaquij cashcamantami paicunataca quishpichircangui. 29 Cambaj Leyta cutin cazuchunmi advertenciacunata curcangui. Pero paicunaca jatun tucushpami cambaj mandamientocunataca mana uyashun nircacuna. Cambaj mandashcacunaca cazujcunamanca causaitami cun. Pero paicunaca chai mandashcacunata mana cazushpami juchapi urmarcacuna. Canta cungarishpami rumi shungu tucushpa mana uyashun nircacuna. 30 Achca huatacunatami pacienciata charishcata paicunamanca ricuchircangui. Cambaj profetacunata cachashpami cambaj espirituhuan advertenciacunata curcangui. Shinapish manataj uyasha nircacunachu. Chaimantami chai llajtacunapi causaj gentecunapaj maquipi churarcangui. 31 Canca jatunta llaquij Dios cashcamantami paicunataca mana tucuchircangui, mana shitashpa saquircangui. Canca alli shungu, llaquij Diosmi cangui.

32 Ñucanchij Dioslla, canca jatun, poderyuj, mancharina Diosmi cangui. Can ari nishcatapish pajtachishcanguimi. Cambaj mana tucurij cꞌuyaitapish ricuchishcanguimi. Cunanca, Asiria llajtata mandaj reycuna causashca punllacunamanta cunancama ñucanchijcuna, ñucanchij reycuna, ñucanchij mandajcuna, ñucanchij sacerdotecuna, ñucanchij profetacuna, ñucanchij ñaupa yayacuna, tucui cambaj pueblopish llaquita apashcataca ama yangata shina ricuhuaichu. 33 Canca tucuita pajtachij cashcamantami ñucanchij ima tucucujpipish cashcata rurashcangui. Ñucanchijmi mana allitaca rurashcanchij. 34 Ñucanchij reycunapish, ñucanchij mandajcunapish, ñucanchij sacerdotecunapish, ñucanchij ñaupa yayacunapish cambaj Leytaca mana cazurcacunachu. Can cushca mandamientocunatapish, can cushca advertenciacunatapish mana uyasha nircacunachu. 35 Paicunapaj reycuna mandacujpipish canmantami achca bendicioncunata chasquircacuna. Can cushca achca alli allpapimi causarcacuna. Shinapish cantaca mana sirvircacunachu. Ashtahuanpish mana allicunata rurashpami catircacuna. 36 Cunanca ricuhuayari, esclavocunami canchij. Allpapi pꞌucushca granocunata, imalla tiyashca allicunata micuchunmi cai allpataca ñucanchij ñaupa yayacunaman curcangui. Cai allpallapitajmi ñucanchijca esclavocuna canchij. 37 Ñucanchij juchacunamantami ñucanchij jahuapi reycunata churashcangui. Achcata pꞌucushca granocunaca paicunapajmi. Paicunapaj munaita rurashpami ñucanchijtapish,* ñucanchij animalcunatapish charincuna. Ñucanchijca achca llaquitami apacunchij.

38 Tucui caicunamantami shuj ari nishcata ruracunchij. Chai ari nishcatami quillcashpa churanchij. Chai quillcachishcata valichingapajca ñucanchij pushajcunapaj, ñucanchij levitacunapaj, ñucanchij sacerdotecunapaj sellohuanmi* sellashpa churanchij” nircacunami.