Romanos
2 Canca pi cashpapish shujtaj runata juzgashpaca mana justificari tucunguichu. Canpish can juzgashca runa shinallatajmi mana allita ruracungui. Chaimantami shujtaj runata juzgashpaca canllataj llaqui tucucungui. 2 Chaicunata rurajcunataca cashcata rurashpami Diosca juzgan. Chaitaca ñucanchijca allimi yachanchij.
3 Canpish can juzgashca runa shinallataj rurashpaca, ¿Dios juzgajpica quishpirishallami nishpachu yuyangui? 4 ¿Dios canta llaquishcata, canhuan mana utca pꞌiñarij cashcata, canman pacienciata ricuchishcatapish manachu yachangui? ¿Dios canta llaquishpa arrepintirichun ayudacushcataca manachu cuentata cungui? 5 Shinapish rumi shungu cashcamanta, mana arrepintirisha nishcamantami Diosca pai pꞌiñarishca punllapi cantaca llaquichinga. Pai pꞌiñarishcataca cashcata rurashpa juzgana punllapimi Diosca ricuchinga. 6 Paica cada unomanmi imata rurashcata ricushpa cunga: 7 allita rurashpa catijcunamanca* huiñai causaitami cunga. Paicunaca jatunyachishca canata, sumajyachishca canata, mana ismuj cuerpota charinatami mashcacuncuna. 8 Ashtahuanpish macanacuita jatarichijcunata, mana llullapi nishcata mana cazujcunata, mana allita rurajcunatapishmi Diosca pꞌiñarishpa llaquichinga. 9 Mana allita rurajcunaca judío cashpapish, griego cashpapish tucuicunami llaquicunata, nanaicunata apangacuna. 10 Shinapish allita rurajcunaca jatunyachishca canata, sumajyachishca canata, sumaj causaitami chasquingacuna. Chaitaca puntapica judiocuna, qꞌuipaca griegocunami chasquingacuna. 11 Diospajca tucuicunami igual canchij.
12 Moisesman cushca leyta mana yachashpa juchata rurajcunaca tucuicunami chai leyta mana yachashpa huañungacuna. Cutin Moisesman cushca leyta yachashca jahua juchata rurajcunaca chai leypi nishca shinami juzgashca cangacuna. 13 Leypi nishcata uyajcunaca Diospaj ñaupajpica cashcata rurajcunaca mana canchu. Ashtahuanpish leypi nishcata rurajcunami Diospaj ñaupajpica cashcata rurajcuna nishca cangacuna. 14 Shujtaj llajtamanta gentecunaca Diospaj leyta mana yachashpapish, chai leypi nishca shinami rurancuna. Paicuna leyta mana yachajpipish chai leyca paicunapaj shungupimi. 15 Shinallataj paicunapaj ruraicunahuanmi leyca paicunapaj shungupi quillcashca cashcata ricuchincuna. Ashtahuanpish paicunapaj concienciami allita ruracushcata o mana allita ruracushcata huillan. Chashnami paicunapaj yuyaillataj culpayuj cashcata o mana culpayuj cashcata ricuchin. 16 Runacuna pacalla rurashcataca pai juzgana punllapimi Diosca juzganga. Chaita rurachunca Cristo Jesustami agllashca. Chai alli huillaicunatami ñucaca huillacuni.
17 Canca judiomi cani, Dios cushca leytapish charinimi, Dioshuanpish allimi cani nishpami jatun tucungui. 18 Canca Moisesman cushca leyta yachashcamantami Diospaj munai maijan cashcata yachangui, alli ruraicunatapish alli nishpa chasquingui. 19 Mana ricujcunapaj pushaj, amsapi cajcunapaj luz cashcatami yuyangui. 20 Shinallataj yuyai illajcunata yachachij, uchilla huahuacunatapish yachachij cashcatami yuyangui. Canca Diosmanta ashallata intindishpapish, Moisesman cushca leypi Diosmanta mana llullata yachashpapish..., 21 shujtajcunata yachachij cashpapish, ¿ima nishpataj canllatajca mana yachachiringuiyari? Canca “Mana shuhuanachu” nishpa huillashpapish, ¿ima nishpataj shuhuanguiyari? 22 Canca “Ama huainayangui” nishpapish, ¿ima nishpataj huainayanguiyari? Canca rurashcalla dioscunata pꞌiñashpapish, ¿ima nishpataj chai huasicunamantaca shuhuanguiyari? 23 Canca Diospaj leyta yachashpami jatun tucungui. Chashnapish ¿ima nishpataj chai Leyta mana cazushpa Diostaca pingaipi churanguiyari? 24 Quillcachishcapi nishca shinaca, “cancunapaj mana alli ruraicunamantami shujtaj llajtamanta gentecunaca Diospaj shutita cꞌamincuna”.
25 Circuncisionta* rurachishcaca leypi nishcata cazujpillami valin. Leypi nishcata mana cazujpica chai circuncisionta rurachishcaca imapaj mana valinchu. 26 Shinapish circuncisionta mana rurachishca runa Leypi nishcata cazujpica Diosca, ¿manachu paitaca circuncisionta rurachishcata shina ricunga? 27 Canca Leymanta, circuncisionmanta yachashpapish chaitaca mana cazunguichu. Chaimantami circuncisionta mana rurachishca runaca Leypi nishcata cazushcamanta cantaca juzganga. 28 Ñahui ricuillapi judío cajca mana judío canchu. Aichapi circuncisionta rurachishcapish imapaj mana valinchu. 29 Ashtahuanpish judioca ucu shungumantami judío can. Circuncisiontapish shungupimi rurachin. Chaitaca mana Leyta catishpallachu ruran. Ashtahuanpish espíritu santomi chaita ruran. Chai runataca mana runacunachu jatunyachin, ashtahuanpish Diosmi paitaca jatunyachin.