2 Corintios
3 ¿Ñucanchijca cutinllatajchu picuna cashcata cancunamanca huillana canchij? ¿Shujtajcuna shinachu ñucanchijmanta allita parlaj cartacunata cancunamanca cuna canchij? ¿Ñucanchijmanta cai laya cartacunata cancuna quillcachunchu minishtinchij? Mana. 2 Cancunallatajmi ñucanchijmanta allita parlaj carta canguichij. Tucui gentecuna rijsishca, liyishca, ñucanchij shungupi quillcashca cartami canguichij. 3 Cancunaca Cristo allita parlashca cartami canguichij. Chaitaca Diosta sirvijcunami quillcarcanchij. Cai cartaca mana tintahuan quillcashcachu can. Ashtahuanpish causaj Diospaj espirituhuanmi quillcashca can. Shinallataj rumi jahuapica mana quillcashcachu can. Chaipaj randica aichapi, shungupimi quillcashca can.
4 Ñucanchijca Cristomantami Diospaj ñaupajpi alli sirvijcuna cashcata crinchij. 5 Shinapish ñucanchij fuerzamanta imatapish rurai tucushcataca mana nicunchijchu. Ashtahuanpish imata alli ruraj cachunca Diosmi yachachin. 6 Diosca mushuj ari ninacushcapi sirvij cachunmi ñucanchijtaca yachachishca. Chai ari ninacushcaca mana quillcashca Leymantachu can, ashtahuanpish Diospaj espiritumantami can. Quillcashca Leyca huañuitami cun. Cutin Diospaj espirituca causaitami cun.
7 Huañuiman apaj Leyca rumipi quillcashcami carca. Chai Leyca yallitaj achijnicujmi shamurca. Moisespaj ñahui yallitaj achijnicujpimi israelitacunaca chai achijnicujtaca mana ricui tucurcacuna. Shinapish chai achijnicujca chingaringapajllami carca. 8 Chai Ley achijnicuj cajpica, ¿manachu Diospaj espiritumanta ruraicunacarin ashtahuan achijnicuj canga? 9 Runacunata huañuiman apaj Ley achijnicuj cajpica, ¡cashcata rurajcuna cachun ayudaj ruraicunacarin ashtahuan yalli achijnicujmi canga! 10 Chai Leyca achijnicuj cashca cashpapish mushuj ari ninacushca shamujpimi achijnicuj canata saquirca. 11 Chingarinalla Ley achijnicuj cashca cashpaca, ¡mana chingarij mushuj ari ninacushcacarin ashtahuan achijnicujmi cana can!
12 Chaita shuyacushcamantami ñucanchijca mana manchashpa huillashpa caticunchij. 13 Shinapish Moisés rurashca shinaca mana ruranchijchu. Moisesca chingarinalla achijnicuj Leyta israelitacuna ama ricuchunmi paipaj ñahuitaca shuj velohuan taparirca. 14 Chashna rurajpipish paicunapaj yuyaipica mana intindircacunachu. Cunan punllacamami paicunaca shuj velohuan taparishca shina ñaupa ari ninacushcataca mana intindincuna. Chai velotaca Cristo ayudajllapimi paicunapaj yuyaimantaca anchuchi tucuncuna. 15 Cunan punllacamami paicunapaj shunguca shuj velohuan tapashca shina can. Chaimantami Moisés quillcashcataca mana intindi tucuncuna. 16 Ashtahuanpish Jehová* Diospajman tigrarijpimi chai veloca anchurin. 17 Jehová* Diosca espiritumi. Jehová* Diospaj espirituta charijcunaca cacharichishcacunami. 18 Tucui ñucanchijcunaca ñucanchij ñahuimantami velota anchuchishcanchij. Chaimantami Jehová* Dios achijnicuj cashcataca shuj espejo shina ñucanchijca ricuchinchij. Diosman rijchaj cangapajmi mushujyachishca canchij. Chashnami Jehová* Dios munashca shina pai achijnicuj cashcataca ashtahuan ashtahuan ricuchishun. Paica espiritumi.*