2 Reyes
4 Profetacunapaj churicunamanta shuj profetapaj huarmica Eliseota rogarishpami: “Canta sirvij ñuca cusaca huañushcamari. Canta sirvijca Jehová Diosta manchajmi carca. Chaitaca canca allimi yachangui. Cunanca dibita cobrajmari ñuca ishqui churicunata esclavota shina apanaman shamushca” nirca. 2 Chashna nijpimi Eliseoca: “¿Canmantaca imatataj rurai tucuni? ¿Cambaj huasipica imatataj charingui?” nirca. Chaimi paica: “Canta sirvijca huasipica imata mana charinichu. Shuj jarra aceitellatami charini” nirca. 3 Chashna nijpimi Eliseoca: “Cambaj tucui vecinocunata chushaj jarracunata mañanaman ri. Can mashna jarracunata tandai tucushcata tandachi. 4 Chai qꞌuipaca huasiman cambaj churicunahuan rishpa, punguta huichcarishpa, tucui chai jarracunapi aceiteta jundachingui. Ña jundachishca jarracunataca ladoman churangui” nircami. 5 Chaimi chai huarmica chaimanta rirca.
Huasi ucupi paipaj churicunahuan huichcarishca huashaca paipaj churicunami jarracunata pasachircacuna. Chaimantami paica jarracunapi aceiteta jundachishpa catirca. 6 Jarracunapi aceite ña junda cajpimi chai huarmica paipaj churicunamanta shujtaca: “Shujtaj jarrata apamui” nirca. Pero paipaj churica: “Jarracunaca ña mana ashtahuan tiyanca” nircami. Chashna nijpimi aceiteca ña mana llujshishpa catirca. 7 Chai huarmica Diosta sirvij runapajman rishpami ima tucushcata huillarca. Chaimi Eliseoca: “Chai aceiteta cꞌatugri, cꞌatushpa cambaj dibicunatapish pagai. Sobrashca cullquica canpish, cambaj churicunapish causachunmi ayudanga” nirca.
8 Shuj punllaca Eliseoca Sunem llajtamanmi rirca. Chai llajtapica shuj respetashca huarmimi tiyarca. Chai huarmica Eliseo paipaj huasipi micuchunmi cutin cutin rogarca. Eliseoca chaita pasacushpaca chai lugarpimi micungapaj siempre saquirij carca. 9 Chai huarmica paipaj cusamanca: “Ñucanchij huasita pasaj runaca Diospaj profeta cashcatami yachani. 10 Terrazapi paipaj shuj cuartota rurashun. Chaipica shuj camata, shuj mesata, shuj sillata, shuj candelerotapish churashun. Chashna rurajpimi pai caita shamushpaca chaipi saquiri tucunga” nircami.
11 Shuj punllaca Eliseoca chaiman chayashpaca samaringapajmi chai huasi terrazapi caj cuartoman llujshirca. 12 Chaipimi Eliseoca paita sirvij Guehazitaca: “Sunem llajtamanta huarmita cayai” nirca. Chashna nijpimi Guehazica chai huarmita cayarca. 13 Chai qꞌuipaca Eliseoca Guehazimanca: “Caita huillashpa mingui tucui: ‘Canca ñucanchijmanta preocuparishpami tucui caicunata rurashcangui. ¿Canmantaca imatataj rurachun munangui? ¿Reyman canmanta imata nichuntaj munangui? ¿O soldadocunata mandajman imata huillachuntaj munangui?’ ni” nircami. Chashna nijpimi chai huarmica: “Mana, ñucaca ima llaquita mana charinichu. Ñuca familiapaj chaupipimi tranquilo causani” nirca. 14 Chaimi Eliseoca Guehazitaca: “Shinaca ¿paimantaca imatataj rurai tucuni?” nishpa tapurca. Chashna tapujpimi Guehazica: “Paica shuj churitaca mana charinchu. Paipaj cusapish ñami yuyaj can” nishpa cutichirca. 15 Chashna nincami Eliseoca: “Chai huarmita cayai” nirca. Chaimi Guehazica chai huarmita cayarca. Chai huarmi shamushpaca pungu yaicunllapimi saquirirca. 16 Chaipimi Eliseoca: “Shamuj huataca cunan punlla shinapimi shuj cꞌari huahuata cambaj rigrapi marcashca charingui” nirca. Shina nijpimi chai huarmica: “¡Diosta sirvij runa ñuca amito! Canta sirvijmanca ama llullacunata nichu” nirca.
17 Chai huarmica Eliseo nishca shinami chichu saquirishpa catij huataca chai punllacunallapitaj shuj churita huacharca. 18 Chai huahuaca huiñarcami. Shuj punllaca chai huahuaca paipaj yaya cosechajcunahuan cajtami ricunaman rirca. 19 Chaimi paica paipaj yayamanca: “¡Aij, ñuca umatamari nanan! ¡Aij, ñuca umatamari nanan!” nirca. Chashna nijpimi paipaj yayaca paita sirvijtaca: “Huahuata aparishpa paipaj mamapajman apai” nirca. 20 Chaimi chai sirvij runaca huahuata aparishpa paipaj mamapajman tigra apashpa rirca. Chai huahuaca paipaj mamapaj changapimi chaupi punllacama tiyacurca. Qꞌuipaca huahuaca huañurcami. 21 Chai huarmica Diosta sirvij runapaj cuartoman rishpami paipaj camapi huahuata sirichishpa, punguta huichcashpa chaimanta rirca. 22 Qꞌuipaca paipaj cusata cayashpami: “Diosta sirvij runata ricushpa rato tigramungapaj saquihuai. Cambaj shuj sirvijta burrota apamuchun cachai” nirca. 23 Shina nijpimi paica: “¿Imamantataj cunan ricunaman risha ningui? Mana llullu lunachu, mana sabadochu” nirca. Shinapish paica: “Ama sustarichu, tucuimi alli can” nircami. 24 Chaimi paica burrota parejashpa paita sirvijtaca: “Rato callpai, ñuca shayaringui nijllapi shayaringui” nirca.
25 Chaimantami paica Diosta sirvij runata Carmelo urcupi ricunaman rirca. Diosta sirvij runa ñapish carumanta chai huarmita ricushpaca, paita sirvij Guehazimanca cashnami nirca: “¡Ricui! Sunem llajtamanta huarmica chaipimari. 26 Paita tupanaman callpahuai. Paihuan tupashpaca: ‘¿Canpish, cambaj cusapish, cambaj huahuapish allillachu can?’ nishpa tapungui” nircami. Chaimi Guehazí callpashpa chai huarmita tapunaman rirca. Chashna tapujpimi chai huarmica: “Tucuimi alli can” nirca. 27 Diosta sirvij runaca urcupimi carca. Chai huarmi chaiman chayashpaca Eliseopaj chaquicunatami chai rato ugllarirca. Chaita ricushpami Guehazica Eliseomanta paita anchuchingapaj cꞌuchuyarca. Shinapish Diosta sirvij runaca: “Saquilla, paica yallitaj llaquillami. Pero mana yachanichu imamanta llaquilla cashcata. Jehová Diosca ñucamanca mana imata huillashcachu” nircami. 28 Chaimi chai huarmica: “Ñuca amito, ñucaca mana shuj churita mañarcanichu. ¿Manachu nircani ‘Mana pajtarina cajpica ama chashna nichu’ nishpa?” nirca.
29 Chashna nijpimi Eliseoca Guehazitaca: “Cambaj churanata cinturapi huatarishpa, ñuca tauna caspita apashpa rato ri. Canhuan pi tupajpipish ama saludangui. Canta pi saludajpipish ama cutichingui. Rato rishpa ñuca tauna caspita huahuapaj ñahui jahuapi churangui” nirca. 30 Shinapish chai huahuapaj mamaca: “Causaj Jehová Diospaj shutipi, cambaj shutipimi jurani. Can illajca manataj rishachu” nircami. Chashna nijpimi Eliseoca jatarishpa paihuan rirca. 31 Guehazica paicunata ñaupashpami chayarca. Chashnami chai huahuapaj ñahui jahuapi tauna caspita churarca. Shinapish huahua causaihuan cashca señalca ima mana tiyarcachu. Chaimi Eliseo maipi cashcaman tigrashpaca: “Huahuaca mana rijcharinchu” nirca.
32 Eliseo chai huasiman yaicujpica huahuaca camapimi huañushca siricurca. 33 Chaimi Eliseoca cuartopi huichcarishpa huahuamanta Jehová Diosta mañai callarirca. 34 Chai qꞌuipaca paica chai huahua siricushca camaman huichiyashpami huahuapaj jahuapi siririrca. Shinallataj paipaj shimitaca huahuapaj shimipi, ñahuicunatapish huahuapaj ñahuicunapi, maquicunatapish huahuapaj maquicunapi churashpami paipaj jahuapi siririrca. Shina rurajpimi huahuapaj cuerpoca cunujyai callarirca. 35 Shinallataj Eliseoca huasipimi caiman chaiman puri callarirca. Paica cama jahuaman llujshishpami cutin chai huahuapaj jahuapi siririrca. Chaimi chai huahuaca canchis cutin jachij nishpa ñahuita pascarca. 36 Eliseoca Guehazita cayashpami: “Sunem llajtamanta caj huarmita cayai” nirca. Chashna nijpimi Guehazica paita cayarca. Chaimi chai huarmica Eliseo maipi cashcaman yaicurca. Chaipimi Eliseoca paitaca: “Cambaj churita jatarichi” nirca. 37 Chai huarmica chai ucuman yaicushpaca Eliseopaj chaquiman urmashpami paipaj ñaupajpi pambacama cumurirca. Qꞌuipaca paipaj churita jatarichishpami chaimanta llujshirca.
38 Eliseoca Guilgal llajtaman tigrashpaca chaipi yaricai tiyashcatami ricurca. Profetacunapaj churicunaca Eliseopaj ñaupajpimi tiyacurcacuna. Chaimi Eliseoca paita sirvijtaca: “Ninapi jatun mangata shayachi. Profetacunapaj churicunapaj micunata yanui” nirca. 39 Profetacunapaj churicunamanta shujmi campopi malvacunata tandanaman rirca. Chaipimi shuj sacha calabaza plantata ricurca. Chai plantapi tiyaj calabazacunatami paipaj churanapi jundachingacama pallarca. Pai tigramushpaca pai apamushca calabazacuna ima cashcata mana yachashpapish chaicunataca mirga mirga pꞌitishpami mangapi churarca. 40 Qꞌuipaca chai runacunamanmi micunata cararcacuna. Shinapish chai runacunaca micunata probashpami caparishpaca: “¡Diosta sirvij runa, cai mangapica venenomari tiyan!” nircacuna. Chaimi paicunaca mana micui tucurcacuna. 41 Chaipimi Eliseoca: “Harinata apamuichij” nirca. Mangapi chai harinata churashca huashami Eliseoca: “Gentecunaman caraichij” nirca. Chai mangapi tiyaj micunaca gentecunataca mana dañota rurarcachu.
42 Shuj runaca Baal-Salisá lugarmanta shamushpami Diosta sirvij runamanca cebadamanta rurashca 20 tandacunata apamurca. Chai tandacunaca punta pꞌucushca granocunahuan rurashcami carca. Shinallataj punta pꞌucushca cebadatami sacopi apamurca. Chaimi Eliseoca: “Caitaca gentecuna micuchun cui” nirca. 43 Shinapish paita sirvijca: “Cai apamushca micunaca ashallamari, 100 gentecunapajca mana pajtangachu” nishpami cutichirca. Pai chashna nijpimi Eliseoca: “Gentecuna micuchun cuilla. Jehová Diosca: ‘Micungacunami, micunapish sobrangami’ ninmi” nirca. 44 Chaimi paica micunata sirvirca. Jehová Dios nishca shinami paicunaca micurcacuna. Micunapish sobrarcami.