2 Timoteo
4 Cristo Jesusca achijllata ricurishpa, paipaj Gobiernopi mandacushpami causajcunatapish, huañushcacunatapish juzganga. Cristo Jesuspaj ñaupajpi, Diospaj ñaupajpimi cantaca caita mandani: 2 Diospaj shimitaca alli tiempopipish, llaqui tiempopipish utca huillai. Shuj alli yachachij shina tucui pacienciahuan sinchita cunai, sinchita rimai, aconsejai. 3 Shuj tiempoca gentecunaca alli yachaitaca mana uyangacunachu. Ashtahuanpish paicunapaj quiquin munaita catishpami paicuna uyasha nishcallata parlaj yachachijcunata mashcangacuna. 4 Paicunaca mana llullata uyanata saquishpami yanga parlocunallata uyangacuna. 5 Shinapish canca tucuipi alli yuyaiyuj cashcata ricuchi, llaquicunata ahuantai, alli huillaicunata huillashpa cati, Diostapish alli sirvi.
6 Ñucaca sacrificio jahuapi vino ofrendata ña tallishca shinami cani. Ñuca quishpirina punllapish ñami cꞌuchuyamucun. 7 Alli macanacuipimi macanacushcani. Callpanatapish tucuchishcanimi. Crishcapipish catishcanimi. 8 Cashcata rurashpa juzgaj Amitomi cunanmanta ñucapajca shuj coronata huaquichishpa charicun. Chai coronaca cashcata rurajcunapajmi can. Paica juicio punllapimi shuj premiota shina ñucamanca cunga. Shinapish mana ñucallamanchu cunga, ashtahuanpish pai ricurina tiempota shuyacujcunamanpishmi cunga.
9 Ima laya tucushpapish ñucata ricunaman utca shamui. 10 Demasca cai pachata* cꞌuyashcamantami ñucallata saquishpa Tesalónica llajtaman rirca. Shinallataj Crescenteca Galacia llajtamanmi rirca. Cutin Titoca Dalmacia llajtamanmi rirca. 11 Lucasllami ñucahuan can. Marcosta canhuan pushamui. Paica Diospaj obrata ruranapica achcatami ñucata ayudanga. 12 Tiquicotaca Éfeso llajtamanmi cacharcani. 13 Ñucapajman shamushpaca Troas llajtapi saquishca capata apamungui. Chai capataca Carpo nishcapaj huasipimi saquircani. Rollocunatapish apamungui. Ashtahuantajca caramanta rurashca rollocunata apamungui.
14 Cobremanta imatapish ruraj Alejandroca achcatami ñucataca llaquichirca. Jehová* Diosmi paimanca pai rurashca shinallataj cunga. 15 Canpish paimanta cuidaringui. Chai runaca ñucanchij huillashcataca tucui layami jarcarca.
16 Autoridadcunapaj ñaupajpi punta cutin ñuca difindiricujpica ñuca ladopica pi mana carcachu. Ashtahuanpish tucuicunami ñucataca shitashpa rircacuna. Chashna rurashcamanta Dios paicunata ama culpachunmi munani. 17 Shinapish Amito Jesusca ñuca ladopimi carca. Paimi tucui llajta gentecuna uyachun, alli huillaicunata tucuicunaman huillachunca ñucaman poderta curca. Leonpaj shimimantapish paillatajmi ñucataca quishpichirca. 18 Amito Jesusmi ñucataca tucui mana allimanta quishpichinga. Jahua pacha paipaj Gobiernoman pushashpami ñucataca quishpichinga. Paica huiñai huiñaita jatunyachishca cachun. Chashna cachun.*
19 Priscatapish, Aquilatapish, Onesiforopaj huasipi cajcunatapish ñuca partemanta saludapangui.
20 Erastoca Corinto llajtapimi saquirirca. Cutin Trofimotaca ungushca cashcamantami Mileto llajtapi saquimurcani. 21 Manaraj tamya punllacuna chayamujpi ima layapish utca shamungui.
Eubulo, Pudente, Lino, Claudia, tucui huauquicunapishmi canmanca saludocunata cachan.
22 Amito Jesusca cambaj alli yuyaita* bendiciachun. Shinallataj paica yallitaj llaquij cashcata cancunaman ricuchichun.