Jeremías

32 Judá llajtamanta rey Sedequías chunga huatacunata mandacujpi, rey Nabucodonosor* 18 huatacunata mandacujpimi Jehová Diosca Jeremiasmanca shuj huillaita huillarca. 2 Chai tiempopica Babiloniamanta reypaj soldadocunaca Jerusalén muyundijpimi shayacurcacuna. Profeta Jeremiasca Guardiacunapaj Patiopimi prezu carca. Chai patioca Judamanta reypaj huasi* cꞌuchupimi carca. 3 Judá llajtamanta rey Sedequiasca Jeremiastaca huichcashpami churashca carca. Paica cashnami nirca: “¿Imamantataj caicunataca huillanguiyari? Canca cashnami nishcangui: ‘Jehová Diosca caitami nin: “Cai llajtataca Babiloniamanta reypaj maquipimi churasha. Paimi mishashpa japinga. 4 Judá llajtamanta rey Sedequiasca caldeocunamantaca mana quishpiringachu. Paica Babiloniamanta reypaj maquipimi churashca canga. Paica reyhuanmi ñahui ñahui parlanga” ninmi. 5 “Chai reymi Sedequiastaca Babiloniaman apanga. Sedequiasca paihuan imata ruranata ñuca yuyaringacamami chaipi saquiringa. Cancunaca caldeocunahuan macanacushpapish mana mishanguichijchu” ninmi Jehová Diosca’ nishcanguimi” nircami.

6 Chai qꞌuipami Jeremiasca cashna nirca: “Jehová Diosca ñucamanca caitami nirca: 7 ‘Cambaj tío Salumpaj* churi Hanamel shamushpami cantaca: “Ñucaca Anatotpimi shuj allpata charini, chai allpata randi. Canmi tigra randingapaj puntaca derechota charingui” ningami’ nircami”.

8 Jehová Dios nishca shinami ñuca tiopaj churi Hanamelca Guardiacunapaj Patiopi ñucata ricunaman shamurca. Paica: “Ñucaca Anatotpimi shuj allpata charini, chai allpata randipai. Chai allpaca benjaminitacunapaj allpapimi can. Canmi chai allpahuan saquiringapaj, tigra randingapaj derechota charingui. Randipai” nircami. Chaipimi Jehová Dios nishca shimicuna cashcata intindircani.

9 Chaimi ñuca tiopaj churi Hanamelmanca Anatotpi saquirij allpata randircani. Paiman pagangapajca 17 siclo cullquitami* pesarcani. 10 Chai qꞌuipaca shuj escriturapi quillcashpami sellarcani. Shinallataj testigocunata cayanaman cachashpami cullquitaca balanzapi pesarcani. 11 Leypi nishca shina, reglamentocunapi nishca shina randishcata ricuchij sellashca escrituratapish, mana sellashca escrituratapishmi japircani. 12 Randishcata ricuchij escrituracunataca Mahseyapaj nieto, Neriaspaj churi Barucmanmi curcani. Chaicunataca ñuca tiopaj churi Hanamelpaj ñaupajpi, randishcata ricuchij escriturapi firmaj testigocunapaj ñaupajpi, Guardiacunapaj Patiopi tiyacuj tucui judiocunapaj ñaupajpimi curcani.

13 Chai qꞌuipami tucuicunapaj ñaupajpi Baructaca cashna mandarcani: 14 “Jahua pacha soldadocunata mandaj Jehová Dios, israelitacunapaj Diosca: ‘Sellashca escrituratapish, mana sellashca escrituratapish ishquindijta japishpa achca tiempota huaquichishca cachun shuj barro puñupi churai’ ninmi. 15 Israelitacunapaj Dios, jahua pacha soldadocunata mandaj Jehová Diosca: ‘Cai llajtapica cutinllatajmi huasicunata, allpacunata, uva chagracunata randingacuna’ ninmi”.

16 Randishcata ricuchij escriturata Neriaspaj churi Barucman cushca qꞌuipami Jehová Diostaca cashna nishpa mañarcani: 17 “¡Aij Tucuita Mandaj Amito Jehová Dioslla! Ricui, canmi cambaj jatun poderhuan, cambaj poderyuj rigrahuan cielotapish, allpatapish rurashcangui. Cambajca imapish mana yallitaj sinchi canchu. 18 Canca huaranga huaranga gentecunamanmi cambaj mana tucurij cꞌuyaita ricuchingui. Shinapish yayacuna pandarishcamantaca paicunapaj huahuacunatami castigangui. Canca Dios verdadero, Jatun Dios, Poderyuj Diosmi cangui. Canca jahua pacha soldadocunata mandaj Jehová shutimi cangui. 19 Cambaj consejocunaca mai sumajmari. Can rurashcacunaca can poderyuj cashcatami ricuchin. Cambaj ñahuicunaca gentecuna tucui imalla rurashcatami ricucun. Paicuna ima shina causacushcamanta, imata ruracushcamanta paicuna japina cashcata cada unoman cungapajmi ricucun. 20 Egipto llajtapica milagrocunatami rurarcangui, señalcunatapishmi ricuchircangui. Chaicunataca cunan punllacamami yachancuna. Chashnami cunan rurashca shinallataj israelitacunapurapipish, tucui gentecunapurapipish cambaj shutita rijsichircangui. 21 Cambaj pueblo Israeltaca Egipto llajtamantami señalcunata ricuchishpa, milagrocunata rurashpa cambaj poderyuj maquihuan, cambaj poderyuj rigrahuan, mancharina ruraicunata rurashpa llujshichircangui.

22 Tiempohuanca paicunapaj ñaupa yayacunaman cushami nishpa jurashca cai allpatami curcangui. Cai allpapica achca leche, achca mielmi tiyan. 23 Paicunaca cai allpaman yaicushpami caipi causarcacuna. Pero can nishcataca mana cazurcacunachu, cambaj leypi nishca shinapish mana purircacunachu. Cambaj mandashcataca imata mana rurarcacunachu. Chaimantami paicunamanca tucui cai llaquita cacharcangui. 24 ¡Ricui! Llajtata llaquichishpa japingapajmi runacunaca allpa montonta churangapaj shamushcacuna. Cai llajtaca espadamanta, yaricaimanta, millai ungüicunamantami caldeocunapaj maquipi urmanga. Caldeocunaca cai llajtapaj contrami macanacucuncuna. Can ricushca shinaca tucui can nishcami pajtarishca. 25 Pero Tucuita Mandaj Amito Jehová Dioslla, canca ‘Allpataca cullquihuan randi, testigocunatapish cayaj cachai’ nishcanguimi. Cai llajta caldeocunapaj maquipi urmanataj cajpipish chaita rurachunmi mandashcangui” nishpami mañarcani.

26 Chai qꞌuipami Jehová Diosca Jeremiasmanca cashna nirca: 27 “Ñucaca Jehová Diosmi cani, tucui gentecunapaj Diosmi cani. ¿Ñucapajca imapish yallitaj sinchichu canga? 28 Chaimantami Jehová Diosca caita nin: ‘Cai llajtataca caldeocunapaj maquipi urmachunmi saquisha. Shinallataj Babiloniamanta rey Nabucodonosorpaj maquipi urmachunmi saquisha. Paimi cai llajtataca mishashpa japinga. 29 Cai llajtahuan macanacucuj caldeocunaca cai llajtaman yaicushpami ninata japichingacuna. Huasicunatapishmi rupachingacuna. Chai huasi terrazacunapimi gentecunaca Baalman sacrificiocunata cujcuna carca. Shinallataj shujtaj dioscunamanmi vino ofrendacunata tallijcuna carca. Chaicunataca ñucata pꞌiñachingapajllami rurajcuna carca’ ninmi.

30 ‘Israelmanta gentecunapish, Judamanta gentecunapish jovenmantami ñuca ñaupajpica mana allicunallata rurashcacuna. Israel puebloca paicunapaj maquihuan rurashca dioscunahuan ñucata pꞌiñachinataca mana saquincunachu’ ninmi Jehová Diosca. 31 ‘Cai llajtaca shayachishca punllamanta cunancamami ñucata colerachishca, yallitaj pꞌiñachishca. Chaimantami ñuca ñaupajmantaca anchuchishca cana can. 32 Israelmanta gentecunapish, Judamanta gentecunapish ñucata pꞌiñachingapajmi tucui mana allicunallata rurashcacuna. Paicunapish, paicunapaj reycunapish, paicunapaj mandajcunapish, paicunapaj sacerdotecunapish, paicunapaj profetacunapish, Judamanta runacunapish, Jerusalenpi causajcunapishmi mana allicunallata rurashcacuna. 33 Paicunaca ñucapajman tigrarinapaj randica ñucamantami caruyashpa catircacuna. Paicunata cutin cutin ñuca yachachisha nijpipish ni pi mana uyasha nircachu. Ñuca disciplinashcatapish ni pi mana chasquisha nircachu. 34 Ñuca shutita charij huasita mapayachingapajmi paicunapaj millanana rurashcalla dioscunata chaipi churarcacuna. 35 Shinallataj Baalta adorangapajmi Hinón pugru pambapica* adorana lugarcunata* rurarcacuna. Chaicunapimi paicunapaj churicunata, paicunapaj ushushicunata Mólek* diosman sacrificiota shina cushpa ninapi rupachircacuna. Chaita rurachunca ñucaca mana mandashcanichu. Chai millanana ruraicunata rurachun mañanataca mana yuyashcanillapishchu. Paicunaca Judamanta gentecunataca jatun juchapimi urmachircacuna’.

36 Cancunaca: ‘Cai llajtaca espadamanta, yaricaimanta, millai ungüimantami Babiloniamanta reypaj maquipi entregashca canga’ ninguichijmi. Chaimantami Jehová Dios, israelitacunapaj Diosca caita nin: 37 ‘Ñucaca pꞌiñarishpa, yallitaj pꞌiñarishpa, jatunta colerashpami paicunataca caita chaita cacharcani. Paicunata caita chaita cachashca tucui allpacunamanta tandachishpami cutin caiman pushamusha. Caipimi paicunaca tranquilo causangacuna. 38 Paicunaca ñuca pueblomi canga, ñucaca paicunapaj Diosmi casha. 39 Ñucata siempre manchachunmi paicunamanca shujlla shunguta cusha, shujlla ñanta rijsichisha. Paicunapaj allipaj, paicunapaj qꞌuipa shamuj huahuacunapaj allipajmi chashna rurasha. 40 Paicunahuanca huiñaipajmi shuj ari ninacuita rurasha. Paicunapaj allita ruranataca mana saquishachu. Ñucamanta ama caruyachunmi paicunapaj shungupica ñucata manchana yuyaita churasha. 41 Paicunapaj allicunata rurashpami achcata cushicusha. Paicunataca cai allpapi siempre causachunmi saquisha. Chaitaca tucui shunguhuan, tucui almahuanmi* rurasha’ ninmi” nircami.

42 “Jehová Diosca caitami nin: ‘Cai pueblota ima shinami jatunta llaquichishcani chashnallatajmi cunan cusha nishca shinallataj paicunamanca tucui alli cosascunata cusha. 43 Cancuna: “Cai allpaca shitashcami can. Caipica gentecunapish, animalcunapish mana tiyanchu. Caldeocunapaj maquipimi entregashca cashca” nicujpipish cai llajtapica cutinmi allpacunata randingacuna’ ninmi.

44 ‘Gentecunaca cullquihuanmi allpacunata randingacuna, randishcata ricuchij escrituracunataca sellashpami churangacuna, testigocunatapishmi cayaj cachangacuna. Tucui chaitaca benjaminitacunapaj allpapi, Jerusalén muyundijpi tiyaj llajtacunapi, Judapi tiyaj llajtacunapi, urcucunapi tiyaj llajtacunapi, pugru pambapi tiyaj llajtacunapi, ura ladopi saquirij llajtacunapimi rurangacuna. Ñucaca prezu shina apashcacunataca cutinllatajmi tigrachimusha’ ninmi Jehová Diosca”.