ESDRAS

1 Persiamanta* rey Ciro punta huatapi* mandacujpimi Jehová Diosca, Persiamanta rey Cirotaca tucui paipaj llajtapi shuj mandashcata huillachun yuyaita curca. Jehová Diosca Jeremiasman huillashca shimicuna pajtarichunmi chashna rurarca. Chai mandashcata quillcachishpaca cashnami churashca carca:

2 “Persiamanta rey Ciroca caitami nin: ‘Jahua pacha Jehová Diosmi tucui cai allpapi mandanacunata ñucaman cushca. Shinallataj Judapi saquirij Jerusalén llajtapimi paipaj huasita rurachun ñucaman mingashca. 3 ¿Cancunapuramantaca maijantaj paipaj pueblomanta canguichij? Cancunapaj Diosca cancunahuan cachun. Judapi saquirij Jerusalenman huichiyashpa israelitacunapaj Jehová Diospaj urmashca huasita* cutin shayachinguichij. Paica Dios verdaderomi can. Paipaj huasica Jerusalenpimi can. 4 Maijan judío shujtaj llajtapi causacushpa paipaj llajtaman tigragrijpica paipaj vecinocunami* paitaca ayudana can. Paicunaca orota, cullquita, huagracunata, ovejacunata, imalla charishca cosascunatapish cuchun. Shinallataj Jerusalenpi Diospaj huasita rurangapaj shungumanta cushca ofrendacunatapish cuchunlla’ ninmi”.

5 Ashtahuanpish Diosca Judapaj familiacunata* pushajcunata, Benjaminpaj familiacunata pushajcunata, sacerdotecunata, levitacunata, shujtajcunatapish Jerusalenpi Jehová Diospaj urmashca huasita cutin shayachinaman llujshichunmi yuyaita cushca carca. Chaimi paicunaca Jerusalenman llujshingapaj allichirircacuna. 6 Paicunapaj vecinocunaca shungumanta cushca ofrendacunahuan ayudashpapish, oromanta rurashca cosascunahuan, cullquimanta rurashca cosascunahuan, charishca cosascunahuan, huagracunahuan, ovejacunahuan, valishca cosascunahuanpishmi ayudarcacuna.*

7 Shinallataj rey Ciroca Jerusalenpi caj Jehová Diospaj huasimanta Nabucodonosor apashca cosascunata tigrachichunmi mandarca. Nabucodonosorca chai cosascunatami paipaj diospaj huasipi churashca carca. 8 Persiamanta rey Ciroca tesorerocunata mandaj Mitridatesmanmi chai apashca cosascunata llujshichishpa, shuj listapi anotashpa Judapaj familiamanta pushaj Sesbazarman* cuchun mandarca.

9 Chai listapica canasta laya orohuan rurashca 30 tazoncuna, canasta laya cullquihuan rurashca 1.000 tazoncuna, 29 shujtaj tazoncuna, 10 orohuan rurashca uchilla 30 tazoncuna, cullquihuan rurashca uchilla 410 tazoncuna, 1.000 shujtaj cosascunapishmi tiyarca. 11 Chai orohuan, cullquihuan rurashca tucuica 5.400-mi carca. Babiloniapi prezu shina cajcuna cutin Jerusalenman tigrajpimi Sesbazarca tucui chaita apashpa tigrarca.

2 Rey Nabucodonosorca judiocunatami Babiloniaman prezuta shina apashca carca. Paicunaca provinciapi causajcunami carca. Paicunami qꞌuipamanca Babiloniamanta llujshishpa Jerusalenman, Judaman cada uno paicunapaj propio llajtaman tigrarcacuna. 2 Chai gentecunata pushajcunaca Zorobabel, Jesúa, Nehemías, Seraya, Reelaya, Mardoqueo, Bilsán, Mispar, Bigvái, Rehúm, Baanami carcacuna.

Israelita cꞌaricunapish caicunami carcacuna. 3 Parospaj churicunaca 2.172-mi carca. 4 Sefatiaspaj churicunaca 372-mi carca. 5 Arapaj churicunaca 775-mi carca. 6 Pahat-Moabpaj churicuna, Jesuapaj churicuna, Joabpaj churicunaca 2.812-mi carca. 7 Elampaj churicunaca 1.254-mi carca. 8 Zatupaj churicunaca 945-mi carca. 9 Zacaipaj churicunaca 760-mi carca. 10 Banipaj churicunaca 642-mi carca. 11 Bebaipaj churicunaca 623-mi carca. 12 Azgadpaj churicunaca 1.222-mi carca. 13 Adonicampaj churicunaca 666-mi carca. 14 Bigvaipaj churicunaca 2.056-mi carca. 15 Adinpaj churicunaca 454-mi carca. 16 Ezequiaspaj familiamanta Aterpaj churicunaca 98-mi carca. 17 Bezaipaj churicunaca 323-mi carca. 18 Jorapaj churicunaca 112-mi carca. 19 Hasumpaj churicunaca 223-mi carca. 20 Guibarpaj churicunaca 95-mi carca. 21 Belenpaj churicunaca 123-mi carca. 22 Netofamanta cꞌaricunaca 56-mi carca. 23 Anatotmanta cꞌaricunaca 128-mi carca. 24 Azmavetpaj churicunaca 42-mi carca. 25 Quiryat-Jearimpaj, Kefirapaj, Beerotpaj churicunaca 743-mi carca. 26 Ramapaj, Guebapaj churicunaca 621-mi carca. 27 Micmasmanta cꞌaricunaca 122-mi carca. 28 Betelmanta, Haimanta cꞌaricunaca 223-mi carca. 29 Nebopaj churicunaca 52-mi carca. 30 Magbispaj churicunaca 156-mi carca. 31 Shujtaj Elampaj churicunaca 1.254-mi carca. 32 Harimpaj churicunaca 320-mi carca. 33 Lodpaj, Hadidpaj, Onopaj churicunaca 725-mi carca. 34 Jericopaj churicunaca 345-mi carca. 35 Senaapaj churicunaca 3.630-mi carca.

36 Sacerdotecunaca caicunami carca. Jedayapaj churicunaca 973-mi carca. Paicunaca Jesuapaj familiamantami carca. 37 Imerpaj churicunaca 1.052-mi carca. 38 Pasjurpaj churicunaca 1.247-mi carca. 39 Harimpaj churicunaca 1.017-mi carca.

40 Levitacunaca caicunami carca. Jesuapaj, Cadmielpaj churicunaca 74-mi carcacuna. Paicunaca Hodaviaspaj familiamantami carca. 41 Cantajcunaca caicunami carca. Asafpaj churicunaca 128-mi carca. 42 Punguta cuidajcunapaj churicunaca: Salumpaj churicuna, Aterpaj churicuna, Talmonpaj churicuna, Acubpaj churicuna, Hatitapaj churicuna, Sobaipaj churicunami carca. Tucuica 139-mi carcacuna.

43 Diospaj huasipi sirvijcunaca* caicunami carca: Zihapaj churicuna, Hasufapaj churicuna, Tabaotpaj churicuna, 44 Querospaj churicuna, Siahapaj churicuna, Padonpaj churicuna, 45 Lebanapaj churicuna, Hagabapaj churicuna, Acubpaj churicuna, 46 Hagabpaj churicuna, Salmaipaj churicuna, Hananpaj churicuna, 47 Guidelpaj churicuna, Gaharpaj churicuna, Reayapaj churicuna, 48 Rezinpaj churicuna, Necodapaj churicuna, Gazampaj churicuna, 49 Uzapaj churicuna, Paseahpaj churicuna, Besaipaj churicuna, 50 Asnapaj churicuna, Meunimpaj churicuna, Nefusimpaj churicuna, 51 Bacbucpaj churicuna, Hacufapaj churicuna, Harhurpaj churicuna, 52 Bazlutpaj churicuna, Mehidapaj churicuna, Harsapaj churicuna, 53 Barcospaj churicuna, Sisarapaj churicuna, Temahpaj churicuna, 54 Neziaspaj churicuna, Hatifapaj churicunami carca.

55 Salomonta sirvijcunapaj churicunaca caicunami carca: Sotaipaj churicuna, Soferetpaj churicuna, Perudapaj churicuna, 56 Jaalapaj churicuna, Darconpaj churicuna, Guidelpaj churicuna, 57 Sefatiaspaj churicuna, Hatilpaj churicuna, Pokéret-Hazebaimpaj churicuna, Amipaj churicunami carca.

58 Diospaj huasipi sirvijcunapish,* Salomonta sirvijcunapaj churicunapish tucuica 392-mi carca.

59 Cutin caicunami Tel-Melahmanta, Tel-Harsamanta, Kerubmanta, Adonmanta, Imermantapish huichiyarcacuna. Shinapish paicunaca maijan familiamanta* cashcata o israelita cashcatapish mana ricuchi tucurcacunachu. Paicunaca: 60 Delayapaj churicuna, Tobiaspaj churicuna, Necodapaj churicunami carca. Paicunaca 652-mi carca. 61 Sacerdotecunapaj churicunamantaca caicunami carca: Habayapaj churicuna, Hacozpaj churicuna, Barzilaipaj churicunami carca. Barzilaica Galaadmanta Barzilaipaj ushushicunamanta shuj ushushihuanmi cazararca. Chaimi paipaj huarmipaj familiapaj shutita japirca. 62 Paicunaca maijan familiamanta cashcata ricuchingapajmi paicunapaj familiapaj shuticunata registrashcacunapi mashcarcacuna. Chashna mashcashpapish paicunapaj shuticunataca mana japircacunachu. Chaimi paicunataca sacerdotecuna shina sirvichun mana saquircacuna. 63 Mandajca* Diospajlla chꞌicanyachishca micunataca shuj sacerdote Urimpi, Tumimpi ricushpa tapungacama ama micunguichij nishpami mandarca.

64 Tucui tigrajcunaca* 42.360 gentecunami carca. 65 Shinapish sirvijcunata, cantajcunataca paicunahuan igualca mana yupashcachu carca. Sirvij cꞌaricuna, sirvij huarmicunaca 7.337-mi carca. Cantaj cꞌaricuna, cantaj huarmicunapish 200-mi carca. 66 Paicunaca 736 caballocunata, 245 mulacunatami charircacuna. 67 Shinallataj 435 camellocunata, 6.720 burrocunatami charircacuna.

68 Jerusalenpi saquirij Jehová Diospaj huasiman chayashpaca, Diospaj huasita chai lugarllapitaj cutin shayachingapajmi yayacunapaj familiacunata pushajcunamanta huaquincunaca shungumanta cushca ofrendacunata curcacuna. 69 Cada unomi ima pudishcata curcacuna. 61.000 oro dracmacunata,* 5.000 mina* cullquita, sacerdotecunapaj 100 churanacunatami chai obrapajca curcacuna. 70 Sacerdotecunapish, levitacunapish, pueblomanta caj maijancunapish, cantajcunapish, punguta cuidajcunapish, Diospaj huasipi sirvijcunapishmi paicunapaj llajtacunallapitaj causangapaj saquirircacuna. Shinallataj tucui israelitacunaca paicunapaj llajtallapitajmi causai callarircacuna.

3 Séptimo quillacunapajca israelitacunaca* ñami paicunapaj llajtacunapi carcacuna. Paicunaca Jerusalenpimi imata ruranata yuyaringapaj tandanacurcacuna. 2 Jehozadacpaj churi Jesúa, paipaj compañero sacerdotecunapish, Sealtielpaj churi Zorobabelpish, paipaj huauquicunapishmi israelitacunapaj Diospaj altarta cutin shayachi callarircacuna. Chaitaca rupachishca sacrificiocunata cungapajmi Moisesman cushca leypi nishca shina rurarcacuna. Moisesca Diosta sirvijmi carca.

3 Chai cꞌuchullapi causaj gentecunata manchashpapish paicunaca altartaca maipimi ñaupa shayachishca carca, chai lugarllapitajmi cutin shayachircacuna. Qꞌuipaca chaipimi rupachishca sacrificiocunata Jehová Diosman cui callarircacuna. Tutamanta ladopish, chishi ladopishmi rupachishca sacrificiocunata cujcuna carca. 4 Quillcachishcapi nishca shinami Chuglla huasicunata rurana fiestata* rurai callarircacuna. Shinallataj punllantami rupachishca sacrificiocunataca cada punllapaj mashnata cuna cashcata curcacuna. 5 Chaicunata cushca huashaca punllanta rupachishca ofrendacunata, llullu lunapi cuna ofrendacunata, Jehová Diospaj jucha illaj tucui fiestacunapi cuna ofrendacunata, shungumanta cushca ofrendacunatami maijan cashpapish Jehová Diosman curcacuna. 6 Séptimo quillapaj punta punllamantami Jehová Diosmanca rupachishca sacrificiocunata cui callarircacuna. Chaipajca Jehová Diospaj huasipica cimientocunallatapish manaraj churashcacunachu carca.

7 Rumita pꞌaquij runacunamanpish, artesanocunamanpish cullquitami curcacuna. Sidoniocunamanpish, tiriocunamanpish Líbano llajtamanta Jopecama cedro caspicunata mama cuchapi huambuchishpa apachunmi micunata, ubyanata, aceitecunata curcacuna. Tucui chaicunataca Persiamanta rey Ciro mandashca shinami rurarcacuna.

8 Jerusalenpi tiyaj Diospaj huasiman paicuna tigramushcaca ñami ishqui huata, segundo quilla carca. Chaipimi Sealtielpaj churi Zorobabel, Jehozadacpaj churi Jesúa, paicunapaj caishuj huauquicuna, sacerdotecunapish, levitacunapish, prezu shina cashcamanta Jerusalenman tucui tigramushcacunapish chai obrataca rurai callarircacuna. Jehová Diospaj huasi ruraricujta ricuchunca 20 huatacunata yalli charij levitacunamanmi mingarca. 9 Jesuapish, paipaj churicunapish, paipaj huauquicunapish, Cadmielpish, paipaj churicunapish tucui paicunami Judapaj huahua huahuacunamanta carcacuna. Shinallataj Henadadpaj churicunapish, paicunapaj churicunapish, paicunapaj huauquicunapish levitacunami carcacuna. Paicunami tandanacushpa Diospaj huasi ima shina ruraricushcata ricurcacuna.

10 Trabajajcuna Jehová Diospaj huasipi cimientocunata churacujpica sacerdotecunapish Diospaj huasipi churana ropacunata churarishpami trompetacunata* apashpa ricurcacuna. Levitacunapish, Asafpaj churicunapish cimbalocunatami aparcacuna. Paicunaca Israel llajtata rey David mandashca shinami Jehová Diosta alabangapaj shayarircacuna. 11 Chashnami Jehová Diosta alabashpa pagui ni callarircacuna. Turnopi cantashpami: “Paica allimari, paipaj mana tucurij cꞌuyaipish israelitacunapajca huiñai huiñaipajmari” nircacuna. Qꞌuipaca Jehová Diospaj huasipi callari cimientocunata churashcamantami tucui gentecuna sinchita Jehová Diosta alabarcacuna. 12 Achca sacerdotecunapish, levitacunapish, yayacunapaj familiacunata pushajcunapish chai huasipaj cimientocunata churacujta ricushpami caparirishpa huacai callarircacuna. Paicunaca ñami yuyajcuna carca. Shinallataj paicunami ñaupa huasitaca ricushcacuna carca. Cutin caishujcunaca cushicuimantami tucui fuerzahuan caparirircacuna. 13 Huacashpa caparicushcamanta, cushicuihuan caparicushcamantami pi caparicushcata mana yachai tucurcacuna. Gentecuna sinchita caparijpimi paicuna caparishcaca caruman uyarirca.

4 Prezu shina apashcamanta tigramushca israelitacunapaj Jehová Diospaj huasita cutin shayachicushcatami Judapaj, Benjaminpaj contracunaca uyarcacuna. 2 Chaimi paicunaca Zorobabelpajman, yayacunapaj familiacunata pushajcunapajman cꞌuchuyashpaca: “Cancunahuan trabajachun saquichij, ñucanchijpish cancunapaj Diosllatatajmi adoranchij.* Ñucanchijca Asiriamanta rey Esar-Hadonpaj punllacunamantami sacrificiocunata ruracushcanchij. Paimi cai lugarmanca pushamurca” nircacuna. 3 Shinapish Zorobabel, Jesúa, yayacunapaj familiacunata pushajcunapish paicunataca: “Cancunaca ñucanchij Diospaj huasitaca ñucanchijhuanca mana ruranguichijchu. Israelitacunapaj Jehová Diospaj huasitaca ñucanchijllami rurashun. Ima shinami Persia llajtata mandaj Ciro mandarca chashnallatajmi ñucanchijca rurashun” nircacunami.

4 Chaimi chai cꞌuchulla llajtapi causaj gentecunaca chai huasita judiocuna ama shayachishpa catichun desanimachishpa, manchachishpa catircacuna. 5 Paicunaca judiocuna imallata rurashun nishcata jarcachunmi gobiernopaj trabajajcunata contratarcacuna. Persia llajtamanta rey Ciro mandacushca punllamanta, Persia llajtamanta rey Darío mandai callari punllacamami tucui punllacuna chashna jarcarcacuna. 6 Rey Asuero mandai callari punllacunapimi Judapi, Jerusalenpi cajcunata juchachishpa shuj cartata escribircacuna. 7 Shinallataj Persiamanta rey Artajerjes mandacui punllacunapimi Bislam, Mitrídates, Tabeel, paipaj caishuj compañerocunapish rey Artajerjesmanca shuj cartata escribircacuna. Paicunaca arameo shimimanmi traducircacuna. Shinallataj arameo* letracunahuanmi escribircacuna.

8 * Rehumca gobierno ucupica achca autoridadtami charirca. Paica mandashcacunata quillcaj Simsái runahuanmi rey Artajerjesmanca Jerusalenpaj contra shuj cartata escribircacuna. 9 (Chai cartataca gobierno ucupi achca autoridadta charij Rehúm, mandashcacunata quillcaj Simsái, caishuj compañerocuna, juezcuna, qꞌuipa mandajcuna, secretariocuna, Erec pueblopi cajcuna, babiloniocuna, Susapi causajcunami escribircacuna. Susapi causajcunaca elamitacunami carcacuna. 10 Shujtaj llajtacunamanta gentecunapishmi escribircacuna. Chai gentecunatami alli rijsishca, jatun Asnaparca prezu shina apashpa Samaria llajtapi tiyaj llajtacunapi causachun churarca. Shinallataj Éufrates jatun yacu inti huashicun ladopi causaj gentecunapishmi cai cartataca escribircacuna. 11 Paicunaca escribishca cartapaj cai copiatami cacharcacuna).

“Éufrates jatun yacu inti huashicun ladopi canta sirvijcunami cai cartataca rey Artajerjesman escribinchij: 12 Caitami reyman huillashun ninchij. Can maipimi cangui chai ladomanta judiocunaca* ñucanchij causan ladocunaman shamushpami cai Jerusalenpi cancuna. Paicunaca mana cazuj, millai llajtatami cutin shayachicuncuna, pircacunatapish ñami shayachishpa tucuchicuncuna. Shinallataj cimientocunatapishmi allichicuncuna. 13 Reymanca caitapishmi huillashun ninchij, paicunaca chai llajtata cutin shayachishpa, pircacunatapish tucuchishpaca impuestocunata, tributocunata, imalla pagana cashcacunatapish mana pagangacunachu. Chaimantami paicuna mana pagashcamanta cullquipish reycunapajca illanga. 14 Ñucanchijca cambaj palacio huasimantami pagotaca japinchij. Rey llaquicunata charichunca mana munanchijchu. Chaimantami can reyman huillangapaj cai cartata cachanchij. 15 Shinallataj cambaj ñaupa reycuna paicunapaj libropi imata registrashcata canllataj investigachunmi chashna huillanchij. Chashna chai libropi investigashpami cai llajta mana cazuj cashcata, reycunata, provinciacunata llaquichij cashcata cuentata cungui. Paicunami ñaupa punllacunamantapacha mana cazushpa reycunapaj contra jatarijcuna carca. Chaimantami paicunaca chingachishca carcacuna. 16 Shinallataj paicuna chai llajtata cutin shayachijpi, pircacunatapish tucuchijpica canca Éufrates jatun yacu inti huashicun ladopi cajcunataca ña mana mandai tucunguichu nishpami reyman huillanchij” nircacunami.

17 Chaimi reyca gobierno ucupi achca autoridadta charij Rehumman, mandashcacunata escribij Simsaiman, Samariapi causaj caishuj compañerocunaman, Éufrates jatun yacu inti huashicun ladopi causaj gentecunamanca cashna nishpa cutichirca:

“¡Cancunatami saludani! 18 Cancuna cachashca cartataca intindinallatami ñucaman ña liyircacuna.* 19 Ñuca mandashcamantami ñucata sirvijcunaca shuj investigacionta ña rurashcacuna. Chashnami ñaupamantapacha chai llajtaca reycunapaj contra tucushcata yachaj chayashcacuna. Chai llajtapi causajcunapish yallitaj bullacunata rurashpa reycunapaj contra jatarishcatami yachaj chayashcacuna. 20 Jerusalenpica achca poderta charij reycunami Éufrates jatun yacu inti huashicun ladopi caj llajtacunataca mandarcacuna. Cai reycunaca impuestocunata, tributocunata, imalla pagana cashcacunatami cobrajcuna carca. 21 Shinaca ñuca chai llajtata cutin shayachinguichij nishpa mandangacama chai gentecuna obrata ama rurashpa catichun mandaichij. 22 Chaita ruranataca ama cungaringuichij. Chashnami reypaj ashtahuan llaquicunaca mana tiyanga” nircami.

23 Chai qꞌuipaca rey Artajerjes cachashca cartapaj copiatami Rehumman, mandashcacunata quillcaj Simsaiman, paipaj caishuj compañerocunamanpish liyirca. Chaita uyashpami paicunaca chai rato Jerusalenman rishpa judiocuna ña ama trabajachun sinchita jarcarcacuna. 24 Chashna rurajpimi Jerusalenpi caj Diospaj huasita shayachinataca chai rato saquircacuna. Persiamanta rey Darío ishqui huatata mandangacamami chai huasitaca mana shayachi tucurcacuna.

5 Chai qꞌuipaca profeta Ageopish, Idopaj nieto profeta Zacariaspish Judapi, Jerusalenpi caj judiocunamanmi israelitacunapaj Diospaj shutipi huillarcacuna. Diosca paicunahuanmi carca. 2 Chaipimi Sealtielpaj churi Zorobabelpish, Jehozadacpaj churi Jesuapish Jerusalenpi saquirij Diospaj huasita cutinllataj shayachi callarircacuna. Diospaj profetacunapish paicunatami animashpa catircacuna. 3 Chai punllacunapica Éufrates jatun yacu inti huashicun ladopi mandaj Tatenaipish, Setar-Bozenaipish, paipaj compañerocunapish paicunapajman rishpami: “¿Cai huasita shayachichun, cai trabajota* tucuchichunca pitaj mandarca?” nishpa tapurcacuna. 4 Shinallataj: “¿Cai huasita shayachishpa trabajaj runacunapaj shuticunaca maijantaj can?” nishpami tapurcacuna. 5 Judiocunata pushajcunata* Dios cuidacushcamantami Tatenaipish, caishuj runacunapish mana jarcai tucurcacuna. Pero paicunaca imalla ruracushcatami rey Darioman huillanaman cacharcacuna. Chashnami paicunaca rey Darío shuj cartapi imata cutichingacama shuyana carcacuna.

6 Éufrates jatun yacu inti huashicun ladopi mandaj Tatenaipish, Setar-Bozenaipish, chai llajtacunata qꞌuipa mandaj caishuj compañerocunapishmi rey Dariomanca cartapaj shuj copiata cacharcacuna. 7 Chai cartapica cashna nishpami escribircacuna:

“Rey Darío:

¡Sumaj causaita charingui! 8 Judá provinciapi saquirij jatun Diospaj huasiman rishcatami reymanca huillanchij. Jatun rumicunahuan chai huasita cutin shayachicujtami ricushcanchij. Shinallataj patacunapipish jatun caspicunatami churacuncuna. Chai pueblopi causajcuna tucui shunguhuan sinchita trabajacushcamantami chai trabajoca ashtahuan utca ruraricun. 9 Chaimi judiocunata pushajcunataca: ‘¿Cai huasita shayachichun, cai trabajota tucuchichunca pitaj mandarca?’ nishpa tapurcanchij. 10 Chai obrata ricujcunapaj shuticunata quillcashpa quiquinman yachaj chayachingapajpishmi paicunapaj shuticunata tapurcanchij.

11 Chashna nijpimi paicunaca cashna cutichircacuna: ‘Ñucanchijca jahua pachatapish, cai pachatapish mandaj Diosta sirvijcunami canchij. Achca huatacuna huashamanmi Israel llajtamanta shuj jatun rey shuj huasita rurashpa tucuchirca. Chai huasillatatajmi cutin shayachicunchij. 12 Ñucanchij yayacunaca jahua pacha Diostami pꞌiñachircacuna. Chaimi paica Babiloniata mandaj caldeocunapuramanta* Nabucodonosorpaj maquipi urmachun saquirca. Chai mandajca cai huasita tucuchishpami gentecunatapish Babilonia llajtaman prezu shina aparca. 13 Shinapish Babilonia llajtamanta rey Ciro ña shuj huatata mandacushpaca shuj mandashcatami llujshichirca. Chai mandashcapica Yaya Diospaj huasi urmashcata cutin shayachichunmi mandarca. 14 Shinallataj rey Ciroca Diospaj huasimanta apamushca orohuan, cullquihuan rurashca copacunata, tazoncunata, shujtaj cosascunatapishmi Babiloniapaj dioscunata adorana huasimanta llujshichichun mandarca. Chaicunataca Nabucodonosormi Jerusalenpi caj Diospaj huasimanta apamushca carca. Paica Babiloniapaj dioscunata adorana huasipimi churashca carca. Chai cosascunataca Sesbazar* shuti runamanmi curcacuna. Paitaca rey Ciromi mandaj cachun nombrashca carca. 15 Ciroca paitaca: “Tucui caicunata Jerusalenpi caj Diospaj huasiman apai. Diospaj huasipish maipimi ñaupa shayachishca carca, chaillapitaj cutin shayachishca cachun” nircami. 16 Sesbazar chayashpami Jerusalenpi caj Diospaj huasipica cimientocunata churarca. Chai punllamanta cunancamami shayachishpa caticunchij. Shinapish manaraj tucuchishcanchijchu’ nircacunami.

17 Can reypaj alli cajpica Babiloniapi reypaj achca valij cosascunata huaquichinapi investigachunmi mañanchij. Chashnami rey Ciro Jerusalenpi caj Diospaj huasita cutin shayachichun mandashcata o mana mandashcata ricungui. Shinallataj rey ima decisionta agllashcata huillachunmi roganchij” nircacunami.

6 Chaimi rey Darioca Babiloniapi valishca cosascunata huaquichina ucupi tiyaj registropi investigachun mandarca. 2 Media nishca provinciapi Ecbátana jatun pircacunayuj llajtapica shuj rollopimi cashna quillcashcata japircacuna:

3 “Rey Ciro punta huatata mandacushpami Jerusalenpi saquirij Diospaj huasita cutin shayachichunca paillataj cashna mandarca: ‘Chai urmashca huasita cutin shayachichij. Chaipimi sacrificiocunata cui tucunguichij. Cimientocunatapish churaichij. Chai huasica altomanca 26 metrocuna yallitami* midina can. Shinallataj anchomanpish 26 metrocuna yallitami midina can. 4 Shinallataj quimsa fila jatun rumicunata, shuj fila jatun caspicunatami charina can. Chai gastocunataca reypaj huasipi huaquichishca tiyacuj cullquitami pagana can. 5 Shinallataj orohuan, cullquihuan rurashca tazacunata, copacunata, shujtaj cosascunata Diospaj huasiman tigrachichun. Chaicunataca Nabucodonosormi Jerusalenpi saquirij Diospaj huasimanta Babiloniaman apamushca carca. Chaicunataca Jerusalenpi saquirij Diospaj huasipimi maipi churana cashcallapitaj churana can’ nishpami mandarca”.

6 “Shinaca Éufrates jatun yacu inti huashicun ladopi mandaj Tatenaipish, Setar-Bozenaipish, chai llajtacunata qꞌuipa mandaj caishuj compañerocunapish chai lugarmanta caruyaichij. 7 Diospaj huasita rurana obrataca ama jarcanguichijchu. Judiocunata mandajpish, judiocunata pushajcunapishmi* Diospaj huasitaca maipimi ñaupa shayachishca carca chaillapitaj cutin shayachishpa catina can. 8 Shinapish judiocunata pushajcuna Diospaj urmashca huasita shayachishpa catichunmi cancunataca caita mandani: chai obra ñaupajman catichunca, chai gastocunataca reypaj achca valij cosascunata huaquichina cullquihuanmi utca pagana canguichij. Chai cullquica Éufrates jatun yacu inti huashicun ladopi tiyaj llajtacunamanta japishca impuestocunami can. 9 Jerusalenpi caj sacerdotecuna imalla mañashcataca ama cungarishpa paicunaman tucui punllacuna cunguichijlla. Jahua pacha Diosman rupachishca ofrendacunata cungapajca malta torocunatapish, carnerocunatapish, malta ovejacunatapish, trigotapish, cachitapish, vinotapish, aceitetapish cunguichij. 10 Chashnami paicunaca jahua pacha Diosman pai munashca ofrendacunata cungacuna. Shinallataj reypaj causaimantapish, paipaj churicunapaj causaimantapishmi Diosta mañangacuna. 11 Shinallataj caitapishmi mandani, maijanpish cai mandashcata mana cazujtaca paipaj huasimanta shuj caspita surcushpami chaipi huarcuna canguichij. Shinallataj pai mana cazushcamantaca paipaj huasitapish tucuicunapajmi shuj bañota* rurana canguichij. 12 Diosmi cai lugartaca* paipaj shutita jatunyachingapaj agllarca. Chaimanta maijan reypish, maijan pueblopish Jerusalenpi caj Diospaj huasita urmachijpi, ñuca mandashcata mana cazujpica Diosllataj tucuchichun. Chaitaca ñuca, Dariomi mandani. Ñuca mandashcaca utca pajtarichun” nircami.

13 Chaimi Éufrates jatun yacu inti huashicun ladopi mandaj Tatenaipish, Setar-Bozenaipish, paipaj compañerocunapish rey Darío imata nishcata tucuita utca pajtachircacuna. 14 Judiocunata pushajcunaca profeta Ageopaj, Idopaj nieto Zacariaspaj profeciacunamantami animarircacuna. Chaimantami Diospaj huasita shayachishpa, trabajashpa catircacuna. Shinallataj israelitacunapaj Dios mandashca shinami chai trabajotaca tucuchircacuna. Rey Ciro, rey Darío, Persia llajtata mandaj Artajerjes mandashca shinami tucuchircacuna. 15 Diospaj huasitaca rey Darío sujta* huatacunata mandacujpimi adar* nishca quillapaj quimsa punllapi tucuchircacuna.

16 Chaimi israelitacunapish, sacerdotecunapish, levitacunapish, Babiloniaman prezu shina apashcamanta caishuj tigramushcacunapish cushicuihuan Yaya Diospaj huasita inagurarcacuna.* 17 Yaya Diospaj huasita inagurangapajca 100 torocunata, 200 carnerocunata, 400 malta ovejacunatami curcacuna. Shinallataj tucui israelitacunapaj juchamanta ofrendata cungapajca 12 cꞌari chivocunatami curcacuna. Chaitaca Israel llajtapi mashna familiacuna tiyashcamantami curcacuna. 18 Moisés quillcashca libropi shinami Jerusalenpi Diosta sirvichunca, sacerdotecunatapish grupocunapi churashca shinallataj cada grupocunapi churarca. Chashnallatajmi levitacunatapish grupopi chaupishca shinallataj churarcacuna.

19 Babiloniapi prezu shina cashcamanta tigramushcacunami punta quillapaj 14 punllapica Pascua fiestata rurarcacuna. 20 Sacerdotecunapish, levitacunapish tucuicunami chuyayashcacuna carca. Chaimantami tucuicuna chuya carcacuna. Chaimi paicunaca prezu shina cashcacunamanta, caishuj compañero sacerdotecunamanta, paicunallamantatajpish Pascua fiestata rurangapaj animalcunata huañuchishpa sacrificiota rurarcacuna. 21 Chai qꞌuipaca prezu shina cashcamanta tigramushca* israelitacunaca chai sacrificiomantami micurcacuna. Paicunahuan tandanacujcunahuanpishmi micurcacuna. Cai tandanacujcunaca israelitacunapaj Jehová Diosta adorangapajmi* chai mapa ruraicunata ruraj llajtacunamanta llujshishcacuna carca. 22 Jehová Dios cushicuita cushcamantami paicunaca Levadura illaj tandata micuna fiestataca canchis* punllacunata cushicuihuan rurarcacuna. Asiriamanta reyca paicunapaj parte tucushpami israelitacunapaj Diospaj huasita shayachichunca ayudarca.* Chashna ayudachunca Diosllatajmi reymanca yuyaita cushca carca.

7 Asha tiempo qꞌuipa Persia llajtamanta rey Artajerjes mandacui punllacunapimi Esdrasca* Babiloniamanta Jerusalenman tigrarca. Paica Serayapaj churi, Azariaspaj churi, Hilquiaspaj churi, 2 Salumpaj churi, Sadocpaj churi, Ahitubpaj churi, 3 Amariaspaj churi, Azariaspaj churi, Merayotpaj churi, 4 Zerahiaspaj churi, Uzipaj churi, Buquipaj churi, 5 Abisuapaj churi, Finehaspaj churi, Eleazarpaj churi, sacerdotecunata mandaj* Aaronpaj churimi carca. 6 Babiloniamanta llujshij Esdrasca Moisesman cushca leyta alli quillcajmi* carca. Chai Leytaca israelitacunapaj Jehová Diosmi paicunaman cushca carca. Esdraspaj Jehová Diospaj maqui paihuan cashcamantami reyca tucui pai mañashcata curca.

7 Canchis huatata rey Artajerjes mandacujpimi huaquin israelitacunapish, sacerdotecunapish, levitacunapish, cantajcunapish, punguta cuidajcunapish, Diospaj huasipi sirvijcunapish* Jerusalenman huichiyarcacuna. 8 Rey Artajerjes canchis huatata mandacujpimi quinto quillapi Esdrasca Jerusalenman shamurca. 9 Paica Babiloniamantaca primer quillapaj punta punlla llujshishpaca quinto quillapaj* punta punllapimi Jerusalenman chayarca. Esdrasca paipaj Diospaj llaquij maqui ayudashcamantami chashna chayarca. 10 Esdrasca Jehová Diospaj Leyta yachangapaj, chai yachashcata pajtachingapaj, Dios mandashcacunatapish, imallata rurachun nishcacunatapish israelitacunaman yachachingapajmi paipaj shunguta allichirca.*

11 Rey Artajerjesca cai cartapaj shuj copiatami sacerdote Esdrasman curca. Esdrasca alli quillcajmi* carca. Paica Jehová Diospaj mandamientocunatapish, israelitacunaman imalla mandashcacunatapish alli yachajmi carca:

12 * “Reycunapaj rey Artajerjesca jahua pacha Diospaj Leyta alli quillcaj sacerdote Esdrasmanca cashnami nini: Cantami saludapani. 13 Ñuca mandacun llajtapi tiyaj tucui israelitacunatapish, sacerdotecunatapish, levitacunatapish Jerusalenman canhuan risha nijpica richunlla nishpami mandani. 14 Cantaca reypish, canchis consejajcunapish Judapi, Jerusalenpi cambaj Diospaj Leyta pajtachicushcata o mana pajtachicushcata ricuchunmi cachanchij. Chai Leytaca cambaj maquipimi charingui. 15 Shinallataj reypish, paipaj consejajcunapish cullquita, orota Jerusalenpi causaj israelitacunapaj Diosman cusha nishcata apangui. 16 Babilonia provinciapi cushca tucui cullquitapish, orotapish apangui. Gentecunapish, sacerdotecunapish Jerusalenpi saquirij paicunapaj Diospaj huasipaj tucui cusha nishcacunatapish apangui. 17 Chai cullquihuanca utca torocunata, carnerocunata, malta ovejacunata randingui. Chaicunahuanca grano ofrendacunatapish, vino ofrendacunatapish cungui. Caicunataca Jerusalenpi saquirij cambaj Diospaj altarpimi cuna cangui.

18 Cutin sobrashca cullquihuan, orohuanca canpish, cambaj huauquicunapish cancunapaj Dios munashca shina imatapish ruranguichijlla. 19 Shinallataj cambaj Diospaj huasipi sirvingapaj chasquishca tazoncunata, copacunata, shujtaj cosascunatapish Jerusalenpi Diospaj ñaupajpi cungui. 20 Cambaj Diospaj huasipi imapish minishtirijpica reypaj achca valij cosascunata huaquichishca cullquihuan paganguilla.

21 Éufrates jatun yacu inti huashicun ladopi tucui tesorerocunatami ñuca, rey Artajerjesca sacerdote Esdrasman tucui pai imalla mañashcacunata utca cuchun mandani. Paica jahua pacha Diospaj Leyta quillcajmi can. 22 Esdrasmanca 100 talentocama* cullquitapish, 100 corocama trigotapish,* 2.200 litrocama* vinotapish, 2.200 litrocama aceitetapish cunguichijlla. Cachitapish mashnata mañajpipish cunguichijlla. 23 Jahua pacha Dios paipaj huasipaj tucui imallata rurachun mandashcaca alli pajtarichun. Chashna rurajpimi jahua pacha Diosca ñucanchij gentecunahuanpish, ñucahuanpish, ñuca churicunahuanpish mana pꞌiñaringa. 24 Ashtahuanpish sacerdotecunatapish, levitacunatapish, tocajcunatapish, punguta cuidajcunatapish, Diospaj huasipi sirvijcunatapish, mana cashpaca Diospaj huasipi caishuj trabajajcunatapish impuestocunata, tributocunata, ima shujtaj cosascunatapish ama cobranguichij nishpami huillani.

25 Esdras, cambaj Diospaj cushca yachaihuan* mandajcunatapish, juezcunatapish agllai. Paicunami Éufrates jatun yacu inti huashicun ladopi causaj gentecunata, cambaj Diospaj leycunata yachajcunataca juzgangacuna. Shinallataj cancunami cai leycunata mana rijsijcunamanpish yachachina canguichij. 26 Maijanpish cambaj Diospaj Leyta, reypaj leyta mana cazujtaca chai rato huañuchishca cachun o prezu shina apashca cachun, mana cashpaca shuj multata pagachun o prezupi churashca cachun” nircami.

27 ¡Ñucanchij ñaupa yayacunapaj Jehová Diosca alabashca cachun. Paimi Jerusalenpi caj Jehová Diospaj huasita sumajyachichunca reypaj shungupi chai munaita churarca! 28 Diosmi ñucamanca mana tucurij cꞌuyaita ricuchishca. Chaimi reypaj, consejajcunapaj, autoridadcunapaj ñaupajpi alli ricurichun ñucata saquishca. Ñuca Jehová Diospaj maqui ñucahuan cashcamantami sinchiyarircani. Israelitacunamanta huaquin pushajcunatapish ñucahuan Jerusalenman richunmi tandachircani.

8 Rey Artajerjes mandai punllacunapi Babiloniamanta ñucahuan llujshij yayacunapaj familiacunata pushajcunapish, cada familiamanta registrashcacunapish caicunami can. 2 Finehaspaj churicunamantaca Guersommi carca. Itamarpaj churicunamantaca Danielmi carca. Davidpaj churicunamantaca Hatusmi carca. 3 Secaniaspaj churicunamanta, Parospaj churicunamantaca Zacariasmi carca. Paihuanca 150 registrashca cꞌaricunapishmi carca. 4 Pahat-Moabpaj churicunamantaca Zerahiaspaj churi Elieho-Enai, 200 runacunapishmi carca. 5 Zatupaj churicunamantaca Jahazielpaj churi Secanías, 300 cꞌaricunapishmi carca. 6 Adinpaj churicunamantaca Jonatanpaj churi Ébed, 50 cꞌaricunapishmi carca. 7 Elampaj churicunamantaca Ataliapaj churi Jesayá, 70 cꞌaricunapishmi carca. 8 Sefatiaspaj churicunamantaca Miguelpaj churi Zebadías, 80 cꞌaricunapishmi carca. 9 Joabpaj churicunamantaca Jehielpaj churi Abdías, 218 cꞌaricunapishmi carca. 10 Banipaj churicunamantaca Josifiaspaj churi Selomit, 160 cꞌaricunapishmi carca. 11 Bebaipaj churicunamantaca Bebaipaj churi Zacarías, 28 cꞌaricunapishmi carca. 12 Azgadpaj churicunamantaca Hacatanpaj churi Johanán, 110 cꞌaricunapishmi carca. 13 Adonicampaj churicunamanta último tigramushcacunapaj shuticunaca Elifeletpish, Jeielpish, Semayapish, 60 cꞌaricunapishmi carca. 14 Bigvaipaj churicunamantaca Utaipish, Zabbudpish, 70 cꞌaricunapishmi carca.

15 Paicunataca Ahavaman ricuj jatun yacu uripimi tandachircani. Chaipimi ñucanchij carpa huasicunapi quimsa punllacunata saquirircanchij. Shinapish gentecunapurapi, sacerdotecunapurapi levitacunata mashcashpaca ni shuj levitata mana japircanichu. 16 Chaimi ñucaca Eliezerta, Arielta, Semayata, Elnatanta, Jaribta, Elnatanta, Natanta, Zacariasta, Mesulamta pushajcunata cayanaman cacharcani. Shinallataj yachaj cꞌaricuna Joiaribtapish, Elnatantapishmi cayanaman cacharcani. 17 Paicunatami Casifía lugarta pushaj Idohuan parlachun mandarcani. Idotapish, paipaj huauquicunatapish ñucanchij Diospaj huasipi sirvichun sirvijcunata pushamuchun mañanguichij nircanimi. Idopaj huauquicunaca Diospaj huasipimi sirvijcuna* carca. Paicunaca Casifía lugarpimi carcacuna. 18 Diospaj llaquij maqui ñucanchijhuan cashcamantami Serebías runata, paipaj churicunata, paipaj huauquicunatapish ñucanchijpajman pushamurcacuna. Tucui paicunaca 18 cꞌaricunami carca. Serebías yachaj runaca Mahlipaj huahua huahuacunamantami carca. Mahlica Levipaj nietomi carca. Levica Israelpaj churimi carca. 19 Shinallataj meraritacunapuramanta Hasabiastapish, Jesayatapish, paipaj huauquicunatapish, paicunapaj churicunatapishmi pushamurcacuna. Tucuicunaca 20 cꞌaricunami carca. 20 Diospaj huasipi sirvijcunapish 220-mi carcacuna. Paicunatami Davidpish, caishuj mandajcunapish levitacunata sirvichun churashcacuna carca. Tucui paicunapaj shuticunaca registrashcami cashca carca.

21 Chaimi Ahavá jatun yacu cꞌuchupi ñucanchij Diospaj ñaupajpi humillarishcata ricuchingapaj shuj ayunota* rurachun mandarcani. Shinallataj tucui ñucanchij huahuacunahuan, tucui ñucanchij imalla charishca cosascunahuanpish viajepi Yaya Dios ñucanchijta pushachunmi mañarcanchij. 22 Reymanca: “Ñucanchij Diospaj llaquij maquica tucui paita mashcajcunahuanmi can. Cutin paimanta caruyajcunataca tucui fuerzahuanmi pꞌiñan” nishcami carcanchij. Chaimantami ñanta ricujpi ñucanchijpaj contracunamanta cuidachun soldadocunata, caballopi purij soldadocunatapish reyta mañanataca pinganayachircani. 23 Chaimi ñucanchijca ayunarcanchij. Shinallataj viajepi cuidachunmi ñucanchij Diosta mañarcanchij. Chashna rurajpimi paica ñucanchij mañashcacunata uyarca.

24 Chai qꞌuipaca sacerdotecunata pushajcunamanta 12 pushajcunatami agllarcani. Paicunaca Serebías, Hasabías, paicunapaj chunga huauquicunapishmi carcacuna. 25 Reypish, paipaj consejajcunapish, paipaj mandajcunapish, chaipi caj tucui israelitacunapish cullquita, orota, shujtaj cosascunatami Yaya Diospaj huasipaj cushca carca. Chaitami pesarcani. 26 Tucui chaita pesashpaca 650 talento* cullquitapish, cullquimanta rurashca 100 shujtaj cosascunatapishmi entregarcani. Chai cullquimanta rurashcacunaca ishqui talentocunami valirca. 100 talento orotapishmi pesashpa entregarcani. 27 Shinallataj orohuan rurashca 20 uchilla tazoncunatapishmi pesashpa entregarcani. Chaica 1.000 daricosmi* valirca. Alli cobremanta pucanicuj, brillacuj ishqui shujtaj cosascunatapishmi pesashpa entregarcani. Chaica oro shinallataj yallitaj valishcami carca.

28 Chaipimi paicunamanca cashna nircani: “Cancunaca Jehová Diospaj chꞌicanyachishcami canguichij. Cai cosascunapish paipajca chꞌicanyachishcami can. Oropish, cullquipish Jehová Diosman shungumanta cushca ofrendami can. Paica cancunapaj ñaupa yayacunapaj Diosmi. 29 Jerusalenman chayangacama caicunataca alli cuidanguichij. Caitaca Jehová Diospaj huasipi micuna cuartocunapi, sacerdotecunata pushajcunapaj ñaupajpi, levitacunata pushajcunapaj ñaupajpi, Israelmanta familiacunata* mandajcunapaj ñaupajpi pesanguichij” nircanimi. 30 Chashnami sacerdotecunapish, levitacunapish Jerusalenpi saquirij ñucanchij Diospaj huasiman apangapaj pesashca cullquitapish, orotapish, shujtaj cosascunatapish chasquircacuna.

31 Primer quillapaj 12 punllapimi Ahavá jatun yacu cꞌuchumanta Jerusalenman rircanchij. Ñucanchij Diospaj maquica ñucanchijhuanmi carca. Chaimi ñucanchijtaca ñanta ricujpi contracunamanta, shuhuajcunamanta cuidarca. 32 Jerusalenman chayashpaca quimsa punllacunatami ña chaipi carcanchij. 33 Chuscu punllapica cullquita, orota, shujtaj cosascunatapishmi ñucanchij Diospaj huasipi pesashpa Uriyapaj churi Meremot sacerdoteman entregarcanchij. Paihuanca Finehaspaj churi Eleazarmi chaipi carca. Shinallataj levitacunapuramanta Jesuapaj churi Jozabadpish, Binuipaj churi Noadiaspishmi chaipi carca. 34 Tucuita cuentashpa, pesashpami tucui mashna pesashcata anotarca. 35 Babiloniapi prezu shina cashcacunahuan cutin tigramushpami israelitacunapaj Diosman rupachishca sacrificiocunata curcanchij. Chaipica tucui israelitacunamanta 12 torocunata, 96 carnerocunata, 77 malta ovejacunatami curcanchij. Cutin juchamanta ofrendapajca 12 cꞌari chivocunatami curcanchij. Tucui chaicunatami rupachishca ofrendata shina Jehová Diosman curcanchij.

36 Chai qꞌuipaca rey mandashcatami reypaj satrapacunamanpish,* Éufrates jatun yacu inti huashicun ladopi mandajcunamanpish curcanchij. Chaimi paicunaca gentecunata ayudashpa Diospaj huasipajpish imalla minishtishcacunata curcacuna.

9 Chai tucuita rurashca qꞌuipami mandajcuna ñucapajman cꞌuchuyashpaca cashna nircacuna: “Israel pueblopish, sacerdotecunapish, levitacunapish cai cꞌuchulla llajtapi causajcunamantaca mana chꞌicanyarishcacunachu. Paicunapaj millanana ruraicunamantapish mana anchurishcacunachu. Shinallataj cananeocunapaj, hititacunapaj, perizitacunapaj, jebuseocunapaj, ammonitacunapaj, moabitacunapaj, egipciocunapaj, amorreocunapaj millai ruraicunamantapish mana separarishcacunachu. 2 Paicunapish, paicunapaj churicunapish chai pueblopi tiyaj huarmicunahuanmi cazarashcacuna. Chashnami jucha illaj puebloca chai pueblopi causaj gentecunahuan chagrurishcacuna. Ashtahuantajcarin mandajcuna, catij mandajcunami puntapica chai juchata rurashcacuna” nircacunami.

3 Chaita uyashpaca ñuca ucu churanatapish, sin mangas churanatapish lliquirishpa, ñuca uma ajchatapish, barbatapish cꞌutsarishpami dimastij llaquirishpa tiyarircani. 4 Prezu shina cashcamanta tigramushcacuna juchata rurashcamantami israelitacunapaj Dios nishcacunata yallitaj respetajcunaca* ñuca muyundijpi tandanacurcacuna. Ñucaca chishi lado grano ofrendata cungacamami chaipi yallitaj llaquilla tiyarishpa saquirircani.

5 Chishi lado grano ofrendata cuna horas chayajpimi chashna llaquirishpa tiyacushcamantaca jatarircani. Chaimantaca ñuca lliqui churanallatataj* churarishpami cungurishpa ñuca Jehová Diospajman maquita huichi alzarcani. 6 Chaipica cashnami nircani: “Ñuca Dioslla, yallitaj pingaihuanmi cani. Cambaj ñaupajman mañashpa cꞌuchuyanallatapish mana pudinichu. Ñuca Dioslla, ñucanchij pandarishcacunaca mana cuentaipajmari. Ñucanchij culpacunapish jahua pachaman chayangacamami jahuanpi montonarishca. 7 Ñucanchij ñaupa yayacunapaj punllacunamanta cunancamami culpayuj tucushcanchij. Ñucanchij pandarishcacunamantami ñucanchijpish, ñucanchij reycunapish, sacerdotecunapish shujtaj llajta reycunapaj maquipi entregashca carcanchij. Ñucanchijtaca espadahuanmi huañuchircacuna, prezuta shinami aparcacuna, tucuitami quichurcacuna, shujtajcunapaj ñaupajpipishmi pingaipi churarcacuna. Chashnallatajmi cunanpish tucucun. 8 Shinapish ñucanchij Jehová Dioslla, ñucanchijta llaquishcataca asha tiempollatami ricuchishcangui. Chaimantami maijancunataca prezumanta cacharichichun saquishcangui. Ñuca Dioslla, cambaj chꞌicanyachishca lugarpi tranquilo causachun, dimastij cushilla sintirichunmi saquishcangui. Chashnami esclavo shina causacushcamanta ñucanchijtaca ashallatapish samachishcangui. 9 Ñucanchij Dioslla, ñucanchijca esclavocunami canchij. Esclavo shina causacujpipish canca manataj saquishcanguichu. Cambaj mana tucurij cꞌuyaitami ricuchishcangui. Persia llajtamanta reycunapish ñucanchijta ayudachunmi saquishcangui. Chashnami cambaj huasi urmashcata cutin shayachichun animota cushcangui. Shinallataj Judá llajtapipish, Jerusalén llajtapipish muyundij pircahuanmi cuidashcangui.*

10 Tucui caicuna pasashca qꞌuipaca, ¿ñucanchij Dioslla, imatataj nishunyari? Cambaj mandashcacunatami saquishcanchij. 11 Chai mandashcacunataca canta sirvij profetacunahuanmi ñucanchijman cashna huillachircangui. Canca cashnami nircangui: ‘Cancuna mishashpa japinaman rigrij allpapi causajcunaca mapami can. Chaimantami chai allpapish mapa can. Chaipi causajcunapish millanana ruraicunatami rurancuna. Chashnami paicunaca cai allpataca millanana rurashcacunahuan jundachishcacuna. 12 Chaimanta cancunapaj ushushicunataca paicunapaj churicunahuan ama cazarachinguichij. Paicunapaj ushushicunatapish cancunapaj churicunapajca ama chasquinguichij. Paicunapaj sumaj causaitapish, alli causaitapish ama mashcanguichij. Chashna rurashpami sinchi tucunguichij. Allpamantapish alli granocunatami micunguichij. Allpatapish cancunapaj huahuacunamanca huiñaipajmi herenciata saquinguichij’ nircanguimi. 13 Tucui caicunaca ñucanchij mana alli ruraicunamanta, ñucanchij achca juchacunamantami chashna tucushca. Chashna cajpipish ñucanchij Dioslla, ñucanchij pandarishcacunamanta llaquichina cashca shinatajca mana llaquichishcanguichu. Ashtahuanpish caipi cajcuna quishpirichunmi ayudashcangui. 14 ¿Chashna jahuachu cambaj mandashcacunata mana cazushpa millanana ruraicunata rurashpa causaj gentecunahuan cazarashun? Cashna rurajpica canca dimastij pꞌiñarishpami tucui ñucanchijcunataca tucuchinguiman. Ni shujllapish mana quishpirishpaca mana causashpa catinchijmanchu. 15 Israelitacunapaj Jehová Dioslla, canca jucha illajmi cangui. Canmantami caipi cajcunamanta maijancunaca cunan punllacama causashpa caticunchij. Juchayujcuna cashpapish cunanca cambaj ñaupajpimi canchij. Tucui caicunata rurashca huashaca ñucanchijca cambaj ñaupajllapipish mana cai tucunchijchu” nircanimi.

10 Esdrasca Diospaj huasi ñaupajpi huacashpa, uri singa siririshpami tucui chai pueblopaj juchacunata huillashpa Diosta mañacurca. Chaicamaca Israelmanta achca cꞌaricuna, huarmicuna, huahuacunami paipaj muyundijpi tandanacurcacuna. Chaipica gentecunaca dimastijmi huacacurcacuna. 2 Elampaj huahua huahuacunamanta Jehielpaj churi Secaniasmi Esdrasmanca cashna nirca: “Ñucanchijca shujtaj llajtamanta caj huarmicunahuan cazarashpami* ñucanchij Diosta mana cazushcanchij. Shinapish israelitacunapaj Dios llaquishcata ricuchina esperanzaca tiyanrajmi. 3 Ñucanchij Dioshuan shuj ari ninacushcata* rurashpa shujtaj llajtamanta caj huarmicunataca paicunapaj huahuacunandij paicunapaj llajtaman tigrachishpa cachashunchij. Chashnami Jehová Dios ima nishcata cazushun. Ñucanchij Diospaj mandashcacunata yallitaj respetajcunatapishmi* cazushun. Shinallataj Leypi ima nishcata rurashunchij. 4 Jatari, caita ruranaca cambaj responsabilidadmi can. Ñucanchijca canhuanmi canchij. Sinchi cai, imata rurana cashcatapish rurailla” nircami.

5 Chashna nijpimi Esdrasca jatarishpa sacerdotecunata pushajcunatapish, levitacunata pushajcunatapish, tucui israelitacunata pushajcunatapish paicuna imata rurasha nishcata jurachirca. Chaimi paicunaca jurarcacuna. 6 Esdrasca Diospaj huasi ñaupajmanta jatarishpami Eliasibpaj churi Jehohananpaj cuartoman* rirca. Chai cuartoca Diospaj huasipimi carca. Esdras chaiman rishpaca prezu shina apashcamanta tigramushcacuna Diosta mana cazushcamantami llaquirishpa imata mana micurca, yacullatapish mana ubyarca.

7 Chai qꞌuipaca prezu shina apashcamanta tigramushcacuna Jerusalenpi tandanacuna cashcatami tucui Judapi, tucui Jerusalenpi huillarcacuna. 8 Shinapish prezu shina apashcamanta tigramushcacunapuramanta maijanpish quimsa punllacunacama mana ricurijpica paicunapuramanta* llujshichishpa cachanatami mandajcunapish, israelitacunata pushajcunapish* decidishca carcacuna. Paipaj tucui charishca cosascunatapish quichunatami decidishca carcacuna. 9 Chaimi Judapaj familiamanta runacunapish, Benjaminpaj familiamanta runacunapish quimsa punlla tucujpi Jerusalenpi tandanacurcacuna. Chaica noveno quillapaj 20 punllapimi carca. Tucui chaipi caj gentecunami Diospaj huasi shuj patiopi tiyarishpa saquirircacuna. Paicunaca culpayuj cashcata yuyarishpami mancharishca carcacuna. Shinallataj achca tamya tiyashcamantami paicunapaj cuerpopish chujchucurcacuna.

10 Chaipimi sacerdote Esdras jatarishpaca cashna nirca: “Cancunaca shujtaj llajtamanta caj huarmicunahuan cazarashpami ñucanchij Diostaca mana cazushcanguichij. Chashnami israelitacunapaj juchataca mirachishcanguichij. 11 Cunanca cancunapaj juchacunata Jehová Diosman huillaichij. Paica cancunapaj ñaupa yayacunapaj Diosmi can. Paita cazuichij. Cai llajta pueblocunamantapish, shujtaj llajtamanta caj huarmicunamantapish chꞌicanyarichij” nircami. 12 Chashna nijpimi chaipi tucui tandanacushca gentecunaca sinchita cashna nircacuna: “Can nishca shinami tucuita rurashun. 13 Ashtahuanpish tamya punllacunapimari canchij. Achcacunamari canchij. Canllapi saquirinaca mana allichu canga. Ñucanchijca jatun juchacunatamari rurashcanchij. Caicunata allichinaca mana shuj punllalla, ishqui punllacunalla cangachu. 14 Chaimantami ñucanchijta pushajcunalla ñucanchijpaj randi caipi saquirichun roganchij. Paicunami ñucanchijpaj randi tucui caicunataca rurangacuna. Shinallataj ñucanchij llajtacunapi maijanpish shujtaj llajtamanta huarmicunahuan cazarashca cashpaca, agllashca punllapimi israelitacunata pushajcunahuan, cada llajtamanta juezcunahuan shamushpa caicunata allichingacuna. Chashna rurajpimi ñucanchij Diosca ñucanchijhuanca ña mana ashtahuan pꞌiñarishpa catinga” nircacunami.

15 Shinapish Asahelpaj churi Jonatanpish, Ticvapaj churi Jahzeyapish mana de acuerdo cashcamantami paicunata jarcarcacuna. Shinallataj levitacunapuramanta Mesulampish, Sabetaipish paicunapaj ladomi tucurcacuna. 16 Pero prezu shina apashcamanta tigramushcacunaca paicuna ñaupaman ari nishca shinami rurarcacuna. Cutin sacerdote Esdraspish, paicunapaj shutita registrashcata charij tucui yayacunapaj familiacunata pushajcunapishmi décimo quillapaj punta punllapi caicunamanta alli investigangapaj tandanacurcacuna. 17 Primer quillapaj punta punllapimi maijan cꞌaricunaca shujtaj llajtamanta huarmicunahuan cazarashcata ricurcacuna. 18 Sacerdotecunapaj huaquin churicuna shujtaj llajtamanta caj huarmicunahuan cazarashcatami yachaj chayarcacuna. Jesuapaj huaquin churicunapish, paipaj huaquin huauquicunapish shujtaj llajtamanta caj huarmicunahuanmi cazarashcacuna carca. Jesuaca Jehozadacpaj churimi carca. Cai cꞌaricunapaj shuticunaca Maaseya, Eliezer, Jarib, Guedaliasmi carca. 19 Shinapish paicunaca paicunapaj huarmicunata llujshichishpa cachanatami ari nircacuna. Ashtahuancarin paicunaca culpata charishcamantami paicunapaj culpacunamanta shuj carnerota cusha nircacuna.

20 Juchata ruraj shujtaj sacerdotecunamantaca caicunami carca. Imerpaj churicunamantaca Hananí, Zebadiasmi carca. 21 Harimpaj churicunamantaca Maaseya, Elías, Semaya, Jehiel, Uziasmi carca. 22 Pasjurpaj churicunamantaca Elioenái, Maaseya, Ismael, Netanel, Jozabad, Eleasami carca. 23 Levitacunapuramantaca cai runacunami juchata rurashcacuna carca: Jozabad, Simeí, Quelaya (paica Quelitami carca), Petahías, Judá, Eliezermi carca. 24 Cantajcunapuramantaca Eliasibmi carca. Punguta cuidajcunapuramantaca Salum, Télem, Urimi carca.

25 Israelitacunamantaca Parospaj churicunamanta caicunami juchata rurashcacuna carca: Ramías, Izías, Malkiya, Mijamín, Eleazar, Malkiya, Benayapishmi carca. 26 Elampaj churicunamantaca Matanías, Zacarías Jehiel, Abdí, Jeremot, Eliaspishmi carca. 27 Zatupaj churicunamantaca Elioenái, Eliasib, Matanías, Jeremot, Zabad, Azizapishmi carca. 28 Bebaipaj churicunamantaca Jehohanán, Hananías, Zabái, Atlaipishmi carca. 29 Banipaj churicunamantaca Mesulam, Maluc, Adaya, Jasub, Seal, Jeremotpishmi carca. 30 Pahat-Moabpaj churicunamantaca Adná, Kelal, Benaya, Maaseya, Matanías, Bezalel, Binuí, Manasespishmi carca. 31 Harimpaj churicunamantaca Eliezer, Isiya, Malkiya, Semaya, Shimeón, 32 Benjamín, Maluc, Semariaspishmi carca. 33 Hasumpaj churicunamantaca Matenái, Matatá, Zabad, Elifélet, Jeremái, Manasés, Simeipishmi carca. 34 Banipaj churicunamantaca Maadái, Amram, Uel, 35 Benaya, Bedeya, Kelúhi, 36 Vanías, Meremot, Eliasib, 37 Matanías, Matenái, Jaasupishmi carca. 38 Binuipaj churicunamantaca Simeí, 39 Selemías, Natán, Adaya, 40 Macnadebái, Sasái, Sharái, 41 Azarel, Selemías, Semarías, 42 Salum, Amarías, Josepishmi carca. 43 Nebopaj churicunamantaca Jeiel, Matitías, Zabad, Zebiná, Jadái, Joel, Benayapishmi carca. 44 Tucui caicunami shujtaj llajtamanta caj huarmicunahuan cazarashcacuna carca. Chaimi paicunapaj huarmicunatapish, huahuacunatapish paicunapaj llajtaman tigrachishpa cacharcacuna.