ESTER

1 Rey Asuero mandacui punllacunapimi tucui caicuna pasarca. Rey Asueroca India llajtamanta callarishpami Etiopía* llajtacama 127 provinciacunata mandacurca. 2 Chai punllacunapica rey Asueroca Susa* llajtapi caj palaciomantami* mandacurca. 3 Paica quimsa huatacunata mandacushpami paita catij mandajcunapaj, paita sirvijcunapaj shuj jatun micuita rurarca. Chai micuimanca Persia llajtamanta, Media llajtamanta soldadocunata mandajcuna, pushajcuna, provinciacunata mandajcunapishmi shamurcacuna. 4 Chaimi rey Asueroca paipaj jatun mandanapi achca valishca cosascunata charishcata, achca poderta charishcata, alli nishca cashcatapish 180 punllacunata ricuchirca. 5 Chai tiempo pasashca qꞌuipami rey Asueroca Susa palaciopi caj tucui gentecunapaj canchis* punllacunata shuj jatun micuita rurarca. Chai micuitaca importante gentecunapaj, humilde gentecunapajpishmi paipaj palacio patiopi tiyaj jardinpi rurarca. 6 Chai jardinca linohuan, yuraj telahuan, azul telahuan sumajta allichishcami carca. Chaicunaca yuraj, morado racu puchcacunahuanmi cullqui argollacunapi charichishca carca. Chai argollacunaca mármol pilarcunapimi huarcushca carca. Pambapish pórfido nishca puca rumihuan, yuraj marmolhuan, yana marmolhuan, nácar nishcahuan rurashcami carca. Chai pamba jahuapica orohuan, cullquihuan rurashca tiyarinacunami tiyarca.

7 Reypaj palaciopica achca vinomi tiyarca. Chaimi vinotaca chꞌican chꞌican oro copacunapi* curcacuna. Chai tucui vinotaca reyllami chashna cui tucurca. 8 Shinapish reyca palaciopi sirvij mayordomocunataca vinota ubyachunca ama pita obliganguichijchu. Ashtahuanpish cada uno paicuna munashcata ubyachun saquinguichijlla nishcami carca.

9 Rey Asueropaj palaciopica reina Vastipishmi huarmicunapaj shuj jatun micuita rurarca.

10 Ña séptimo punlla tucujpimi rey Asueroca vinota ubyashcamanta paipaj shungupica cushilla carca. Chaimi paita ayudaj canchis runacunahuan parlarca. Chai runacunaca Mehumán, Biztá, Harboná, Bigtá, Abagtá, Zetar, Carcás shuticunami carca. Paicunaca palaciopi achca autoridadta charijcunami carca. 11 Paicunatami reina Vastita paipaj ñaupajman pushamuchun mandarca. Chai reinaca sumajmi carca. Pai sumaj cashcata tucui gentecunaman, mandajcunaman ricuchingapajmi paipaj uma jahuapi sumaj adornocunata churachishcata pushamuchun mandarca. 12 Palaciopi achca autoridadta charijcuna rey imata mandashcata huillajpipish reina Vastica cutin cutinmi mana cazurca. Chaimi reyca nina sindirij shina pꞌiñarishpa achcata colerarca.

13 Cashna pꞌiñarishca cashpami reyca chai tiempopi tiyaj costumbrecunamanta yachaj yuyaisapa runacunata tapurca. (Reyca imata ruranata yachangapajca leymanta alli yachajcunata, juezcunapajpi problemacunata allichinata yachajcunatami tapuj carca. 14 Chai yuyaisapa runacunamantaca Carsená, Setar, Admatá, Tarsis, Meres, Marsená, Memucán shuti canchis runacunami reyhuan alli apanacujcuna carca. Paicunaca Persia, Media llajtacunamanta mandajcunami carca. Paicunallami reypajmanca jahualla cꞌuchuyai tucurcacuna, ashtahuan jatun cargocunatapishmi charircacuna). 15 Rey Asueroca paicunataca: “Palaciopi achca autoridadta charijcunatami reina Vastita cayachun cacharcani. Pero Vastica chai mandashcataca mana cazushcachu. Leypi nishca shinaca, ¿paihuanca imatashi rurana canga?” nishpami tapurca.

16 Chashna tapujpimi reypaj ñaupajpipish, mandajcunapaj ñaupajpipish Memucán runaca: “Reina Vastica mana reypaj ñaupajllapichu mana allita rurashca. Ashtahuanpish tucui mandajcunapaj ñaupajpi, rey Asuero mandacushca tucui provinciacunapi causaj gentecunapaj ñaupajpimi mana allita rurashca. 17 Reina imata rurashcata tucui huarmicuna yachaj chayashpaca paicunapaj cusacunataca mana respetangacunachu. Paicunaca: ‘Rey Asuero reina Vastita cayaj cachajpica paica mana cazurcachu’ ningacunami. 18 Persia llajtata, Media llajtata mandajcunapaj huarmicunaca reina imata rurashcata yachaj chayashpaca cunanllatajmi paicunapaj cusacunahuan parlanacungacuna. Chaimi qꞌuipataca mana respetangacuna, achcata pꞌiñaringacuna. 19 Can jatun rey Asueropaj yuyaipi alli cajpica Vasti cambaj ñaupajman amataj cutin shamuchunca shuj leyta churai. Chai leyca Persia, Media llajtacunapaj leycunapi quillcashca saquirichun. Chai leycunataca pi mana anchuchi tucunchu. Shinallataj reina cachunca Vastitapish yalli shujtaj alli huarmita agllai. 20 Cai leypi nishcataca rey mandacushca tucui llajtacunapimi yachaj chayangacuna. Chaimi tucui huarmicunaca paicunapaj cusacunata respetangacuna. Importante gentecunapurapi, humilde gentecunapurapimi chaitaca rurangacuna” nircami.

21 Memucán cushca consejoca reypajpish, catij mandajcunapajpish allimi ricurirca. Chaimi reyca Memucán runa nishcata rurarca. 22 Pai mandacushca tucui provinciacunamanmi cada puebloman paicunapaj propio shimipi, cada provinciaman paicuna ima shina quillcaj cashca shinallataj quillcashpa cartacunata cacharca. Chai cartacunapica cusacunataca paicunapaj huasipi mandaj cachun, paicunapaj propio shimipi parlachunmi mandarca.

2 Chai qꞌuipami Rey Asueroca yallitaj pꞌiñarishca canata saquirca. Paica Vasti imata rurashcata, paita castigangapajpish imata ruranata decidishcatami yuyarirca. 2 Chaimi reyta sirvijcunaca cashna nircacuna: “Reypajca cꞌarihuan mana chayarishca sumaj joven soltera huarmicunatami mashcana can. 3 Chaipajca reyca pai mandacun tucui provinciacunamanta runacunata agllachun. Paicunami cꞌarihuan mana chayarishca tucui sumaj huarmicunata Susa palaciopica huarmicunapaj huasipi tandachingacuna. Chai huasipimi chai huarmicunaca ashtahuan sumajyachishca cangacuna. Paicunataca reyta sirvij, huarmicunata cuidaj Hegái shuti eunuco runapaj maquipi churachuncuna. 4 Chashnami rey ashtahuan munashca solteraca Vastipaj randi reina tucunga” nircacunami. Paicuna cushca consejo alli ricurijpimi reyca chaita rurarca.

5 Susa palaciopica Mardoqueo shuti shuj judío runami sirvij carca. Paica Jairpaj churimi carca. Jairca Simeipaj churimi carca. Simeica Quispaj churimi carca. Quis runaca Benjaminpaj familiamantami carca. 6 Paica Judá llajtata mandaj rey Jeconiashuan Jerusalenmanta prezu shina apashcacunapurapimi carca. Jeconiastaca* Babilonia llajtata mandaj rey Nabucodonosormi prezu shina aparca. 7 Mardoqueoca paipaj prima Hadassá* nishca Estertaca yaya mama illaj saquirishcamantami pai cuidarca. Cai solteraca sumaj ñahui, alaja huarmimi carca. Esterpaj yaya mama huañushcamantami Mardoqueoca paipaj ushushita shina huiñachirca. 8 Rey mandashcata huillajpimi achca joven solteracunataca Susa palacioman pusharcacuna. Chaipimi huarmicunata cuidaj Hegái shuti runa cuidachun saquircacuna. Estertapishmi reypaj huasiman pusharcacuna.

9 Hegái runaca Ester paipaj ñaupajpi alli ricurijpimi paitaca cꞌuyaihuan tratarca. Chaimantami chai rato Ester ashtahuan sumajyachishca cachun, alli micuita chasquichun imata ruranata ricurca. Shinallataj reypaj huasipi sirvij huarmicunamantaca canchis ashtahuan alli huarmicunatami Esterta sirvichun churarca. Chai qꞌuipami paitaca paita sirvijcunandij huarmicunapaj huasipi caj ashtahuan alli lugarman pusharca. 10 Esterca paipaj llajtamanta, paipaj familiamantapish piman imata mana huillarcachu. Mardoqueomi chaitaca piman ama huillangui nishpa mandashca carca. 11 Mardoqueoca Ester ima shina cashcata yachangapaj, paihuan ima tucucushcata yachangapajmi huarmicunapaj huasi canlla patiota cada punlla pasaj carca.

12 Soltera huarmicunaca rey Asueropaj ñaupajpimi turnopi ricurina carcacuna. Pero puntaca cada solterami 12 quillacunata ashtahuan sumajyachishca cana carcacuna. Sujta* quillacunataca mirramanta rurashca aceitetami churarina carcacuna. Cutin caishuj sujta quillacunataca aceite balsámico nishcata, shujtaj aceitecunatapishmi churarina carcacuna. 13 Chai qꞌuipaca solteracunaca reypaj ñaupajpi ricuringapajmi ña allichirishca carcacuna. Huarmicunapaj huasimanta reypaj huasiman rijpica paicuna imata mañashcataca cujllami carcacuna. 14 Reypaj huasiman rij huarmica chishiman yaicushpaca cayandij tutamantami huarmicunapaj catij huasiman tigraj carca. Chai huasitaca reyta sirvij Saasgaz shuti eunuco runami cuidaj carca. Paica reypaj caishuj huarmicunatapishmi* cuidaj carca. Reypaj huasimanta llujshij huarmica rey maipi cashcamanca mana tigrajchu carca, reyllataj munashpa paipaj shutipi cayajllapimi cutin tigraj carca.

15 Esterca Mardoqueopaj tío Abihailpaj ushushimi carca. Paitami Mardoqueoca paipaj ushushita shina huiñachirca. Esterca reypaj ñaupajman yaicuna turno chayajpica reyta sirvij, huarmicunata cuidaj Hegái shuti eunuco* runa imata mañachun nishcallatami mañarca. (Chai tiempopica tucuicunami Estertaca achcata cꞌuyarcacuna). 16 Rey Asuero ña canchis huatacunata paipaj jatun palaciopi mandacujpimi, Estertaca tebet* nishca décimo quillapi paipaj ñaupajman pusharcacuna. 17 Reyca tucui caishuj huarmicunamanta yallimi Estertaca cꞌuyai callarirca. Esterca caishuj solteracunamanta yallimi reypaj ñaupajpica alli ricurirca. Chaimi reyca Esterpaj uma jahuapi sumaj adornocunata churachishpa Vastipaj randi reina cachun churarca. 18 Chai qꞌuipami reyca Esterpaj shuj jatun micuita rurarca. Chai micuimanca paita catij mandajcunata, paita sirvijcunatami invitarca. Shinallataj reyca tucui provinciacunapimi gentecunata prezumanta cacharichirca.* Paica rey cashcamantami regalocunatapish mana llaquishpa achcata shujtajcunaman curca.

19 Soltera huarmicunata cutin tandachijpica Mardoqueoca reypaj palacio pungupimi tiyacurca. 20 Esterca Mardoqueo mandashca shinallatajmi paipaj familiacunamanta, paipaj llajtamantaca imata mana huillarca. Mardoqueo cuidacujpi cazushca shinallatajmi Esterca paita cazushpa catirca.

21 Chai punllacunapica Mardoqueoca reypaj palacio pungupimi tiyacurca. Chaipimi Bigtán, Teres ishqui runacunaca* pꞌiñarishca cashcamanta rey Asuerota ima shina huañuchinata yuyarircacuna. Paicunaca palaciopi achca autoridadta charijcuna, punguta cuidashpa trabajajcunami carca. 22 Mardoqueo chaita yachaj chayashpaca chai ratomi reina Esterman huillarca. Cutin Esterca Mardoqueopaj shutipimi reyman huillarca. 23 Reyca chai cierto cashcata yachangapajmi alli tapuchun cacharca. Tiempohuanca verdad cashcatami yachaj chayarca. Chaimantami chai ishqui runacunataca caspipi huarcurcacuna. Chaitaca chai tiempopi imalla tucushcata ricuchij libropimi reypaj ñaupajpi quillcashpa churarcacuna.

3 Chai qꞌuipaca rey Asueroca Hamedatapaj churi Hamantami jatunyachirca. Hamedata runaca Agagpaj familiamantami carca. Reyca tucui caishuj mandajcunamanta ashtahuan autoridadta cushpami Hamanta jatunyachirca. 2 Reyllataj mandashcamantami palacio pungupi reyta sirvijcunaca tucuicuna Hamanpaj ñaupajpi cumuricurcacuna, cunguricurcacuna. Pero Mardoqueoca mana cumurircachu, mana cungurircachu. 3 Chaimantami palacio pungupi reyta sirvijcunaca Mardoqueotaca: “¿Ima nishpataj rey mandashcataca mana cazungui?” nijcuna carca. 4 Paicuna tucui punllacuna chashna nijpipish Mardoqueoca mana uyajchu carca. Ashtahuanpish judío cashcatami paicunamanca huillarca. Chaimantami Mardoqueo chaita rurashpa catijta o mana rurashpa catijta ricuchun Hamanman huillarcacuna.

5 Hamán runaca Mardoqueo paipaj ñaupajpi mana cumurijpi, mana cungurijpimi achcata pꞌiñarirca. 6 Mardoqueo judío* cashcata paicuna huillajpimi Hamanca ña mana paillata huañuchisha nirca. Ashtahuanpish rey Asuero mandacushca tucui llajtacunapi causaj judiocunatami ima shinapish huañuchinata yuyarirca.

7 Rey Asuero 12 huatacunata mandacujpimi nisán* nishca callari quillapi judiocunata ima punlla, ima quilla tucuchinata yachangapaj Hamanpaj ñaupajpi pur nishca suerteta rurarcacuna. Suerteta rurajpica adar* nishca 12 quillapimi urmarca. 8 Hamanca rey Asuerotaca cashnami nirca: “Can mandacun tucui provinciacunapimi shuj llajtamanta gentecunaca uraman janajman causancuna. Paicunapaj leycunapish shujtaj llajtacunapaj leycunamanta chꞌicanmi can. Paicunaca cambaj leycunataca mana cazuncunachu. Chaimantami paicuna causashpa catichunca mana saquina cangui. 9 Reypaj yuyaipi alli cajpica chai llajtamanta gentecunata tucuchingapaj shuj leyta quillcachi. Reypaj achca valij cosascunata huaquichinapi churachunca canta sirvijcunamanmi 10.000 talento* cullquita cusha” nircami.

10 Chashna nijpimi reyca sellota churana anillota paipaj maquimanta llujshichishpa judiocunata pꞌiñaj Hamanman curca. Paica Agagpaj familiamanta caj Hamedatapaj churimi carca. 11 Reyca Hamanmanca: “Cullquipish, chai llajta gentecunapish cunanca cambaj maquipimi. Paicunahuanca can imata munashcata rurailla” nircami. 12 Chaimi callari quillapaj 13 punllapica reypaj secretariocunata cayarca. Paicunami Hamán tucui imalla mandashcataca rey churashca satrapacunaman, provinciacunata mandajcunaman, cada pueblota mandajcunaman quillcarcacuna. Cada pueblomanmi paicunapaj propio shimipi, cada provinciamanmi paicuna quillcaj cashca shinallataj quillcarcacuna. Tucuitami rey Asueropaj shutipi quillcashpa sellota churana paipaj anillohuan sellarcacuna.

13 Chai qꞌuipaca rey mandacun tucui provinciacunamanmi cartacunata entregachun huillajcunata cacharca. Chai cartacunapica jovencunata, mayorcunata, huarmicunata, huahuacunata shuj punllallapi tucui judiocunata huañuchichun, llaquichichun, tucuchichun, paicuna imalla charishca cosascunatapish japichunmi mandarca. Chaitaca adar nishca 12 quillapaj 13 punllapimi rurana carca. 14 Chai cartacunapi quillcashca shimicunaca cada provinciapimi shuj ley shina cana carca. Chai punllapaj gentecuna allichirishca cachunmi chai leytaca tucuicunaman huillana carca. 15 Rey mandajpimi huillajcunaca utca rircacuna. Chai leyca Susa palaciomantami llujshirca. Chai qꞌuipaca rey Asueroca Hamán runahuan ubyangapajmi tiyarirca. Pero Susa llajtapi causaj gentecunaca ima tucucushcata mana yachashpami caita chaita yuyacurcacuna.

4 Mardoqueoca tucui imalla tucushcata yachaj chayashpami paipaj churanata lliquirishpa racu sacota* churarirca. Paipaj uma jahuapipish ushpatami* shitarirca. Chaimantaca caparirishpa, jatunta* huacashpami chai llajtata rirca. 2 Chashnapish palacio pungucamallami chayarca. Reypaj palaciomanca racu sacota churarishcaca pi mana yaicui tucurcachu. 3 Rey imata mandashcata tucui provinciacunapi huillajpimi judiocunaca llaquilla carcacuna.* Chaimantami ayunashpa, huacashpa, cꞌuyaillata caparirircacuna. Achcacunaca racu saco jahuapi, ushpa jahuapimi sirirircacuna. 4 Sirvij huarmicunapish, eunuco runacunapish Ester maipi cashcaman yaicushpaca imalla tucucushcatami paiman huillarcacuna. Chaita uyashpami Esterca yallitaj sustarirca. Mardoqueo pai churarishca racu sacota anchuchichunpish shujtaj ropatami cacharca. Shinapish Mardoqueoca mana japircachu. 5 Chaimi Esterca Hatac shuti eunuco runata cayashpa ima tucucushcata tapuchun Mardoqueopajman cacharca. Hatac runataca reymi Esterta sirvichun churashca carca.

6 Hatac runaca Mardoqueotaca plazapimi mashcanaman rirca. Chai plazaca reypaj palacio pungu chꞌimbapurallapimi carca. 7 Mardoqueoca tucui ima tucushcatami paimanca huillarca. Judiocunata tucuchingapaj reypaj achca valij cosascunata huaquichinapi cullquita churachun Hamán mashnata pagasha nishcatapishmi huillarca. 8 Susa llajtapi quillcashca leymanta copiatapishmi curca. Chai leypica judiocunata tucuchichunmi mandacurca. Hatac runaca chai copiata ricuchishpami Estermanca intindichina carca. Shinallataj Mardoqueo imata nishcatami huillana carca. Mardoqueoca: “Reypaj ñaupajman rishpa cambaj llajta gentecunata llaquichun, paicunata ama huañuchichun rogarigri” nishpami mandashca carca.

9 Hatac runaca Ester maipi cashcaman cutin tigrashpaca Mardoqueo imata nishcatami huillarca. 10 Chaimi Esterca Hatac runataca Mardoqueoman cashna huillachun mandarca: 11 “Reyta sirvijcunapish, rey mandacun provinciacunapi causaj gentecunapish shujlla ley tiyashcataca allimi yachancuna. Maijan cꞌaripish, maijan huarmipish rey mana cayajpi ucu patioman* yaicujca huañungatajmi. Rey paipaj oro varata chutajllapimi mana huañunga. Ñucataca ña 30 punllacunatami reyca mana cayashca” nircami.

12 Ester imata nishcata Mardoqueo yachaj chayashpaca 13 cashnami nirca: “Shujtaj judiocunata huañuchijpi canca reypaj palaciopi cashcallamanta quishpirina cashcataca ama yuyaichu. 14 Cunan can upalla saquirijpipish judiocunaca maimantapish ayudata chasquishpa quishpiringacunami. Pero canpish, cambaj yayapaj familiapish huañunguichijmi. Ashtahuanpish canca cai llaqui punllacunapi ayudangapajchari reina tucurcangui” nircami.

15 Chashna nijpimi Esterca Mardoqueomanca cashna cutichirca: 16 “Ri, Susa llajtapi caj tucui judiocunata tandachishpa ñucamanta ayunagrichij. Quimsa punllacunata, quimsa tutacunata ama imata micunguichij, ama imata ubyanguichij. Ñucata sirvij huarmicunapish, ñucapish chashnallatajmi ayunashun. Qꞌuipaca leypi mana mandashca cajpipish reypaj ñaupajpi ricuringapajmi risha. Masqui huañuna cajpipish huañushallami” nircami. 17 Chashna nijpimi Mardoqueoca Ester tucui imalla mandashcata rurarca.

5 Ña quimsa punllacuna tucujpimi Esterca reina churarina ropata churarishpa reypaj palacio patio ucuman rirca. Chaiman chayashpaca rey mandana ucu chꞌimbapurapimi shayarirca. Rey Asueroca chai ucupimi yaicuna chꞌimbapurapi paipaj jatun tiyarinapi tiyacurca. 2 Reyca patiopi reina Ester shayacujta ricushpaca achcatami cushicurca. Chaimantami paipaj maquipi charicushca oro varataca Esterpajman chutarca. Esterca paipajman cꞌuchuyashpami chai oro vara puntapi tuparirca.

3 Rey Asueroca: “¿Reina Ester, imataj tucungui? ¿Imatataj mañasha ningui? Huillapailla, ñucaca cushallami. ¡Ñuca mandacushca llajtacunamanta chaupita cuna cajpipish cushallami!” nircami. 4 Chashna nijpimi Esterca: “Quiquinpajmi jatun micuita preparashcani. Reypaj yuyaipi alli cajpica quiquinpish, Hamanpish chai micuiman cunan shamuchunmi munani” nirca. 5 Chaimi reyca paita sirvijcunataca: “Ester mañashca shinaca Hamanta cai rato shamui nigrichij” nirca. Ña shamujpimi reypish, Hamanpish Ester preparashca jatun micuiman rircacuna.

6 Ña vinota ubyacushpami* reyca Estertaca: “¿Imatataj munangui? Huillapailla, ñucaca cushallami. ¿Imatataj mañasha ningui? ¡Ñuca mandacushca llajtacunamanta chaupita cuna cajpipish cushallami!” nirca. 7 Chashna nijpimi Esterca cashna nirca: “Caitami ñucaca munani: 8 cayapishmi jatun micuita quiquinpaj preparasha. Quiquinpaj ñaupajpi ñuca alli ricurishca cajpi, ñuca mañashcapish quiquinpaj ñaupajpi alli cajpica quiquinpish, Hamanpish chai micuiman shamuchunmi munani. Cayami ñuca imata munashcataca huillasha” nircami.

9 Hamanca chai punllaca jatun micuimantaca cushillami llujshirca. Shinapish reypaj palacio pungupi Mardoqueota ricushpa pai mana jatarijpi, paita mana manchajta ricushpaca Hamanca paihuanca achcatami pꞌiñarirca. 10 Pero ahuantarishpa paipaj huasiman rircallami. Qꞌuipaca paipaj amigocunata, paipaj huarmi Zerestapishmi cayaj cacharca. 11 Paicunamanmi Hamanca alabarishpa paipaj charishca achca cosascunata ricuchirca. Shinallataj achca churicunata charishcatapishmi huillarca. Tucui caishuj mandajcunamanta, reyta sirvijcunamanta ashtahuan autoridadta cushpa rey Asuero paita jatunyachishcatapishmi alabarishpa parlarca.

12 Hamanca caitapishmi nirca: “Reina Esterca pai preparashca jatun micuiman reyta compañachunca ñucallatami invitarca. Cayapishmi paicunahuan micungapajca invitashca cani. 13 Pero reypaj palacio pungupi Mardoqueo shuti judío runa tiyacujta ricushpaca ñuca shungupica mana contentochu cani” nircami. 14 Chashna nijpimi paipaj huarmi Zerespish, paipaj tucui amigocunapish: “22 metrocunata* charij caspita shayachichun cachai. Caya tutamantaca chai caspipi Mardoqueota huarcuchun reyta mañangui. Chaita rurashca qꞌuipaca reyhuan cushicushpa micunaman ringuillami” nircacuna. Paicuna nishca alli ricurijpimi Hamanca caspita shayachichun cacharca.

6 Chai tutaca reyca mana dormi pudircachu. Chaimantami chai tiempopi imalla tucushcata ricuchij librota apamushpa liyichun mandarca. 2 Chai libropica Bigtana, Teres shuti runacuna rey Asuerota ima shina huañuchinata yuyarishcata Mardoqueo huillashcami quillcashca tiyacurca. Chai ishqui runacunaca palaciopi achca autoridadta charijcuna, punguta cuidashpa trabajajcunami carca. 3 Chaimi reyca: “¿Chashna rurashcamantaca Mardoqueoca ima allitataj chasquishca? ¿Paita alli ningapajpish imatataj rurashcanchij?” nirca. Chaimi paita sirvijcunaca: “Paipajca imata mana rurashcanchijchu” nishpa cutichircacuna.

4 Chai qꞌuipami Rey Asueroca: “¿Pitaj canllapica?” nishpa tapurca. Reypaj palacio canlla patiomanca Hamanmi yaicushca carca. Paica pai shayachinaman cachashca caspipi Mardoqueota huarcuchunmi mañasha nirca. 5 Reyta sirvijcunaca: “Patiopica Hamanmi can” nircacunami. Chashna nijpimi reyca: “Yaicumui nichij” nirca.

6 Hamán yaicujpimi rey Asueroca: “¿Rey jatunyachisha nishca runamantaca imata ruranashi alli canga?” nishpa tapurca. Chaimi Hamanca paipaj shungupica: “¿Pi shujtajtataj reyca jatunyachisha ningari? ¿Manachu ñucata jatunyachinga?” nishpa yuyarca. 7 Chaimi Hamanca cashna nirca: “Rey jatunyachisha nishca runapajca 8 rey churarina ropata apamuchuncuna. Umapi sumaj adornota churachishca rey tiyarina caballotapish apamuchuncuna. 9 Rey churashca mandajcunamanta ashtahuan importante mandajmi ropatapish apamuna can, caballotapish pushamuna can. Shinallataj sirvij runacunami rey jatunyachisha nishca runataca ropata churachishpa, caballopi tiyachishpa plaza pambata pushana can. Chai qꞌuipaca: ‘¡Rey jatunyachisha nishca runataca cashnami rurana can!’ nishpami paipaj ñaupajpi caparina can” nircami. 10 Chaimi reyca chai rato Hamantaca: “¡Utca ri! Ropatapish, caballotapish mashcamugri. Palacio pungupi tiyacuj Mardoqueo shuti judío runata chashna rurai. Can tucui nishca shinallataj rurai” nishpa mandarca.

11 Chaimi Hamanca ropata mashcagrishpa Mardoqueoman churachirca. Caballotapish pushamushpami chaipi tiyachishpa plaza pambata pusharca. Mardoqueopaj ñaupajpimi: “¡Rey jatunyachisha nishca runataca cashnami rurana can!” nishpa caparirca. 12 Chai qꞌuipaca Mardoqueoca reypaj palacio punguman tigrarcallami. Pero Hamanca yallitaj llaquirishpa, paipaj umata taparishpami paipaj huasiman rato rircalla. 13 Ña huasiman chayashpami Hamanca paipaj huarmi Zeresmanpish, paipaj tucui amigocunamanpish imalla tucushcata parlarca. Chaimi paiman consejota cuj runacunapish,* paipaj huarmi Zerespish: “Mardoqueoca judío cashpapish cantapish yallimi autoridadta chasquishca. Paitaca mana mishanguichu. Canca paipaj ñaupajpica seguromi urmangui” nircacuna.

14 Hamán paicunahuan parlacujpirajmi palaciopi achca autoridadta charijcuna shamushpaca Ester preparashca jatun micuiman paitaca chai rato pushashpa rircacuna.

7 Rey Asueropish, Hamanpish reina Ester preparashca jatun micuimanmi chayarcacuna. 2 Chaica cayandij punlla jatun micuimi carca. Chaipimi reyca ña vinota ubyacushpa Esterta cutin tapushpaca: “¿Reina Ester, imatataj munangui? Huillapailla, ñucaca cushallami. ¿Imatataj mañasha ningui? ¡Ñuca mandacushca llajtacunamanta chaupita cuna cajpipish cushallami!” nirca. 3 Chashna nijpimi reina Esterca cashna cutichirca: “Ñuca reylla, quiquinpaj ñaupajpi ñuca alli ricurishca cajpi, ñuca mañashcapish quiquinpaj ñaupajpi alli cajpica ñuca causaitapish, ñuca llajta gentecunapaj causaitapish quishpichichunmi mañapani. 4 Ñuca llajtamanta gentecunapish, ñucapishmi huañuchichun, llaquichichun, tucuchichun cꞌatushca cashcanchij. Sirvij cꞌaricuna shinalla, sirvij huarmicuna shinalla cachun cꞌatushca cajpica upallami saquirinman carcani. Pero cai llaqui tiyachun saquinaca mana allichu. Ñucanchijta tucuchijpica cai llaquica reypajllatajmi mana alli canga” nircami.

5 Chaimi rey Asueroca reina Estertaca: “¿Pitaj chaitaca rurasha nishcari? ¿Chai runaca maipitajyari?” nirca. 6 Shina nijpimi Esterca: “Ñucanchijta pꞌiñaj cai millai runa Hamanmi” nirca.

Chaimi Hamanca reypaj ñaupajpi, reinapaj ñaupajpipish achca manchaihuan carca. 7 Reyca achcata pꞌiñarishpami vinota ubyacushcamanta jatarishpa palaciopi tiyaj jardinman llujshirca. Hamanca paita rey castigagrishcata cuentata cushpami paita ama llaquichichun reina Esterta rogaringapaj jatarirca. 8 Rey Asueroca jardinmanta vinota ubyacushcaman cutin yaicushpaca Ester maipi tiyacushcaman Hamán huichiyashcatami ricurca. Chaimantami paica: “¿Cai runaca ñuca propio huasipichu reinataca violasha nin, imamí?” nishpa caparirca. Rey chaita nijpica chai ratomi Hamantaca ñahuita taparcacuna. 9 Palaciopi achca autoridadta charijcunamanta Harboná shuti runami: “Mardoqueo huillashcamantami reyca huañuimanta quishpirirca. Pero Hamán runaca Mardoqueota huarcungapajmi 22 metrocunata* charij caspita shayachirca. Chai caspica Hamanpaj huasipimi can” nirca. Chaimi reyca: “Chai caspipi paita huarcuichij” nishpa mandarca. 10 Chashna mandajpimi Hamantaca Mardoqueota huarcungapaj shayachishca caspipi huarcurcacuna. Chai qꞌuipami reyca yallitaj pꞌiñarishca cashpapish pacienciarirca.

8 Chai punllaca rey Asueroca judiocunata pꞌiñaj Hamán tucui imalla charishca cosascunatami reina Esterman curca. Mardoqueopish reypaj ñaupajmanmi yaicurca. Estermi Mardoqueo paipaj familia cashcata rey Asueroman huillashca carca. 2 Rey Asueroca sellota churana anillotami Hamanta quichushca carca. Chai anillotami paipaj maquimanta surcushpa Mardoqueoman curca. Cutin Esterca Hamán tucui imalla charishca cosascunatami Mardoqueopaj maquipi churarca.

3 Esterca cutinmi reyhuan parlangapaj rirca. Paipaj ñaupajpi cungurishpa, huacashpami Agagpaj familiamanta caj Hamán runa judiocunata llaquichingapaj imata rurasha nishcata jarcachun rogarirca. 4 Chaimi reyca paipaj oro varata Esterpajman chutarca. Chaimantami Esterca jatarishpa reypaj ñaupajpi shayarishpaca 5 cashna nirca: “Reypaj yuyaipi alli cajpi, reypaj ñaupajpi ñuca alli ricurishca cajpi, cai yuyai alli cajpi, ñucapi cushicushpaca caita rurapai. Agagpaj familiamanta caj Hamedatapaj churi millai Hamanca, rey mandacun tucui provinciacunapi causaj judiocunata tucuchingapajmi shuj leyta quillcachirca. Chai leyta anchuchingapaj shujtaj leyta quillcachichunmi mañapani. 6 Ñuca llajta gentecunata llaquichigrijta ricushpaca maitataj mana imata rurashayari. Ñuca familiacunata huañuchicujpica maitataj ricucushallayari” nircami.

7 Chashna nijpimi Rey Asueroca reina Estertapish, Mardoqueo shuti judío runatapish cashna nirca: “Ricuichij, Hamán tucui imalla charishca cosascunataca ñami Esterman curcani. Judiocunata huañuchisha nishcamantapish caspipi huarcuchunmi mandarcani. 8 Cunanca judiocunapaj ima alli cashcata ricushpa reypaj shutipi cancunallataj shuj leyta quillcaichij. Chai leytaca sellota churana reypaj anillohuan sellaichij. Reypaj shutipi quillcashca leyta, sellota churana reypaj anillohuan sellashcataca pi mana anchuchi tucunchu” nircami.

9 Chaimi paicunaca siván* nishca tercer quillapaj 23 punllapica reypaj secretariocunata tandachircacuna. Chai secretariocunami India llajtamanta callarishpaca Etiopía llajtacama 127 provinciacunapi caj judiocunaman, satrapacunaman, mandajcunaman, provinciacunata mandajcunaman Mardoqueo tucui imalla mandashcata quillcarcacuna. Cada pueblomanmi paicunapaj propio shimipi, cada provinciamanmi paicuna quillcaj cashca shinallataj quillcarcacuna. Judiocunamanpish paicunapaj propio shimipi, paicuna quillcaj cashca shinallatajmi quillcarcacuna.

10 Mardoqueoca reypaj shutipimi shuj leyta quillcarca. Chai leytaca reypaj sellota churana anillohuanmi sellarca. Chai qꞌuipaca reypaj cachun huiñachishca utca callpaj caballocunapimi huillajcunata cacharca. 11 Chai quillcashca leypimi rey Asueroca tucui llajtacunapi causaj judiocunataca difindiringapaj tandanacuchun permisota curca. Paicunamanca maijan pueblomanta, maijan provinciamanta llaquichisha nijcunataca huarmicuna cajpipish, huahuacuna cajpipish huañuchichun, llaquichichun, tucuchichunmi permisota curca. Shinallataj chai gentecuna imalla charishca cosascunatapish quichuchunmi mandarca. 12 Caicunataca adar* nishca 12 quillapaj 13 punllapimi rey Asuero mandacun tucui provinciacunapi judiocunaca rurana carcacuna. 13 Quillcachishcapi huillashcataca leyta shinami tucui provinciacunapi entregana carcacuna. Shinallataj chai punllapi paicunata pꞌiñajcunata mishangapaj judiocuna allichirishca cachunmi tucui gentecunaman huillana carcacuna. 14 Rey mandajpimi huillajcunaca chai rato llujshishpa rircacuna. Paicunaca reypaj cachun huiñachishca caballocunapimi callpashpa rircacuna. Cai leytaca Susa palaciopipishmi yachaj chayachircacuna.

15 Mardoqueoca reypaj ñaupajmantaca rey churarina azul telahuan, yuraj telahuan rurashca ropacunata churarishca, jatun oro coronata churarishca, alli puchcahuan rurashca morado capata pꞌachallishcami llujshirca. Chaita ricushpami Susa llajta gentecunaca cushicushpa caparircacuna. 16 Judiocunaca quishpichishca cashcamantami achcata cushicurcacuna. Paicunataca shujtaj gentecunapishmi respetarcacuna. 17 Tucui provinciacunapi, tucui llajtacunapimi maipi cashpapish rey mandashca leyta uyashpaca judiocunaca achcata cushicushpa jatun micuicunata, fiestacunatapish rurarcacuna. Shujtaj pueblocunamanta achca gentecunapish judiocunata achcata manchashcamantami paicunapura tucurcacuna.

9 Adar* nishca 12 quillapaj 13 punllapimi rey Asuero mandashcatapish, paipaj leytapish pajtachina carcacuna. Judiocunata pꞌiñajcunaca chai punlla paicunata mishanatami yuyarcacuna. Pero chaitaca mana rurai tucurcacunachu. Ashtahuanpish judiocunami paicunata pꞌiñajcunataca misharcacuna. 2 Rey Asuero mandacun tucui provinciacunapimi judiocunaca paicunapaj propio llajtacunapi paicunata llaquichisha nijcunahuan macanacungapaj tandanacurcacuna. Judiocunata tucuicuna achcata manchashcamantami paicunataca pi mana llaquichi tucurcacuna. 3 Shinallataj provinciacunata tucui mandajcunapish, satrapacunapish, mandajcunapish, rey mingashcata pajtachijcunapishmi Mardoqueota manchashcamanta judiocunata ayudarcacuna. 4 Mardoqueoca reypaj huasipica achca autoridadtami charirca. Chashna ashtahuan autoridadta charishcamantami paica tucui provinciacunapi ashtahuan rijsishca tucurca.

5 Judiocunaca paicunata pꞌiñajcunataca espadacunahuan huañuchishpami tucuchircacuna. Paicunata pꞌiñajcunataca paicuna munashcatami rurarcacuna. 6 Susa palaciopica judiocunaca 500 cꞌaricunatami huañuchishpa tucuchircacuna. 7 Shinallataj Parsandatá, Dalfón, Aspatá runacunatami huañuchircacuna. 8 Poratá, Adalía, Aridatá, 9 Parmastá, Arisái, Aridái, Vaizata runacunatapishmi huañuchircacuna. 10 Cai runacunaca judiocunata pꞌiñaj Hamanpaj chunga churicunami carca. Hamanca Hamedatapaj churimi carca. Pero judiocunaca paicunata huañuchishca qꞌuipaca paicuna imalla charishca cosascunataca mana japircacunachu.

11 Chai punllaca Susa palaciopi mashnacuna huañushcatami reyman huillarcacuna.

12 Rey Asueroca reina Estertaca: “Susa palaciopica judiocunaca 500 cꞌaricunata, Hamanpaj chunga churicunatapishmi huañuchishpa tucuchishcacuna. ¿Rey mandacushca shujtaj provinciacunapicarin imatashi rurarcacuna? Reina Ester, ¿imatataj ashtahuan munangui? Huillapailla, ñucaca cushallami. ¿Imatataj ashtahuan mañasha ningui? Can imata munashcataca cushallami” nircami. 13 Chashna nijpimi Esterca: “Reypaj yuyaipi alli cajpica Susapi caj judiocuna cunan difindirishca shinallataj cayapish difindirichun saquihuai. Hamanpaj chunga churicunapaj cuerpocunatapish caspipi huarcuchunmi mañapani” nirca. 14 Chaimi rey Asueroca chaita rurachun mandarca. Susa llajtapica shuj leytami llujshichirca. Hamanpaj chunga churicunapaj cuerpocunatapishmi caspipi huarcurcacuna.

15 Susapi caj judiocunaca adar nishca quillapaj 14 punllapimi cutin tandanacurcacuna. Chashna tandanacushpami Susapica 300 cꞌaricunata huañuchircacuna. Pero paicuna imalla charishca cosascunataca mana japircacunachu.

16 Rey mandacushca provinciacunapi caj caishuj judiocunapishmi difindiringapaj tandanacurcacuna. Paicunaca paicunata pꞌiñaj 75.000 runacunatami huañuchircacuna. Chashnami paicunata pꞌiñajcunamanta quishpirircacuna. Pero paicuna imalla charishca cosascunataca mana japircacunachu. 17 Chaitaca adar quillapaj 13 punllapimi rurarcacuna. Shinapish 14 punllapica samarishpami jatun micuita rurashpa cushicurcacuna.

18 Susapi caj judiocunaca 13 punllapi, 14 punllapimi difindiringapaj tandanacurcacuna. Shinapish 15 punllapica samarishpami jatun micuita rurashpa cushicurcacuna. 19 Cutin campocunapi, pueblocunapi causaj judiocunaca adar quillapaj 14 punllapimi jatun micuita rurashpa cushicurcacuna. Chai punllaca fiestata rurana punlla, caishuj chaishuj caranacuna punllami carca.

20 Mardoqueoca imalla tucushcatami quillcarca. Shinallataj rey Asuero mandacushca tucui provinciacunamanmi carupi cajpipish, cꞌuchullapi cajpipish tucui judiocunaman cartacunata cacharca. 21 Chai cartacunapimi Mardoqueoca tucui huatacuna adar quillapaj 14 punllapi, 15 punllapica fiestata rurachun mandarca. 22 Chai punllacunapimi judiocunaca paicunata pꞌiñajcunamanta quishpirircacuna. Chai quillapimi paicunaca nanaihuan canata saquishpa cushicurcacuna, llaquilla canata saquishpa fiestata rurarcacuna. Chai punllacunapimi jatun micuita rurashpa cushicuna carcacuna, caishuj chaishujmi caranacuna carcacuna. Pobrecunamanpishmi regalocunata cuna carcacuna.

23 Judiocunaca huatan huatanta chai punllacunapi fiestata rurangapajmi ari nircacuna. Shinallataj Mardoqueo paicunaman imallata quillcashcata rurangapajmi ari nircacuna. 24 Chashnami Agagpaj familiamanta caj Hamedatapaj churi Hamán paicunata tucuchisha nishcata yuyarina carcacuna. Tucui judiocunata pꞌiñaj Hamanca paicunata manchachingapaj, tucuchingapajmi pur nishca suerteta rurashca carca. 25 Pero Ester reypaj ñaupajman yaicujpica reyca: “Hamán runa judiocunata llaquichisha nishcaca paipaj jahuallapitaj urmachun” nishpami quillcachun mandarca. Chaimi Hamantapish, paipaj churicunatapish caspipi huarcurcacuna.

26 Chaimantami chai punllacunataca pur* palabramanta Purim nishpa shutichircacuna. Mardoqueo cartapi imata quillcashcamanta, paicuna imallata ricushcamanta, paicunahuan imalla tucushcamantami 27 judiocunaca paicunapish, paicunapaj huahua huahuacunapish, paicunahuan tucui tandanacujcunapish chai ishqui punllacunapi fiestata rurangapaj ari nircacuna. Shinallataj tucui huatacunami agllashca punllacunapi chai fiesta punllacunamanta imalla quillcashcata ruranata ari nircacuna. 28 Tucui provinciacunapi, tucui llajtacunapimi familiacunamanta huahua huahuacunaca chai fiesta punllacunataca yuyarishpa rurana carcacuna. Judiocunaca Purim nishca fiestata ruranataca mana nunca saquinachu carcacuna. Paicunapaj huahua huahuacunapish chai fiestata yuyarishpa ruranataca manataj saquinachu carcacuna.

29 Abihailpaj ushushi reina Esterpish, Mardoqueo shuti judío runapishmi achca autoridadta charishcamanta Purim nishca fiestata judiocuna ama cungarichun shujtaj cartata quillcarcacuna. 30 Mardoqueoca rey Asuero mandacushca 127 provinciacunapi caj tucui judiocunamanmi sumaj shimicunahuan, mana llulla shimicunahuan quillcashca cartacunata cacharca. 31 Mardoqueo shuti judío runa mandashca shina, reina Ester mandashca shina agllashca punllacunapi Purim nishca fiestata rurana cashcata yuyachingapajmi cartacunata cacharca. Judiocunaca paicunapish, paicunapaj huahua huahuacunapish chai fiestata ruranatami ari nishcacuna carca. Chai punllaca paicunaca ayunanami carcacuna. Diostapish ayudachunmi rogarina carcacuna. 32 Purim nishca fiestata rurachunca Estermi mandashca carca. Chaitaca shuj libropimi quillcashpa churarcacuna.

10 Rey Asueroca pai mandacushca llajtacunapica chaquishca allpapi causajcunatapish, islacunapi causajcunatapishmi sinchita trabajachirca.

2 Media llajtamanta, Persia llajtamanta reycunapaj tiempopi imalla tucushcata ricuchij libropimi rey Asuero paipaj fuerzahuan, paipaj poderhuan imalla rurashcacunataca quillcashpa churarcacuna. Mardoqueota ima shina jatunyachishcatapishmi tucuita quillcashpa churarcacuna. 3 Rey Asueropaj qꞌuipaca Mardoqueo shuti judío runami mandanapica ashtahuan autoridadta charirca. Paica judiocunapurapica alli nishcami carca. Paipaj llajta tucui gentecunapishmi paitaca respetajcuna carca. Mardoqueoca tucui judiocunapaj allipajmi trabajaj carca. Paicunapaj huahua huahuacunapaj sumaj causaitapishmi mashcaj carca.