ZACARÍAS
1 Rey Darío ña ishqui huatacunata mandacujpi, octavo quillapimi Jehová Diosca Idopaj nieto, Berekiaspaj churi profeta Zacariasman* cai shimicunata nirca: 2 “Jehová Diosca cancunapaj yayacunahuanmi yallitaj pꞌiñarirca.
3 Paicunataca cashna ningui: ‘Jahua pacha soldadocunata mandaj Jehová Diosca caitami nin: “‘Ñucapajman tigramuichij’ ninmi jahua pacha soldadocunata mandaj Jehová Diosca. ‘Ñucapish cancunapajman tigrashami’ ninmi jahua pacha soldadocunata mandaj Jehová Diosca”’.
4 ‘Cancunapaj yayacuna shinaca ama tucuichijchu. Paicunamanca ñaupa profetacunaca: “Jahua pacha soldadocunata mandaj Jehová Diosca: ‘Cancunapaj mana alli ñancunata saquipaichij, cancunapaj mana alli ruraicunatapish saquipaichij’ ninmi” nishpami huillajcuna carca’.
‘Pero paicunaca ñucataca mana uyarcacunachu, mana cazurcacunachu’ ninmi Jehová Diosca.
5 ‘¿Cancunapaj yayacunaca cunanca maipitajyari? ¿Profetacunapish huiñaitachu causarcacuna? 6 Cancunapaj yayacunamanca ima mandashcacunata pajtachinatami huillarcani. Chai mandashcacunata mana cazushpa ima tucuna cashcata huillachunmi ñucata sirvij profetacunata cacharcani. Tucui chaicunami cancunapaj yayacunapica pajtarirca ¿nachu?’. Chaimi paicunaca ñucapajman tigrashpaca: ‘Jahua pacha soldadocunata mandaj Jehová Diosca ñucanchij ima laya causashca shina, ñucanchij imata rurashca shinami pai yuyarishca shinallataj ñucanchijtaca tratashca’ nircacuna” nircami.
7 Rey Darío ishqui huatacunata mandacujpimi sebat* nishca 11 quillapi, chai quillapaj 24 punllapi Idopaj nieto, Berekiaspaj churi profeta Zacariasca Jehová Dios nishca shimicunata chasquirca: 8 “Tutaca muscuipi shinami ricurcani. Puca caballopi montashca shuj runami pugru pambapi tiyaj mirto yuracuna chaupipi casijlla shayacurca. Paipaj huashapica puca caballocuna, café* caballocuna, yuraj caballocunami carca”.
9 Ñucaca: “¿Ñuca amito, picunataj chai caballocunapi purijcunaca?” nishpami tapurcani.
Chaimi ñucahuan parlacuj angelca: “Picuna cashcatami canman ricuchisha” nishpa cutichirca.
10 Chai qꞌuipami mirto yuracuna chaupipi casijlla shayacuj runaca: “Cai runacunaca allpa pachata richun Jehová Dios cachashcacunami” nirca. 11 Chaimi paicunaca mirto yuracuna chaupipi shayacuj Jehová Diospaj angelmanca: “Ñucanchijca tucui allpatami rishcanchij. Tucui allpapimi tranquilo causai, sumaj causai tiyan” nircacuna.
12 Chashna nijpimi Jehová Diospaj angelca: “Jahua pacha soldadocunata mandaj Jehová Dioslla, ¿ima horacamataj Jerusalentapish, Judapi tiyaj llajtacunatapish mana llaquingui? Paicunahuanca cai 70 huatacunatami pꞌiñarishca cashcangui” nirca.
13 Ñucahuan parlacuj angelmanca Jehová Diosca sumaj shimicunahuan, cushichij shimicunahuanmi cutichirca. 14 Chai qꞌuipami ñucahuan parlacuj angelca ñucataca cashna nirca: “Caita huillai: ‘Jahua pacha soldadocunata mandaj Jehová Diosca caitami nin: “Jerusalentapish, Siontapishmi difindisha. Ari, tucui shunguhuanmi difindisha. 15 Ñucaca pꞌiñarishcami cani. Tranquilo causacuj llajtacunahuanmi yallitaj pꞌiñarishca cani. Ñuca pueblohuanca ashallatami pꞌiñarishca carcani. Pero chai llajtacunaca ñuca pueblotaca ashtahuanmi llaquipi churarcacuna” ninmi’ nishpa huillai.
16 Shinaca Jehová Diosca caitami nin: ‘“Jerusalentaca cutinmi llaquisha, chaipimi ñuca propio huasita cutin shayachisha. Midina huascahuanmi Jerusalentaca midisha” ninmi jahua pacha soldadocunata mandaj Jehová Diosca’.
17 Caitapish huillai: ‘Jahua pacha soldadocunata mandaj Jehová Diosca caitami nin: “Ñuca llajtacunapica cutinllatajmi achca alli cosascuna tiyanga. Jehová Diosca Siontami cutin cushichinga. Jerusalentapish cutinmi agllanga”’” nircami.
18 Chai qꞌuipaca huichilla ricushpami chuscu gachucunata ricurcani. 19 Chaimi ñucahuan parlacuj angeltaca: “¿Chai gachucunaca* imataj canyari?” nishpa tapurcani. Chaimi paica: “Judá llajtata, Israel llajtata, Jerusalén llajtata caita chaita cachaj gachucunami can” nishpa cutichirca.
20 Chai huashami Jehová Diosca chuscu artesanocunata ñucaman ricuchirca. 21 Ñucaca: “¿Paicunaca imata ruranamantaj shamunyari?” nishpami tapurcani.
Chaimi paica: “Cai gachucunaca Judá llajtapi causaj gentecunata caita chaita cachaj gachucunami can. Paicunahuanca pi mana macanacui tucurcachu. Cai artesanocunaca shujtaj llajtacuna Judá llajtata, chaipi causaj gentecunata paicunapaj gachucunahuan caita chaita cachashcamantami paicunatapish manchachingapaj, paicunapaj gachucunatapish pꞌaquishpa shitangapaj shamungacuna” nirca.
2 Cutinllataj huichilla ricushpaca shuj runa paipaj maquipi midina huascata charicujtami ricurcani. 2 Chaimi paitaca: “¿Maimantaj ricungui?” nishpa tapurcani.
Paica: “Jerusalenta midinamanmi ricuni. Anchomanpish, largomanpish mashnata midishcata yachangapajmi ricuni” nishpami cutichirca.
3 Chai qꞌuipaca ñucahuan parlacuj angelca llujshishpa rircallami. Paitaca shujtaj angelmi tupanaman shamurca. 4 Chai huashami paica cashna nirca: “Callpashpa ri, chai joventaca cashna ni: ‘“Jerusalenpica pircacuna illaj llajtapi shinami causangacuna. Achca gentecuna, achca animalcuna chaipi tiyashcamantami chashna causangacuna. 5 Ñucaca Jerusalén muyundijpica shuj nina pirca shinami casha. Chai llajta chaupipica ñuca sumaj achijnicujhuanmi achijyachisha” ninmi Jehová Diosca’” nircami.
6 “¡Shamuichij! ¡Shamuichij! Janaj lado allpamanta miticuichij” ninmi Jehová Diosca.
“Ñucaca cancunataca tucui ladocunatami* caita chaita cachashcani” ninmi Jehová Diosca.
7 “¡Sion, shamui! Miticuyari. Canca Babiloniapaj ushushihuanmi causangui. 8 Jahua pacha soldadocunata mandaj Jehová Diosca pai jatun cashcata ricuchishca qꞌuipami cancuna imalla charishcacunata quichushpa apaj llajtacunaman ñucata cacharca. Paica cashnami nin: ‘Maijanpish cancunata llaquichijca ñuca ñahui luluntami chugrichin. 9 Cunanca paicunapaj contrami ñuca maquita alzasha. Chaimi paicunapaj esclavocunallataj paicuna imalla charishcacunataca japingacuna’ ninmi. Cancunaca jahua pacha soldadocunata mandaj Jehová Dios ñucata cachashcatami yachanguichij”.
10 “Sionpaj ushushilla, cushicushpa capariyari. Ñucaca ñamari chayamucuni. Cambaj chaupipimi causasha” ninmi Jehová Diosca. 11 “Chai punllaca achca llajtacunamanta gentecunami Jehová Diospajman cꞌuchuyangacuna. Paicunaca ñuca pueblomi tucunga. Ñucaca cancunapaj chaupipimi causasha” ninmi. Cancunaca jahua pacha soldadocunata mandaj Jehová Dios ñucata cachashcatami yachanguichij. 12 Jehová Diosca paipajlla chꞌicanyachishca allpapimi Judá llajtataca paipaj herenciata shina japinga, Jerusalentapish cutinmi agllanga. 13 Jehová Diospaj ñaupajpica tucui gentecuna upalla cachun. Paica pai causana jucha illaj lugarmantami tucui imatapish ruracun.
3 Chai qꞌuipaca sacerdotecunata jatun mandaj Josuetami ñucaman ricuchirca. Paica Jehová Diospaj angelpaj ñaupajpimi shayacurca. Paipaj alli ladopica Satanasmi paita jarcangapaj shayacurca. 2 Chaimi Jehová Diospaj angelca Satanastaca: “¡Satanás, Jehová Dios canta juzgachun! ¡Ari, Jerusalenta agllaj Jehová Dios canta juzgachun! ¿Manachu cai runaca ninamanta surcushca yanta shina can?” nirca.
3 Josueca mapa ropacunata churarishcami angelpaj ñaupajpi shayacurca. 4 Chai angelca paipaj ñaupajpi shayacujcunataca: “Paipaj mapa ropata anchuchichij” nircami. Chai qꞌuipaca Josuetaca: “Ricui, cambaj culpatami anchuchishcani. Canca alli ropahuanmi churachishca cangui” nircami.
5 Chaimi ñucaca: “Paipaj umapica sumaj, limpio turbanteta churachichij” nircani. Chashna nijpimi umapica limpio turbanteta churachircacuna. Shinallataj alli ropatami churachircacuna. Jehová Diospaj angelca chai cꞌuchullapimi shayacurca. 6 Chai qꞌuipami Jehová Diospaj angelca Josuemanca caita nirca: 7 “Jahua pacha soldadocunata mandaj Jehová Diosca caitami nin: ‘Ñuca ñancunapi purishpa, canman mingashcata ñuca ñaupajpi pajtachishpaca ñuca huasipimi juez cangui, ñuca huasi patiocunatapishmi cuidangui. Shinallataj caipi shayacujcunahuan ñuca maipi cashcaman yaicuchunmi saquisha’.
8 ‘Sacerdotecunata jatun mandaj Josuella, uyapai. Canpish, cambaj ñaupajpi tiyarij sacerdotecunapish uyapaichij. Cai runacunaca shuj señal shinami canga. ¡Ricuichij, Retoño shuti ñuca sirvijtami pushamugrini! 9 ¡Josuepaj ñaupajpi ñuca churashca rumita ricuichij! Chai rumillapimi canchis* ñahuicuna tiyan. Chai rumipica shuj sellota labraj shina labrashpami quillcagrini. Chai allpapaj culpataca shuj punllallapimi anchuchisha’ ninmi jahua pacha soldadocunata mandaj Jehová Diosca.
10 ‘Chai punllaca cancunaca cada unomi cancunapaj vecinocunataca cancunapaj uva yura ucupi, cancunapaj higo yura ucupi shuj ratota pasachun invitanguichij’ ninmi jahua pacha soldadocunata mandaj Jehová Diosca” nircami.
4 Ñucahuan parlaj angelmi cutin tigramurca. Paica dormicuj runata rijchachij shinami ñucataca rijchachirca. 2 Chai qꞌuipami ñucataca: “¿Imatataj ricungui?” nishpa tapurca.
Chaimi ñucaca cashna nircani: “Shuj oro candelerotami ricuni. Candelero jahuapi shuj tazón tiyacujtapishmi ricuni. Chai candeleroca canchis lamparacunatami charin. Ari, canchismi can. Jahuaman caj lamparacunaca canchis tubocunatami charin. 3 Chai candelero cꞌuchullapica ishqui olivo yuracunami tiyan. Shujca tazón alli ladoman, caishujca tazón lluqui ladomanmi can” nircanimi.
4 Chai qꞌuipaca ñucahuan parlacuj angeltaca: “Ñuca amito, ¿caicunaca imatataj ricuchin?” nishpami tapurcani. 5 Chaimi ñucahuan parlacuj angelca: “¿Caicuna imata ricuchishcataca manachu yachangui?” nirca.
Chaimi ñucaca: “Ñuca amito, mana yachanichu” nishpa cutichircani.
6 Chai qꞌuipami paica ñucamanca cashna nirca: “Jehová Diosca Zorobabelmanmi caita nin: ‘“Tucui caicunaca mana soldadocunapaj fuerzahuan, mana runacunapaj poderhuanchu pajtaringa. Ashtahuanpish ñuca espirituhuanmi pajtaringa” ninmi jahua pacha soldadocunata mandaj Jehová Diosca. 7 Jatun urculla, ¿canca pitaj canguiyari? Zorobabelpaj ñaupajpica canca llano* pambami tucungui. Gentecuna “¡Sumajmari! ¡Sumajmari!” nishpa caparicujpimi paica jahuaman caj último rumita surcunga’ ninmi” nircami.
8 Cutinllatajmi Jehová Dios huillashca shimicunata chasquircani. Ñucamanca cashnami nirca: 9 “Zorobabelpaj maquicunami cai huasi cimientocunataca churarca. Paipaj maquicunallatajmi cai huasitaca shayachishpa tucuchinga. Cancunaca jahua pacha soldadocunata mandaj Jehová Dios ñucata cachashcatami yachanguichij. 10 ¿Callaripi uchilla ruraicunata ruracujpica pitaj burlarircari? Gentecunaca Zorobabelpaj maquipi shuj plomadata* ricushpami achcata cushicungacuna. Cai canchis lamparacunaca* Jehová Diospaj ñahuicunami can. Chaicunaca tucui allpatami ricucun” nircami.
11 Chai qꞌuipaca: “¿Candelero alli ladopi, lluqui ladopi caj ishqui olivo yuracunaca imatataj ricuchin?” nishpami tapurcani. 12 Shinallataj cutinmi paitaca: “Olivo yuracunapaj ramacunamantaca* quillu aceitemi ishqui oro tubocunata llujshicun, ¿chai olivo yuracunapaj ramacunaca imatataj ricuchin?” nishpa tapurcani.
13 Chaimi paica: “¿Chaicuna imata ricuchishcataca manachu yachangui?” nirca.
Chaimi ñucaca: “Ñuca amito, mana yachanichu” nishpa cutichircani.
14 Paica: “Cai yuracunaca Dios agllashca ishqui runacunatami* ricuchin. Paicunaca tucui allpa pachapaj Amitopaj ladopimi shayacuncuna” nircami.
5 Cutinllataj huichilla ricushpaca shuj rollo volacujtami ricurcani. 2 Angelca ñucataca: “¿Imatataj ricungui?” nishpami tapurca.
Chaimi ñucaca: “Shuj rollo volacujtami ricuni. Chai rolloca largomanca casi iscun* metrocunatami* midin, anchomanca chuscu metrocuna yallitami* midin” nircani.
3 Chai qꞌuipami paica cashna nirca: “Caica tucui allpa pachata rij maldicionmi can. Rollo ñaupaj ladoman quillcashca shinaca shuhuaj runaca mana castigashcachu cashca. Rollo huasha ladoman quillcashca shinaca llullashpa juraj runapish mana castigashcachu cashca. 4 ‘Chai maldiciontaca ñucami cacharcani. Chaica shuhuaj runapaj huasiman, ñuca shutipi llullashpa juraj runapaj huasimanmi yaicunga. Chai huasi ucupi saquirishpami caspicunatapish, rumicunatapish libri tucuchinga’ ninmi jahua pacha soldadocunata mandaj Jehová Diosca” nircami.
5 Chai qꞌuipami ñucahuan parlacuj ángel ñucapajman cꞌuchuyashpaca: “Huichilla ricushpa ima ricuricujta ricupai” nirca.
6 Chaimi ñucaca: “¿Chaica imataj can?” nishpa tapurcani.
Paica: “Chaica granocunata midina canastami* can” nircami. Shinallataj paica: “Chai layami millai gentecunaca tucui allpa pachapi ricurin” nircami. 7 Chai huashaca redondo plomo* tapa pascarijtami ricurcani. Canasta ucupica shuj huarmimi tiyacurca. 8 Angelca: “Cai huarmica Millaitami ricuchin” nircami. Qꞌuipaca chai huarmitaca granocunata midina canasta ucullamantajmi tꞌangashpa cacharca. Chashna rurashca qꞌuipaca llashaj plomo tapahuanmi canastataca tucui fuerzahuan taparca.
9 Qꞌuipaca huichilla ricushpami huairapi volashpa ishqui huarmicuna cꞌuchuyamucujta ricurcani. Chai huarmicunaca cigüeñapaj alascunata shinami charircacuna. Paicunaca chai canastataca asha ashami jahuata alzarcacuna. 10 Chaimi ñucahuan parlacuj angeltaca: “¿Granocunata midina canastataca maimantaj apacuncuna?” nishpa tapurcani.
11 Chaimi angelca: “Huarmipaj shuj huasita rurangapajmi Sinar* allpaman apacuncuna. Ña tucui huasichijpimi paica chaipi churashca canga. Pai maipi cana cashcapimi churashca canga” nirca.
6 Cutinllataj huichilla ricushpaca ishqui urcucuna chaupimanta chuscu carretacuna llujshicujtami ricurcani. Chai urcucunaca cobremantami carca. 2 Primer carretataca puca caballocunami aisacurca. Segundo carretataca yana caballocunami aisacurca. 3 Tercer carretataca yuraj caballocunami aisacurca. Cuarto carretataca muru caballocuna, manchasta charij caballocunami aisacurca.
4 Ñucahuan parlacuj angeltaca: “¿Ñuca amito, caicunaca imataj can?” nishpami tapurcani.
5 Chashna tapujpimi angelca cashna nirca: “Chaicunaca jahua pachamanta chuscu espiritucunami can. Paicunaca tucui allpa pachapaj Amitopaj ñaupajpi cashca qꞌuipami llujshincuna. 6 Yana caballocunaman aisachishca carretaca janaj lado allpamanmi rin. Yuraj caballocunaman aisachishca carretaca mama cuchata pasashpa carutami rin. Cutin muru caballocunaman aisachishca carretaca ura lado allpamanmi rin. 7 Cutin manchasta charij caballocunaca allpata muyunaman rinayachishpami mana shuyasha nicuncuna” nircami. Chai qꞌuipaca: “Richij, allpata muyugrichij” nircami. Chaimi allpata muyunaman rircacuna.
8 Chai huashami angelca ñucata cayashpaca: “Ricui, janaj lado allpaman rijcunaca Jehová Diospaj espíritu janaj lado allpapi samarichunmi saquishcacuna” nirca.
9 Cutinllatajmi Jehová Dios huillashca shimicunata chasquircani. Ñucamanca cashnami nirca: 10 “Heldaiman, Tobiyaman, Jedayaman Babiloniapi prezu shina caj gentecuna imallata cachashcata japi. Chai punllaca Babiloniamanta shamuj cai runacunahuan Sofoniaspaj churi Josiaspaj huasiman yaicui. 11 Cullquita, orota japishpami shuj coronata* rurana cangui. Chai coronataca Jehozadacpaj churi sacerdotecunata jatun mandaj Josuepaj umapimi churana cangui. 12 Paitaca cashna ningui:
‘Jahua pacha soldadocunata mandaj Jehová Diosca caitami nin: “Retoño shuti runaca caipimi can. Paica pai maipi cashcamantami retoñanga, Jehová Diospaj huasitapishmi shayachinga. 13 Paimi Jehová Diospaj huasita shayachinga. Paica jatunyachishcami canga. Paipaj jatun tiyarinapimi tiyaringa. Paica reymi canga, sacerdotepishmi canga. Cai ishquindij ruraicunata* alli pajtachishpami sumaj causaita apamunga. 14 Chai coronaca Jehová Diospaj huasipimi saquiringa. Chaica Hélem, Tobiya, Jedayá, Sofoniaspaj churi Hen shuti runacuna imata rurashcata yuyaringapajmi canga. 15 Carupi cajcuna shamushpami Jehová Diospaj huasita shayachishpa ayudangacuna” ninmi. Cancunaca jahua pacha soldadocunata mandaj Jehová Dios cancunapajman ñucata cachashcatami yachanguichij. Tucui caicunaca cancunapaj Jehová Dios nishcata ciertotaj uyajpimi pajtaringa’ ningui” nircami.
7 Rey Darío chuscu huatacunata mandacujpimi kislev* nishca noveno quillapi, chai quillapaj chuscu punllapi Zacariasca Jehová Dios huillashca shimicunata chasquirca. 2 Betel llajtamanta gentecunaca Sarézer runatapish, Réguem-Mélec runatapish paipaj runacunandijmi Jehová Dios bendiciachun rogarishpa mañanaman cacharcacuna. 3 Shinallataj jahua pacha soldadocunata mandaj Jehová Diospaj huasipi sirvij sacerdotecunatapish, profetacunatapish: “¿Quinto quillapica achca huatacunata rurashca shinallatajchu huacana canchij, ni mana micuna canchij?” nishpa tapuchunmi cacharcacuna.
4 Cutinllatajmi jahua pacha soldadocunata mandaj Jehová Dios huillashca shimicunata chasquircani. Ñucamanca cashnami nirca: 5 “Cai llajtapi causaj gentecunatapish, sacerdotecunatapish cashna ningui: ‘Cancunaca 70 huatacunatami quinto quillapipish, séptimo quillapipish ayunaj carcanguichij, yallitaj llaquirij carcanguichij. Chashna rurashpaca, ¿ciertotajchu tucui chai huatacunataca ñucamanta ayunaj carcanguichij? 6 Cancuna micushpa, ubyashpaca, ¿manachu cancunallamantataj micurcanguichij, cancunallamantataj ubyarcanguichij? 7 ¿Manachu cancunaca ñaupa profetacunaman Jehová Dios huillachishca shimicunata cazuna carcanguichij? ¿Manachu Jerusalenpi, Jerusalén muyundijpi gentecuna sumajta causacujpiraj chaicunataca cazuna carcanguichij? ¿Manachu Neguebpi, Sefelapi gentecuna causacujpiraj chaicunataca cazuna carcanguichij?’ ningui” nircami.
8 Zacariasca cutinllatajmi Jehová Dios huillashca cai shimicunata chasquirca: 9 “Jahua pacha soldadocunata mandaj Jehová Diosca caitami nin: ‘Cashcata rurashpa juzgaichij. Caishuj chaishuj mana tucurij cꞌuyaita ricuchinacuichij, caishuj chaishuj llaquishcata ricuchinacuichij. 10 Viuda huarmicunatapish, yaya illaj huahuacunatapish, shujtaj llajtamanta runacunatapish, pobrecunatapish ama umashpa shuhuanguichijchu. Cancunapaj shungupipish caishuj chaishuj llaquichinataca ama yuyanguichijchu’ ninmi. 11 Pero paicunaca mana uyasha nishpami catircacuna. Rumi shungumi carcacuna, mana cazurcacunachu. Ama uyangapajpish paicunapaj rinrincunatami taparircacuna. 12 Paicunapaj shunguca shuj diamante* shina sinchimi tucurca. Paicunaca jahua pacha soldadocunata mandaj Jehová Dios paipaj espirituhuan ñaupa profetacunata cachashpa huillachishca leycunatapish, pai nishca shimicunatapish mana cazurcacunachu. Chaimantami jahua pacha soldadocunata mandaj Jehová Diosca paicunahuan yallitaj pꞌiñarirca”.
13 “Jahua pacha soldadocunata mandaj Jehová Diosca caitami nin: ‘Ñuca cayajpica paicunaca mana uyarcacunachu. Chashnallatajmi ñucapish paicuna ayudachun mañajpica mana uyarcani. 14 Paicunataca sinchi huairahuanmi ñaupaman paicuna mana rijsishca tucui llajtacunaman caita chaita cacharcani. Paicunapaj allpaca shitashcami saquirirca. Chai allpataca pi mana pasarcachu, chaitaca pi mana tigrarcachu. Paicunaca sumaj allpatami llaquinaita rurarcacuna’ ninmi”.
8 Cutinllatajmi jahua pacha soldadocunata mandaj Jehová Dios huillashca shimicunata chasquircani. Ñucamanca cashnami nirca: 2 “Jahua pacha soldadocunata mandaj Jehová Diosca caitami nin: ‘Siontami difindisha. Ari, tucui shunguhuanmi difindisha’” nircami.
3 “Jehová Diosca: ‘Sionmanmi tigrasha, Jerusalenpimi causasha. Jerusalenca mana llullata nij llajta nishcami canga. Jahua pacha soldadocunata mandaj Jehová Diospaj urcupish jucha illaj urcu nishcami canga’ ninmi”.
4 “Jahua pacha soldadocunata mandaj Jehová Diosca caitami nin: ‘Jerusalén plazacunapica mayorlla cꞌaricunapish, mayorlla huarmicunapishmi cutin tiyaringacuna. Paicunaca mayorlla cashcamantami cada uno paicunapaj maquipica tauna caspita aisashca cangacuna. 5 Chai llajta plazacunapica achca cꞌari huahuacuna, achca huarmi huahuacunami pugllacungacuna’ ninmi”.
6 “Jahua pacha soldadocunata mandaj Jehová Diosca caitami nin: ‘Chai punllacunapi cai pueblomanta saquirijcunapaj sinchi laya ricurijpipish, ¿chaica ñucapajpish sinchichari ricuringa?’ ninmi jahua pacha soldadocunata mandaj Jehová Diosca”.
7 “Jahua pacha soldadocunata mandaj Jehová Diosca caitami nin: ‘Ñuca pueblotaca inti llujshin lado allpacunamanta, inti huashicun lado allpacunamanta llujshichishpami quishpichisha. 8 Paicunataca pushamushami, paicunaca Jerusalenpimi causangacuna. Paicunaca ñuca pueblomi cangacuna. Ñucaca paicunapaj pajtachij Dios, cashcata ruraj Diosmi casha’ ninmi”.
9 “Jahua pacha soldadocunata mandaj Jehová Diosca caitami nin: ‘Ama manchaichijchu. Cancunaca profetacuna nishca shimicunatami uyacunguichij. Chai shimicunataca Diospaj huasita rurangapaj jahua pacha soldadocunata mandaj Jehová Diospaj huasi cimientocunata churacui punllami nircacuna. 10 Chai punllacuna manaraj chayajpica gentecunapish, animalcunapish ima pagota mana chasquijcunachu carca. Contracuna tiyashcamantami maiman rishpapish, maimanta shamushpapish mana tranquilo carcacuna. Ñucami tucui runacunataca paicunapura contracuna tucuchun saquircani’ ninmi.
11 ‘Pero cai pueblomanta saquirijcunataca mana ñaupa shina tratashachu’ ninmi jahua pacha soldadocunata mandaj Jehová Diosca. 12 ‘Sumaj causaita apamuj muyutami tarpungacuna. Uva yuracunaca pꞌucungami. Allpapipish achca granomi pꞌucunga. Jahua pachamantapish shulla tamyami urmanga. Cai pueblomanta saquirijcunamanca tucui chaicunatami herenciata shina cusha. 13 Judá llajtalla, Israel llajtalla, ima shinami cancunaca shujtaj llajtacunapurapica maldicishca carcanguichij chashnallatajmi bendiciashca canguichij. Ñucami cancunataca quishpichisha. ¡Ama manchaichijchu! Sinchi caichij’.
14 Jahua pacha soldadocunata mandaj Jehová Diosca caitami nin: ‘“Cancunapaj ñaupa yayacuna ñucata yallitaj pꞌiñachishcamantami cancunata llaquichinata decidircani. Ñuca yuyaitaca mana cambiarcanichu”* ninmi jahua pacha soldadocunata mandaj Jehová Diosca. 15 “Cunanca Jerusalenpi causajcunatapish, Judapi causajcunatapish alli tratanatami decidishcani. ¡Ama manchaichijchu!”’ ninmi.
16 ‘Cancunaca caitami rurana canguichij: caishuj chaishuj verdadta ninacuichij, cancunapaj llajta pungucunapi juzgashpaca alli cashcata ruraichij, gentecuna sumaj causaita charichunpish ayudaichij. 17 Cancunapaj shungupica caishuj chaishuj llaquichinataca ama yuyaichijchu, llullashpa juranatapish ama munaichijchu. Tucui chaicunatami ñucaca pꞌiñani’ ninmi Jehová Diosca”.
18 Cutinllatajmi Jehová Dios huillashca shimicunata chasquircani. Ñucamanca cashnami nirca: 19 “Jahua pacha soldadocunata mandaj Jehová Diosca: ‘Cuarto quillapi ayunana, quinto quillapi ayunana, séptimo quillapi ayunana, décimo quillapi ayunanaca Judá llajtapi causajcunapajca contento, cushilla cana tiempomi canga. Cushicui fiestacunami canga. Shinaca verdadta ninatapish, sumaj causaitapish mashcaichij’ ninmi.
20 Jahua pacha soldadocunata mandaj Jehová Diosca caitami nin: ‘Pueblocunamanta gentecuna, achca llajtacunapi causajcuna shamuna punllaca chayamungami. 21 Shuj llajtamanta gentecunaca caishuj llajta gentecunapajman rishpaca: “¡Jacuchij! Jehová Dios ñucanchijta bendiciachun paita rogarishpa mañashunchij. Jahua pacha soldadocunata mandaj Jehová Diosta mashcanaman rishunchij. Ñucanchijpish rishunmi” ningacunami. 22 Achca pueblocunamanta, poderyuj llajtacunamanta gentecunami jahua pacha soldadocunata mandaj Jehová Diosta Jerusalenpi mashcanaman shamungacuna. Paicunaca Jehová Dios paicunata bendiciachun rogarishpa mañanamanmi shamungacuna’ ninmi.
23 Jahua pacha soldadocunata mandaj Jehová Diosca caitami nin: ‘Chai punllacunapica tucui llajtacunamanta, tucui laya shimicunata parlaj chunga runacunami shuj judío runapaj churanapi* sinchita chariringacuna. Chashna rurashpaca: “Ñucanchijca Dios cancunahuan cajtami uyashcanchij. Chaimantami cancunahuan rishun ninchij” ningacunami’”.
9 Caica Dios huillashca shimicunami:
“Jehová Diosca Hadrac allpapaj contra,
Damasco llajtapaj contrami huillan.
Jehová Diospaj ñahuicunaca tucui gentecunatami ricucun.
Israelpaj tucui familiacunatapishmi ricucun.
2 Chai ladollapi caj Hamat llajtapaj contrapishmi huillan.
Yachaisapa Tiro llajtapaj, yachaisapa Sidón llajtapaj contrapishmi huillan.
3 Tiro llajtapi causajcunaca jatun pircacunatami shayachircacuna.
Cullquitaca ñutu allpata shinami montonarcacuna.
Orotapish ñancunapi tiyaj lodota shinami montonarcacuna.
4 ¡Ricuichij! Jehová Diosca paicuna imalla charishca cosascunatami quichunga,
paicunapaj soldadocunatapish mama cuchapimi mishanga.
Paicunapaj llajtataca ninami libri tucuchinga.
5 Asquelón llajtapi causajcuna chaita ricushpaca mancharingacunami.
Gaza llajtapi causajcunaca yallitajmi sustaringacuna.
Ecrón llajtapi causajcunapish chashnallatajmi sustaringacuna, paicuna shuyacushcapish pingaipimi churashca canga.
Gaza llajtapica shuj reyca ña mana ashtahuan tiyangachu.
Asquelón llajtapica pi mana causangachu.
6 Asdod llajtapica shujtaj llajtamanta runami tiyaringa.
Filisteo runa jatun tucunataca tucuchishami.
7 Paipaj shimimantaca yahuarhuan mapayashca cosascunatami anchuchisha.
Paipaj quirucunamantapish millanana cosascunatami anchuchisha.
Paimanta saquirijca ñucanchij Diospajmi canga.
Paica Judá llajtapica shuj pushaj shinami tucunga.
Cutin Ecrón llajtamanta gentecunaca jebuseocuna shinami canga.
8 Ñuca huasita cuidangapajca shuj guardia shinami carpa huasicunapi saquirisha.
Contracuna richunpish, shamuchunpish mana saquishachu.
Chaitaca shuj capataz* runaca cutinca mana pasangachu,
chaitaca* ñuca ñahuicunahuanmi cunanca ricushcani.
9 Sionpaj ushushilla, achcata cushicui.
Jerusalenpaj ushushilla, mishashcamanta capari.
¡Ricui! Cambaj reyca cambajmanmi shamun.
Paica cashcata rurajmi, quishpichishcami can.*
Paica humildemi can, shuj burropi tiyarishcami shamun,
shuj burrapaj huahua malta burritopi tiyarishcami shamun.
10 Efrainmantaca macanacuna carretacunatami tucuchisha.
Jerusalenmantapish caballocunatami tucuchisha.
Macanacuna arcocunaca tucuchishcami canga.
Paica sumaj causaimantami llajtacunapi causaj gentecunaman huillanga.
Paica mama cucha shuj ladomanta caishuj ladocamami mandanga.
Éufrates jatun yacumantaca allpa pacha lindecunacamami mandanga.
11 Huarmiculla, canhuanmi shuj ari ninacuita* rurarcani. Chaitaca yahuarhuanmi sellashpa churarcani.
Chaimantami cambaj huahuacunataca chaquishca jutcupi prezu cashcamanta cacharichisha.
12 Cacharichichun shuyacujcuna, jatun pircacunayuj llajtaman tigraichij.
Cunanmi canmanca caita huillani:
‘Huarmiculla, canmanca dobleta cushpami bendiciasha.
13 Judataca ñuca arcota shinami chutasha.*
Efrainca arcopaj flecha shinami canga.
Sionlla, cambaj huahuacunatami rijchachisha,
Grecia llajtapaj huahuacunapaj contrami rijchachisha.
Sionlla, cantaca shuj macanacuj runapaj espadata shinami rurasha’.
14 Jehová Diosca paipaj pueblohuan cashcatami ricuchinga.
Paipaj flechaca shuj rayo shinami llujshinga.
Tucuita Mandaj Amito Jehová Diosca gachupimi tocanga.
Paica ura ladomanta shamuj sinchi huaira shinami contracunahuan macanacunaman ringa.
15 Jahua pacha soldadocunata mandaj Jehová Diosmi paicunataca difindinga.
Paicunaca huaracahuan shitashca rumicunataca millpungacunami, sarungacunami.
Paicunaca cushicungacunami, vinota ubyashca shinami caparingacuna.
Paicunaca shuj tazón shinami junda saquiringacuna,
altar esquinacuna shinami saquiringacuna.
16 Chai punllaca paicunapaj Jehová Diosmi
paipaj pueblotaca paipaj ovejacunata shina quishpichinga.
Paipaj allpapica shuj coronapi* churashca sumaj rumicuna achijnicuj shinami cangacuna.
17 ¡Paica jatunta llaquijmari.
Paipaj sumaj achijnicujpish yallitaj sumajmari!
Micunaca joven cꞌaricunatami sinchiyachinga.
Llullu vinoca cꞌarihuan mana chayarishca huarmicunatami sinchiyachinga”.
10 “Jehová Diostaca qꞌuipa tamya shamuna punllacunapi tamyachichun mañaichij.
Jehová Diosmi pꞌuyutaca amsayachin, yanayachin.
Paimi gentecunaman achca tamyata cachan.
Campopi pꞌucushca granocunatapish tucuicunamanmi cun.
2 Santocunaca* llullacunatami nishcacuna.
Adivinocunapish mana cierto cashcatami muscuipi shina ricushcacuna.
Paicunaca imapaj mana vali muscuicunatami parlancuna.
Yangamantami cushichinata yuyancuna.
Chaimantami gentecunaca ovejacuna shina caita chaita puringacuna,
michijta mana charishcamantami sufringacuna.
3 Michijcunahuanca achcata pꞌiñarishcami cani.
Llaquichij pushajcunataca juzgashami.
Jahua pacha soldadocunata mandaj Jehová Diosca paipaj ovejacunata, Judá llajta gentecunataca ricushcami.
Paipaj sumaj caballota shinami paicunataca sumajyachishca.
4 Paimantaca* pushaj runami* shamun.
Paimantaca mandashpa ayudajmi shamun.
Paimantaca macanacuipaj arcomi shamun.
Paimantaca pushaj* runacunami llujshin, paimantami tucui paicuna shamun.
5 Paicunaca macanacuipi lodota ñancunapi saruj
soldadocuna shinami tucungacuna.
Jehová Dios paicunahuan cashcamantami macanacungacuna.
Caballopi purijcunaca pingaipimi saquiringacuna.
6 Judá llajta gentecunataca jatunyachishami.
Josepaj huahua huahuacunataca quishpichishami.
Paicunata llaquishcamantami
paicunapaj allpaman tigrachimusha.
Paicunata ñuca mana nunca saquishca shinami canga.
Ñucaca paicunapaj Jehová Diosmi cani, paicuna mañashcatapish cutichishami.
7 Efrainmanta runacunaca shuj sinchi macanacuj shinami tucungacuna.
Paicunapaj shunguca vinota ubyashcamanta cushicuj shinami cushilla canga.
Paicunapaj huahuacunaca chaita ricushpami cushicungacuna.
Paicunapaj shunguca Jehová Diosmantami cushilla canga.
8 ‘Paicunata tandachingapajca silbashami.
Paicunataca quishpichishami, chaimantami achcacuna tucunga.
Paicunaca achcacuna cashpami catingacuna.
9 Gentecunapurapi muyuta shina caita chaita cachajpipish,
ñucataca caru lugarcunapimi yuyaringacuna.
Paicunapish, paicunapaj huahuacunapish fuerzata japishpami tigrangacuna.
10 Paicunataca Egipto llajtamantami cutin tigrachimusha.
Asiria llajtamantami tandachisha.
Galaad allpaman, Libanomanmi pushasha.
Chaipica paicunapajca mana suficiente allpa tiyangachu.
11 Paica mama cuchata llaquichishpami pasanga.
Mama cuchapi jataricuj yacucunataca huajtangami.
Nilo jatun yacuca tucuimi chaquiringa.
Asiriaca pingaipimi saquiringa.
Mandana varapish Egiptomantami caruyanga.
12 Ñuca, Jehová Diosllatajmi paicunataca shujtajcunatapish yalli cachun saquisha.
Paicunaca ñuca shutipimi puringacuna’ ninmi Jehová Diosca”.
11 “Libanolla, cambaj cedro yuracunata nina rupachichun
cambaj pungucunata pascai.
2 ¡Enebro yuralla, cedro yura urmashcamanta llaquiriyari.
Sumaj yuracunaca urmachishcami cashca!
¡Basanmanta roble yuracunalla, llaquirichijyari.
Jatun bosquemanta yuracunaca urmachishcami cashca!
3 ¡Uyaichij! Michijcunaca yallitajmi llaquirincuna,
paicunata ña mana jatunyachijpimi yallitaj llaquirincuna.
¡Uyaichij! Malta leoncunaca huacaricuncunami.
Jordán jatun yacu urimanta sacha yuracunata anchuchishcamantami huacaricuncuna.
4 Ñuca Jehová Diosca caitami nin: ‘Huañuchinapaj cashca ovejacunata michi. 5 Randijcunaca chaicunataca huañuchinllacunami, shinapish mana culpayuj cancunachu. Cꞌatujcunaca: “Jehová Diosca alabashca cachun. Ñucaca achcata charijmi tucugrini” nincunami. Chai ovejacunata michijcunapish paicunataca mana llaquincunachu’ ninmi.
6 Jehová Diosca cashnatajmi nin: ‘Cai llajtapi causaj gentecunataca cutinca mana llaquishachu. Ashtahuanpish paicunapaj projimopaj maquipi, paicunapaj reypaj maquipi urmachunmi saquisha. Paicunaca cai llajtataca llaquichingacunami. Paicunapaj maquimantaca mana quishpichishachu’”.
7 Ñucaca huañuchinapaj cashca ovejacunatami michi callarircani. Llaquichishca ovejacunalla, cancunamantami chaita rurarcani. Chaimantami ishqui tauna caspicunata japircani. Shuj caspitaca Llaquij shutita, caishuj caspitaca Tandachij shutitami churarcani. Chai qꞌuipami ovejacunataca michi callarircani. 8 Ñucaca shuj quillallapimi quimsa michijcunata llujshichishpa cacharcani. Paicunahuanca pacienciata mana charircanichu. Paicunapish ñucataca pꞌiñarcacunami. 9 Chaimi ñucaca: “Mana michishpa catishachu. Huañucujca huañuchun, causaita chingachicujca causaita chingachichun. Cutin saquirijcunaca cada uno caishujpaj aichata micuchun” nircani. 10 Chai qꞌuipaca Llaquij shuti ñuca tauna caspita japishpami mirga mirgapi pꞌaquircani. Chashnami tucui pueblocunahuan ari ninacushcata pꞌaquircani. 11 Chai punllami ari ninacushcaca pꞌaquirirca. Ñucata ricucuj llaquichishca ovejacunaca Jehová Dios nishcata* ñuca huillacujtami yacharcacuna.
12 Chai qꞌuipami ñucaca: “Cancunapaj alli cajpica ñuca pagota cuichij. Pero mana chashna cajpica chai pagohuan saquirichijlla” nircani. Chaimi ñuca pagota curcacuna. Ñucamanca 30 moneda cullquitami pagarcacuna.*
13 Chai qꞌuipami Jehová Diosca: “Ñucataca achca valishca cullquipimari cꞌatushcacuna. Chaitaca achca valij cosascunata huaquichinapi shitai” nirca. Chashna nijpimi 30 moneda cullquita japishpaca Jehová Diospaj huasipi achca valij cosascunata huaquichinapi shitarcani.
14 Chai qꞌuipaca Tandachij shuti ñuca caishuj tauna caspitami mirga mirgapi pꞌaquircani. Chashnami Judá llajtahuan Israel llajtahuan chꞌicanyachircani.
15 Jehová Diosca ñucataca cashnami nirca: “Cunanca shuj mana vali michij runapaj cosascunata japi. 16 Ñucaca cai llajtapi shuj michij tiyachunmi saquisha. Paica huañucuj ovejacunataca mana cuidangachu. Huahua ovejacunatapish mana mashcangachu. Chugririshca ovejacunatapish mana jambingachu. Sano ovejacunamanpish mana carangachu. Chaipaj randica huirayashca ovejacunapaj aichatami micunga, sillucunatapishmi surcunga.
17 ¡Aij ovejacunata shitashpa saquij mana vali michijlla!
Cambaj rigratapish, cambaj alli lado ñahuitapish shuj espadami chugrichinga.
Cambaj rigraca tucuimi chaquiringa.
Cambaj alli lado ñahuipish imata mana ricungachu”* nircami.
12 Caica Dios huillashca shimicunami:
“Israel llajtamanta Jehová Dios huillashca shimicunami” ninmi Jehová Diosca.
Paimi jahua pachataca shuj telata shina tindirca.
Paimi allpa pachapaj cimientocunatapish churarca.
Paimi gentecuna causachunpish samaita curca.
2 “Jerusalentaca shuj copata* shinami rurasha. Chaimi tucui cꞌuchulla pueblocunataca chujchuchinga. Judá llajta muyundijpipish, Jerusalén llajta muyundijpipish contracunami shayaringa. 3 Chai punllaca Jerusalentaca tucui pueblocunapajmi shuj llashaj rumita shina rurasha. Maijanpish chai rumita alzajca chugriringatajmi. Allpapi tiyaj tucui llajtacunami Jerusalenpaj contra tandanacungacuna”. 4 “Chai punllaca tucui caballocunatami manchachisha. Chaimi caballopi purijcunaca locoyangacuna. Judá llajta gentecunataca ñucami chaparacusha. Pero tucui pueblocunapaj caballocunataca ciegoyachishami” ninmi Jehová Diosca. 5 “Judá llajtamanta pushajcunaca paicunapaj shungupica: ‘Jerusalenpi causajcunaca ñucanchijpajca jahua pacha soldadocunata mandaj Jehová Diosmanta shamuj fuerzami can’ ningacunami. 6 Chai punllaca Judá llajtamanta pushajcunataca yanta chaupipi tiyaj rupacuj carbón shina cachunmi rurasha. Shinallataj gavillacunapi mecha japichishca shina cachunmi rurasha. Chaimi alli ladoman, lluqui ladoman caj cꞌuchulla pueblocunataca tucuchingacuna. Jerusalenmanta gentecunaca paicunapaj llajta Jerusalenpi causanamanmi tigrangacuna.
7 Jehová Diosca puntaca Judapaj carpa huasicunatami quishpichinga. Chashnami Davidpaj huahua huahuacunapish, Jerusalenpi causaj gentecunapish Judá llajtamanta gentecunata yalli mana jatunyachishca cangacuna. 8 Chai punllaca Jehová Diosca Jerusalenpi causajcunapaj muyundijpica shuj escudo shinami canga. Chai punllaca paicunapuramanta ashtahuan débil caj* runaca David shina sinchimi canga. Davidpaj huahua huahuacunaca Dios shinami cangacuna, ñaupajta rij Jehová Diospaj ángel shinami cangacuna. 9 Chai punllaca Jerusalenta llaquichij tucui llajtacunataca tucuchishatajmi.
10 Davidpaj huahua huahuacunaman, Jerusalenpi causaj gentecunamanmi ñuca espirituta cusha. Paicunaca ñuca ñaupajpimi alli ricuringacuna. Paicunaca rogarishpami ñucata mañangacuna. Shinallataj paicunaca paicuna lanzahuan tujsishca runatami ricungacuna. Chaimi shujlla huahuamanta yallitaj llaquirij shina paimanta yallitaj llaquiringacuna. Punta churimanta cꞌuyaillata huacaj shinami paimanta cꞌuyaillata huacangacuna. 11 Chai punllaca Jerusalenpica Meguidó pugru pambapi saquirij Hadadrimonpi yallitaj llaquirij shinami jatunta llaquiringacuna. 12 Cai llajtapi causaj gentecunaca yallitajmi llaquiringacuna. Cada familiami paicunalla yallitaj llaquiringacuna. Davidpaj familiaca paicunallami llaquirishpa huacangacuna, paicunapaj huarmicunapish paicunallami huacangacuna. Natanpaj familiaca paicunallami llaquirishpa huacangacuna, paicunapaj huarmicunapish paicunallami huacangacuna. 13 Levipaj familiaca paicunallami llaquirishpa huacangacuna, paicunapaj huarmicunapish paicunallami huacangacuna. Simeipaj familiaca paicunallami huacangacuna, paicunapaj huarmicunapish paicunallami huacangacuna. 14 Saquirij tucui familiacunapish cada familiami paicunalla llaquirishpa huacangacuna, paicunapaj huarmicunapish paicunallami huacangacuna.
13 Chai punllaca allashca shuj pugyumi tiyanga. Chaipimi Davidpaj huahua huahuacunapish, Jerusalenpi causaj gentecunapish paicunapaj juchamanta, paicuna mapa saquirishcamanta chuyayaringacuna”.
2 “Chai punllaca llajtamantaca rurashcalla dioscunapaj shuticunatami anchuchisha. Paicunataca ña mana yuyaringacunachu. Llajtamantaca profetacunatapish tucuchishami. Chaipica millaita ruranata munajca pi mana tiyangachu” ninmi jahua pacha soldadocunata mandaj Jehová Diosca. 3 “Shuj runa cutinllataj profeta shina huillajpica paipaj propio yayapish, paita huachaj mamapish: ‘Canca Jehová Diospaj shutipimi llullacunata nishcangui. Chaimantami huañungui’ ningacunami. Paipaj propio yayapish, paita huachaj mamapish profeta shina huillashcamantaca paitaca lanzahuanmi tujsingacuna.
4 Chai punllaca tucui profetacunami paicuna muscuipi shina ricushcata huillashpaca pingai tucungacuna. Gentecunata pandachingapajpish profetacuna churarina millma churanataca mana churaringacunachu. 5 Paicunaca cada unomi: ‘Ñucaca mana profetachu cani. Ñucaca allpapi tarpuj runallami cani. Ñucataca jovenraj cajpimi shuj runa randirca’ ningacuna. 6 Maijanpish ‘¿Cambaj rigracuna chaupipi* chugricunaca imataj canyari?’ nishpa tapujpica, ‘Ñuca amigocunapaj* huasipimi chashna chugrichircacuna’ nishpami cutichinga”.
7 “Espadalla, rijchariyari, ñuca michijta huañuchiyari.
Ñuca amigota huañuchiyari.
Michijta huañuchiyari, chaimi ovejacunaca caita chaita ringacuna.
Uchilla huahuacuna shina cajcunataca disciplinashami” ninmi jahua pacha soldadocunata mandaj Jehová Diosca.
8 Jehová Diosca: “Tucui llajtapimi
quimsapi chaupishca partemantaca ishqui parte huañunga,
cutin shuj parteca causashpami saquiringa” ninmi.
9 “Saquirijcunataca cullquita ninapi chuyayachij shina,
orota ninapi chuyayachij shinami
alli ricushpa chuyayachisha.
Paicunaca ñuca shutita nishpami mañangacuna,
ñucapish paicuna mañashcataca cutichishami.
Ñucaca ‘Paicunaca ñuca pueblomari’ nishami.
Paicunaca ‘Jehová Diosca ñucanchij Diosmari’ ningacunami”.
14 “¡Ricuichij! Shuj punllami shamun, Jehová Diospaj punllami shamun. Chai punllaca cancuna imalla charishca cosascunataca cancunapaj* ñaupajpimi quichushca cosascunata shina chaupingacuna. 2 Ñucaca tucui llajtacunatami Jerusalenhuan macanacuchun tandachisha. Chai llajtamanta gentecunaca Jerusalén llajtatami japingacuna, huasicunapi imalla tiyashcatami shuhuangacuna, huarmicunatapishmi violangacuna. Jerusalenpi causaj gentecunamanta chaupica prezu shinami apashca cangacuna, pero saquirij gentecunaca llajtamantaca mana tucuchishcacunachu canga.
3 Jehová Dios llujshishpaca shuj macanacui punllapi macanacuj shinami chai llajtacunahuan macanacunga. 4 Chai punllaca paipaj chaquicunaca Olivos yuracuna tiyan urcupimi canga. Chai urcuca Jerusalén chꞌimbapurapi, inti llujshin ladopimi can. Olivos yuracuna tiyan urcuca inti llujshin ladomantaca inti huashicun ladocamami ishquipi chaupiringa. Chashnami shuj jatun pugru pamba tucunga. Chaupi urcuca janaj ladomanmi cuyuringa, cutin chaupi urcuca ura ladomanmi cuyuringa. 5 Cancunaca chai urcucunapi tiyaj pugru pambamanmi miticushpa ringuichij. Chai urcucunapi tiyaj pugru pambaca Azelcamami canga. Judá llajtata mandaj rey Uziaspaj punllacunapi terremoto tiyashcamanta miticushpa rij shinallatajmi miticushpa rina canguichij. Ñuca Jehová Diosca shamungami, tucui jucha illajcunapish paihuanmi canga.
6 Chai punllaca ima achijyachij luz mana tiyangachu. Ima mana cuyuringachu.* 7 Chai punllaca Jehová Diospaj punlla nishcami canga. Punllapish, tutapish mana tiyangachu. Ashtahuanpish tutayaitami luzca tiyanga. 8 Chai punllaca Jerusalenmantaca causaita cuj yacucunami callpanga. Chaupica inti llujshin lado mama cuchamanmi* ringa, cutin chaupica inti huashicun lado mama cuchamanmi* ringa. Usia punllacunapi, tamya punllacunapimi chashna canga. 9 Jehová Diosca tucui allpapimi Rey canga. Chai punllaca tucuicunami Jehová Diosllata adorangacuna. Paipaj shutillatami alabangacuna.
10 Tucui llajtami Guebamanta callarishpaca Jerusalén ura ladopi saquirij Rimoncama Arabá pugru pamba shina tucunga. Jerusalenca jatunyachishcami canga, gentecunapish chaipimi causangacuna. Benjamín Pungu nishcamantaca Punta Pungu nishcacama, Esquina Pungu nishcacamami causangacuna. Shinallataj Hananel Torremantaca, reypaj uvacunata saruna pambacunacamami causangacuna. 11 Jerusalenpica causangacunami. Cutinca mana tucuchishcachu canga. Jerusalenpica imata mana manchashpami causangacuna.
12 Jehová Diosca Jerusalenhuan macanacuj tucui gentecunataca cashnami llaquichinga: paicunapaj aichaca causacujpirajmi ismunga, ñahui luluncunapish maipi cashcapimi ismunga, cꞌallupish shimipimi ismunga.
13 Chai punllaca Jehová Diosca paicuna achca manchaita charichunmi saquinga. Cada unomi paicunapaj projimopaj maquipi chariringacuna. Shinallataj caishuj chaishuj macanacushpami llaquichinacungacuna. 14 Judapishmi Jerusalenpi macanacunga. Cꞌuchulla llajtacunamanta valishca cosascunatami japingacuna. Orota, cullquita, achca churanacunatami japingacuna.
15 Chai layallataj ungüimi caballocunatapish, mulacunatapish, camellocunatapish, burrocunatapish, contracunapaj carpa huasicuna chaupipi caj tucui animalcunatapish japinga.
16 Jerusalenta llaquichij tucui llajtacunamanta saquirijcunaca huatantami jahua pacha soldadocunata mandaj Rey Jehová Diosta adorangapaj, Chuglla huasicunata* rurana fiestata rurangapaj huichiyangacuna. 17 Pero allpapi tiyaj llajtacunamanta maijanpish jahua pacha soldadocunata mandaj Rey Jehová Diosta adorangapaj Jerusalenman mana huichiyajpica paicunapaj llajtapica mana tamyangachu. 18 Shinallataj Egipto llajtamanta gentecuna mana huichiyajpi, Jerusalenman mana yaicujpica chaipipish mana tamyangachu. Ashtahuanpish Jehová Diosca Chuglla huasicunata rurana fiestata rurangapaj mana huichiyaj llajtacunamanta gentecunata shinallatajmi llaquichinga. 19 Egipto llajtamanta gentecunapish, Chuglla huasicunata rurana fiestaman mana huichiyaj tucui llajtacunamanta gentecunapish chashnami llaquichishca cangacuna. Paicunaca juchatami rurashcacuna.
20 Chai punllaca ‘¡Jehová Diosca jucha illajmi!’ nishca shimicunami caballocunapi churashca uchilla campanacunapi quillcashca canga. Jehová Diospaj huasipi caj mangacunapish* altar ñaupajpi caj tazoncuna shinami canga. 21 Jerusalenpipish, Judapipish tucui mangacunami Diospajlla chꞌicanyachishca canga. Chaicunaca jahua pacha soldadocunata mandaj Jehová Diospajmi canga. Sacrificiocunata ruracujcunaca yaicushpami huaquin mangacunataca yanungapaj japingacuna. Chai punllaca jahua pacha soldadocunata mandaj Jehová Diospaj huasipica cananeocunaca* ña mana ashtahuan tiyangachu”.
“Zacarías” shutica ‘Jehová Diosmi yuyarishca’ nisha ninmi.
Ayuda B15-ta ricui. “Sebat” shimita huasha diccionariopi ricui.
O “bayo”.
“Gachu” shimita huasha diccionariopi ricui.
Hebreo rimaipica: “jahua pacha chuscu huairacunatami” ninmi.
O “siete”.
O “pugru”.
Hebreo rimaipica: “rumita, estañota” ninmi.
Caitaca “ñahuicunaca” nishpapishmi traducishcacuna.
Caipica granocuna junda olivo ramacunamantami parlacun.
O “Diospaj ishqui ungidocunatami”.
O “nueve”.
Hebreo rimaipica: “20 codos” ninmi. Shuj codoca 44.5 centimetrocunatami charirca. Ayuda B14-ta ricui.
Hebreo rimaipica: “10 codos” ninmi.
Hebreo rimaipica: “efami” ninmi. Ayuda B14-ta ricui.
Caipica shuj metalmantami parlacun.
Caipica Babiloniamantami parlacun.
O “sumaj coronata”.
Caipica rey canamantapish, sacerdote canamantapishmi parlacun.
Ayuda B15-ta ricui. “Kislev” shimita huasha diccionariopi ricui.
Caitaca “sinchi rumi” nishpapishmi traducishcacuna.
O “Ñucaca mana llaquirircanichu”.
O “churana puntapi”.
O “llaquichij”.
Caipica paipaj pueblo llaquita apacushcatami parlacuj yuyachin.
O “quishpichijmi can”, “mishajmi can”.
O “pactota”.
Hebreo rimaipica: “sarusha” ninmi.
O “diademapi”.
Hebreo rimaipica: “Terafim” ninmi.
O “Judamantaca”.
Hebreo rimaipica: “esquinapi tiyaj torre” ninmi. Caitaca shuj importante runamanta parlangapajmi chashna nin.
O “capataz”.
Hebreo rimaipica: “Diospaj shimita” ninmi.
O “pesarcacuna”.
Hebreo rimaipica: “tucuimi amsa saquiringa” ninmi.
O “tazonta”.
O “fuerzata mana charij”.
Caipica pechopi o huashapi cashcatami parlacun.
O “Ñucata cꞌuyajcunapaj”.
Caipica Jerusalenmantami parlacun.
O “Cosascunapish caspiyashcami saquiringa”.
Caipica mar Muertomantami parlacun.
Caipica mar Mediterraneomantami parlacun.
Caipica ashalla tiempota causana chuglla huasicunamantami parlacun.
O “jatun shimiyuj mangacunapish”.
Caitaca “comerciantecunaca” nishpapishmi traducishcacuna.