MALAQUÍAS

1 Caica Dios huillashca shimicunami.

Jehová Diosmi Malaquiashuan* israelitacunamanca cai shimicunata huillarca:

2 “Cancunamanca ñuca cꞌuyaitami ricuchishcani” ninmi Jehová Diosca.

Shinapish cancunaca: “¿Ima shinataj cambaj cꞌuyaitaca ricuchishcangui?” ninguichijmi.

“¿Esauca manachu Jacobpaj huauqui carca?” ninmi Jehová Diosca. “Ñucaca Jacobtaca cꞌuyarcanimi, 3 pero Esautaca pꞌiñarcanimi. Shinallataj paipaj urcucunatapish shitashcatami saquircani. Paipaj herenciatapish chaquishca pambapi causaj sacha allcucunamanmi* saquircani” ninmi.

4 “Edomca: ‘Ñucanchijca tucuchishca shina cashpapish tigrashpaca urmachishca lugarcunatami cutin shayachishun’ ninmi. Shinapish jahua pacha soldadocunata mandaj Jehová Diosca: ‘Paicuna cutin shayachijpipish ñucaca urmachishami. Ashtahuanpish gentecunaca chai llajtapi causajcunataca “millaita rurashpa causajcuna” nishpami shutichingacuna. Shinallataj paicunataca “Jehová Diosca chaipi causajcunataca huiñaipajmi pꞌiñashca” ningacunami. 5 Cancunapaj propio ñahuihuan ricushpami: “Jehová Diosca tucui Israel llajtapi jatunyachishca cachun” ninguichij’ ninmi”.

6 “Jahua pacha soldadocunata mandaj Jehová Diosca paipaj shutita yangapi churaj sacerdotecunamanca: ‘Huahuaca yayatami respetan, sirvijca paipaj amotami alli nin. Ñuca cancunapaj yaya cajpica, ¿ima nishpataj mana respetanguichij? Cutin ñuca amo cajpica, ¿ima nishpataj mana manchanguichij?’ ninmi.

‘Shinapish cancunaca: “¿Ima shinataj cambaj shutitaca yangapi churashcanchij?” ninguichijmi’.

7 ‘Cancunaca ñuca altar jahuapica mapayachishca micunacunatami cunguichij’.

‘Cashnapishmi ninguichij: “¿Ima shinataj mapayachishcanchij?”’.

‘Cancunaca: “Jehová Diospaj mesata respetanataca mana minishtinchijchu” ninguichijmi. 8 Cancunaca mana ricuj animaltacunata sacrificiota shina cushpapish: “Ima mana allica mana canchu” ninguichijmi. Shinallataj patojo o ungushca animalcunata cushpapish: “Ima mana allica mana canchu” ninguichijmi’”.

Jahua pacha soldadocunata mandaj Jehová Diosca: “Cambaj mandajman chashna cuhuayari. Can chashna cujpica, ¿paica contentochu sintiringa? ¿Paica allichu chasquinga?” ninmi.

9 “Cunanca Dios ñucanchijman cꞌuyaita ricuchichun rogapaichij. Cancuna cashna laya ofrendacunata cujpica, ¿cancunamanta maijan cushca ofrendataca cushicushpachu chasquiniman?” ninmi jahua pacha soldadocunata mandaj Jehová Diosca.

10 “¿Cancunamantaca pitaj pungucunallatapish* huichcasha ninguichij? Ñuca altarpica ninallatapish mana gratis japichinguichijmanchu. Cancunahuanca mana cushilla canichu” ninmi jahua pacha soldadocunata mandaj Jehová Diosca. Shinallataj “Cancuna cushca ofrendatapish mana chasquinichu” ninmi.

11 “Inti llujshin ladomanta, inti huashicun ladocamami tucui llajtacunapaj chaupipi ñuca shutica rijsishca canga. Tucui ladocunapimi sacrificiocunata rupachishpa cushnichingacuna. Shinallataj ñuca shutita jatunyachingapajmi ofrendacunata cungacuna. Chaica alli regalomi canga. Tucui llajtacunapaj chaupipimi ñuca shutica rijsishca canga” ninmi jahua pacha soldadocunata mandaj Jehová Diosca.

12 “Shinapish cancunaca yangapi churashpami ‘Jehová Diospaj mesaca mapayachishcami can. Chai mesapi caj frutocunapish, chai jahuapi tiyaj ofrendacunapish mana valinchu’ ninguichij. 13 Cancunaca ‘¡Cai trabajomantapish, shaicushcami canchij!’ ninguichijmi. Shinallataj tucuitami millanayachinguichij” ninmi jahua pacha soldadocunata mandaj Jehová Diosca. “Cancunaca patojo, ungushca animalcunatami apamunguichij. ¡Chaimi cancunapaj regalo! ¿Ñucaca cancuna cushca regalotaca chasquishachu?” ninmi Jehová Diosca.

14 “Maijanpish Diosman shuj ofrendata cungapaj ari nishpa paipaj corralpi shuj sano cꞌari ovejata charishca jahua, mana alli animalta Jehová Diosman sacrificiota cushpa umajca millai nishca cachun. Ñucaca jatun mandajmi cani” ninmi jahua pacha soldadocunata mandaj Jehová Diosca. “Ñuca shutitapish tucui llajtacunapaj chaupipimi manchangacuna, respetangacuna” ninmi.

2 “Sacerdotecuna, cai mandashcacunaca cancunapajmi can. 2 Cancuna mana uyasha nishpa, cancunapaj shungupipish ñuca shutita mana jatunyachishcamantami cancunataca mana alli nisha. Cancunapaj bendicioncunapish mana alli nishcami tucunga” ninmi jahua pacha soldadocunata mandaj Jehová Diosca. “Ari, cancuna tucui shunguhuan mana uyashcamantami cancunapaj bendicioncunataca maldicioncunaman tigrachishcani” ninmi.

3 “¡Ricuichij! Chashna rurashcamantami cancuna tarpushca muyutapish tucuchisha. Cancunapaj fiestacunapi sacrificiota rurashca animalcunapaj majadacunatami cancunapaj ñahuicunapi shitasha. Shinallataj montonashca majadacunapimi shitashca canguichij. 4 Ñucaca Levihuan ari ninacushca* catichunmi cai mandashcataca cushcani. Chaitami cancunaca yachaj chayanguichij” ninmi jahua pacha soldadocunata mandaj Jehová Diosca.

5 “Ñuca ari ninacushcaca pai causashpa catichunmi ayudarca. Shinallataj tranquilo causashpa catichunmi saquirca. Chashna laya bendicioncunata charishcamantami paica ñucata jatunyachinata munarca.* Paica ñucata mancharcami. Ari, paica ñuca shutita respetashcatami ricuchirca. 6 Paica mana llulla leytami* yachachirca. Shinallataj paipaj shimihuanca ima mana allitaca mana rimarcachu. Paica ñucahuanca tranquilomi causarca. Ñuca ñaupajpipish ima pandataca mana rurarcachu. Achca gentecunatapish mana allicunata ruranata saquichunmi ayudarca. 7 Sacerdotemi gentecunaman Diosmanta yachachina deberta charin. Gentecunapish leymantaca paitami tapuna can. Paica jahua pacha soldadocunata mandaj Jehová Diospaj huillajmi can.

8 Shinapish cancunallatajmi ñanmantaca anchurishcanguichij. Cancunapaj culpamantami achcacunaca mandashcata mana catishcacuna. Levihuan ari ninacushcatapish mana valichishcanguichijchu” ninmi jahua pacha soldadocunata mandaj Jehová Diosca. 9 “Cancunaca ñuca ñancunataca mana catircanguichijchu. Ashtahuanpish leypi mandashcataca ñahuita ricushpallami pajtachircanguichij. Chaimantami cancunataca pꞌiñasha. Tucuicunapaj ñaupajpipish pingaipimi churasha”.

10 “¿Manachu tucuicuna shujlla yayata charinchij? ¿Manachu tucuicunata shujlla Dios rurarca? Shinashpaca ¿imamantataj caishuj chaishuj umanacushpa ñucanchij ñaupa yayacunapaj ari ninacushcataca yangapi churanchij? 11 Judá llajtapi causajcunaca mana cazushcacunachu. Israelpi, Jerusalenpipish millai cosascunatami ruracuncuna. Judá llajtapi caj gentecunaca Jehová Diostami yangapi churashcacuna. Diosca jucha illaj canatami cꞌuyan. Paicunaca shujtaj diosta adoraj huarmicunahuanmi cazarashcacuna. 12 Jehová Diosca Jacobpaj carpa huasicunapi maijanpish millaita rurajtaca chingachingami. Maijan cajpipish, jahua pacha soldadocunata mandaj Jehová Diosman shuj ofrendata cujpipish paitaca chingachingatajmi” nircami.

13 “Ashtahuanpish cancunaca shujtaj millai ruraitami rurashcanguichij. Chaimantami Jehová Diospaj altarpica huiquicunata jundachishcanguichij. Huacaicunapish, shungu nanaicunapishmi uyarishca. Chaimi paica cancuna cushca ofrendatapish mana ricunachin, mana cushicuihuan chasquin. 14 Cancunaca: ‘¿Imamanta?’ nishpami tapunguichij. Canca jovenraj cashpa canhuan cazarashca huarmita shitashpa shujtajhuan rishcamantami Jehová Diosca cambaj contra testigo tucushca. Can cazarashca huarmica cambaj amigami can. Paihuan ari ninacushcamantami cambaj huarmi tucurca.

15 Shinapish shujca Diospaj espirituta charishcamantami mana chaita rurarca. ¿Paica imatataj mashcarca? Diospaj huahua huahuacunatami mashcarca. Chaimanta cancunapaj shungupica allita ruranata mashcaichij. Cancuna jovenpi cazarashca huarmitapish ama shitashpa shujtajhuan richijchu. 16 Shuj cꞌari paipaj huarmimanta divorciarijpica ñucaca yallitajmi pꞌiñani” ninmi israelitacunapaj Jehová Diosca. “Shinallataj millaita rurajcunatapish pꞌiñanimi” ninmi jahua pacha soldadocunata mandaj Jehová Diosca. “Chaimanta cancunapaj shungupipish allita ruranata mashcaichij. Shujtajcunahuanpish ama umanacuichijchu.

17 Cancunaca caita chaita nishpami Jehová Diostaca shaicuchishcanguichij. Shinapish cancunaca: ‘¿Ima shinataj shaicuchishcanchij?’ ninguichijmi. Cancunaca ‘Tucui mana allita rurajcunaca Jehová Diospaj ñaupajpica allimi can, paipaj ñaupajpipish allimi ricurin’ ninguichijmi. Mana cashpaca, ‘¿Cashcata ruraj Diosca maipitaj can?’ ninguichijmi” ninmi.

3 “¡Ricuichij! Ñuca huillajtami cachagrini. Paica ñucata ñaupashpami ñanta allichishpa ringa. Cancuna mashcacushca Amitoca manapish yuyashcapimi paipaj huasiman shamunga. Ari ninacushcata huillajca shamungatajmi. Paitami cancuna cushicuihuan shuyacunguichij. ¡Ricuichij! Paica shamungatajmi” ninmi jahua pacha soldadocunata mandaj Jehová Diosca.

2 “Shinapish ¿pai shamuna punllapajca pitaj allichirishca cangayari? ¿Pai ricurina punllapajca pitaj shayashpa catingayari? Paica fierrota yacuyachij nina shinami canga. Paica ropata tajshangapaj jabón shinami canga. 3 Cullquita yacuyachij, chuyayachij shinami tiyaringa. Chashnallatajmi Levipaj huahuacunatapish chuyayachinga. Paicunataca cullquita, orota shinami chuyayachinga. Chaimantami paicunaca cashcata ruraj gentecuna tucushpa shuj ofrendata Jehová Diosman cunga. 4 Jehová Diosca Judapaj, Jerusalenpaj ofrendacunataca cushicushpami chasquinga. Ñaupa punllacunapi chasquij layallatajmi chasquinga.

5 Ñucaca cancunata juzgangapajmi shamusha. Brujocunapaj, huainayajcunapaj, llullashpa jurajcunapaj, cullqui jahua trabajajcunaman mana cabalta pagajcunapaj contrami utca huillasha. Shinallataj viudata, yaya illajta, shujtaj llajtamanta cajta mana ayudajcunapaj contrami utca huillasha. Cai gentecunaca ñucataca mana manchashcacunachu” ninmi jahua pacha soldadocunata mandaj Jehová Diosca.

6 “Ñucaca Jehová Diosmi cani. Mana cambianichu. Cancunaca Jacobpaj huahuacunami canguichij. Chaimantami cancunaca manaraj tucuchishca canguichij. 7 Cancunaca ñaupa yayacunapaj punllacunamantami ñuca mandashcacunata mana catishpa caruyashcanguichij. Ñucapajman tigramuichij, ñucapish cancunapajman tigrashami” ninmi jahua pacha soldadocunata mandaj Jehová Diosca.

Shinapish cancunaca: “¿Ima shinataj cambajmanca tigrashunyari?” ninguichijmi.

8 “¿Shuj runaca Diostaca shuhuai tucunchu? Cancunami ñucataca shuhuacunguichij”.

Shinapish cancunaca: “¿Ima horataj shuhuashcanchijyari?” ninguichijmi. “Diezmocunata,* ofrendacunata mana apamushpami shuhuacunguichij. 9 Cancunaca ñucata shuhuacushcamantami maldicishcataj canguichij. Chaitami tucui llajta ruracun. Chaica chashnatajmi. 10 Ñuca huasiman* diezmota* cabalta apamuichijyari. Shina apamujpica ñuca huasipica micunaca mana faltangachu. Amataj shina caichijchu. Chashna cancuna apamujpi ñuca cancunapaj imata rurajta ricuichijyari. Ñucaca jahua pacha pungucunata pascashpami cancunapaj imapish ama faltachunca achcata bendiciasha” ninmi jahua pacha soldadocunata mandaj Jehová Diosca.

11 “Cancunapaj chagra granocunata ama tucuchichun, uva chagracunapish uva illaj ama saquirichunmi cancunamanta langostacunata jarcasha” ninmi jahua pacha soldadocunata mandaj Jehová Diosca.

12 “Cancunataca tucui llajtacunami cushilla ningacuna. Cancunaca cushilla llajtami tucunguichij” ninmi jahua pacha soldadocunata mandaj Jehová Diosca.

13 “Cancunaca ñucapaj contrami sinchita rimashcanguichij” ninmi Jehová Diosca.

Shinapish cancunaca: “¿Ima horastaj chashna sinchita rimashcanchijyari?” ninguichijmi.

14 “Cancunaca: ‘Diosta sirvinaca imapaj mana valinchu. ¿Paipaj mandashcata cazunapish imapajtaj valishcayari? ¿Jahua pacha soldadocunata mandaj Jehová Diospaj ñaupajpi llaquilla purinapish imapajtaj valishcayari? 15 Cunanca jatun tucushcacunaca cushillami can nishunchij. Millaita rurajcunapish allimi causan nishunchij. Paicunaca Diosta pruebapi churashpami paicuna munashcata rurancuna’ ninguichijmi”.

16 Chai tiempopica Jehová Diosta manchajcunaca paicunapurami parlanacucurcacuna. Cada unomi paicunapaj amigocunahuan parlanacucurcacuna. Jehová Diosca paicunataca allimi uyashpa catirca. Jehová Diosca paipaj ñaupajpimi shuj librota quillcachirca. Chai librotaca paita manchajcunata, paipaj shutita yuyarijcunapaj* shuticunata yuyaringapajmi quillcachirca.

17 “Ñucapajlla valishca cachun agllai punllaca paicunaca ñucapajmi canga” ninmi jahua pacha soldadocunata mandaj Jehová Diosca. “Ima shinami shuj runaca paita sirvij churita llaquin, chashnallatajmi ñucapish cancunataca llaquisha. 18 Cancunaca cashcata rurajhuan, millaita rurajhuanca mana igual cashcatami cutin alli ricunguichij. Shinallataj Diosta sirvijhuan, Diosta mana sirvijhuan mana igual cashcatami cutin alli ricunguichij” ninmi.

4 Jahua pacha soldadocunata mandaj Jehová Diosca: “¡Ricuichij! Nina lunyacuj horno shina punllaca ñallami chayamugrin. Chaipica tucui jatun tucushcacuna, tucui millaicunata rurajcunaca chaquishca qꞌuihua shinami tucunga. Chai punlla chayamushpaca tucuitami tucuchingataj. Chaimi shuj sapillapish, shuj ramallapish mana saquiringa. 2 Shinapish cashcata ruraj intica cancunapaj jahuapimi achijyachinga. Ñuca shutita jatunyachijcunataca intipaj rayocunami alliyachinga. Chaimi cancunaca gordoyashca bizicuna shina saltanguichij” ninmi.

3 “Ñuca chaita rurai punllaca cancunaca millaicunatami sarunguichij. Paicunataca cancunapaj chaqui ucupi allpata shinami rurasha” ninmi jahua pacha soldadocunata mandaj Jehová Diosca.

4 “Ñucata sirvij Moisesman cushca leyta yuyarichij. Chaipica mandashcacunata, ñuca imallata rurachun nishcacunatapish tucui israelitacuna cazuchunmi Horeb llajtapi curcani.

5 ¡Ricuichij! Jehová Diospaj jatun mancharina punlla manaraj shamujpimi profeta Eliasta cachagrini. 6 Paica yayacunapaj shungutaca huahuacunapaj shunguta shinami ruranga. Shinallataj huahuacunapaj shungutaca yayacunapaj shunguta shinami ruranga. Ñuca shamushpa allpata ama llaquichishpa tucui tucuchingapajmi chashna ruranga” ninmi.

(Caipimi hebreo y arameo shimicunapi quillcashca shimicunaca tucurin. Caimanta ñaupajmanca griego shimipi quillcashcacunami callarin).