Ñaupa tiempopi quillcashca rollo
1970 huatapi tarishca Ein Gedi nishca rollota liyinaca sinchimi carca. Chai rolloca tucuimi rupashca carca. Pero shuj maquinapi churashpa, chaipi huaquin fotocunata llujchishpami Levítico libromanta shuj parte cashcata ricurcacuna. Diospaj shutipish chaipimi ricurirca.
1970 HUATAPIMI Israel llajtapi saquirij Ein Gedi nishca pueblomanmi huaquin gentecunaca rircacuna. Paicunaca shuj rupashca sinagoga huasimanmi chayarcacuna. Chai sinagoga huasitaca casi 1500 huatacuna huashamanmi rupachishca carca. Chaipi allashpami ñaupa punllacunapi quillcashca rollota japircacuna. Chai rollotaca Ein Gedi nishpami rijsincuna. Chai rollo rupashca cashcamantami mana pi liyi tucurcacuna o pascai tucurcacuna. Shinaca chai rollopi ima tiyashcata yachangapajca ¿imatataj rurarcacuna? Shuj maquinapi churashpa, huaquin fotocunata llujchishpami chaipi imalla tiyashcacunata yacharcacuna.
Chai fotocunata ricushpami Bibliamanta shuj parte cashcata ricurcacuna. Chaipica Levítico libromanta callari versocuna tiyacushcatami ricurcacuna. Shinallataj hebreo rimaipi Diospaj shuti chaipi ricurishcatami ricurcacuna. Chai rollotaca 1600 huatacuna huashamanmi escribishca cangacuna. Gil Zohar nishca runaca: ‘Rollos del mar Muerto nishcata escribishca tiempomanta Códice de Alepo nishcata escribishca tiempocamaca shujtaj rollocunaca mana tiyarcachu’ nircami (The Jerusalem Post nishca periódico). Yachaj gentecunaca, ‘Bibliamanta callari pichca librocunata escribishca horasmantaca achca copiacunatami rurashcacuna. Pero chaipi tucui tiyajcunataca mana cambiashcacunachu. Ein Gedi nishca rollota ricushpami chaita intindinchij’ nincunami.