Jesusta catijcuna tucuchun ayudashunchij
1. ¿Gentecuna quishpirichunca imatataj rurana canchij?
1 2014 huatapaj informe ricuchishca shinaca, Jehovata servijcunaca paipaj Mandanamantami alli huillaicunata tucui fuerzahuan cushicushpa huillacunchij (Mat. 24:14). Huasin huasin huillashpa, pꞌangacunata, invitacioncunata saquingapaj llujshishpa, publicacioncunata ricuchina puestocunapi huillashpami alli huillaicunata achca gentecunaman yachachinchij. Shinapish gentecuna quishpirichunca Bibliamanta alli yachachishpami Jesusta catijcuna tucuchun ayudana canchij (1 Tim. 2:4).
2. ¿Bibliamantami yachachisha nini ningapajca ima tapuicunataj ayudanga?
2 Bibliamantami yachachisha nini. Maijanpish yachana munaita ricuchijpica: ¿paicuna maipi causashcata, paicunahuan ima shina cutin parlanacunata tapunchijchu, Bibliamantami yachachisha nini nishpa paicunata utca mashcanchijchu? ¿Punta cutin visitashpaca Bibliamanta ima shina yachachishcata ricuchishcanchijchu? ¿Ima horastaj revistacunata chasquijcunataca Bibliamantami yachachisha nini nishcanchij? ¿Shinallataj ¿Imamantataj Bibliamanta yachana canchij? ¿Ima shinataj Bibliamanta yachachinchij? nishca videocunata vecinocunaman, familiacunaman, rijsishcacunaman, trabajopi, escuelapi compañerocunaman ricuchishcanchijchu? ¿Publicacioncunata ricuchina puestocunapi huillacushpaca, yachana publicacioncunata apajcunamanca Bibliamantapish gratismi yachachinchij nishpa huillanchijchu?
3. ¿Shujtajcunaman Bibliamanta alli yachachingapajca imatataj minishtinchij?
3 Jehová Diospaj, Jesuspaj ayudatami charinchij. Jesusca paimanta yachachichun mandashpaca “richij” nircami. Chashnami ñucanchijllataj yuyarishpa llujshina cashcata ricuchirca. Shinapish mana ñucanchijllata saquircachu. Ñucami cancunahuan casha nircami (Mat. 28:19, 20). Ashtahuancarin Jehová Diosca paipaj espirituta cushpa, Bibliamanta alli yachachingapaj minishtishca ayudacunata cushpa, ima shina yachachina cashcata ricuchishpami ñucanchijta ayudan (Zac. 4:6; 2 Cor. 4:7). Shinallataj huillashpa catingapajca Diostami fuerzata cuchun, huillana munaita cuchun mañanalla canchij (Filip. 2:13).
4. ¿Imamantataj Jesusta catijcuna tucuchun ayudana canchij?
4 Alli huillaicunata huillashpaca cushillami sintirinchij. Shinapish Bibliamanta yachachishpa, ‘causaiman pushaj ñanpi’ ñucanchijhuan purichun ayudashpaca ashtahuanmi cushicushun (Mat. 7:14; 1 Tes. 2:19, 20). Ashtahuancarin Jesusta catijcuna tucuchun ayudashpaca, Jehová Diostami cushichinchij. Paica ‘shujllapish ama chingarichun, tucuicuna mana allita ruracushcata saquishpa cutirichunmi’ munan (2 Ped. 3:9).