Tapuicuna
◼ ¿Caru llajtacunapi causaj mana rijsishcacunamanca Internetpi huillai tucunchijchu, Bibliamanta yachachi tucunchijchu?
Huaquin huauquicuna, panicunaca Internetpimi Bibliamanta yachachincuna. Paicunaca testigocuna mana tiyashca llajtacunapi o ama huillaichij nishpa jarcaj llajtacunapi causajcunamanmi yachachincuna. Huaquinpica chaita ruranaca allimi cashca. Shinapish mana rijsishcacunaman correocunata quillcanapish, mensajecunata cachanapish peligrosomi can (Nuestro Ministerio del Reino de julio de 2007, página 3-ta ricui). Diospaj Mandanamanta alli shungucunaman parlasha nishpapish, huaquinpica mana alli gentecunahuan, apostatacunahuanmi tupai tucunchij (1 Cor. 1:19-25; Col. 2:8). Shinallataj huaquin llajtacunapica huaquin jarcaicuna tiyashcamanta, o ni imata ama huillachun nishpa jarcashcamantami autoridadcunaca correocunata ricusha ningacuna. Chashna rurashpaca caru llajtapi causaj huauquicuna panicunatami llaquipi churanchijman. Shinashpaca, caru llajtacunapi causajcunaman alli huillaicunata huillangapajca Internetpi mana mashcanachu canchij.
Maipi cashpapish huillacushpaca caru llajtamanta shamuj gentecunamanmi huillanchij. Shinapish paicunapaj llajtaman tigrajpica yachana munaita charijpipish mana yachachishpa catinachu canchij. Chai llajtapaj sucursal imata nishca cajllapimi yachachishpa catina canchij. ¿Ñucanchijca imatataj rurai tucunchij? Internetpi jw.org paginaman ima shina yaicunata, paipaj llajtapi huillanata ñaupajman pushaj sucursalta ima shina mashcanatami paimanca yachachi tucunchij. Chai llajtapi Tandanacuna Huasi tiyajpica chaiman ringui ninami canchij. Testigocunahuan parlashpa catisha nijpica Persona que mostró interés (S-43) nishca formulariota jundachishpami congregacionpaj secretarioman cuna canchij, paimi jw.org paginapi quillcashpa Betelman cachanga. Paipaj llajtata ayudaj sucursalmi paipaj llajta ima shina cashcata alli yachashcamanta paita alli ayudai tucun (Nuestro Ministerio del Reino de junio de 2014, página 7-ta, Nuestro Ministerio del Reino de noviembre de 2011, página 2-tapish ricui).
Ñucanchij ña visitacujpi gentecuna shujtaj llajtapi causanaman rijpi, o caru llajtapi causajcunata Internetllapi rijsishpa Bibliamanta ña yachachicushpaca ñaupa parrafopi yachashcatami rurana canchij. Chashna cajpipish shuj testigo paita visitangacamaca ayudashpa catinallami canchij. Pai causashca llajtapi huaquin jarcaicuna tiyajpi, o ni imata ama huillachun nishpa jarcajpica, Bibliamanta parlashpa cartacunata cachangapaj, telefonopi parlanacungapaj, mensajecunata cachangapajpish achcatami cuidarina canchij (Mat. 10:16).