Caitami tapushcacuna

¿Templopica picunataj policiacuna shina trabajajcuna carca? ¿Paicunaca imatataj rurajcuna carca?

Mana sacerdote huaquin levitacunaca chꞌican chꞌican ruraicunapimi templopi trabajajcuna carca. Por ejemplo, huaquincunaca policiacunami carca. Paicunataca templopaj capitanmi mandaj carca. Judá llajtamanta Filón runaca cai policiacuna ima shina trabajaj cashcatami escribirca. Paica: “Maijancunaca temploman yaicuna pungucunapimi cuidajcuna carca. Cutin shujtajcunaca templopaj chꞌicanyachishca pushtucunaman pipish ama yaicuchunmi ricurajcuna carca. Caishujcunaca templo muyundijtami turnashpa punllapi o tutapi cuidajcuna carca” ninmi.

Sanedrinpi mandajcunaca cai policiacunatami ayudachun mañajcuna carca. Romamanta gobiernoca judío gentecunapuramanta policiacunallatami espadacunata apachun saquij carca.

Bibliamanta estudiaj Joachim Jeremias runaca: “Jesusta policiacuna prezupi churangapaj japinaman shamujpica, Jesusca ‘templopi yachachicujpica ¿ima nishpataj ñucataca mana japircanguichij?’ nishpami paicunataca tapurca. Chai policiacuna templopi mana cuidaj cashca cajpica Jesusca chaitaca mana ninmanchu carca” ninmi (Mateo 26:55). Shinallataj Jeremias runaca: ‘Manaraj Jesusta prezuman apajpi asha tiempo huashamanca templopi trabajaj policiacunallatajmi paitaca prezusha nishcacuna carca’ ninmi (Juan 7:32, 45, 46). Asha tiempo qꞌuipaca Sanedrinpi mandajcunaca templomanta capitantapish policiacunatapish Jesusta catij discipulocunatami Sanedrinpaj ñaupajman apamuchun cacharcacuna. Templomanta policiacunallatajmi Pablotapish Diospaj templo ñaupajmantaca sirijta aisashpa llujshichishcangacuna (Hechos 4:1-3; 5:17-27; 21:27-30).