Caitami tapushcacuna

Gálatas 5:22, 23-pica nueve cualidadcunamantami parlan. Caicunaca espiritupaj granomi can. ¿Chaicunallachu tucuicuna can?

Cai versocunapica nueve cualidadcunamantami parlan. Chaipica: ‘Espiritupaj granoca cꞌuyaimi, cushimi, sumaj causaimi, mana utca pꞌiñarinami, alli shungumi, alli cajmi, crijmi, manso shungumi, quiquinllataj jarcarijpishmi can’ ninmi. Diospaj espíritu santoca mana cai cualidadcunallata charichunchu ayudan. Shujtaj cualidadcunatapish charichunmi ayudan.

Espiritupaj granomanta manaraj parlashpaca apóstol Pablo imata nishcata ricushun. Paica: ‘Aichapaj ruraicunaca caicunami: Huainayana, imapish millananata rurana, aicha munaita mana jarcarina, rurashcalla dioscunata adorana, brujiana, pꞌiñanacushcalla causana, cꞌamina, huañurina, jahualla pꞌiñarina, pꞌiñanacuicuna, chꞌicanyarinacuna, panda yachachicuna, envidiaicuna, machaicuna, maipish cachun fiestacuna, imapish chai shina ruraicunapishmi tiyan’ nircami (Gálatas 5:19-21). ‘Imapish chai shina ruraicunami tiyan’ nishpaca apóstol Pabloca aichapaj shujtaj ruraicunapish tiyashcatami intindichisha nirca. Colosenses 3:5-pipish chai ruraicunamantami parlan. Shinallataj Gálatas 5:22, 23-pi tiyaj cualidadcunamanta apóstol Pablo parlashpaca chai cualidadcunallata charichun espíritu santo ayudashcataca mana nicurcachu.

Shinallataj apóstol Pabloca Timoteotaca huaquin cualidadcunata charichunmi animarca. Pabloca: “Cashcata ruranapi, Taita Dios yuyailla canapi, alli crij canapi, cꞌuyanapi, mana pꞌiñarinapi, manso shungu canapi catirai” nircami (1 Timoteo 6:11). Galataspi tiyaj chuscu cualidadcunallami cai versopica ricurin. Caipica alli crij canamanta, cꞌuyaj, mana pꞌiñarij, manso shungu canamantami parlan. Pero Timoteoca cashcata ruranata, Taita Dios yuyailla canatapishmi charina carca. Paica cai cualidadcunata charingapajca Yayitu Diospaj espíritu santota minishtishcatami yacharca (Colosenses 3:12; 2 Pedro 1:5-7-ta ricui).

Gálatas 5:22, 23-pica mana tucui cualidadcunamantachu parlan. Diospaj espíritu santoca Galataspi tiyaj nueve cualidadcunata charichunmi ayudan. Pero Diosta alli sirvingapajca shujtaj cualidadcunatapishmi charina canchij. Chai cualidadcunata charingapaj esforzarishpaca Efesios 4:24-pi nishcacunatami pajtachishun. Chaipica: “Churanata churarij shinallataj Dios munashca mushuj causaita churarichij. Chai mushuj causaica cashcata ruraj cashcatapish Diospajlla cashcatapish mana llullaj cashcatapish ricuchijmi” ninmi (Efesios 4:24, NTQC, 1973).