Shuj pꞌucushca yura shinami Diosta sirvishcanchij

1979 huatapica huauqui Matsca paipaj huarmihuanmi escuela de Galaadman rircacuna. Chai escuelapi yachachij huauqui Jack Redfordmi paicunataca: “Maipi churashcapimi pꞌucuna canguichij” nishpa consejashca carca. Chꞌican llajtacunapi sirvina cashcamantami paicunapajca cai consejoca valishca carca. Paicunaca Irán, Zaire, Uganda, Tanzania, Mauricio y Myanmar llajtacunapimi sirvishcacuna. Shinapish shuj yurata maipi churajpipish alajata pꞌucuj shinami paicunapish chai tucui llajtacunapica Yayitu Diosta cushilla sirvishcacuna. Paicunapaj causaimanta ashtahuan yachashun.

¿Jehová Diostaca ima shinataj rijsircanguichij?

Mats: Segunda Guerra Mundial tiyai horasmi ñuca yayituca Polonia llajtapi causarca. Chai tiempopica iglesia Catolicapi cajcuna mana allicunata rurajcuna cashcatami ñuca yayaca ricurca. Shinapish paica: “Paicuna chashna rurajpipish Diosta alli sirvijcunaca tiyangatajmi” nishpami yuyaj carca. Ñucaca ñaupa libritocunata randinatami munaj carcani. Shuj punllaca La verdad que lleva a vida eterna nishca azul librotami ricurcani. Chai librota liyisha nishpami rato randircani. Qꞌuipacarin chai tutallatajmi chai tucui librota liyircani. Cayandij punllaca ñuca yayitu nishca shinallataj Diosta alli adorajcunata tarishcatami cuentata curcani.

1972 huatapaj abril quillamantami testigo de Jehovacunapaj achca publicacioncunata liyi callarircani. Chaicunata liyishpami Bibliamanta charishca tapuicunata yachaj chayarcani. Chaicunata yachaj chayashpami yallitaj valishca perlata tarij shuj comerciante runa shina sintirircani. Jesús nishca shinaca chai runaca yallitaj valishca perlata japishpaca paipaj tucui charishcacunata cꞌatushpami chai perlata randirca. Ñucapish yallitaj valishca perlata tarij shinami Bibliamanta mana llulla yachaicunata yachaj chayarcani. Chai yallitaj valishca perlata ama pirdingapajca tucui ñuca charishcacunata cꞌatuj shinami doctor tucungapaj universidadpi estudiana munaita saquina carcani (Mateo 13:​45, 46). Chai huashacarin 10 de diciembre de 1972 huatapimi bautizarircani.

Ñuca bautizarishca shuj huata qꞌuipaca ñuca yaya mamapish, ñuca qꞌuipa huauquipish Diosta sirvinatami decidircacuna. Qꞌuipacarin paicunapishmi bautizarircacuna. Julio de 1973 huatapica ñucaca precursor regularmi tucurcani. Ñucanchij congregacionpica Ann-Catrin shuti precursorami tiyarca. Paica sumaj, Diosta alli sirvijmi carca. Tiempohuanca enamorarishpami novios tucurcanchij. 1975 huatapicarin cazararcanchijmi. Cazarashca qꞌuipaca Strömsund nishca llajtapimi chuscu huatacunata sirvicurcanchij. Strömsund nishca llajtaca Sueciapi saquirij sumaj llajtami can. Chaipi tiyaj achca gentecunaca Bibliamantami ashtahuan yachasha nircacuna.

Ann-Catrin: Ñuca yayaca Estocolmo llajtapi universidadtami tucuchicurca. Universidadpi estudiacushpapish Testigocunahuanpishmi Bibliamanta yachai callarirca. Pai Bibliamanta estudiai callarijpica ñucaca quimsa quillacunallatami charircani. Llulluraj cajpipish ñuca yayaca tandanacuicunaman, huillanamanmi ñucataca apaj carca. Pero ñuca mamaca chaita mana munashpami Testigocuna panda religión cashcata ricuchisha nirca. Chashnapish Testigocuna alli religión cashcata cuentata cushpami paipish bautizarirca. Ñucapish 13 huatacunata charishpami bautizarircani. Cutin 16 huatacunata charishpaca precursorami tucurcani. Qꞌuipaca huillajcuna minishtirin Umeå llajtapi sirvinamanmi rircani. Achca gentecuna Bibliamanta yachasha nijpimi ñucataca precursora especial cachun agllarcacuna.

Matshuan cazarashca qꞌuipaca chꞌican gentecunamanmi Bibliamanta yachachi tucurcanchij. Maivor shuti shuj jovencitamanpishmi Bibliamanta yachachircanchij. Paica shuj deportepi famosa tucunata saquishpami Yayitu Diosta ashtahuan sirvi callarirca. Chaimi ñuca qꞌuipa ñañahuan precursoras tucurcacuna. 1984 huatapicarin escuela de Galaadmanmi rircacuna. Cunanca Ecuador llajtapimi misioneracuna cancuna. Chashna Diosta sirvichun gentecunata ayudanami ñucapajca shuj sumaj bendición cashca.

¿“Maipi churashcapimi pꞌucuna canguichij” nishca consejotaca ima shinataj pajtachishcanguichij?

Mats: Shuj plantitata shujtaj lugarpi tarpuj shinami ñucanchijtapish chꞌican lugarcunapi sirvichun churarcacuna. Shinapish Jesús yachachishcacunapi alli sapiyashca shina cashcamantami paipaj alli ejemplota catingapaj esforzarircanchij. Chaimi chꞌican lugarcunapi cashpapish Jesús shina humildes cashcata ricuchi tucurcanchij (Colosenses 2:​6, 7). Por ejemplo, shuj mushuj llajtapi sirvinaman rishpaca gentecunata alli intindingapaj, paicunapaj costumbrecunatapish alli intindingapajmi esforzarijcuna carcanchij. Jesuspaj ejemplota catishcamantami yacu uripi tarpushca yura shina cushilla Diosta sirvi tucushcanchij (Salmo 1:​2, 3).

Ann-Catrin: Cunanlla tarpushca yuraca inti achijyachichun, cunujyachichunmi minishtin. Chai shinallatajmi Jehová Diospish, turi ñañacunapish inti cunujyachij shina ñucanchijta sinchiyachishcacuna. Terán llajtapaj congregacionpi sirvicujpica turi ñañacunaca Bibliapi parlaj Diosta sirvijcuna shinami alli chasquijcuna carca. Paicuna imalla charishca cosascunatapishmi ñucanchijman carajcuna carca. Irán llajtapimi sirvishpa catinata munarcanchij. Shinapish julio de 1980 huatapica chai llajtapaj gobiernomi testigo de Jehovacuna ama huillashpa catichun jarcai callarirca. Ñucanchijtaca: “Ishqui punllapimi cai llajtamanta llujshinataj canguichij” nircacunami. Chaimanta llujchishpa cachajpimi pushaj turicunaca Africapi saquirij Zaire nishca llajtapi sirvichun cacharcacuna. Cunanca chai llajtataca República Democrática del Congo nishpami rijsinchij.

Ñucaca África llajtapi culebracuna, ungüicuna tiyashcatami achca cutincuna uyashca carcani. Chaimi Africapi sirvichun cachashcata uyashpaca manchaimanta huacai callarircani. Shinapish ñucanchij ishqui alli amigocunaca África llajtapimi achca huatacunata sirvicushcacuna carca. Paicunaca ñucanchijtaca: “África llajtapi sirvinaca alajami cashca. Cancunapishmi Africapi sirvinataca achcata munanguichij. Ama manchaichijchu” nircacunami. Africapi caj turi ñañacunaca cꞌuyaj, Diosta alli sirvijcunami carca. Chaipi seis huatacunata sirvicujpimi chai llajtapaj gobiernoca Testigocuna ama huillashpa catichun jarcai callarirca. Chaita yachaj chayashpaca Yayitu Diostaca: “África llajtapimi sirvishpa catisha nini, ayudahuai” nishpami mañai callarircani. Chashna mañashpaca ima manchaita ña mana charishcatami cuentata curcani. Chaimi achcata cushicurcani. Shinapish qꞌuipaca África llajtamantami llujshina carcanchij.

¿Chꞌican chꞌican llajtacunapi sirvicushcamantaca ima bendicioncunallatataj charishcanguichij?

Mats: Chꞌican llajtacunamanta achca misionerocunahuanmi alli apanacushcanchij. Achca gentecunamanpishmi Bibliamanta yachachi tucushcanchij. Huaquin llajtacunapicarin cada unomi hasta 20 yachacujcunata charishcanchij. Africapi caj huauqui panicunapish ñucanchijmanca cꞌuyashcatami ricuchircacuna. Chai tiempopica shuj busetapimi causajcuna carcanchij. Congregacioncunata visitacushpaca chai busetataca huauqui panicunapaj huasi ladopimi shayachijcuna carcanchij. Chaipi cajpimi paicunaca imalla charishca cosascunata ñucanchijman convidajcuna carca. Maipicarin cui pudishcatapish yallimi cujcuna carca. Shinallataj tucui tutacunami ñuca huarmisitahuanca chai punllapi ima shina cainashcata parlanacujcuna carcanchij. Chai huashaca Yayitu Diostaca ñucanchijta siempre bendiciashcamantami pagui nijcuna carcanchij.

Ann-Catrin: Muyundij Allpapi achca turi ñañacunata rijsishcamantami achcata cushicuni. Francés, luganda, persa, suajili nishca shimicunatami yachai tucushcanchij. Chꞌican culturacunatapishmi rijsishcanchij. Achca turi ñañacunamanpishmi Yayitu Diosta alli sirvichun yachachi tucushcanchij. Alli amigocunahuan Yayitu Diosta tandalla sirvishcamantami achcata cushicuni (Sofonías 3:9).

Yayitu Diosca chꞌican sumaj lugarcunapi paita sirvichunmi saquishca. Mushuj lugarcunaman rishpaca achcatami cushicuj carcanchij. Jehová Diosmi ñucanchijtaca alli pusharca. Paipaj alaja, sumaj rurashcacunatapishmi rijsi tucushcanchij. Diosta sirvinata mana agllashca cashpaca chai tucui lugarcunataca mana nunca rijsinmanchu carcanchij.

¿Ima llaquicunallahuantaj chꞌimbapurashcanguichij?

Mats: Ñucanchijca chꞌican, chꞌican ungüicunata, malaria nishca ungüitapishmi charishcanchij. Ñuca huarmisitatapish achca cutincunami operashcacuna. Ñucanchij yaya mamacunapish yuyajyacushcamantami preocuparircanchij. Shinapish huauqui panicunaca paicunataca cꞌuyaihuan, pacienciahuanmi cuidarcacuna. Ñucanchijca carupi causashcamantami paicunata cuidasha nishpapish mana cuidai tucurcanchij. Chaimantami huaquinpica llaquilla sintirircanchij. Huauqui panicuna paicunata cuidashcamantami shungumanta agradicinchij (1 Timoteo 5:4).

Ann-Catrin: 1983 huatapica Zaire nishca llajtapimi cólera ungüita charircani. Ñuca ancha ungushca cashcamantami doctorca ñuca cusataca: “Cunanllatajmi paita jambingapajca shujtaj llajtaman apana cangui” nirca. Chaimi Suecia llajtaman ringapaj shuj avionta mashcarcanchij. Shinapish cargacunata apaj shuj avionllami tiyarca. Cayandij punllaca chai avionpimi Sueciaman rircanchij.

Mats: Doctorca: “Ann-Catrinca mana alliyaringachu” nishcami carca. Pai chashna nijpipish ñuca huarmisitaca alliyarircami. Shinapish misionerocuna ña mana cagrishcata yuyashpami achcata huacarcanchij. Chashna yuyashpapish shuj huata qꞌuipallami Zaire llajtaman tigrarcanchij. Chaipica Lubumbashi llajtapi caj suajili shimita parlaj uchilla congregacionpimi sirvi callarircanchij.

Ann-Catrin: Lubumbashi llajtapi cashpami chichu saquirircani. Shinapish ñuca huahuaca manaraj huacharishpami huañurca. Mama canata mana yuyashca cashpapish ñuca huahuata pirdishcamantami dimastij llaquilla sintirircani. Jehová Diosca ñucanchijta cushichingapajmi achca yachacujcunata charichun ayudarca. Ñucanchij congregacionpica 35 turi ñañacunallami carcanchij. Pero shuj huata manaraj pajtajpimi ña 70 turi ñañacuna tucurcanchij. Tandanacuicunapipish 40-purallami tandanacujcuna carcanchij. Shinapish qꞌuipaca 220-mi tucurcanchij. Jehová chashna ñucanchijta bendiciashcata ricushpami achcata cushicurcanchij. Cunancamami ñucanchij huahua ima shina cana cashcata parlashpa catinchij. Paraíso allpapicarin Jehová Dios ñucanchijta ima shina bendicianapipishmi cutin yuyanchij.

Mats: Qꞌuipaca ñuca huarmisitaca ungushca cashcamantami dimastij shaicushca sintiri callarirca. Ñucapish cáncer ungüihuanmi ancha carcani. Chaimi ñucataca alli ricurashpa operana carcacuna. Cunanca allillami cani. Ñuca huarmisitapish tucui pudishcata rurashpami ñaupajman caticun.

1994 huatapica Ruanda llajtapimi shujtaj culturamanta caj gentecunata huañuchi callarircacuna. Chaimantami achca huauqui panicunaca shujtaj llajtaman rishpa carpa huasicunapi causai callarircacuna. Paicunata ricunaman rishpaca sinchi feta charishcata, cushicuihuan ahuantacushcata, cꞌuyajcuna cashcatapishmi ricurcanchij. Jehová Diosmi paicunataca ahuantashpa catichun sinchiyachirca. Ñucanchijpish ima llaquicuna shamujpipish ahuantai tucushcatami intindircanchij (Salmo 55:22).

Ann-Catrin: 2007 huatapica Ugandapaj sucursalta Diosman mingangapajmi shuj tandanacuiman rircanchij. Tandanacui qꞌuipaca misionerocunahuan, betelitacunahuanmi Keniapi caj Nairobi llajtaman buspi tigramurcanchij. Ñucanchijca 25-purami carcanchij. Kenia llajtaman ña chayacujpimi shuj uchilla busca contra vía shamushpa ñucanchijhuan chocarca. Chaipimi ñucanchij choferpish, cinco turicunapish huañurcacuna. Qꞌuipaca shuj ñañapishmi hospitalpi huañurca. Cai cꞌuyashca amigocuna causarijpi paicunata cushicuihuan chasquinapimi siempre yuyanchij (Job 14:​13-15).

Chai accidentepi lisiarishpapish qꞌuipaca alliyarircanimi. Shinapish ñucapish, ñuca cusapish, shujtaj turi ñañacunapish achca manchaihuanmi saquirircanchij. Ñucaca tutacunapica mana dormi tucurcanichu. Tutamanta rijcharishpapish samaita na aisai tucushcatami sintij carcani. Chaicunata ahuantangapajca Yayitu Diostami cutin mañaj carcanchij. Ñucanchij munashca versocunapipishmi cutin yuyajcuna carcanchij. Doctorcunapish ñucanchijta ayudachunmi mashcarcanchij. Jehová Dios ayudashcamanta, Doctorcunapish ayudashcamantami cunanca tranquilos sintirinchij. Jehová Diostapish ñucanchij laya llaquicunata charijcunata ayudachunmi cutin mañanchij.

¿Llaqui horaspica Yayitu Diosca cancunataca ima shinataj cuidarca?

Mats: Suajili shimipica gentecunaca: “Ima shinami luluncunata ama pꞌaquirichun allijlla apancuna. Chashnallatajmi ñucanchijtapish alli cuidashcacuna” nincunami. Jehová Diosca ñucanchijtapishmi chai luluncunata shinallataj siempre cuidacushca. Ñucanchijcuna minishtishcatapish yallimi carahuashca. Cuerpo Gobernantepi sirvij huauquicunapaj cꞌuyaita ricushpami Jehová Diospish ñucanchijta achcata cꞌuyashcata ricushcanchij.

Ann-Catrin: Ñucapish Jehová Dios ima shina cuidashcatami yuyarini. Shuj punllaca ñuca yaya hospitalpi ancha ungushca cashcata huillangapajmi ñucata cayarcacuna. Ñuca cusito Matspish malaria ungüimantami cunanlla alliyashca carca. Sueciaman ringapaj cullquita mana charishcamantami ñucanchij carrota cꞌatunata decidircanchij. Pero ñapishmi shuj cusa huarmica ñucanchij cullquita minishticushcata yachashpa cayarcacuna. Paicunaca avionpaj shuj pasajetami pagasha nircacuna. Qꞌuipaca shuj mayorlla panipish pai ahorrashca cullquita cungapajmi ñucanchijta cayarca. Chai cullquitaca “minishtijcunapaj” nishca cajitapimi huaquichishca carca. Paicunahuanmi Jehová Diosca ñucanchijtaca rato ayudarca (Hebreos 13:6).

¿50 huatacunata tiempo completopi Diosta sirvishcamantaca imatataj yachashcanguichij?

Ann-Catrin: Isaías 30:​15-pica: “Ñucapi shunguta churashpa, casijlla causajpica muyujta pirca shinami casha” ninmi. Caipi nishca shinaca Jehová Diospi tucui shunguhuan confiajpimi paica ñucanchijmanta macanacucuj shina ñucanchijta cuidanga (2 Crónicas 20:​15, 17). Maipi cashpapish Yayitu Diostaca tucui shunguhuanmi siempre sirvishcanchij. Jehová Diospish ñucanchij yuyashcatapish yallimi bendiciashca.

Mats: Ñucaca tucuimanta yallica Jehová Diospi confiana cashcatami yachashcani. Paipi confiashcamantami Jehová Dios ima shina ñucanchijta cuidashcata siempre cuentata cushcani (Salmo 37:5). Jehová Diosca ñucanchijtaca mana nunca saquishcachu. Cunanca Myanmar Betelpi cajpipish ñucanchijta cuidashpami caticun.

Achca joven huauqui panicunaca Diosta ashtahuanmi sirvisha nincuna. Jovencitocuna, cancunapish maipi churashcapimi pꞌucuna canguichij. Jehová Diosca ñucanchijta cuidashca shinallatajmi cancunatapish tucuipi cuidanga.