3 Respetota charichij

¿IMA SHINATAJ CAITA RURAI TUCUNGUICHIJ?

Respetota ricuchij cusa huarmica mana tucuipi de acuerdo cashpapish alli causangapajmi esforzarincuna. Diez claves para transformar tu matrimonio nishca libropica: “Alli cusa huarmica cada uno paicunapaj yuyashcallahuanca mana saquirincunachu. Chashna yuyanapaj randica paicunapaj problemacunata allichinatami mashcancuna. Shinallataj huarmi o cusa ima yuyashcatami alli uyana can. Shinami ishquindij alli decisioncunata agllangacuna” ninmi.

BIBLIAPICA: ‘Cꞌuyaita charijca mana paipajlla mashcanchu’ ninmi (1 Corintios 13:4, 5).

Shuj cꞌarica: “Ñuca huarmita respetashpami pai ñucapaj achca valishca cashcata ricuchini” ninmi.

¿IMAMANTATAJ RESPETANA CAN?

Maipishcachun rimashpaca ñucanchij cusapaj huarmipaj shungutami llaquichishun. Cazadocunata consejajcunaca: “Cusa huarmi pꞌiñanacushpalla causashpaca divorciomanmi chayai tucuncuna” nincunami.

Brian shuti runaca: “Ñucanchij huarmita maipishcachun rimashpa, burlarishpaca paita mana alli sintichishunchu. Ashtahuancarin paica ñucanchijpi mana confianzata charingachu” ninmi.

¿IMATATAJ RURAI TUCUNGUI?

CAIPI YUYAI

Caina semana cambaj cusahuan huarmihuan ima shina parlashcata, paita ima laya tratashcata yuyari. Qꞌuipaca caita tapuri:

• “¿Mashna cutintaj paimanta mana allita nircani? ¿Cushichij shimicunata nircanichu?”

• “¿Paita respetacushcataca ima shinataj ricuchircani?”

CUSANDIJ HUARMINDIJ ALLI PARLANACUICHIJ

• ¿Ima laya ruraicunataj respetota charishcata ricuchin?

• ¿Ima laya ruraicunataj respetota mana charishcata ricuchin?

CAITA RURAI

• Ima laya cambaj cusa o huarmi respetota ricuchichun munashcata quimsa yuyaicunata escribi. Cambaj cusa o huarmi imata rurachun mañashcata pajtachingapaj esforzari.

• Cambaj cusa o huarmi cꞌuyaj, llaquij, mana utca pꞌiñarij cajpica paita felicitai.

Megan shuti huarmica: “Ñuca cusata valorashcataca rurashcacunahuanmi ricuchini. Shinallataj pai cushilla sintirichunmi siempre munani. Paita respetashcata ricuchingapajca mana jatun cosascunata rurana minishtirinchu” ninmi.

Cambaj cusata o huarmita respetashcataca rurashcacunahuanmi ricuchina cangui.

BIBLIAPICA: “Cꞌuyashcacuna cashcamanta shungumanta llaquij canata, cuj canata, mana jatun tucushca canata, manso shungu canata, mana pꞌiñarij canata churarichij” ninmi (Colosenses 3:12).