9 Allita ruraichij

¿IMA SHINATAJ CAITA RURAI TUCUNGUI?

Huaquincunaca ñahuita ricushpallami allita ruraj jovenmi cangui nincuna. Pero mana jahua ñahuillatachu ricuna canchij. Ashtahuanpish shungupi ima shina cashcatami ricuna canchij.

¿IMAMANTATAJ CAITA RURANA CANGUI?

Ima alli cajta ima mana alli cajtaca allimi yachana cangui. Chashnami shujtajcuna mana allita rurachun nijpipish chaita mana rurangui.

Adrian jovenca: “Muñecocunamanca ima laya ropacunatapish churachincunallami. Chashnallatajmi huaquin jovencunaca paicunaman shujtajcuna ropata agllashpa cuchun saquincuna” ninmi.

Shuj solteraca: “Imatapish allita rurangapajmi esforzarini, caita ruranaca huaquinpica sinchi layami ricurin. Alli amigocunaca allicunallatami rurancuna. Ñucatapish paicuna layallataj allicunata rurachunmi animancuna” ninmi.

BIBLIAPICA: ‘Cai pachapaj cajcuna shina rurashpa ama cushicuichijchu. Ashtahuanpish cancunapaj yuyaita mushujyachishpa, shujtaj causaita causaichij’ ninmi (Romanos 12:2).

¿IMATATAJ RURAI TUCUNGUI?

Cunan tiempo imalaya joven cashcata, shamuj punllacunapi ima laya runa canatami alli yachana cangui. Chaipajca imapi alli cashcata, imapi cambaj causaipi mejorana cashcatami ricuna cangui. Cai tapuicunapi yuyai.

¿Imatataj alli ruranata yachangui? ¿Imapipish controlarinata yachanguichu? ¿Puntualchu cangui? ¿Alli trabajajchu cangui? ¿Shujtajcunata ayudajchu cangui?

CAITA RURAI: Imapajpish mana sirvij laya sintirishpaca cambaj yaya mamata amigocunatami, ¿imapitaj alli cani? nishpa tapuna cangui.

BIBLIAPICA: “Ima shina ruracushcataca, cada quiquin alli ricurichun. Chashna cashpami imamanta jatunyarina cajpica, mana shujtajpaj rurashcapi jatunyarishpa, quiquin rurashcapi jatunyaringa” ninmi (Gálatas 6:4).

¿Imapitaj mejorana cangui? ¿Imata ruracushpataj juchapi urmai tucungui? ¿Imapitaj ashtahuan controlarina cangui?

BIBLIAPICA: “Mana juchata charinchijchu nishpaca, ñucanchijllatajmi umarinchij” ninmi (1 Juan 1:8).

¿Imapitaj cringui? ¿Ima alli o ima mana alli cashcataca ima shinataj yachai tucungui? ¿Diospi cringuichu? ¿Dios tiyashcataca ima shinataj yachangui? ¿Ima ruraicunatataj mana allita shina ricungui? ¿Shamuj punllacunapi causaitaca ima shinataj ricungui?

BIBLIAPICA: “Chashna rurajpica, cai alli shimicunaca canta huaquichingami. Cai alli yuyaicunaca imamantapish quishpichingami” ninmi (Proverbios 2:11).