1. Jarcarij cana

¿IMATAJ CAN?

Jarcarij cashpaca:

• Ñucanchij munashcata charingapaj shuyana cashcatami yachashun

• Tucui ñucanchij yuyashcataca mana rurashunchu

• Mana munashca trabajocunatapish tucuimi rurashun

• Shujtajcunapirajmi yuyashun

¿IMAMANTATAJ IMPORTANTE CAN?

Huahuacuna jarcarinata yachashpaca mana alli ruraicuna alli laya ricurijpipish chaicunamantami jarcaringacuna. Cutin, jarcarinata mana yachashpaca:

• Millai huambracunami tucunga

• Llaquilla sintirishpami sufringacuna

• Fumana, drogarina, tragota yalli ubyana viciocunapimi urmangacuna

• Ima ricurishcatami micungacuna

Shuj investigacionpica, ‘jarcarinata yachaj huahuacuna jatunyashpaca cullquimanta, saludmanta mana tanto problemacunata charingachu. Leycunatapish allimi cazungacuna’ ninmi. Chai investigacionmanta parlashpami, Universidad de Pensilvaniamanta Angela Duckworth profesoraca: “Jarcarij canata yachanaca allimi can” nirca.

¿HUAHUACUNA JARCARIJ CACHUNCA IMA SHINATAJ YACHACHISHUN?

Yaya mamacuna cancuna ima nishcata pajtachichij

BIBLIAMANTA SHUJ YUYAI: “Ari cajpica ari, mana cajpica mana ningui” (Mateo 5:37).

Maipica uchilla huahuacunaca paicunaman imata cuchun nishpami dimastij huacancuna. Maipicarin shujtajcunapaj ñaupajpimi chaita rurancuna. Huahua ama huacashpa catichun yaya mama paicuna nishcata rurajpica, huahuacunaca siempremi paicuna munashcata rurachun ningacuna.

Yaya mamacuna mana nishcata pajtachijpica huahuacunaca paicuna tucui munashcata mana chari tucushcatami intindingacuna. David Walsh doctorca: “Jarcarinata yachajcunaca ashtahuan cushillami causancuna” ninmi. Shinallataj ñucanchij huahuacunaman “paicuna nishca mana nishcata cai causaipi charichun yachachishpaca ima favorta mana ruracunchijchu” nircami.a

Cunanmanta huahuacunaman mana ninata yachachinaca allimi can. Chashnami paicuna huiñarishpaca drogacunapi urmanamanta, manaraj cazarashpa chayarinamanta, shinallataj shujtaj llaquicunapi urmanamanta jarcaringacuna.

Allita rurashpa alli causana cashcata, mana allita rurashpa llaqui tucuna cashcata yachachi

BIBLIAMANTA SHUJ YUYAI: “Maijan imata tarpujca, chaillatatajmi tandanga” (Gálatas 6:7).

Huahuacuna jarcarinata mana yachajpica tucuimi mana alli llujshinga. Por ejemplo, cambaj huahua tucuimanta pꞌiñarinata yachashpaca mana tanto amigocunata charingachu. Pero, mana pꞌiñarishpa shujtajcunata pacienciahuan uyanata yachajpica shujtajcunaca paihuan pasanatami munangacuna. Chaimi cambaj huahuamanca jarcarinata yachashpaca alli causai tucushcata intindichina cangui.

Ima ashtahuan importante cashcata intindichun ayudai

BIBLIAMANTA SHUJ YUYAI: “Imacuna ashtahuan importante cashcata ama cungarichun” (Filipenses 1:10, Traducción del Nuevo Mundo).

Jarcarij cashpaca ima mana alli ruraicunallamantaca mana jarcarishunchu. Ashtahuanpish ima mandashcacuna mana ñucanchij munashca shina cajpipish chaitarajmi pajtachishun. Cambaj huahuaca ima ashtahuan importante cashcataraj ruranatami yachana can. Por ejemplo, manaraj pugllanaman rishpami debercunataraj rurana can.

Alli ejemplota cui

BIBLIAMANTA SHUJ YUYAI: “Caitaca cancunapish ñuca rurashca shinallataj rurachunmi ricuchini. Cancunapish ñuca rurashca shinallataj ruraichij” (Juan 13:15).

Huahuacunaca yaya mama ima laya comportarijtami ricuncuna. Chaimantami jarcarij cashpa alli causai tucushcata cancunapaj ejemplohuan yachachina canguichij. Chaimanta: “¿Ñuca huahua ñucata colerachijpica pacienciatachu ricuchini?” nishpa tapuri.