¿Estrés ungüica imataj can?

Llaquicunamanta yallitaj sustarido cajpimi ñucanchij cuerpoca yallitaj shaicushca sintirin. Chaimi ñucanchij cerebroca hormonas nishcacunata ñucanchij cuerpopi mirachin. Shina tucujpica ñucanchij corazón, ñucanchij pulmoncunaca mana alli funcionangachu. Músculos nishcacunapish librimi dibilyanga. Ñucanchij cuerpopi ima tucucushcata mana cuentata cujpipish ñucanchij cuerpollatajmi ima shina alli tucunata mashcan. Estresmanta aliviarijpica ñucanchij cuerpoca ña normalmi funcionai callarin.

ASHA ESTRESTA CHARINACA MAIPICA ALLIMI CAN

¿Asha estresta charina o asha sustarishca canaca imamantataj maipica alli can? Ñucanchij ima munashcata pajtachingapaj, imata alli rurangapaj o shuj problemata utca allichingapajmi asha estresta charinaca alli can. Asha estresta charishpaca shuj examenta cuna horas, shuj trabajopaj entrevista horas, o imata pugllana horasmi allita rurangapaj esforzarishun.

Pero, achca tiempota estresta charishpaca ñucanchij cuerpotami unguchi tucunchij. Yallitaj shaicushca cashpaca yuyaipipish cuerpopipish mana alli sintirishunchu. Maipicarin shujtajcunatami mana alli tratai callarishun. Yallitaj estresado cashcamantami huaquincunaca yallitaj tragota ubyancuna, yallitaj micui callarincuna. Mana cashpaca drogarina, fumana viciopi o shujtaj chai laya viciocunapimi urmancuna. Maijancunaca yallitaj llaquilla o yallitaj shaicushca sintirishcamantami huañuna yuyaita chari tucuncuna.

Estrés ungüica mana tucuicunata igual japinchu. Pero ñucanchij cuerpotami maijan parteta cashpapish anchata unguchi tucun.