Dios yachachishcacunami esperanzata cun
Diosca sumaj causai ñalla tiyagrishcatami huillashca. Ñallami tucui llaquicuna tucuringa. Gentecunaca sumajtami causangacuna (Salmo 37:11). ¿Imamantataj cai nishcacunapi crinchij? “Taita Diosca mana runachu llullangapajca” (Números 23:19). Yaya Dios imallacunata ruragrishcata ricushun.
Diosca millai gentecunatami tucuchinga
“Diosta mana rijsijcunaca qꞌuihua shina yallitaj huiñashpapish huiñaipaj chingachishca canapajllami. Millaita tucui rurajcunaca mana jahualla sumajtami sisan. Ashtahuanpish huiñaipaj chingachishca canapajllamari” (SALMO 92:7).
Ñaupa yachaipi ricushca shinaca cai mundopica yallitaj mana alli ruraicunami tiyan. Pero mana mancharinachu canchij. 2 Timoteo 3:1 al 5-pica tucuri punllacunapica yallitaj millai gentecunami tiyanga nishpami huillarca. Pero ¿tucuri punllacuna nishpaca imamantataj parlacunchij? Diosta mana cazuj gentecunapaj punllacunami ñalla tucurigrin. Mana alli costumbrecunata saquishpa mana cambiasha nij gentecunataca Diosca ñallami tucuchinga. Cai Allpapica paita cazuj gentecunallami saquiringa. Salmo 37:29-pica: “Cashcata rurajcunallami Dios cusha nishca llajtata [allpata, NWT] japingacuna” ninmi.
Diosca Diablotami tucuchinga
‘Sumaj causaita cuj Taita Diosca, Satanastaca sarungami’ (ROMANOS 16:20).
Diablotapish, demoniocunatapish, millai gentecunatapish tucuchijpica cai Allpapica sumaj causaimi tiyanga. Ñucanchijta ruraj Yaya Diosca cancunataca “pi mana manchachingachu” ninmi (Miqueas 4:4).
Diosca ungüicunata, huañuitapishmi tucuchinga
‘Diospaj carpa huasica cunanca tucui gentecunahuanmi. Paicunapaj ñahuicunamantaca, tucui huiquitami pꞌichanga. Huañuipish, huacaipish, llaquipish, nanaipish ña mana ashtahuan tiyangachu’ (APOCALIPSIS 21:3, 4).
Diablopish, Adán Evapish apamushca llaquicunataca Diosmi tucuchinga. Ñucanchij juchacunamanta charishca llaquicunatapishmi tucuchinga. Chaimantami llaquicuna, ungüicuna, incluso huañuipish ña mana tiyanga. Diosta cꞌuyaj, cazuj gentecunallami huiñai huiñaita causangacuna. Pero ¿maipitaj causangacuna?
Diosca cai Allpataca shuj paraisotami ruranga
“Shitashca pambacunapish, chaquishca pambacunapish cushicungacunami. Shitashca pambapish cushicungami. Rosas shinami sisanga” (ISAÍAS 35:1).
Tucui mana allicunata Dios tucuchijpica cai Allpaca sumaj paraisomi tucunga. Sumaj parquecuna, sumaj jardincunami tucui ladopi tiyanga. Allpapipish achca micunami pꞌucunga (Salmo 72:16). Mama cuchacunapi, uchilla cuchacunapi, riocunapica achca animalcunami causanga, yacucunapish limpiomi canga. Cai Allpa mapa cashcatapish ña mana pi yuyaringacunachu. Gentecunapish propio huasicunata rurashpami chaipi causangacuna. Ña mana pi pobre cangachu, mana pi yaricaihuan pasangachu, mana pi callecunapi causangachu (Isaías 65:21, 22).
Diosca huañushcacunatapishmi causachinga
‘Tucui huañushcacunatami Taita Dios causachinga’ (HECHOS 24:15).
¿Huañushca familiacunata, amigocunata cutin ricunata munanguichu? Tucui poderta charij Diosca paraíso Allpapimi huañushcacunataca causachinga. Chaipi cashpa familiacunata, amigocunata ricushpa, paicunapish canta ricujpi cushilla cashcata yuyai. Bibliapica huaquin huahuacuna, jatuncuna causarishpa paicunapaj familiacunahuan cutin tandanacushcatami parlan. Ashtahuancarin Jesusca achca gentecunapaj ñaupajpimi huaquin huañushcacunata causachirca (Lucas 8:49-56; Juan 11:11-14, 38-44).