¿Familia ucupi cushilla causangapajca imatataj rurana canchij?

1. ¿Cushilla causangapajca familiacunaca imatataj rurana can?

JEHOVÁ DIOSCA familiacuna cushilla causachunmi munan. Chaimantami familia ucupi cada uno imata rurana cashcata Bibliapi huillan. Bibliapi yachachishcata cazushpaca familiacunaca allimi causanga. Jesusca ‘¡Diospaj Shimita uyashpa cazujcunami, ashtahuan cushicun!’ nircami (Lucas 11:28).

2. ¿Familia ucupi cushilla causangapajca imatataj crina canchij?

² Familia ucupi cushilla causangapajca, familiacunata Jehová Dios callarichishcatami crina canchij. Diostami Jesusca “ñucanchij Yaya” nirca (Mateo 6:9). Cai Allpapi tiyaj tucui familiacunaca Diosmantami tiyan. Chaimantami familiacuna cushilla causangapaj imata rurana cashcata paica alli yachan (Efesios 3:14, 15). Shinashpaca, Bibliapi yachachishca shinaca ¿familia ucupica imatataj Dios munashca shina cada uno rurana can?

FAMILIATACA DIOSMI CALLARICHIRCA

3. a) ¿Bibliapi yachachishca shinaca pitaj familiata callarichirca? b) ¿Familiata Dios callarichishcataca pitaj ashtahuan yachachirca?

³ Jehovami punta cꞌari Adanta, punta huarmi Evata rurashpa cazarachirca. Qꞌuipaca Edén sumaj huertapi churashpami cashna mandarca: ‘Huahuacunayuj tucushpa, achcata mirarishpa cai pachapi jundarishpa cai pachata mandanguichij’ nircami (Génesis 1:26-28; 2:18, 21-24). Cai shimicunaca mana yanga parlollachu can. Familiacunata pi callarichishcata parlashpaca Jesuspish Génesis libromantami yachachirca (Mateo 19:4, 5). Cunan punllacunapica achca llaquicunami tiyan. Mana callaripi Dios munashca shinachu causacunchij. Shinapish familiacunaca cushillami causai tucun. ¿Familiacunaca imatataj rurana can?

4. a) ¿Familia ucupi cushilla causangapajca imatataj cada uno rurana canchij? b) ¿Imamantataj Jesús rurashcata catina canchij?

⁴ Familia ucupi cushilla causangapajca cada unomi Dios imata rurashcata catishpa cꞌuyanacuna canchij (Efesios 5:1, 2). Diostaca mana ricui tucunchijchu. Shinashpaca ¿ima shinataj Dios imata rurashcata catishun? Jehová Diosca paipaj punta Churi Jesustami cai Allpaman cacharca (Juan 1:14, 18). Jesusmi paipaj Yaya imalla rurashcata rurarca. Shinashpaca Jehová rurashcata catingapajca Jesús rurashcatami catina canchij. Jehová rimashcata uyangapajca Jesús rimashcatami uyana canchij (Juan 14:9). Shina cajpica familia ucupi cushilla causangapajca Jesús rurashca shinami tucuicuna cꞌuyanacuna canchij.

¿CUSACA IMATATAJ RURANA CAN?

5, 6. a) ¿Cusacunaca imatataj Jesús rurashca shina rurana can? b) ¿Dios perdonachunca imatataj cada uno rurana can?

⁵ Bibliapi yachachishca shinaca, Jesús rurashcatami cusacunaca rurana can. Bibliapica: ‘Cristoca tandanacushca crijcunata cꞌuyashpami paillataj curirca. Chai shinallataj cusacunapish, quiquin huarmicunata cꞌuyaichij. Quiquin cuerpota shina huarmicunata cꞌuyaichij. Maijanpish paipaj huarmita cꞌuyajca, paillatajmi cꞌuyarin. Paipaj quiquin cuerpotaca, pi mana pꞌiñanchu. Ashtahuanpish allimi micun, allimi cuidan, chashnallatajmi Cristopish tandanacushca crijcunapajca ruran’ ninmi (Efesios 5:23, 25-29).

⁶ Shinashpaca paita catijcunata Jesús cꞌuyashca shinami cusaca paipaj huarmita cꞌuyana can. Jesusca paita catijcuna juchayuj cajpipish huañungacamami paicunata cꞌuyarca (Juan 13:1; 15:13). Chaimantami Bibliapica: “Cusacuna, cancunapaj huarmicunata cꞌuyashpa [catichij, NM]. Paicunahuanca ama millaicuna caichijchu” nin (Colosenses 3:19). ¿Cusacuna huarmicunata cꞌuyashpa catichunca imataj ayudanga? Huaquinpica huarmicunaca mana alli yuyashpami imapipish pandari tucun. Shinapish cusaca paipish pandarijlla cashcatami yuyarina can. Dios perdonachunca paipaj huarmitami perdonana can. Huarmipish chashnallatajmi cusata perdonana can (Mateo 6:12, 14, 15-ta rezai). Caishujmanta chaishujmanta perdonanacushpa causaj cusa huarmica cushillami causan.

7. a) ¿Jesusca imatataj alli entendirca? b) ¿Cusapish imamantataj paipaj huarmita cuidana can?

⁷ Shinallataj paita catijcunata Jesús cuidashca shinami cusaca huarmita cuidana can. Jesusca paita catijcuna imata rurai tucushcata, imata minishtishcatami alli entendirca. Shuj punllaca paita catijcunaca shaicushcami carca. Chaimi Jesusca: ‘Jacuchij, ñucanchijlla chulunllapi ashata samarishun’ nirca (Marcos 6:30-32). Huarmipish chashnallataj cuidachunmi minishtin. Bibliapica cashnami yachachin: “Huarmitaca pꞌaquirijlla vaso shina cashcamanta alli cuidaichij” ninmi. ¿Imamantataj cusaca chashna cuidana can? Ishquindijllataj “huiñai causaita” japina cashcamantami chashna cuidana can (1 Pedro 3:7). Cusacuna yuyarichij: Mana cꞌarilla o huarmilla cashcamantachu Diospaj ñaupajpica alli ricurinchij. Pai mandashcata pajtachishcamantami paipaj ñaupajpica alli ricurinchij (Salmo 101:6).

8. a) ¿Cusaca imamantataj quiquin huarmita cꞌuyana can? b) ¿Imamantataj cusa huarmica ‘shujlla aicha’ can?

⁸ ¿Bibliapica imamantataj ‘cusapish, quiquin cuerpota shina paipaj huarmita cꞌuyachun’ nin? Jesús yachachishca shinaca, cusa huarmica “ña mana ishquichu, shuj aichallami” can (Mateo 19:6). Chaimantami cusa huarmindijlla chayarinacuna can (Proverbios 5:15-21; Hebreos 13:4). Shujtajta ama mashcachunca mana mitsarishpami huarmi o cusa minishtishcata cuna can (1 Corintios 7:3-5). Shinallataj Bibliapica: ‘Paipaj quiquin cuerpotaca, pi mana pꞌiñanchu. Ashtahuanpish allimi micun, allimi cuidan’ ninmi. Chaimantami cusaca paipaj cuerpota cꞌuyaj shina paipaj huarmita cꞌuyana can. Shinallataj cusapaj umaca Jesusmi can. Paipaj ñaupajpimi cusaca imallata rurashcata ricuchinga (Efesios 5:29; 1 Corintios 11:3).

9. a) ¿Filipenses 1:8-pi yachachishca shinaca imatataj Jesusca ricuchirca? b) ¿Cusapish imamantataj huarmita cꞌuyana can?

⁹ Apóstol Pablopish ‘Jesuspaj cꞌuyaimantami’ parlarca (Filipenses 1:8). Jesús cꞌuyashcamantami paita catijcunaca cushilla sintirirca. Chashna cꞌuyashcamantami Jesusta servij huarmicunapish cushilla sintirirca (Juan 20:1, 11-13, 16). Shinallataj cazarashca huarmicunapish cusacuna cꞌuyachunmi minishtin.

¿HUARMICA IMATATAJ RURANA CAN?

10. ¿Huarmicunaca imatataj Jesús rurashca shina rurana can?

¹⁰ Familia ucupi taucacuna causashcamantami familiaca pi ñaupajman pushachun minishtin. Jesucristopish paita ñaupajman pushaj umatami charin. ‘Diosmi Cristopaj uma’ can. Chashnallatajmi ‘cꞌarica huarmipaj uma’ can (1 Corintios 11:3). Jesusca tucuipimi paipaj Umata cazun. Ñucanchijpish tucuicunami ñaupajman pushaj umata charinchij. Chaimantami Jesús imata rurashcata rurana canchij.

11. a) ¿Huarmicunaca ima shinataj cana can? b) ¿Huarmi cazujpica cusaca imatataj ruranga?

¹¹ Juchayuj cashcamantami cusacunaca pandarinlla. Chaimantami huaquincunaca familiata mana alli ñaupajman pushan. Shinapish ¿huarmica imatataj rurana can? Cusata mana maipishcachun rimanachu can. Shinallataj mana cusa laya tucushpa familiata mandanachu can. Huarmica alli shungu gentecunata Dios cꞌuyashcatami yuyarina can (1 Pedro 3:4). Alli shungu cashpami cusata cazuna sinchi ricurijpipish paita cazushpa causanga. Bibliapica: “Huarmipish, paipaj cusata respetachun” ninmi (Efesios 5:33). Shinapish ¿cusacuna Jesusta mana catijpica, huarmicunaca imatataj rurana can? 1 Pedro 3:1, 2-pica: “Huarmicuna cancunapaj cusacunata cazuichij. Chashna tucuipi alli cazuj cajpimi, Diospaj Shimita mana crij cusapish huarmi tucuipi alli cajta ricushpaca, mana imata huillajpipish crij tucunga. Cancunaca imapi mana juchachipaj, cazuj cajpimi chashnaca crij tucunga” ninmi.

12. ¿Huarmica pai imata yuyashcata cusaman ni tucunchu?

¹² Huaquinpica huarmica mana paipaj cusa yuyashca shinachu yuyan. Cusacuna Jesusta catijpi o mana catijpipish, huarmica pai yuyashcata alli shimicunahuan parlashpami cusata respetashcata ricuchin. Huarmipish alli yuyaicunatami ni tucun. Chaimantami cusa uyajpica tucui familia cushicun. Bibliapi yachachishca shinaca, Sara huarmica pai yuyashcatami paipaj cusa Abrahamman parlarca. Abrahamca mana uyasha nircachu. Chaimantami Diosca ‘cambaj huarmi nishcata rurailla’ nirca (Génesis 21:9-12-ta rezai). Shinapish cusacuna imata ruranata agllashpa Biblia mandashcata mana pꞌaquijpica, huarmica cusata cazunami can. Cusa agllashcatami paipish rurana can (Hechos 5:29; Efesios 5:24).

13. a) ¿Tito 2:4, 5-pi yachachishca shinaca huarmica imatataj rurana can? b) ¿Chꞌicanyarinamanta, divorciarinamantapish Bibliaca imatataj yachachin?

¹³ Familia alli causachunca huarmimi achcata ayudana can. Bibliapica, huarmicunaca “cusacunata, huahuacunata cꞌuyaj, alli yuyaiyuj, mapa yuyai illaj, paicunapaj huasipi allicunata ruraj, alli shungu, paicunapaj cusacunatapish cazuj” cachun ninmi (Tito 2:4, 5). Chashna huarmita, chashna mamataca tucui familiami cꞌuyan (Proverbios 31:10, 28-ta rezai). Shinapish cusa huarmicunaca juchayujmi can. Chaimantami huaquinpi jatun llaquicuna ricurijpica chꞌicanyarincuna, divorciarincunapish. Cusa huarmi chꞌicanyarichunca Bibliaca saquinmi. Shinapish mana yangamanta chꞌicanyarinachu can. 1 Corintios 7:10, 11-pica: ‘Huarmica cusata ama shitachun, cusapish huarmita ama shitachun’ ninmi. Ashtahuanpish Bibliaca cusa o huarmi huainayajllapimi divorciarichun saquin (Mateo 19:9).

¿YAYA MAMACUNACA IMATATAJ RURANA CAN?

14. a) ¿Jesusca imatataj yaya mamacunaman yachachirca? b) ¿Yaya mamacunaca imatataj huahuacunaman cuna can?

¹⁴ Jesusca huahuacunata cꞌuyana cashcatami yaya mamacunaman yachachirca. Shuj punllaca huahuacuna Jesuspajman ama shamuchunmi huaquincunaca jarcacurca. Chaimi Jesusca: “Huahuacuna ñucapajman shamuchun saquichij, ama jarcaichijchu” nirca. Chai qꞌuipaca, “huahuacunata marcashpami, paicunapaj jahuapi maquita churashpa Taita Dios allicunata cuchun” nirca (Marcos 10:13-16). Jesusca huahuacunahuan cangapajmi tiempota surcurca. Yaya mamacuna ¿manachu cancunapish chashnallataj rurana canguichij? Mana asha tiempollatachu huahuacunahuan cana. Huahuacunaca achca tiempota paicunahuan cachunmi minishtin. Punllanta yachachingapajmi paicunahuan cana. Chaitami Jehová Diosca yaya mamacunaman mandan (Deuteronomio 6:4-9-ta rezai).

15. ¿Huahuacunata cuidangapajca yaya mamacunaca imatataj rurai tucun?

¹⁵ Gentecunaca ashtahuan millaicunami tucushca. Huaquincunaca huahuacunatami violasha nin. Chaimantami yaya mamacunaca huahuacunata cuidana can. Jesusca paita catijcunataca achcatami cuidarca. Paicunataca ñuca “huahuacuna” nircami. Paita huañuchingapaj japicujpica, “ñucahuan cajcunataca richun saquichij” nishpami paita catijcunata cuidarca (Juan 13:33; 18:7-9). Yaya mama cashpaca huahuacunata Diablo ama llaquichichunmi cuidana canguichij. Shinallataj ima llaquicuna tiyashcatami huillana canguichij (1 Pedro 5:8).a Cunan punllacunapica achca mana alli ruraicuna, mapa yuyaicunami huahuacunataca Diosmanta caruyachi tucun.

16. ¿Yaya mamacunaca imatataj Jesús rurashca shina rurana can?

¹⁶ Jesús manaraj huañujpica paita catijcunaca ‘maijanshi tucuita yalli jatunca’ nishpami pꞌiñanacurcacuna. Jesusca paicunahuan pꞌiñarinapaj randica, pai rimashcahuan, pai rurashcahuanmi cꞌuyaihuan yachachirca (Lucas 22:24-27; Juan 13:3-8). Huahuacunata charishpaca ¿imatataj Jesús shina rurana cangui? Huaquinpica huahuacunaca cunachun, rimachunmi minishtin. Shinapish “allichingapajllami” chaita rurana cangui. Mana pꞌiñarishpami ayudana cangui. Imata manaraj nishpami alli yuyarina cangui. Cambaj shimicunaca mana ‘espadahuan chugrichij’ shinachu cana can (Jeremías 30:11; Proverbios 12:18). Huahuacunaca paicunata ayudangapaj rimashcatami entendina can (Efesios 6:4; Hebreos 12:9-11).

¿HUAHUACUNACA IMATATAJ RURANA CAN?

17. ¿Huahuacunaca imatataj Jesús rurashca shina rurana can?

¹⁷ ¿Jesusca imatataj huahuacunaman yachachin? Jesusca huahuacuna yaya mamata cazuna cashcatami yachachirca. Jesusca: “Ñuca Yaya yachachishcallatami rimani. Ñucaca pai munashcallatami rurani” nircami (Juan 8:28, 29). Yaya Diosta Jesús cazushca shinami huahuacunapish yaya mamata cazuna can. Bibliaca chaita rurachunmi mandan (Efesios 6:1-3-ta rezai). Jucha illaj huahua cashpapish Jesusca paita huiñachij yaya Joseta, paipaj mama Mariataca juchayujcuna cajpipish cazurcami. Chaimantami paipaj familiaca cushilla causashca canga (Lucas 2:4, 5, 51, 52).

18. a) ¿Jesusca imamantataj paipaj Yayata cazurca? b) ¿Cazuj huahuacunaca picunatataj cushichin?

¹⁸ Shinallataj ¿yaya mamata cushichingapajca huahuacunaca imatataj Jesús shina rurana can? Dios munashca shinami sinchi ricurijpipish yaya mamata cazuna can (Proverbios 1:8; 6:20). Jesusca sinchi ricurijpipish Yaya Diosta cazurcami. Paipaj Yaya mandashcata cazuna sinchi ricurijpica, Jesusca ‘cai llaquita mana apana cajpica, ñucamanta anchuchipai’ nircami. Shinapish Dios mandashcatami rurarca. Paipaj Yaya chaita rurachun munashcatami Jesusca entendirca (Lucas 22:42). Cazushpa causaj huahuacunaca yaya mamatapish, Jehová Diostapish achcatami cushichin (Proverbios 23:22-25).b

19. a) ¿Diabloca ima shinataj jovencunata pandachin? b) ¿Ima llaquipi urmajpica yaya mamacunaca ima shinataj sintirin?

¹⁹ Diabloca Jesustami pandachisha nirca. Chashnallatajmi jovencunatapish mana allita rurachun pandachisha nin (Mateo 4:1-10). Huaquinpica colegiomanta, escuelamanta compañerocunahuanmi Diabloca pandachi tucun. Chaimantami jovencunaca mana alli amigocunata mana charina can (1 Corintios 15:33, QC, 1989). Bibliapica Jacobpaj ushushi Dinamantami parlan. Dinaca Diosta mana adorajcunahuan apanacushcamantami achca llaquicunapi urmarca (Génesis 34:1, 2). Joven, ¿ima llaquipi urmajpi o huainayajpica manachu cambaj familiaca achcata llaquiringa? (Proverbios 17:21, 25.)

¿FAMILIA UCUPI CUSHILLA CAUSANGAPAJCA IMATATAJ RURANA CANCHIJ?

20. ¿Familia ucupi cushilla causangapajca imatataj cada uno rurana can?

²⁰ Biblia yachachishcata cazushpami, familia ucupi ima llaquicuna ricurijpipish cushilla causashun. Shinashpaca, cusacuna Jesús paita catijcunata cꞌuyashca shina cancunapaj huarmicunata cꞌuyaichij. Huarmicuna cancunapaj cusata cazuichij. Paimi cancunapaj uma can. Proverbios 31:10-31-pi huarmicunaman yachachishcata catichij. Yaya mamacuna cancunapaj huahuacunaman yachachichij (Proverbios 22:6). Yayacuna ‘huasipi alli mandaichij’ (1 Timoteo 3:4, 5; 5:8). Huahuacunapish yaya mamata cazuichij (Colosenses 3:20). Familia ucupica tucuicunami juchayuj can. Tucuicunami pandarin. Chaimanta ama pꞌiñarishpa caishujmanta chaishujmanta perdonahuai nishunchij.

21. a) ¿Shamuj punllacunapica ima shinataj causashun? b) ¿Familia ucupi cushilla causangapajca imatataj rurana canchij?

²¹ Bibliami familia ucupi cushilla causanata alli yachachin. Shinallataj shamuj punllacunapi sumaj paraíso Allpa tiyanatami yachachin. Chaipica Jehová Diosta servijcunallami causanga (Apocalipsis 21:3, 4). ¡Chai sumaj causaitami shuyacunchij! Shinapish cunan punllacunapica Bibliapi Dios yachachishcata cazushpami familia ucupica cushilla causashun.