Pi mana yachashcata yachashunchij

¿Pi mana yachashcata yachasha ninguichu?...a Caitaca ashalla gentecunami yachan. Bibliapica Dios imata rurasha nishcatami parlan. Callaripica ni pi mana yacharcachu. Angelcunapishmi pi mana yachashcataca yachasha nircacuna. ¿Canca pi mana yachashcata yachasha ninguichu?...

Achca huatacuna ñaupamanca Diosca punta cꞌari, punta huarmitami rurarca. ¿Picunataj carca?... Paicunaca Adán Evami carca. Diosca shuj alhaja huertata rurashpami Adán Evata chaipi causachun churarca. Edén huertata shinami Adán Evaca paicunapaj huahuacunandij, cai Allpataca sumaj paraisota rurana carca. Diosca tucuicuna huiñai huiñaita paraíso Allpapi causachunmi munarca. Shinapish ¿imamantataj mana chashna causanchij?

Adán Eva Diosta mana cazushcamantami paraíso Allpapi mana causanchij. Shinapish Diosca ñallami cai Allpataca shuj paraisota rurasha nin. Chaipica tucuicunami huiñai huiñaita cushilla causashun. ¿Diosca ima shinataj cai Allpataca shuj paraisota ruranga? Caitaca achca huatacunatami ni pi mana yacharca.

Asha ashami chaitaca yachaj chayashcanchij. Jesús cai Allpaman shamushpami pi mana yachashcataca yachachirca. Pi mana yachashcaca Diospaj Mandanami can nishpami yachachirca. Chaimantami “Cambaj mandana shamuchun” nishpa Diosta mañanchij. Diospaj Mandanami cai Allpataca shuj sumaj paraisota ruranga.

¿Paraíso Allpapi causasha ninguichu?... Paraíso Allpapica Diosta cazujcunallami causanga. Bibliapica achca gentecuna Diosta cazushpa causashcatami parlan. ¿Paicunaca picunataj carca? ¿Paicuna shina causangapajca imatataj rurana canchij? Chaitaca cai folletopimi yachashun. ¿Paicunata rijsisha ninguichu?...