Timoteoca gentecunatami ayudarca

Timoteoca huambramantami shujtajcunata ayudashpa cushicurca. Shujtaj llajtacunamanpish rishpami gentecunata ayudarca. Chaimantami cushilla causarca. ¿Paimanta ashtahuan yachasha ninguichu?...

Timoteoca Listra llajtapimi huiñarca. Paipaj mamaca Eunice, paipaj abuelaca Loida shuticunami carca. Timoteomanca uchillamantami Jehová Diosmanta yachachircacuna. Chaimantami Timoteoca uchillamantapacha gentecunaman Jehovamanta yachachisha nirca.

Timoteo ña jatun cajpica, Pabloca: “Ñucaca shujtaj llajtacunapimi huillagrini. ¿Ñucahuan risha ninguichu?” nircami. Timoteoca cushicushpami “¡ari risha ninimi!” nirca. Timoteoca gentecunata ayudasha nircami.

Timoteoca Pablohuanmi Grecia llajtapi caj Tesalónica llajtaman rirca. Chai llajtamanca achcata purishpa, barcopi rishpami chayarcacuna. Ña chayashpaca Diosmanta yachachishpami gentecunata ayudarcacuna. Shinapish huaquincunaca achcata pꞌiñarishpami paicunata llaquichisha nirca. Chaimantami Pabloca Timoteondij shujtaj llajtacunapi huillanaman rirca.

Asha quillacuna qꞌuipaca, Tesalónica llajtapi causaj huauquicuna ima shina cashcatami Pabloca yachasha nirca. Chaimantami Timoteota Tesalónica llajtaman cacharca. Chaipi causaj huaquin gentecunaca, Jesusta catijcunatami achcata llaquichishca carca. Shinapish ¡Timoteoca mana mancharcachu! Ashtahuanpish huauquicunata cꞌuyashcamantami chai llajtaman rirca. Tesalónica llajtamanta tigrashpaca cushichij huillaicunatami Pabloman huillarca. ¡Tesalónica llajta huauquicunaca Jehová Diostami servishpa caticurca!

Achca huatacunatami Timoteoca Pablohuan Jehová Diosta servirca. Chaimantami “Timoteo shinaca pi shujtaj mana tiyanchu, huauquicunata ayudachunmi cachagrini, paica Jehová Diostapish gentecunatapish achcatami cꞌuyan” nishpami Pabloca quillcarca.

¿Canca shujtajcunata cꞌuyanguichu? ¿Jehová Diosmanta shujtajcunaman yachachisha ninguichu?... Chashna rurashpaca canpish Timoteo shinami cushilla causai tucungui.