Cusandij huarmindij cushilla causangapajca Diosta mashcaichij

Jehováa Diosmi punta cꞌarita, punta huarmita cazarachirca. Bibliapi yachachishca shinaca, Taita Diosca shuj huarmita rurashpami Adanpajman apamurca. Adanca: “Caica ñuca tullumanta, ñuca aichamanta rurashcami” nishpami cushicurca (Génesis 2:​22, 23). Cunanpish Jehová Diosca cusandij huarmindij cushilla causachunmi munan.

Shuj cꞌari shuj huarmi cazarashpaca sumajtami causashun ninmi. Shinapish achcata cꞌuyanacuj cusa huarmicunapish llaquicunata charinmi (1 Corintios 7:​28). Cai folletopica Bibliamantami yachachin. Biblia yachachishcata cazushpaca cusandij huarmindijpish, familiapish cushillami causanguichij (Salmo 19:​8-​11).

1 JEHOVÁ MANDASHCATA PAJTACHI

BIBLIACA CAITAMI YACHACHIN: Cusaca familiapaj umami can (Efesios 5:​23).

Cusataca huarmita cꞌuyashpa cuidachunmi Diosca mandan (1 Pedro 3:​7). Diosca huarmitaca cusata ayudachunmi rurarca. Chaimantami huarmita cꞌuyachun, ama maipishcachun charichun mandan (Génesis 2:​18). Cusaca paipaj huarmitaca ashtahuan valishca cashcatami sintichina can (Efesios 5:​25-​29).

Huarmitaca cusata ayudashpa shungumanta respetachunmi Diosca mandan (1 Corintios 11:3; Efesios 5:​33). Cusa imata rurasha nijpica mana pꞌiñarishpami ayudana can (Colosenses 3:​18). Chashnami huarmica cusapaj ñaupajpipish, Jehová Diospaj ñaupajpipish alli ricuringa (1 Pedro 3:​1-6).

CAITA RURAI:

• Cambaj cusata o huarmitaca, imatataj ashtahuan alli rurana cani nishpa tapui. Alli uyashca qꞌuipaca imapi cambiana cashcata tucui shunguhuanmi cambiana cangui

• Shuyanata yachai. Huarmita cꞌuyanata, cusata respetanataca asha ashami yachanguichij

2 CAMBAJ CUSA O HUARMI IMA SHINA SINTIRISHCATA ENTENDI

BIBLIACA CAITAMI YACHACHIN: Cambaj cusa o cambaj huarmi ima shina sintirishcatami alli entendina cangui (Filipenses 2:​3, 4). Jehová Diosca paita servijcuna cꞌuyanacushpa causachunmi munan. Chaimantami cusa huarmica alli apanacushpa causana can (2 Timoteo 2:​24). Ima shina parlanatami alli yuyana canguichij. Bibliapica: ‘Maijancunaca imata rimashpapish, espadahuan chugrichishca shinami saquincuna. Ashtahuanpish yachaisapacunaca sumaj shimicunahuanmi jambincuna’ ninmi (Proverbios 12:​18). Jehová Diosmi paipaj espirituta cushpa cꞌuyaihuan parlachun ayudanga (Gálatas 5:​22, 23; Colosenses 4:​6).

CAITA RURAI:

• Parlanacuna cashpaca, ama pꞌiñarishpa, alli yuyashpa parlangapaj ayudahuai nishpa Diosta mañai

• Imata parlanata, ima shina parlanatapish alli yuyai

3 SHUJ SHINALLA CASHCATA YUYARICHIJ

BIBLIACA CAITAMI YACHACHIN: Cazarajcunaca “shuj aichallami” tucun (Mateo 19:​5). Shinapish huaquinpica chꞌican chꞌican yuyaitami charincuna. Chaimantami shuj yuyailla, shuj shinalla tucunata yachana canguichij (Filipenses 2:​2). Imata ruragrishpaca shuj yuyailla tucushpami rurana canguichij. ¿Shuj yuyailla tucungapajca imatataj rurana canguichij? Bibliapica: “Imata yuyarinacushcapish cunashcahuanmi alli llujshin” ninmi (Proverbios 20:18). Chaimantami imata ruragrishpaca Biblia yachachishcata catina canguichij (Proverbios 8:​32, 33).

CAITA RURAI:

• Cusandij huarmindijca mana jahua jahuallachu parlanacuna canguichij. Cada uno ima shina sintirishcatami parlanacuna canguichij

• Shujtajcunahuan imata rurangapajca cusandij huarmindij parlanacushpami imata ruranata ricuna canguichij