Abrahanca crishcatami ricuchirca

Abrahanca paipaj churi Isaactaca Jehová Diosta cꞌuyachun, pai cusha nishcacunapipish crichunmi yachachirca. Isaac ña 25 huatacunata charijpimi Diosca Abrahantaca shuj sinchi ruranata mandarca. ¿Imatashi mandarca?

Diosca Abrahantaca: “Cambaj churita, cambaj cꞌuyashca shujlla churi Isaacta pushashpa Moria allpaman ri. Paitaca rupachishca ofrendata shina shuj urcupi ñucaman cui” nircami. Abrahanca imamanta chaita rurachun mandashcata mana intindishpapish cazurcami.

Cayandij punlla utca jatarishpami Abrahanca Isaacta, paipaj ishqui sirvijcunatapish pushashpa Moria urcuman rirca. Quimsa punllatami purircacuna. Urcucuna ricuri callarijpimi Abrahanca paita sirvijcunataca, caillapi saquirichij. Ñuca churindijmi Diosman sacrificiota cushpa tigramugrinchij nirca. Paica cuchillota apashpa, yantata Isaacman apachishpami rirca. Isaacca paipaj yayataca: ‘¿Rupachina ofrendapaj ovejaca maipitajyari?’ nishpami tapurca. Chaimi Abrahanca: ‘Ñuca huahualla, Diosllatajmi cunga’ nirca.

Urcuman ña chayashpaca shuj altartami rurarcacuna. Qꞌuipaca Abrahanca Isaacpaj chaquicunata, maquicunata huatashpami altar jahuapi churarca.

Abrahán cuchillota japishpa Isaacta huañuchigrijpimi Jehovapaj angelca jahua pachamantaca: ‘¡Abrahán!, huambrataca ama imata ruraichu. Cunanmi canca Diospi feta charij runa cashcata yachani. Canca cambaj churita cunataca mana negashcanguichu’ nirca. Chaimi Abrahanca ñahuita alzashpaca shuj carnero uchilla yurapi gachucuna churarishca shayacujta ricurca. Chai carnerota japishpami paipaj churipaj randi rupachishca ofrendata shina Diosman curca.

Abrahanca imamanta Dios chaita rurachun mandashcata mana intindishpapish pai nishcatami cazurca. Chai punllamantami Diosca: ‘Abrahanca ñuca amigomi can’ nirca.

Jehová Diosca cutinmi Abrahantaca: ‘Cantami bendiciasha. Cambaj huahua huahuacunatapish ciertotajmi achcata mirachisha’ nirca. Cai shimicunaca Abrahanpaj familiamanta tucui alli gentecunata Dios bendiciagrishcatami ricuchirca.