Zarza yurapimi nina lunyacurca

Moisesca 40 huatacunatami Madián llajtapi causarca. Chaipimi cazarashpa huahuacunata charirca. Shuj punllaca Moisesca Sinaí urcu cꞌuchullapi ovejacunata michicushpami shuj jatun mancharinata ricurca. Zarza yurapimi nina lunyacurca. Pero chai yuraca mana rupacurcachu. Moisés ricunaman cꞌuchuyacujpica: “Ama ashtahuan cꞌuchuyaichu. Canca jucha illaj pambapimi shayacungui. Chaimanta cambaj chaquicunamanta sandaliacunata llujshichi” nishcami uyarirca. Jehovami shuj angelta parlachicurca.

Moisesca mancharishpami ñahuita taparirca. Chaimi Jehová Diosca: ‘Israelitacuna sufricushcatami ricushcani. Chaimantami Egiptomanta llujshichishpa alli allpaman pushasha. Cantami ñuca pueblota Egiptomanta llujshichichun agllashcani’ nirca. Chaita uyashpaca, ¿Moisesca ima shinataj sintirishcanga?

Moisesca: ‘¿Cantaca pitaj cacharca nijpica imatataj nishari?’ nishpami tapurca. Chaimi Diosca: ‘“Abrahanpaj, Isaacpaj, Jacobpaj Jehová Diosmi cancunapajman cachan” ningui’ nirca. Moisesca: ‘¿Israelitacuna mana crijpica?’ nishpami tapurca. Chaimi Diosca shuj milagrota rurashpa paita ayudanata ricuchirca. Moisestaca caspita pambaman shitachunmi mañarca. Caspita shitajpica shuj culebrami tucurca. Moisés culebrapaj chupata japijpica cutinmi caspi tucurca. Jehová Diosca: ‘Cai milagrota can rurajpimi ñuca cachashcata cringacuna’ nircami.

Moisesca: ‘Ñucaca gentecunapaj ñaupajpica mana alli rimai tucunichu’ nircami. Chaimi Diosca: ‘Ñucami cantaca rimachisha. Ashtahuanpish cambaj huauqui Aarontami canta ayudachun cachasha’ nirca. Jehová ayudanata yachashpaca Moisesca paipaj huarmita, huahuacunatapish apashpami Egiptoman tigrarca.