Pacalla ricunaman rij 12 runacuna

Israelitacunaca Sinaí urcumantaca Parán shitashca pambacunata rishpami Cadés llajtaman chayarcacuna. Chaipimi Jehová Diosca Moisestaca: “Israelitacunaman ñuca cugrishca Canaán allpata pacalla ricunaman richunca paicunapaj yayacunapaj cada familiamanta shuj pushaj runata agllashpa cachai” nirca. Moisesca 12 runacunata agllashpaca: ‘Canaanman rishpa tarpungapaj alli o mana alli allpa cashcata ricuichij. Chaipi causajcunapish sinchi o débil cajta, carpa huasicunapi o pueblocunapi causaj cashcatapish ricumugrichij’ nircami. 12 runacunaca Canaanmanmi rircacuna. Paicunapurapica Calebpish, Josuepishmi carca.

Paicunaca 40 punllacunapimi tigrarcacuna. Higocunata, granadacunata, uvacunata apashcami chayarcacuna. Paicunaca: ‘Canaanca alli allpami can. Shinapish chaipi causajcunaca sinchicunamari. Pueblocunapish jatun pircacunatami charin’ nircacunami. Pero Calebca: ‘¡Huichiyashunchij! Paicunataca macanacushpa ganashunmi’ nircami. Paipish, Josuepish Diospi confiashcamantami chashna nirca. Chaimi diez runacunaca: ‘Ama huichiyashunchijchu. Chaipi causajcunaca jatun runacunamari. Paicunapaj cꞌuchupica saltamontecuna shinallamari canchij’ nircacuna.

Israelitacunaca paicunapura desanimarishpami: ‘Shujtaj pushajta agllashpa Egiptoman tigrashunchij. ¿Canaanmanca imapajtaj rishun? Ñucanchijtaca huañuchingamari’ ninacui callarircacuna. Pero Josuepish, Calebpish: ‘Diosta cazushunchij. Paimi cuidanga. Ama manchashunchijchu’ nircacunami. Israelitacunaca chaita mana uyasha nishpami paicunataca huañuchishun nircacuna.

Chaita uyashpami Jehová Diosca Moisestaca: ‘Israelitacunapajca achca allicunatami rurashcani. Chashnapish paicunaca mana cazusha nincunachu. Chaimantami cai chaquishca pambapi 40 huatacunata causashpa huañungacuna. Paicunapaj huahuacunallami Josuehuan, Calebhuan israelitacunaman cusha nishca Allpapica causangacuna’ nirca.