Jehová Diospaj contrami tucurcacuna

Israelitacuna chaquishca pambapi cajpirajmi Coré, Datán, Abiram, shujtaj 250 runacunapish Moisespaj contra tucushpa: ‘¡Cancunamantaca ñami shaicushca canchij! ¿Imamantataj canca ñucanchijta pushaj cana canguiyari? ¿Aaronpish imamantataj sacerdotecunata mandaj cana canyari? Diosca mana cancunallahuanchu. Ñucanchijhuanpishmi’ nircacuna. Chaita uyashpami Jehová Diosca chai runacuna paipaj contra tucushcata ricurca.

Coré runatapish, paihuan cajcunatapish Moisesca: ‘Braserillocunapi inciensota apashpa Diospaj carpa huasiman caya shamunguichij. Chaipimi Dios maijanta agllashcata ricushun’ nircami.

Cayandij punllaca Corepish, 250 runacunapish Moiseshuanmi Diospaj carpa huasipi tandanacurcacuna. Chaipimi sacerdote shina inciensota rupachi callarircacuna. Chaimi Moisestapish, Aarontapish Jehová Diosca: ‘Coremanta, paihuan cajcunamantapish anchuichij’ nirca.

Moisesca Diospaj carpa huasipimi carca. Chaimanmi Coreca rishca carca. Cutin Datanpish, Abirampish, paipaj familiacunapish mana risha nishcacunachu carca. Diosca israelitacunataca: ‘Corepaj, Datanpaj, Abirampaj carpa huasi muyundijpi cajcuna anchuichij’ nircami. Israelitacunaca uyashcahuanmi anchurcacuna. Cutin Datanpish, Abirampish paicunapaj familiacunahuanmi carpa huasi cꞌuchupi saquirircacuna. Ñapish allpa pascarishpami mana cazujcunata pambarca. Shinallataj jahuamanta nina shamushpami Diospaj carpa huasipi Coretapish, 250 runacunatapish huañuchirca.

Qꞌuipaca Diosca Moisestaca: ‘Cada familiata pushajcunataca tauna caspicunata apamuchun mandai. Chai taunacunapica cada pushajpaj shuticunata escribingui. Levipaj familiapaj taunapica Aaronpaj shutita escribingui. Chaicunataca Diospaj carpa huasi ucupi churangui. Ñuca agllashca runapaj taunapica sisami huiñanga’ nircami.

Cayandij punllaca Moisesca tucui taunacunata llujshichishpaca pushajcunamanmi ricuchirca. Aaronpaj taunapimi sisacuna, pꞌucushca almendracuna huiñacushca carca. Chashnami Diosca sacerdotecunata mandaj cachunca Aaronta agllashcata ricuchirca.