Barac, Débora, Jael

Josueca Diospaj pueblotaca achca huatacunatami pusharca. Paica 110 huatacunata charishpami huañurca. Josué causacujpica israelitacunaca Diostami adorarcacuna. Pero pai huañujpica Canaanpi causajcuna shinami yanga dioscunata adorai callarircacuna. Jehová Diosca paita mana cazushcamantami Canaanta mandaj Jabín israelitacunata llaquichichun saquirca. Chaipimi israelitacunaca Diostaca ayudahuai nishpa rogarircacuna. Chaimi Diosca shuj pushajta agllarca. Paica Barac shutimi carca. Paimi israelitacuna Diosta cutin adorachun ayudagrirca.

Débora huarmica shuj profetami carca. Paica Dios ima nishcata huillangapajmi Baracta cayaj cacharca. Pai chayajpica: ‘Mandaj Jabinpaj soldadocunahuan macanacungapaj 10.000 cꞌaricunata pushashpa Cisón larca yacuman ri’. Chaipimi soldadocunata mandaj Sisaratapish huañuchingui nircami. Chaita uyashpaca Baracca: ‘Can ñucahuan rijllapimi ñucaca risha’ nircami. Chaimi Deboraca: ‘Canhuanmi risha. Pero Sisarataca mana can huañuchinguichu. Diosca shuj huarmi huañuchichunmi saquinga’ nirca.

Deboraca Barac runahuan, paipaj soldadocunahuanmi Tabor urcupi guerrapaj allichiringapaj huichiyarcacuna. Sisaraca chaita yachashcahuanmi macanacuna carrocunata, soldadocunatapish pugru pambapi tandachirca. Deboraca Baractaca: ‘Cunanmi Diosca Sisarataca cambaj maquipi entreganga’ nircami. Chaipimi Baracca paipaj 10.000 soldadocunahuan Sisarapaj soldadocunata tucuchingapaj uriyarcacuna.

Qꞌuipaca Jehová Diosca Cisón larca yacuta jundarishpa ladocunata regarishpa richunmi saquirca. Chaipimi Sisarapaj macanacuna carrocunaca lodopi pambarishpa saquirirca. Sisaraca paipaj carretamanta uriyashcahuanmi rirca. Baracca paipaj soldadocunahuanmi Sisarapaj soldadocunataca huañuchircacuna. Pero Sisaraca Jael shuti huarmipaj carpa huasipimi miticurca. Jaelca asha lecheta ubyachun cushpami cꞌatahuan taparca. Sisaraca shaicushca cashcamantami dormishca saquirirca. Chaimi Jaelca allijlla cꞌuchuyashpa carpa huasita charichina estacahuan umapi clavarca. Chashnami Sisaraca huañurca.

Qꞌuipaca Baracca Sisarata mashcashpami chayarca. Jaelca paipaj carpa huasimanta llujshishpaca: “Shamui, can mashcacushca runatami ricuchisha” nircami. Barac yaicushpaca Sísara huañushca siricujtami ricurca. Chaimi Baracpish, Deborapish contracunata huañuchichun ayudashcamanta Jehová Diosta alabashpa cantarcacuna. Chashnami israelitacunaca 40 huatacunata tranquilo causarcacuna.