Jehovami Sansonmanca fuerzata curca

Achca israelitacunami yanga dioscunata cutin adorai callarircacuna. Chaimantami Jehová Diosca filisteocuna paicunata mandachun saquirca. Shinapish huaquincunaca Manóah runa shinami Jehovata sirvicurcacuna. Manoahpaj huarmica huahuacunataca mana charircachu. Shuj punllaca Diosca shuj angeltami Manoahpaj huarmipajman cacharca. Chai angelca: ‘Shuj huahuatami charigringui. Paica israelitacunatami filisteocunapaj maquimanta quishpichinga. Nazareomi canga’ nircami. ¿Nazareocunaca picunataj carca? Diospajlla chꞌicanyachishcacunami carca. Ajchataca mana pꞌitinachu carcacuna.

Qꞌuipaca Manoahpaj churimi huacharirca. Sansón shutitami churarcacuna. Ña huiñajpica Jehová Diosca achca fuerzatami paimanca curca. ¡Maquillahuanmi shuj leonta huañuchinata pudirca! Shuj cutinca 30 filisteocunatami pailla huañuchirca. Chaimantami filisteocunaca paitaca pꞌiñashpa ima shina huañuchinata yuyarcacuna. Shuj tuta Sansón Gaza llajtapi dormicujpimi paipaj contracunaca cayandij tutamanta huañuchisha nishpa chai llajtapaj pungucunapi shuyanaman rircacuna. Pero Sansonca chaupi tutata jatarishpami chai llajtapaj pungucunata surcurca. Qꞌuipaca aparishpami Hebrón cꞌuchu shuj jatun urcu jahuaman rirca.

Filisteocunaca Sansonpaj novia Dalilahuanmi parlanacunaman rircacuna. Paicunaca: ‘Sansón imamanta achca fuerzata charishcata yachashpa ñucanchijman huillajpica canmanca achca cullquitami cushun. Paitaca prezupimi churasha ninchij’ nircacunami. Dalilaca cullquiraicullami ari nirca. Callaripica Sansonca maimanta achca fuerzata charishcataca Dalilamanca mana huillarcachu. Pero cutin cutin tapucujpillami Sansonca: ‘Ñuca ajchataca nazareo cashcamanta manataj rutuchishcanichu. Ñuca ajchata rutujpica fuerza illajmi saquirisha’ nirca. Chaita Dalilaman huillashpaca Sansonca mana allitami rurarca.

Dalilaca yachaj chayashcahuanmi filisteocunamanca: ‘Imamanta fuerzata charishcataca ñami yachani’ nirca. Dalilaca changa jahuapi dormichishpami Sansonpaj ajchata pꞌitichun cayarca. Qꞌuipaca: ‘¡Sansón, filisteocunaca canta japinaman shamucunmari!’ nishpami caparirca. Sansón rijcharishpaca fuerza illaj cashcatami cuentata curca. Chaipimi ñahuicunata surcushpa prezupi churarcacuna.

Shuj punllaca achca filisteocunami paicunapaj dios Dagonta adorana huasipi tandanacurcacuna. Paicunaca: ‘Ñucanchij diosmari Sansontaca ñucanchij maquipi churarca. Paimanta asingapaj pushamuichij’ nircacunami. Chaimi ishqui columnacunapaj chaupipi churashpa paimanta burlarircacuna. Sansonca sinchita caparishpami: ‘Jehová Dioslla, shuj cutinllahuan ñucaman fuerzata cuhuayari’ nirca. Chaipajca paipaj ajchapish ñami huiñashca carca. Chaimantami chai ishqui columnacunataca tucui fuerzahuan tꞌangarca. Chaimi chai huasi urmajpi Sansonpish tucuicunahuan huañurca.